EQUAL DISTRIBUTION OF WEALTH BA KAMO?

0

HINDI na ako magtataka na marami pa ring probinsya ang mahirap dahil hindi pantay ang hatian sa budget ng national government lalo na sa mga infrastructure projects.

Lagi nating naririnig ang mga salitang “equal distribution of wealth” sa mga national government officials para raw masugpo ang kahirapan ng mamamayan sa apat na sulok ng bansa.

Sa tagal ko nang nag-cover sa budget hearing ng Kongreso, kahit minsan ay hindi ako nakakita na nagkaroon ng pantay-pantay na hatian ng resources ng ­gobyerno dahil kung sino ang mga nasa poder lang ang nakakakuha ng malaking proyekto.

Kung napapansin ninyo, ang laging binubuhusan ng malalaking proyekto ay yung mga mauunlad na lungsod samantalang yung mga nasa malalayong lalawigan ay limitado ang proyektong ibinabato sa kanila ng national government.

Paasenso ng paasenso ang mga lungsod at mayayamang probinsya dahil bilyon-bilyong ang nakukuha nilang proyekto tapos magtataka tayo kung bakit hindi umaasenso ang mas maraming lalawigan?

Sa laki nga ng budget na nakukuha ng mga mayayamang lungsod at probinsya, wala ng silang paglalagyan kaya nagbabakbak na lang sila ng mga maayos na kalsada para may paggastusan samantalang maraming kalsada sa mga malalayong probinsya ang hindi pa nakakatikim ng konkretong daan.

Walang ipinagkaiba sa isang pamilya na mas mayaman ang anak na pinamanahan ng mas malaki kesa run sa isa pang anak na barya lang ang ipinama sa kanya ng kanilang magulang.

Tapos sasabihin ng magulang na pantay-pantay lang ang pagtingin sa kanilang mga anak. Ganyan ang gobyerno.

Laging sinasabing equal distritubion of wealth pero hanggang sa salita lang.

Kung gusto talaga ng ­gobyerno na huwag ng umalis sa kanilang probinsya ang mga tao at makipagsiksikan sa mga mauunlad na lungsod buhusan sila ng pondo, gumawa ng trabaho para sa kanila pero hindi yan mangyayari kung hindi pantay-pantay ang hatian ng resources.

Pero isa sa mga sinisi ko dito ay yung mga Kongresista na hindi ipinaglalaban ang kanilang distrito at constituents pagdating sa hatian ng resources ng national government.

Umaabot sa 250 ang Congressional district sa buong bansa at iilan lang dyan ang nakakakuha ng malaking proyekto.

Bilyong ­bilyon ang halaga ng inuuwi ng iilang Congressmen na projects sa kaniyang distrito samantalang masuwerte na ang karamihan kung aabot sa P100 Million ang nakukuha nila.

Napansin ko, kung sino ang mga nasa posisyon ang karaniwang nakakakuha ng malalaking proyekto.

Kung sino ang maiingay at epal sa Kongreso yun ang mga humahakot ng bilyong-bilyong halaga ng proyekto.

Yung mga tinatawag namin sa Kongreso na silent majority o yung mayorya na tahimik at hindi ­nakikisali sa mga deliberasyon ng kahit anong panukalang ­tinatalakay sa kapulungan, ay laging mumo ang kanilang natatanggap.

Tinatawag namin silang silent majority dahil napakarami nila at hindi mo sila nakikitang nagsasalita kahit sa committee hearing man lang at pagdating sa session hall ay nagpapacheck lang sila ng attendance.

Eto yung mga hindi ­nakikipaglaban para sa kanilang mga constituents na naglagay sa kanila sa Kongreso kaya limitado ang naiuuwi nilang proyekto sa kanilang distrito samantalang yung mga maiingay at epal ay sobra-sobra ang nakukuha.

Read More

KALIGTASAN SA COVID-19 NAKASALALAY SA TAUMBAYAN

0

NABABAHALA tayo sa ating nakikita na sobrang dami na ng taong lumalabas ngayon ng kanilang tahanan.

Bakit kamo? Kasi simula na namang magkabuhol-buhol ang mga sasakyan sa lansangan sa dami ng mga tao.

Katunayan ito na balewala na sa mga Pinoy ang pandemic ng COVID-19 na hanggang ngayon ay patuloy na nanghahawa at maraming namamatay.

Nakikita natin sa mga tiangge ang dami ng mga namimili na hindi na nasusunod ang physical distancing at iba pang health protocol.

Resulta nyan sa sunod na taon (2021) posibleng biglang lobo ang may COVID-19 sa Pinas.

Sabi ni Sec. Carlito Galvez na siyang hinirang na ‘vaccine czar’ baka sa kalagitnaan pa ng 2021 tayo magkaroon ng bakuna mula sa mga bansang gumagawa nito.

