Month: September 2020

“HUWAG ipasa-load sa LGUs ang pagbili ng palay.”

Ito ang sinabi ni Senate Pro-Tempore Sen. Ralph Recto sa pagsasabing kulang na nga ang pondo ng mga local government unit ay ipapasa pa sa kanila ang pagbili ng palay ng mga magsasaka.

“Kakaunti lang ang local governments na may surplus na pera na pwedeng ipambili ng palay. Wala nang laman ang kanilang salop ng pera. Matagal nang inubos ng covid. Hindi pwedeng ipasa-load ang problemang ito sa mga local government frontliners,” giit nito.

Paliwanag pa ni Recto, malaking gastos ang pagpapatakbo ng isolation centers maliban pa ang gastusing iniluwal ng pandemya tulad ng distance learning at ayuda sa mga nawalan ng trabaho.

Giit nito, tama ang suhestyon sa mga lokal na pamahalaan na ituloy ang pamimigay ng bigas at may pondo na gawing direkta ang pagbili nito sa mga magsasaka sa kanilang lugar.

“Subalit hindi ito ang pangunahing solusyon. Maaring isa sa maraming lunas kung paano sagipin ang bumubulusok na presyo ng palay,” aniya pa.

Malaki aniya ang tiwala nito sa Department of Agriculture (DA) at Department of Trade and Industry (DTI) na bumalangkas ng isang plano kung paano maagapan ang pagkalugi ng milyun-milyong magsasaka sa panahong kailangan nila ng kita. (NOEL ABUEL)

WALO sa bawat sampung Filipino ang takot na mahawa ng coronavirus disease base sa pag-aaral ng Social Weather Station.

Base sa inilabas na pag-aaral ng SWS, aabot sa 85 percent ng mga Pinoy  ang nagsabi na sila ay kinakabahan sa posibilidad na masalinan o mahawa sa COVID-19.

Lumabas sa survey na 63 percent ng mga Pilipinong tinanong ang nagsasabing lubha silang natatakot na mahawa habang 22 percent naman ang nagsabing nababahala o  kinakabahan.

Siyam na bahagdan naman ng mga Pinoy sa nasabing survey ang nagpahayag na hindi gaanong nababahala at anim na porsiyento naman ang hindi talaga takot na mahawa sa COVID-19.

Pinakamataas na worry rate ang Luzon na 87 percent, sunod ang Visayas sa 84 percent, Metro Manila na tinuturing na epicenter ng COVID-19 ay 83 percent at Mindanao sa 80 percent.

Base sa DOH at IATF report, karamiham sa COVID-19 cases sa bansa ay naitala sa Metro Manila, pero ang worry rate sa rehiyon na ito ay bahagyang bumaba sa 83 percent ngayong buwan kung
ikukumpara sa resulta ng survey na isinagawa noong Mayo at Hulyo na 92 percent.

Ang inilabas na latest survey result ng SWS ay isinagawa noong Setyembre 17 hanggang 20 gamit ang mobile phone at computer-assisted telephone interviewing sa 1,249 adult Filipino respondents sa buong bansa. (JESSE KABEL)

INIHAYAG ni Senador Imee Marcos na dapat nang paghandaan ng pamahalaan partikular ang Department of Education (DepEd), local government units (LGUs) at paaralan ang maayos na recycling ng basurang idudulot ng self-learning modules sa pagtatapos ng klase.

Sa pahayag, sinabi ni Marcos na magkakaroon ng problemang pangkalikasan sa pagtatapos ng klase dahil magtatambakan ang printed self-learning modules sa pagbabalik ng klase sa susunod na linggo.

“Isipin mo yung multiplier effect ng dami ng modules sa kada subject, bukod pa yung dami ng subject sa kada mag-aaral, bilang ng mga anak na mag-aaral sa kada pamilya, at dami ng mga tahanan sa kada komunidad, katapus-tapusan nito ay gabundok na basura,” diin ni Marcos.

Ayon kay Marcos, dapat mag-organisa ng sistema sa pagtatapon ng basura na mangunguna sa pag- recycle ng itinapong papel hindi lang sa urban center kundi lalo sa mga lugar na limitado ang pag- access sa online class at dedepende lang sa printed modules bilang paraan ng pag-aaral.

“Dahil biodegradable o nabubulok naman ang papel, maiging magkaroon ng plano sa pagreresiklo para mabawasan ang mga itatapong papel sa landfill o tambakan ng basura,” ani Marcos.

“Sa totoo lang, karamihan sa mga landfill ay halos tambak ng mga ginamit na papel. Sa bagong paraan ng ating edukasyon, hindi dapat maliitin ang posibleng banta nito sa kalikasan,” dagdag ni Marcos.

Binanggit din ni Marcos na matagal nang problema ng mga lokal na pamahalaan ang dumaraming landfills kaya patuloy itong sinisikap kontrolin.

Kung makakapagpahiram ang DepEd, LGU o maging mga paaralan ng mga laptop o papayagan ang installment na paraan ng pagbabayad ay maiibsan ang pasanin ng mahihirap na mag-aaral na
makasunod sa digital learning at mababawasan pa ang paggamit ng mga papel, panukala ni Marcos.

