1 PATAY, 7 SUGATAN SA DATU PIANG BLAST

0

MAGKATUWANG na tinutugis ng Armed Forces of the Philippine at Philippine National Police ang grupong responsable sa pagpapasabog ng cellphone detonated improvised explosive device na ikinamatay ng isang lalaki at ikinasugat ng pitong iba pa noong Sabado ng hapon sa Barangay Poblacion sa Datu Piang.

Ayon kay Lt. Col. John Paul Baldomar, spokesman ng 6th Infantry Division, nangyari ang pagsabog bandang alas-3:39 ng hapon sa covered court ng Poblacion Datu Piang sa kasagsagan ng volleyball match.

“It was confirmed na IED ‘yung nilagay, component na na-recover ng ating mga EOD (Explosive Ordnance Division) sa area, sa post blast investigation are black powder, so black powder ‘yung charge na ginamit nila, and then command detonated siya,” ani Baldomar.

Signature bomb umano ito o laging ginagamit sa Maguindanao ng mga teroristang grupo, kabilang ang Bangsamo Islamic Freedom Fighters at Daulah Islamiya bagama’t wala pang umaaming grupo sa pagpapasabog.

Tatlong anggulo ang tinitingnan ng militar at pulisya, unang-una ay posibleng gawa ito ng BIFF o Daulah Islamiyah na nagsasagawa ng diversionary attack dahil ongoing ang combat operation laban sa mga ito.

“Medyo naiipit sila at nasasaktan kasi dumadami na talaga ang nagsusurender sa kanila so parang dina-divert nila ‘yung focus ng military ngayon, another na motive na tinitingnan ng mga awtoridad ay Islamic extremism, galit sa hanay ng mga LGBT dahil sa may threats umano silang natanggap. Parang ganun, ‘pag hindi sila magbago, bawal daw sa religion natin ‘yung ginagawa n’yo, ‘pag hindi kayo nagbago mananagot kayo, parang ganun ang tono, pero hindi nila alam kung sino ang nagpadala ng threat na ‘yun.  Pero isa ‘yun sa anggulo na tinitingnan natin, ang last na anggulo natin is political,” ayon sa opisyal.

Kinilala ang namatay na biktimang si Norodin S. Musa, 21, habang sugatan naman sina Fahad A. Tato, 22; Samsudin D. Kadtugan, 21; Benzar Macogay, 24; Amid B. Miparanun, 19; Carlo Mobpon, 25; Tukoy Abo, 13, at Mohamad Wanti, 29-anyos.

Samantala, ipinag-utos ni Philippine National Police (PNP) chief, Police General Guillermo Lorenzo Eleazar sa Police Regional Office Bangsamoro Autonomous Region na magsagawa ng malalimang imbestigasyon para matukoy ang suspek o grupo sa likod ng pagpapasabog kasabay nang pagpapaigting ng seguridad sa kanilang nasasakupan.

“Inatasan ko na ang RD, PRO BAR na makipagtulungan sa local military forces, hindi lamang sa pagsasagawa ng manhunt sa mga taong responsable dito, kundi pati na rin sa pagpapaigting ng seguridad sa Maguindanao at ilang mga lugar kung saan maaaring mangyari ang ganitong klaseng karahasan,” ani P/Gen. Eleazar.

“Nanawagan din tayo sa ating mga kababayan na patuloy na makipagtulungan sa inyong kapulisan dahil ang inyong pakikiisa ay isang mabisang sandata upang hindi mabigyan ng pagkakataon ang mga tao at grupo na maghasik ng karahasan sa ating bayan,” dagdag pa PNP chief. (JESSE KABEL)

Read More

WANTED RAPIST INARESTO NG PNP-PRO5 SA NBI JAIL

0

“WE are not men in uniforms just to be outsmarted,” ani PNP-PRO5 Regional Director Jonnel C. Estomo matapos na dakpin ng kanyang mga tauhan ang isang pugante sa kasong statutory rape.

Ito ay makaraang matunton ang suspek na si Rolly Selos Olaybal alyas “Raul” ng Sitio Libis, San Ysidro, Brgy. San Joseph, Antipolo City, na kasalukuyang hawak ng National Bureau of Investigation dahil naman sa kasong paglabag sa PD 1602 o anti-gambling law.