Siyempre bago tayo mapagbentahan ng Amerika, China at iba pang bansa sa Europa na gumagawa ng bakuna ay uunahin muna nila ang kanilang mga kababayan na turukan ng bakuna.

Pero mismong si Sec. Galvez ay hindi nakakasiguro na sa kalagitnaan ng 2021 ay makabibili na ang Pilipinas ng bakuna.

Pag minalas-malas tayo, baka sa taong 2022 pa tayo magkaroon ng bakuna sa COVID-19.

Bagamat hindi tayo eksperto pagdating sa mga sakit na nakahahawa ay nangangamba tayo at nag-aalala na baka sa sunod na taon ay biglang dumami ang kaso ng COVID-19 sa bansa.

Sobrang nakababahala ang walang pakundangan pagdami ng mga tao sa lansangan na nagiging dahilan din ng matinding masikip na daloy ng mga sasakyan.

Araw-araw na namang trapik sa kahabaan ng EDSA hanggang papalabas ng North Expressway sa may Balintawak area.

Ganun din sa may kahabaan ng Commonwealth partikular sa may area ng Fairview. Grabe na rin ang trapik sa Mindanao Avenue hanggang sa may kanto ng Quirino Highway.

Nagkalat na rin ang mga katutubo na sumasampa sa mga pampasaherong sasakyan sa ibat-ibang mga lansangan na nangangaroling sa mga pasahero.

Sa may Susano Road sa Novaliches, Quezon City, simula nang pagpasok ng huling Linggo ng Oktubre hanggang sa kasalukuyan ay dumami ang mga batang sumasampa sa mga dyip na nangangaroling gamit ang kanilang daladalang lata na ginawang mga tambol.

Kadalasan pa sa kanila ay walang mga face mask na suot na kinokonsinte rin ng kanilang mga magulang na kasama.

Dapat makiisa ang Local ­Government Units (LGUs) sa ­paghuli sa mga batang ito at kanilang mga magulang na namamasko sa mga pampublikong sasakyan.

Maging ang mga barangay officials at mga pulis ay dapat ding kumilos para hulihin ang mga batang ito at kanilang mga magulang.

Kailangan natin magkaisa para sa ikabubuti nating lahat at maiwasan ang mabilis na pagkalat ng virus na pumapatay ng mga tao sa buong mundo.

Hindi ordinaryo ang panahon na basta-basta na lamang tayo lalabas para lang ipagdiwang ang kapaskuhan.

Hindi dapat tayo maging kampante at ‘wag natin balewalain ang COVID-19 dahil mabilis itong nakahahawa.

Hindi lang dapat makuntento sa paalala ang gawin ng mga opisyal ng pamahalaan sa mga pasaway kundi talagang ipatupad ng mahigpit ang mga health protocol.

Hindi lang kalusugan nila ang nakasalalay dito kundi maging ang mga nakararaming mamamayan na pwede nilang mahawahan.

Siyempre pag-uwi ng mga yan sa kani-kanilang mga lalawigan at sa kanilang mga pamilya ay sila ang magdadala ng virus.

Nakita natin na karamihan na tumataas na kaso ng COVID-19 ay nasa mga lalawigan na. Kabilang na dito ang Davao, CALABARZON at iba pa.

Kahit na wala pang mga sasakyang pampubliko papunta sa mga lalawigan mula sa National Capital Region (NCR) ay may nakalulusot namang pribadong sasakyan na ginagamit pampasahero.

Kaya ayon patuloy ang pagtaas ng kaso ng COVID-19 sa mga lalawigan.

Kailangan tumulong ang mga tao sa gobyerno kung papaano mapabagal ang pagkalat ng virus na dala ng COVID-19.

Kung hindi ay marami sa atin ang malalagay sa panganib sa COVID-19.

Ang COVID-19 ay problema ng buong mundo kaya lahat ng bansa ay nangangailangan ng bakuna. Kaya nga ngayon ay unahan na sa pagbili nito. Suwerte kung sa susunod na taon ay agad tayong mapagbebentahan, papaano kung hindi pa? Nganga tayo!

oOo

Para sa suhestiyon at reaksyong mag-email joel2amongo@yahoo.com at operarioj45@gmail.com.

Read More

VELASCO TAHIMIK SA GULO NG ‘KANYANG’ MAYORYA

0

NAGDUDUDA na ako sa katahimikan ni Speaker Lord Allan Jay Velasco hinggil sa nangyayaring kaguluhan sa ‘kanyang’ ­mayorya na nagluklok sa kanya sa pinakamataas na posisyon sa Kamara de Representantes kapalit ni Taguig – Pateros ­Representative Alan Peter ­Cayetano.

Nababasa ko ang mga i­storyang lumalabas dito sa SAKSI Ngayon tungkol sa sunud-sunod na pagtanggal sa posisyon ng pangkat ni Velasco sa mga kaalyado at tagasuporta ni Cayetano.