Panukala ni Marcos, ang mga nanay na kailangang huminto sa pagtatrabaho para alalayan ang mga anak sa pag-aaral ay dapat isama sa subsidiyang galing sa gobyerno at job creation programs. (ESTONG REYES)

PINAGPAPALIWANAG ng Department of Justice (DOJ) ang hepe ng Bureau of Corrections (BuCor) hinggil sa ulat ng Commission on Audit (COA) kaugnay sa pagkamatay ng ilang persons deprived of liberty (PDLs) dahil umano sa coronavirus diseases 19 (COVID-19).

Kinumpirma ni DOJ Secretary Menardo Guevarra na totoong kailangang magpaliwanag ni BuCor Director General Gerald Bantag upang malinawan ang nakasaad sa ulat ng COA na kawalan ng gamot ng BuCor ang dahilan ng pagkamatay ng mga PDL, kabilang ang siyam na kilalang bilanggo, mula Mayo hanggang Hulyo.

Isa sa mga namatay ay ang 40 taong gulang na si Jaybee Sebastian na kasama sa mga kasong isinampa laban kay Senadora Leila de Lima kaugnay sa bentahan ng ilegal na droga sa National Bilibid Prison (NBP) sa lungsod ng Muntinlupa bago maganap ang halalan noong 2016.

Nakakulong pa rin si De Lima dahil hind pa tapos ang paglilitis ng korte sa kanyang kaso.

Naging kontrobersiyal ang pagkamatay ni Sebastian at walong iba pa dahil magkakasunod silang natigok sa panahong nasa ilalim ng quarantine ang National Capital Region (NCR) dulot ng COVID-19.

Pinaulanan ng mga senador ng kritisismo si Bantag dahil sa pangyayari, ngunit pagkatapos magalit si Bantag sa mga senador abang iniinterbyu ito sa GMA 24 Oras, ay nanahimik ang mga nambatikos na senador na karamihan ay mula sa oposisyon.

Nakasaad sa ulat na dahil sa mabagal na proseso sa pagbili ng BuCor ng mga kinakailangang gamot ay namatay ang PDLs.

Nabanggit din sa sinasabing COA Report na pitong “procurement contract” na P65.53 milyong halaga ng mga gamot ang naibigay noong nakalipas na taon sa mga nanalo sa subastang isinagawa ng BuCor.

Idiniin ni Guevarra na kung mayroon mang pagkaantala sa proseso ng pagbili ng mga gamot ay dapat sanang kumilos agad ang pamunuan ng BuCor upang mabilis na magamot ang PDL.

Aniya, batid ng lahat na ang gamot ay pangalawa sa pagkain na kailangan ng tao para mabuhay, ngunit naipagkait ito sa PDLs. (NELSON S. BADILLA)

NELSON S. BADILLA

PINALALAKAS ng Office of the Solicitor General (OSG) ang mga argumento nito sa paghahain ng quo warranto sa Korte Suprema upang mapatalsik si Associate Justice (AJ) Marvic Leonen dahil sa kawalan ng “integridad.”

Kailangang makumbinsi ng tanggapan ni Solicitor General Jose Calida ang mayorya ng labing-apat na mahistrado ng mataas na korte na kailangang matanggal din si Leonen dahil sa hindi nito pagpasa ng Statements of Assets Liabilities and Networth (SALN) nang labinglimang ulit sa loob ng 21 taong pamamalagi sa University of the Philippines-College of Law, sa pamamagitan ng petisyong quo warranto.

Ang aksyon ng OSG ay nakabatay sa kahilingan ni Atty. Larry Gadon.

Ang integridad, ayon sa Konstitusyong 1987, ay isa sa mga katangiang kailangang makita sa opisyal ng pamahalaan, lalo na kung kabilang ito sa pinakamataas na puwesto sa hudikatura.

Ang pagkakaalam ng lahat ng abogado ay matatanggal lamang ang mga mahistrado ng Korte Suprema, sa pamamagitan ng impeachment na siyang nakasaad sa Saligang Batas.

Si Ma. Lourdes Sereno ay natanggal bilang punong mahistrado ng Korte Suprema noong Mayo 2018, sa pamamagitan ng quo warranto na ang naging batayan ay ang hindi niya pagpasa ng kumpletong SALN noong nagtuturo pa siya sa U.P. College of Law na bahagi na ng Philippine Jurisprudence.

Ang kasong paglabag sa Republic Act 6713, partikular ang mga probisyon tungkol sa SALN, ay ikinabit ni Calida sa Artikulo VIII at Seksyon 7 ng Konstitusyon upang madiin sa “kawalan ng integridad” ni Sereno.

Batay sa rekord na ipinasa sa mataas na korte, anim na taon (katumbas ng anim na ulit) na hindi nakapagpasa si Sereno ng kanyang SALN habang konektado pa ito sa U.P. College of Law.

Batay sa impormasyong naglabasan sa media, labinlimang taon, o labinlimang ulit, hindi nagpasa ng kanyang SALN si Leonen sa 21-taon niya sa U.P. College of Law.

Nagsimula si Leonen sa U.P. noong 1989 at natapos noong 2010.

Inaasahang sa paglabag na ito sa SALN ididiin ni SolGen Calida si Leonen kapag naihabla na ang huli sa Korte Suprema gamit ang petisyong quo warranto.

Inaasahang aktibong kikilos at makikipagtulungan si Gadon sa OSG upang magtagumpay ang quo warranto laban kay AJ Leonen kaugnay sa isyu ng integridad.