Nang iparating ng Albay Police Provincial Office base sa datos ng Oas Municipal Police Office, sa NBI na pakay ng kanilang manhunt operation ang suspek dahil sa kasong rape, ay tiniyak na NBI na ibibigay nila ang suspek matapos ang kinakaharap nitong kaso sa kanila.

Si Olaybal ay itinuturing na top 10 most wanted person sa bayan ng Oas kaugnay sa umano’y panggagahasa sa isang menor de edad na kinilalang si alyas Faith, hanggang sa matunton sa NBI Central Office sa Maynila nitong nakalipas na linggo.

Kasunod ng isinagawang intelligence gathering ay nagtungo ang mga tauhan ng PRO5 Albay, OAS MPS team, sa pamumuno ni P/Col. Arnold Santiago, Albay PD, kasama ang mga ahente ng NBI, Manila, Environmental Crime Division, Albay PIT RIU5, Albay PPO PIU at 1st APMFC, para kunin ang akusado.

Limang taong nagtago ang suspek bago naisilbi sa kanya ang warrant of arrest sa kasong rape na inilabas ni Judge Annielyn Medes-Cabilles, RTC Branch 12, 5th Judicial Region, Ligao City.

“Our campaign against on the loose criminals resonates beyond Region 5. As exemplified by this case, no area is far enough not to get caught up by PNP PRO 5. Our records will speak for itself that we walk our talk,” pahayag ni P/BGen. Estomo. (JESSE KABEL)

Read More

BABAENG TULAK DUMARAMI SA CAVITE

0

CAVITE – Tila dumarami ang bilang ng mga babae na lumilinya na rin sa pagtutulak ng ilegal na droga, patunay rito ang walo na kabilang sa 20 kataong nadakip ng Cavite Police sa isinagawang buy-bust operation sa magkakahiwalay na lugar sa lalawigang ito.

Ayon sa ulat ng Cavite Police Provincial Police Office (PPO), isinagawa ang buy-bust operation sa pagitan ng alas-2:45 noong Sabado ng hapon hanggang alas-11:50 noong Sabado ng gabi sa apat na lungsod at tatlong bayan sa Lalawigan ng Cavite.

Nanguna sa listahan ng may pinakamaraming tulak na naaresto ang ang Bacoor City at bayan ng Tanza na tig-anim; sumunod ang Dasmariñas City, 3; dalawa sa Gen. Mariano Alvarez (GMA) at tig-isa sa Trece Martires City, Gen. Trias City at Kawit. (SIGFRED ADSUARA)

Read More

HITMAN NG NEGOSYANTE SA LAGUNA, ARESTADO

0

LAGUNA – Arestado ang umano’y hitman na sangkot sa pamamaril sa isang negosyante sa Calamba City noong Miyerkoles.

Nilalapatan pa ng lunas sa ospital ang biktimang si Elpidio Fernandez, 51-anyos, ng B3, L1, PH1, South Ville 6, Barangay Kay-anlog, dahil sa tama ng bala sa ulo.

Ayon sa ulat kay P/Col. Arnel Pagulayan ng Calamba City Police Station, nakita sa CCTV footages ang pamamaril sa biktima ng suspek na si John Marco Sandoval at isang kasama nito noong Setyembre 15 habang sakay ng motorsiklo bandang alas-3:15 ng hapon.

Nang matukoy ng mga awtoridad ang suspek, agad nagsagawa ng manhunt operation sa kinaroroonan nito na nagresulta sa pagkakadakip kay Sandoval.

Nakumpiska sa suspek ang motorsiklo at isang cal. 45 na ginamit sa pamamaril gayundin ang sari-saring pekeng ID na may iba’t ibang pangalan.

Base sa record ng pulisya, mayroong nakabinbing apat na warrant of arrest ang suspek sa kasong murder, homicide, direct assault at usurpation of authority.

Nakakulong na ang suspek habang pinaghahanap pa ang ilang kasama nito sa krimen. (CYRILL QUILO)

Read More

4 MANGINGISDA, NASAGIP SA BATAAN

0

APAT na mangingisda na mahigit 48 oras nang nagpapalutang-lutang sa dagat na sakop ng Mariveles, Bataan ang nasagip ng mga tauhan ng Philippine Navy matapos masiraan ng makina ang kanilang sinasakyang fishing boat noong Setyembre 16, 2021.