Ipinalit ng pangkat ang mga sumuporta kay Velasco tulad nina Cagayan de Oro City Rep. Rufus Rodriguez, Buhay party-list Rep. Jose “Lito” Atienza at Las Piñas Rep. Camille Villar bilang deputy speakers.

Ipinalit sila sa mga kaalyado ni Cayetano na sina Capiz Rep. Fredenil Castro, Laguna Rep. Dan Fernandez at Batangas Rep. Raneo Abu.

Tinanggihan ni Villar ang alok ni Velasco na mukhang ang malinaw na mensahe ni Villar ay ayaw niyang dumikit nang husto sa magulo at walang solidong pagkakaisa sa mayorya ni Velasco.

Ang gulo, o ang binansagang “silent war” sa mayorya ni Velasco ay hindi inimbento ng media.

Nabunyag ang warat na ­mayorya sa mismong pagdiriwang ng kaarawan ni Velasco noong ­Nobyembre 10.

Tinalakay ko na ito rito sa Badilla Ngayon noong Nobyembre 24.

Nakakapagtaka namang hindi nagpaliwanag si Velasco, samantalang noong kasagsagan ng kanyang pakikipaglaban para makuha ang posisyon ng pagiging speaker mula kay Cayetano ay madalas siyang magbigay ng pahayag sa media.

Sa totoo lang, napakahalaga na ipaliwanag ni Velasco sa ­publiko kung bakit niya inilagay ang anak ni Pangulong Rodrigo Duterte na si Davao City Representative Paolo Duterte sa Accounts Committee, samantalang hindi naman ito bumoto sa kanya sa pagiging speaker.

Ang isyu tungkol sa pagkakaroon ng napakagandang posisyon ni Rep. Duterte ay siyang tinumbok ni AAMBIS-OWA party-list Rep. Sharon Garin laban sa bagitong kongresista.

Napikon si Duterte sa tabas ng dila ni Garin, kaya nagkagulo.

Ang isa sa mga umawat ay si Maguindanao Rep. Esmmael “Toto” Mangudadatu.

Bumoto si Garin kay Velasco, ngunit hindi ito naging chairperson ng Ways and Means Committee.

Hindi itinanggi ni Duterte ang banggaan nila ni Garin.

Sa halip, inihayag niya sa viber group ng mga kongresista kinabukasan (Nobyembre 11) na “lalayo”, o “didistansya” siya sa mayorya.

Sinabi rin ni Duterte na “maraming Salamat po sa opportunity, trabaho lang po walang personalan. Sorry to say but I have to distance myself na po pati sa ruling majority ng HOR (House of Representatives), pinahiya at naquestion na po loyalty ko. Sa bunganga po ni Cong. Mangudadatu at Congw. Sharon Garin mababalitaan n’yo po ‘yan mamaya agad. So, pinili ko na po to properly habang may mukha pa akong maharap sa inyo wait and see na lang po Monday”.

Inamin din niya na nagkaroon ng gulo sa pagdiriwang ng kaarawan ni Velasco, ngunit ­humingi na siya ng tawad sa bagong speaker.

Mahalaga ang pahayag ni Garin kay Duterte dahil ang punto ay “loyalty” ang pinag-uusapan, o ang pagiging totoong kakampi, ni Duterte kay Velasco.

Si Duterte ay hindi bumoto kay Velasco nang magkaroon ng halalan para sa pagiging speaker dahil ang katwiran ng bagitong kongresista ay malapit na kaibigan niya sina Velasco at dating Speaker Cayetano.

Ngunit, kahit iyan ang tindig ni Duterte ay naging pinuno ito ng Accounts Committee.

Ang kontrobersiyal pa sa desisyon ni Velasco ay isa sa mga unang binigyan ng posisyon si Duterte kaysa ang mga tunay na aktibo, kumilos at inilaban ang kanyang ambisyong maging speaker ng Kamara.

Kaya, hindi ako magtataka kung diretsahang tirada ni Garin kay Duterte.

Ang impormasyong galing sa Kamara ay pinangakuan ni Velasco ang mga kakamping mambabatas na bibigyan ng posisyon kapag nakuha niya ang trono mula kay Cayetano.

Isa si Garin sa pinangukuan, ngunit hindi naibigay sa kanya ang chairmanship ng Ways and Means Committee dahil hawak ito ni Albay Rep. Joey Salceda.

Ayon sa impormasyong nakuha ko, gagawin sanang deputy speaker si Garin, ngunit tinanggihan niya ito dahil higit na makapangyarihan ang Ways and Means Committee.

Hindi kaya ang dahilan ng pananahimik ni Speaker Veasco ay dahil nagpopokus siya sa pagtitiyak na siya pa rin ang speaker ng Kamara de Representantes?

Read More

Luho sa gitna ng bagsak na ekonomiya, sumingaw AJ LEONEN UMALMA SA P5-M SC COTTAGE RENOVATION

0

NELSON S. BADILLA

HINDI nagustuhan ni Associate Justice Marvic Leonen ang lumabas na balitang siya mismo ang humiling sa Korte Suprema na magkaroon ng halos P5 milyong halaga ng “renobasyon” ang vacation house na itinalaga sa kanya sa Baguio City.

Idiniin ni Leonen sa kanyang press statement na inilabas sa media na hindi siya ang personal na humiling sa en banc (buo) ng mataas na korte na maglabas at gumastos ito ng P4,970,623.71 upang baguhin ang vacation house na ipagagamit sa kanya at kanyang mga empleyado.

Banggit ni Leonen sa kanyang press release na inilabas nitong Nobyembre 26: “My chambers never endorsed the P5-million proposal to renovate Cottage G in Baguio City. The proposal was drafted by the Supreme Court’s Maintenance Division and, without having gone through my office, was placed in the Court’s En Banc agenda. Upon learning of this, I immediately wrote a letter requesting that the matter be withdrawn, and it was promptly deleted”.

Ayon sa balita, sumulat si Leonen kay Chief Justice Diosdado Peralta noong Nobyembre 23, isang araw bago talakayin ng en banc Supreme Court ang limang milyong Cottage G, na huwag munang magdesisyon ang mga mahistrado tungkol sa isyu dahil gusto niyang ‘rebyuhin’ at ‘pag-aralan’ ang itsura ng gagawing renobasyon, mga gagamiting materyales at gastos.

Sumang-ayon si Peralta na huwag nang talakayin ang Cottage G.

Nabunyag sa media ang maluhong pagpapabago ng bakasyunan ni Leonen habang negatibo ang antas ng gross domestic product (GDP) ng bansa mula sa ikalawang kwarter ng taon.

Ayon sa impormasyong inilabas sa Senado, mahigit 10 milyon ang mga manggagawang nawalan ng trabaho dulot ng COVID-19, mahigit tatlong milyong Pilipino ang nagugutom at libu-libong mga negosyante sa sektor ng Micro, Small and Medium Enterprises (SMEs) ang nalulugi.

Nabatid na Oktubre 17 sumulat ang tanggapan ni Leonen, sa pamamagitan ng kanyang judicial staff head na si Atty. Jeanne Carla T. Ferrer-Becina,
kay Deputy Clerk of Court Ma. Carina Cunanan, hepe ng Administrative Services ng Korte Suprema, tungkol sa P5 milyong halaga ng renobasyon sa Cottage G.

Mayroong bakasyunan ang Korte Suprema sa lungsod ng Baguio kung saan nag-uusap, nagtatalakayan at nagpapasya ng mga kaso at iba pang importanteng usapin ang mga mahistrado tuwing bakasyon.

Ang Cottage G ay nakadestino kay dating Senior Associate Justice Antonio Carpio.

Tatlong palapag ang kontrobersiyal na bakasyunan.

Mayroon itong tatlong living areas, basement, anim na kuwarto at masster bedroom na may kasamang study room, apat na banyo, lang lanai at halamanan.

Ang gagastusin sa pagbabagong gagawin sa basement pa lamang ay aabutin na sa P1,888,983.20.

Maligan sa iba pang detalyeng popondohan ng mataas na korte ay aabot sa P3,859,179 ang kabuuang direktang perang gagastusin, samantalang P578,876 ang tinatawag a “contingency funds” at mayroon pang babayarang P532,566 na value added tax (VAT) sa Bureau of Internal Revenue (BIR).

Noong Nobyembre 18, sumulat si Cunanan sa Clerk of Court ng mataas na korte na si Atty. Edgar Aricheta hinggil sa kahilingan ni Leonen.

Malinaw na binanggit ni Cunanan sa liham na si Atty. Becina ang nagparating ng kahilingang baguhin ang Cottage G ni Leonen.

Ang liham na ito ay kongkretong katibayang nanggaling kay Leonen ang kahilingang baguhin ang kanyang bahay – bakasyunan sa Baguio City, taliwas sa kanyang pahayag na hindi siya ang humiling.

Read More

Hindi makatwiran ngayong pandemya SOLON KAY LEONEN: HUWAG MALUHO

0

(BERNARD TAGUINOD)

HINDI makatuwiran ang paggastos ng lahat ng opisyales ng tatlong sangay ng gobyerno kasama na ang Korte Suprema para sa kanilang luho sa panahon ng pandemya kung saan halos lahat ng mamamayan ay naghihikahos.

Ito ang pahayag ng isang administration congressman matapos makarating sa kanyang kaalaman na nag-request ang tanggapan ni Supreme Court (SC) Associate Justice Marvic Leonen ng P5 milyon para sa renovation ng kanyang cottage sa SC Compound sa Baguio City.