Sa report na isinumite kay Navy Flag Officer in Command Vice Admiral Adeluis Bordado, ni Philippine Navy Fleet, Public Affairs chief, LCdmr. Ryan Luna, nakatanggap sila ng distress call hinggil sa fishing boat na dalawang araw nang stranded sa gitna ng laot.

Mabilis na nagsanib-pwersa ang dalawang barko ng Philippine Navy, ang BRP Jose Rizal (FF150) at BRP Manobo (LC297) para saklolohan at iligtas ang apat na mangingisdang palutang-lutang sa karagatan.

Una rito, ayon kay Luna, nakatanggap ng radio call ang Acting Commanding Officer ng frigate FF150 na si Cdr. Paul Michael Hechanova hinggil sa napaulat na distressed motorized fishing boat, dahilan para agad na mag-maneuver ang BRP Manobo sa bisinidad kung saan naroon ang na-stranded na mga mangingisda.

Pinangunahan ni Cdr. Danish Ruiz, commanding officer ng BRP Manobo, ang matagumpay na rescue operation sa apat na crew ng F/B Jhon and Jane.

Kinilala ang nailigtas na mga mangingisdang sina Joshua Matugas, Rainiel Castillo, John Rollie Soliman at Roger Valencia, pawang mga residente ng Naic, Cavite.

“The presence of our Philippine Navy assets across the country, the vigilance of our sailors and their prompt response to any maritime situation help secure our seas and prevent the unnecessary loss of lives,” ani LCdmr. Luna. (JESSE KABEL)

Read More

Aksyon ng DOH-Calabarzon sa Quezon hospital NAIPONG BANGKAY INIIMBESTIGAHAN

0

INIIMBESTIGAHAN na ng Department of Health-Calabarzon ang mga nadiskubreng bangkay na nakatengga sa isang bahagi ng Quezon Medical Center sa lungsod ng Lucena.

Pahayag ito ni DOH-Calabarzon director Eduardo Janairo sa isang panayam sa ABS-CBN, kung saan ipinalabas ang footage ng mga bangkay na nagsisimula na umanong mabulok, na kuha ng isang nagmamalasakit na kawani ng ospital.

Ito’y sa kabila ng kautusan ng DILG at DOH na ang mga namatay sa COVID-19 ay kailangang ma-disposed sa loob lamang ng 12 oras.

Sinabi ni Dir. Janairo na ang gusto ng karamihan sa mga kaanak ng namamatay sa COVID-19 virus ay ma-cremate ang bangkay ng mga ito. Gayunman, dahil sa kakulangan ng crematorium sa lalawigan ng Quezon ay pwede rin aniyang i-seal sa body bag ang mga bangkay gayundin ang ataul na paglalagakan sa mga ito saka ilibing.

Ang Quezon Medical Center ang panlalawigang ospital ng Quezon na pinamamahalaan ni Dr. Rolando Padre at nasa ilalim ng pamahalaang panlalawigan na pinamumunuan naman ni Gov. Danilo Suarez.

Sa panayam, itinuro ni Dr. Padre ang DILG at mga local government unit bilang responsable sa pagkaipon ng mga bangkay.

Hindi naman itinanggi ni Gov. Suarez ang insidente at nagsagawa na rin umano ng pagpupulong ang ilang lokal na opisyal hinggil dito.

Reaksyon naman ng mga saksi sa pangyayari, mistulang pagpapakita ito ng kawalang kakayahan ng gobernador at pagiging hindi handa sa patuloy na pagkalat ng sakit at paglobo ng bilang ng mga namamatay sa virus araw-araw.

Maituturing din anila itong malaking kahihiyan at dagok sa pangasiwaan ng ospital, lalo na sa lokal na pamahalaan ng probinsya ng Quezon. (ANNIE PINEDA)

Read More

ALERT LEVEL 4 SA NCR POSIBLENG MA-EXTEND

0

MAAARING i-extend o palawigin ng dalawa pang linggo ang ipinatutupad na COVID-19 Alert Level 4 sa National Capital Region (NCR) na magtatapos sa katapusan ng Setyembre kung magiging mababa ang resulta ng COVID-19 infections.