Sa kondisyong huwag siyang pangalanan, sinabi ng mambabatas na hindi dapat aprubahan ang request ni Leonen na pondohan ang renovation sa cottage sa Baguio City bilang pakikiisa sa mamamayan na hindi alam kung saan kukunin ang kanilang pang-araw-araw na pangangailangan dahil sa pandemya.

“Palagay ko, huwag tayong maging maluho. Marami ang nagugutom tapos luho ang inuuna natin,” komento ng mambabatas.

Base sa mga dokumento, nag-request ang tanggapan ni Leonen ng halos P5 million noong Hulyo 17, 2020 para sa renovation ng cottage ni dating Associate Justice Antonio T. Carpio sa SC Compound sa Baguio City.

Kabilang sa paggagastusan ng hinihinging halaga ay landscaping sa paligid ng cottage na ayon sa mambabatas ay hindi makatuwiran dahil marami ang nagugutom dahil sa pandemya.

“Alam kong may separation of power. Puwede nilang gastusin ang kanilang pondo kung saan nila gusto pero sa panahong ito, baka hindi makatuwiran na unahin ang luho,” ayon pa sa mambabatas.

Mas makabubuti aniya kung gamitin muna ang pondo para tulungan ang mga taong nawalan ng hanapbuhay dahil sa pandemya na hanggang ngayon ay nararanasan sa bansa.

Read More

Lorenzana sa pagkamatay ng anak ni Cullamat KASALANAN NI JOMA SISON

0

ITO ang naging pahayag kahapon ng Department of National Defense at Armed Forces of the Philippines kaugnay sa pagkasawi ng anak ni Bayan Muna Congresswoman Eufemia Campos Cullamat sa sagupaan ng militar at grupo ng New People’s Army sa Surigao del Sur kamakalawa.

Isinisisi rin ng militar ang pagkamatay ng 22-anyos na si Jevilyn Cullamat sa hanay ng CPP-NPA sa pangunguna ni Jose Maria Sison na sa tingin nila ay walang pakialam sa mga namamatay na estudyante at dating estudyante na sumasama sa NPA.

“Ang tingin ko e parang they do not care if these people dies for as long they can pursue their so called armed struggle,”ani Defesne Secretary Delfin Lorenzana.

“Ako ay nakikiramay sa pamilya ni Congresswoman Cullamat sa pagkamatay ng kanyang anak ano, kaya nga siguro, ako’y nananawagan sa grupo ng CPP-NPA na itigil na natin itong himagsikan na to para matigil na rin yung patayan,” ani Lorenzana.

“Dahil kung patuloy sila sa kanilang tinatawag na sandatahang himagsikan or armed struggle ay walang katapusan itong kamatayan ng mga kabataan lalong-lalo na yung mga nagogoyo nila na sumali sa samahan ng NPA kaya ako’y nakikiusap, nananawagan na itigil na natin ito at tayo’y magkaisa para sa ating bayan,” panawagan pa ng kalihim.

“This senseless killing of and by fellow Filipinos—espoused and propagated by CTG leaders like Jose Maria Sison living luxuriously in some foreign land— should come to an end,” ito naman ang pahayag ng Armed Forces of the Philippines.

Ayon kay Marine Major General Edgard Arevalo, commander, AFP Education, Training and Doctrine Command and AFP Spokesperson, “ipinagdarasal na lamang namin ang maraming buhay ng mga kabataan na sinayang dahil sa kasinungalingan at panlilinlang ni Joma Sison.”

Kaugnay nito, nagpahatid ng pakikiramay ang AFP kay Cullamat at sa pamilya nito sa pagkawala ng kanilang anak na si Jevilyn na nagsisilbi umanong medical officer ng CPP-NPA.

Napatay si Jevilyn nang makasagupa ng tropa ng Philippine Army 3rd Special Forces “Arrowhead” Battalion (3SFBn) ang pangkat ng NPA sa Barangay San Isidro, bayan ng Marihatag, Surigao del Sur.

 

MAKABAYAN
BLOC, TAKSIL – AÑO

Samantala, kataksilan sa tiwala ng mamamayan ang tahasang pagtanggi ng mga kongresistang kabilang sa Makabayan Bloc na batikusin at kondenahin ang pagpatay ng New People’s Army (NPA) sa 40,000 sundalo, pulis at sibilyan.

Maliban diyan, ininsulto ng mga kaliwang kongresista ang 40,000 mamamayang Pillipino na pinatay ng NPA mula noong 1969, ratsada ni Interior and Local Government Secretary Eduardo Año.

Ang NPA na armadong yunit ng Communist Party of the Philippines (CPP) ay itinatag noong Marso 29, 1969.

Ang unang pinuno nito ay si Bernabe Buscayno, alyas “Kumander Dante”, na matagal nang ‘nagretiro’ sa armadong pakikibaka.

Ani Año: “If you cannot even condemn the perpetrators of these horrendous crimes against the people in your capacity as elected public officials, there is definitely something wrong. The refusal of the Makabayan Bloc to condemn and distance itself from the CPP-NPA-NDFP and their crimes is clear and indisputable betrayal of public trust”.

Ang birada ng kalihim ng DILG ay reaksyon sa pagmamatigas ng Makabayan bloc na batikusin at kondinahin ang CPP-NPA-NDFP.

Ayaw ring dumistansya ng mga kongresistang kaliwa sa pakikibaka ng nasabing mga pangkat.

Naninindigan ang mga kongresista ng Makabayan bloc na hindi sila kaanib sa CPP-NPA-NDFP.

 

ITINULAK SA NPA

Ang estado mismo ang nagtulak sa anak ni Bayan Muna party-list Rep. Eufemia Cullamat na si Jevilyn, 23, na sumapi sa armadong pakikibaka ng New People’s Army (NPA).

Ito naman ang pahayag ng Makabayan bloc sa Kamara matapos hindi anila mabigyan ng katarungan ang pagpaslang ng paramilitary sa kanilang mga lider noong Setyembre 1, 2015.

“Ang desisyon niyang lumahok sa armadong pakikibaka ay hindi simpleng bagay at bunga na rin ng pang-aabusong dinanas naming mga Lumad at ang matinding kahirapan na nasaksihan niya,” ani Cullamat.

Nakita aniya ng kanyang anak kung paano pinaslang ng mga paramilitary ang kanilang mga lider na sina Dionel Campos, Datu Bello Sinzo, at Executive Director ng ALCADEV na si Emerito Samarca.

Hindi aniya binigyan ng hustisya ng estado ang pagpaslang sa mga nabanggit na lider ng mga Katutubo sa Mindanao bagkus ay ininsulto umano ang mga ito dahil ang mga salarin ay malaya pa rinng nakagagala sa Surigao.

Wala namang ideya si Bayan Muna party-list Rep. Carlos Zarate kung kailan sumama si Jevilyn sa armadong pakikibaka subalit naniniwala ito na ang nasaksihang krimen ng paramilitary sa kanilang grupo ang posibleng nagtulak sa kanya na sumama sa NPA.

 

HINDI TROPHY

Kinondena rin nina Cullamat at Zarate ang Armed Forces of the Philippines (AFP) dahil sa umano’y pambababoy ng mga ito sa bangkay ni Jevilyn na mistulang ginawang trophy ng mga sundalo.

“Hindi siya bagay, hindi siya isang tropeo na ipaparada para lamang sa propaganda ng militar. Hindi niyo na ginalang ang patay, binabastos pa ninyo ang nagluluksa naming pamilya,” ani Cullamat.

Ginawa ng mambabatas ang pahayag matapos magpa-picture umano ang mga sundalo na nakapatay kay Jevilyn sa bangkay nito kasama ang mga armas na nakumpiska matapos ang bakbakan sa Marihatag, Surigao del Sur.

“The military blatantly violated International Humanitarian Law (IHL) by desecrating the remains of Jevilyn, circulating photos of her obviously artificially posed body as though she were still carrying a rifle, and with troops displaying her corpse alongside captured paraphernalia,” ayon naman kay Zarate sa virtual press conference kahapon.

Dahil dito, hiniling ng mambabatas na burahin ang mga larawan na kumakalat sa social media at maging sa mga government website.

Naniniwala si Zarate na hindi matatapos ang armadong pakikibaka sa Pilipinas hangga’t hindi inuugat ng gobyerno ang dahilan kung bakit maraming Pilipino ang sumama sa NPA. (JESSE KABEL/NELSON S. BADILLA/BERNARD TAGUINOD)

Read More

Kampanya natabunan ng COVID-19 KASO NG HIV SA PINAS SASARGO – DEFENSOR

0

NAGBABALA si Anakalusugan party-list Rep. Mike Defensor na posibleng sumargo pa ang bilang ng mga biktima ng human immunodeficiency virus (HIV) sa bansa matapos maudlot ang kampanya laban dito dahil sa pandemya sa COVID-19.

Ginawa ng mambabatas ang nasabing babala habang naghahanda ang buong mundo para sa paggunita sa World AIDS Day na isang kampanya para makontrol ang HIV-AID sa buong mundo.

“Our fight against AIDS has been set back by the COVID-19 crisis, leaving thousands of Filipinos living with HIV undiagnosed and untreated,” pahayag ni Defensor, vice chairman ng House health committee.

Base aniya sa National AIDS Registry statistics, nakapagtala lamang ng 934 bagong HIV case sa bansa mula Abril hanggang Hunyo 2020 na mas mababa ng 68% sa 2,938 na naitala sa kaparehong panahon noong 2019.