“Hopefully kapag nagawa natin ito sa mga susunod na araw, matapos na ‘yung katapusan sa buwan na ito, maaari pa itong i-extend ng two more weeks bago natin tunay na makita kung ano talaga ‘yung naging epekto nito sa ating mga datos,” ayon kay National Task Force (NTF) against COVID-19 spokesperson Restituto Padilla.

Ang Kalakhang Maynila ay nasa ilalim ng Alert Level 4, “second-highest alert level,” dahil mataas o tumataas ang case counts at tumataas ang utilization rates ng kabuuang COVID-19 beds at intensive care beds.

Ang Granular lockdowns ay maaaring ipatupad sa ilalim ng nasabing alert level.

Ang pilot implementation ay tatagal ng hanggang Setyembre 30. (CHRISTIAN DALE)

Read More

PROTEKSYON SA SEAFARERS ISINULONG NG DOLE

0

ISINUSULONG ngayon ni Department of Labor and Employment (DOLE) Secretary Silvestre Bello III ang dagdag na proteksyon at pagkilala sa mga mandaragat sa pag-amyenda sa 15-taon nang ‘maritime convention’ ng International Labor Organization (ILO).

Pahayag ito ni Secretary Bello sa harap ng mga lider sa pagdaragat sa London nitong nakaraang Linggo bilang keynote speaker ng International Meeting on Future-Proofing of the Maritime Labour Convention of 2006.

Iginiit ni Bello na malabo ang isinasaad ng umiiral na ILO statute sa pagbibigay ng tamang trato at proteksyon sa mga mandaragat anoman ang lahi.

Partikular niyang tinukoy na sa ilalim ng convention, ang mga bansang kaanib ay hinihikayat lamang na magsagawa ng imbestigasyon sa mga seryosong ‘casualty’ sa karagatan.

“We strongly recommend the amendment of the Maritime Labour Convention to recognize seafarers as key workers,” dugtong pa ng kalihim.

Pinakaapektado umano nito ang Pilipinas na isa sa pinakamaraming mandaragat.  Ipinagmalaki niya ang mga nagawa ng Pilipinas para maging patas ang pagtrato sa mga mandaragat lalo ngayong pandemya.

Kabilang dito ang pag-partner sa Seafarers’ Rights International noong 2018 na lumikha ng  Manila Statement sa “Fair Treatment of Seafarers in the Event of a Maritime Accident”. (RENE CRISOSTOMO)

Read More

PACQUIAO, PAMBATO NG PDP-LABAN SA 2022

0

TINANGGAP ni Senador Manny Pacquiao ang nominasyon sa kanya ng paksyon nina Senador Koko Pimentel na Partido Demokratiko Pilipino – Lakas ng Bayan (PDP-Laban) bilang presidential candidate sa 2022 national elections.

Ito ay matapos siyang i-nominate ng iba’t ibang regional representatives ng partido sa isinagawang national assembly.

Isinagawa nina Pimentel ang kanilang national assembly dalawang linggo matapos ang anunsyo ng PDP-Laban wing nina Energy Secretary Alfonso Cusi kasama na sina Senador Bong Go at

President Rodrigo Duterte ang kanilang presidential at vice-presidential candidates.

Tinagurian din ng partido si Pacquiao bilang ‘Man of Destiny’.

Sa kanyang acceptance speech, binigyang-diin ni Pacquiao na wala pa siyang labang intrasan sa kanyang buhay.

“I am a fighter and I will always be a fighter inside and outside the ring,” pahayag ni Pacquiao.

“Sa buong buhay ko, wala akong laban na inaatrasan. dahil sa ngalan ng prinsipyo, karangalan ng bayan ay tumayo ako, nanindigan, at nakipaglaban,” dagdag pa ng Pambansang Kamao.

Binigyang-diin din nito na mula siya sa hirap kaya’t alam niya ang nararamdaman at pangangailangan ng mahihirap.

Binigyan naman ng kapangyarihan ng mga miyembro ng partido si Pacquiao na pumili ng kanyang magiging runningmate. (DANG SAMSON-GARCIA)

Read More