Mula Enero hanggang September ngayong taon aniya ay 5,627 ang bagong HIV cases na naitala o mas mababa ng 42% mula sa 9,749 sa kaparehong panahon noong 2019.

“There is only one reason for the big drop in newly reported HIV cases – fewer Filipinos who may be living with HIV are actually getting tested,” ayon sa mambabatas.

Bagama’t malaki ang ibinaba ng kaso ay nangangamba si Defensor na nangangahulugan ito na maraming Pilipino na may HIV ang hindi nakapagpa-check-up sa panahon ng pandemya sa COVID-19 na posibleng nakapanghawa pa dahil hindi nila alam na positibo sila sa nasabing sakit.

“Thus, we may have a larger number of undiagnosed and untreated individuals out there contributing to the spread of HIV, mainly through sexual contact, without them knowing it,” dagdag pa nito.

Bukod dito, bumaba rin aniya sa 57% ang sumasailalim sa antiretroviral therapy (ART) hanggang Setyembre ng taong ito dahil umaabot lamang sa 45,981 mula sa 80,434 HIV patients sa bansa habang 4,196 ang naiulat na namatay dahil sa nasabing sakit na wala pang natutuklasang gamot. (BERNARD TAGUINOD)

Read More

Paglobo ng kaso ng COVID-19 binubusisi ng QC-CESU LATE REPORTING NG KAMARA BINIRA

0

SINITA ng Quezon City Epidemiology and Surveillance Unit (CESU) ang House of Representatives sa late reporting nito sa kanilang covid cases na maaaring naging dahilan ng biglang paglobo ng kaso na umabot na sa mahigit 40 cases.

Ayon kay QC-CESU Director Dr. Rolly Cruz, nasa 40 ang confirmed cases na kanilang naitala sa mababang kapulungan subalit kanilang bineberipika ang ulat na may mga hindi na-report.

Ito ay dahil nasa 96 na umano ang kabuuang bilang ng positive cases sa Kamara sa nakalipas na 10 araw.

Dahil dito, maaaring may mga kasong hindi naiuulat at hindi agad nagagawan ng contact tracing.

Ipinaliwanag ni Cruz na kahit pa man asymptomatic ang pasyente basta nakumpirma itong positive sa test ay dapat ipagbigay-alam agad sa kinauukulan.

“Dapat kasi everytime na may new case dapat nire-report agad sa LGU para sa contact tracing,” paliwanag ni Cruz kung saan sa kaso ng Kamara ay kinailangan pa nilang hingan ito ng report.

Nang hingan ng reaksyon sa lapses ng Kamara, sinabi ni House Secretary-General Dong Mendoza na nakipag-ugnayan na sila sa QC-CESU, tumanggi rin itong kumpirmahin na tumaas ang kaso ng covid sa mababang kapulungan bagamat nagsasagawa na umano ngayon ng mass testing sa mga mambabatas, kawani at maging sa mga bumibisita sa tanggapan.

“We already spoke with the QC govt with regards to this matter. We will release the results to DOH and CESU once the lab results are available already,” paliwanag ni Mendoza.

Hindi naman tinukoy ni Mendoza kung rapid test o swab test ang kanilang gagawin subalit para sa mga kawani ay mainam na swab test ang isagawa upang mas konkreto ang maging resulta.

Una nang inalarma ng QC-CESU ang Kamara matapos itong makatanggap ng mahigit 40 kaso ng covid na ang inilagay kung saan nila nakuha ang virus ay sa lugar na pinagtatrabahuhan sa mababang kapulungan. Nabatid na ang tinamaan ng covid ay pawang naninirahan lamang sa mga kalapit na barangay sa Batasan Complex.

Sinabi ni Cruz na pagbabatayan nila ang covid cases report na isusumite ng Kamara sa kanilang gagawing imbestigasyon pangunahin na rito kung bakit nagkaroon ng hawahan at kung may pagtaas ng kaso na maaaring pumasok sa kategorya ng outbreak na magiging dahilan para pansamantalang ipasara ang tanggapan.

Ukol naman sa posibleng paglabag ng Kamara, sinabi ng QC-CESU na ang kanilang gagawing imbestigasyon ay isusumite sa Department of Health(DoH).

Samantala kinastigo naman ni dating Ang Nars Partylist Rep. Leah Paquiz ang mga House leader na sina House Speaker Lord Allan Velasco, Deputy Speaker at 1Pacman Partylist Rep. Mikee Romero at House Secretary-General Mendoza na lumabag umano sa quarantine protocol at patuloy na pumapasok sa Kamara sa kabila ng kanilang exposure sa covid positive na si TESDA Chair Isidro Lapeña.

Sinabi ni Romero na nagnegatibo sila sa test matapos ma-exposed kay Lapeña ngunit hindi naman ito sumailalim sa 14 day quarantine dahil nakita itong dumadalo sa mga hearing at courtesy call sa Kamara.

Ipinaliwanag ni Health Undersecretary Maria Rosario Vergeire na kailangan ang quarantine sa mga may direct exposure sa isang covid patient kahit pa man nagnegatibo sa test dahil ang virus ay maaaring magdevelop sa pagitan ng dalawa hanggang 14 araw pagkatapos ng exposure.

“Dapat po sumunod sa protocol. Respect the authority, paano susunod ang mamamayan kung hindi sumusunod mga leaders, dapat maging role model sila,” pagkastigo pa ni Paquiz.

Samantala, mismong mga empleyado ng Kamara ang nagsabing hindi sagot ang gagawing covid testing para maresolba ang tumataas na kaso ng Covid sa Kamara.

Anila, dapat sumunod sa quarantine protocol ang mismong mga lider na may exposure sa virus.

Umaapela ang mga kawani ng full transparency sa mga covid case sa Kamara at kung sino-sino ang mga may exposure sa covid patients para na rin sa proteksyon ng lahat.

Read More

Gov. Albano inupakan ng anti-mining group ILLEGAL LOGGING AT MINING TALAMAK PA RIN SA ISABELA

0

BINATIKOS ng ilang grupo si Isabela Governor Rodito Albano sa pagtuloy nitong pagtanggi na patuloy ang illegal logging at mining activities sa kanilang lalawigan.

Ito ay matapos ang mismong pag-amin ni Cagayan Governor Manuel Mamba na nangyayari pa rin ang mga nasabing aktibidad sa Cagayan na pinoprotektahan pa ng mga tiwaling alkalde.

Ayon kay Alyansa Tigil Mina (ATM) National Coordinator Jaybee Garganera, wala man silang hawak sa ngayon na actual evidence ay maraming circumstancial at accounts mismo ng mga residente na magpapatunay na hindi natigil ang illegal mining at logging sa Isabela.

Giit ni Garganera, kung magkakaroon lamang ng aerial survey gaya ng ginagawa noon ng yumaong si Enviroment Secretary Gina Lopez ay makikita ang massive deforestation at ang presensya ng mga heavy equipment na nagsasagawa ng quarrying at mining sa Isabela gayundin sa Cagayan.

“Huwag sanang magbulag-bulagan si Governor Albano at ang mga opisyal ng Isabela, kahit sinasabi nilang wala ay kabaligtaran ito dahil meron naman talaga. Ang problema sa illegal mining, quarrying at logging ay magkakaugnay, para makapag-operate ng minahan at quarry ay kailangan na magputol ng puno at ‘yan ang nangyayari,” pahayag ni Garganera.

Gayundin ang pahayag ni Kilusang Magbubukid ng Pilipinas (KMP) President Danilo Ramos. Aniya, nakalulusot pa rin ang mga illegal logger at miners dahil sa pagkunsinte ng lokal na pamahalaan.

Inamin ni Mamba na may tatlong alkalde umano na may kasabwat na uniformed personnel ang sangkot at protektor ng illegal logging sa Cagayan, bagaman hindi niya pinangalanan ang mga ito.

Sa datos ng Provincial Environment and Natural Resources Office (PENRO), ang bayan ng Peñablanca at Baggao sa Cagayan ay nananatiling illegal logging hotspot zone sa probinsya.

Una nang inamin ni Presidential Spokesperson Harry Roque na nagkaroon ng lapses sa enforcement kaya hindi napipigilan ang illegal mining at logging activities sa Isabela at Cagayan.

Sinabi naman ni Año na ang nangyari sa Cagayan at Isabela ay dapat nang magsilbing wake-up call sa bawat isa na seryosohin ang eleksyon.

Ang pamilya Albano at pamilya Dy ay may ilang dekada nang namumuno sa Isabela, ang kasalukuyang gobernador na si Albano ay dating Isabela 1st District representative, ang kasalukuyang vice governor naman nito na si Faustino “Bojie” G. Dy Ill ang dating gobernador ng lalawigan.

Ang pamilya Albano ang may hawak ng congressional seat ng Isabela First District mula 8th Congress hanggang 17th Congress.

Si dating Isabela Vice Governor Tonypet Albano, kapatid ni Gov. Albano, ang siyang humalili rito sa Kamara bilang kinatawan ng Unang Distrito habang mga kaanak din nila ang nakaupo sa ibang distrito. Si Paul Ian Dy ang Isabela 3rd District Rep habang 5th District Congressman naman si Faustino Michael Dy III at 6th District si Inno Dy.

Maging ang nanamahala sa Provincial Board ay mga pamangkin din ng mga Albano at Dy. (DAVE MEDINA)

Read More