‘Papel’ ng high-ranking officials sisilipin PNP-PDEA SHOOTOUT KADUDA-DUDA *Senate, House, NBI probe ikakasa

0

(BERNARD TAGUINOD)

KWESTYONABLE para sa isang mambabatas sa mababang kapulungan ng Kongreso ang nangyaring engkwentro ng mga tauhan ng Philippine National Police (PNP) at Philippine Drug Enforcement Agency (PDEA) lalo pa’t may high-ranking police officials umano sa lugar ng bakbakan.

Dismayado si House committee on dangerous drug chairman Rep. Robert Ace Barbers sa aniya’y “very unfortunate incident” na nagresulta sa kamatayan ng apat na operatiba at pagkasugat ng apat na iba pa.

“Both police and PDEA claim their respective anti-drug operations in Ever Gotesco yesterday are legitimate. If this is so, there could be no firefight because there should be coordination between them as required under Sec. 86 of RA 9165 before any legitimate anti-drug operation can be carried out,” ani Barbers.

Ang tinutukoy ng mambabatas ay ang Comprehensive Dangerous Drugs Act of 2002 kung saan nakasaad na lahat ng drug operation na isasagawa ng PNP ay kailangang may koordinasyon sa PDEA.

Nais magpatawag ng imbestigasyon ni Barbers upang linawin kung bakit may presensya umano ng mga high ranking police official sa lugar kung saan isinasagawa ang ‘buy-bust operation’.

“This (presensya ng high ranking police officials) adds to the irregularity in the total scenario,” pahayag pa ni Barbers.

 

KADUDA-DUDA

Duda rin ang mambabatas sa PDEA agents na nakaposisyon sa lugar nang magkabarilan ang mga pulis at kasamahan nila na isang indikasyon na pinaghandaan nila ang operasyon.

“These things will have to be clarified in order for us to introduce proper legislation, timely as it is because we have just approved on second reading the proposed amendments to the Dangerous Drugs Act which we intend to address situations such as this,” ani Barbers.

Sinuportahan naman ni Quezon City Rep. Precious Hipolito Castelo ang plano ni Barbers na imbestigahan ang engkuwentro na kauna-unahan mula nang paigtingin ni Pangulong Rodrigo Duterte ang kampanya laban sa ilegal na droga noong 2016.

Nagtataka si Castelo kung bakit nauwi sa engkuwentro ang operasyon kung paniniwalaan ang pahayag ng Quezon City Police District (QCPD) na nakipag-ugnayan ang mga ito sa PDEA.

“So why the misencounter? Were the two groups unaware that they would operate in the same area or place? And why did it take so long to stop the gunfight if there was prior coordination? These are additional questions we would like answered,” ani Castelo.

 

SENATE PROBE

Magsasagawa rin ng investigation in aid of legislation ang Senate Committee on Public Order and Dangerous Drugs sa sinasabing misencounter.

Ayon kay Senator Ronald ‘Bato’ dela Rosa, chairman ng komite, magpapatawag sila ng pagdinig sa insidente sa Marso 2.

Iginiit naman ni Senate President Vicente Sotto III na napapanahon nang ipasa ang kanyang isinusulong na panukala na naglalayong lumikha ng United Presidential Drug Enforcement Authority.

Binigyang-diin ni Sotto na makatutulong ang ahensyang ito upang maiwasan ang misencounter.

 

GAG ORDER

Kaugnay nito, nagbaba ng ‘gag order’ si General Debold Sinas sa QCPD hinggil sa barilang naganap sa Commonwealth, Quezon City nitong Miyerkoles.

Inatasan ng hepe ng PNP si National Capital Region Police Office (NCRPO) director Major General Vicente Danao Jr. na siyang “opisyal” na magsasalita sa media hinggil sa insidente.

Inatasan din ni Sinas ang Criminal Investigation and Detection Group (CIDG) na siyang “lead investigating body” sa naganap.

Batay sa inisyal na impormasyon, namatay ang dalawang pulis na nakilala lamang “Lauro de Guzman” at “Garoso” ng QCPD-District Special Operations Unit (DSOU), samantalang apat ang sugatan. Sa huling ulat ay nadagdagan pa umano ng dalawa ang mga nasawi.

Ayon sa press statement ng QCPD noong gabi ng Miyerkoles, “buy-bust operation” ang ikinasa nila.

Tiniyak din ng tagapagsalita ng PDEA na si Derrick Carreon na lehitimong buy-bust operation ang presensya ng mga ahente ng kanyang ahensiya.

Katunayan, mayroong dalang buy-bust money ang mga ahente ng PDEA, saad ni Carreon.

Nagsimula ang engkuwentro ganap na 5:45 ng hapon sa sangay ng food chain na katabi ng Ever Gotesco Mall.

 

HUSTISYA TINIYAK

Ipinag-alala umano ni Pangulong Rodrigo Roa Duterte ang fatal shootout ng mga pulis at PDEA agents pero siniguro na aalamin ang katotohanan at bibigyan ng hustisya.

“The President, of course, expressed both sadness and concern bakit nangyari nga ito na kapwa tao ng gobyerno ay nagkaputukan,” ayon kay Presidential spokesperson Harry Roque.

“Ang in-assure niya, gaya ng nangyari sa Sulu, ay we will get to the bottom of this incident, magkakaroon po ng partial investigation at justice will be done,” dagdag na pahayag nito.

 

NBI INVESTIGATION

Samantala, inatasan na rin ni Justice Secretary Menardo Guevarra ang National Bureau of Investigation (NBI) na magsagawa ng hiwalay na imbestigasyon sa engkwentro.

Paglilinaw ni Guevarra, ang pag-iimbestiga ng NBI ay hiwalay sa pag-iimbestiga ng ad hoc joint PNP-PDEA Board of Inquiry.

Una nang nagkasundo ang PNP at PDEA na bumuo ng joint Board of Inquiry para imbestigahan ang pangyayari na nagresulta rin sa pagkakasugat ng tatlong pulis, dalawang PDEA agents at isang sibilyan.

 

“SELL-BUST”
ILLEGAL

Isa sa mga anggulong lumutang na posibleng mitsa ng madugong engkuwentro ang ‘sell-bust.’

Agad na nilinaw ni P/Maj. Gen. Danao na bawal ito.

Sa isang live interview matapos ang shootout o misencounter ay inihayag ni Mgen Danao na lahat ng posibleng dahilan o anggulo ay kanilang sisiyasatin at walang magaganap na ‘whitewash”.

Hindi inaalis ng heneral na posibleng isa sa law enforcement team ang gumamit ng maling pamamaraan at ito ay pakay ng pagsisiyasat.

Tiyak umanong may mananagot dito, sinoman o kung totoo man na nagsagawa ng “sell-bust,” ani Danao.

Tahasang sinabi ni Gen. Danao na bawal ang nasabing sistema na kabaligtaran ng buy-bust operation kung saan hindi magdadala ng pera ang mga awtoridad at sa halip ay mag-aalok sila ng droga na ibebenta saka nila huhulihin.

Maging si Rep. Barbers ay nagsabing ilegal ang sell-bust.

“If the news reports are to be believed, PDEA seems engaged in or conducting a sell bust. If this is so, PDEA’s sell bust operation is not legal because it borders on the illegal act of instigation and drug selling or trafficking,” ani Barbers.

“If PDEA adopts “sell bust” as its policy, then it would appear that this organization is like a drug syndicate for practicing and allowing drug trafficking,” dagdag pa ng mambabatas. (NELSON S. BADILLA/DANG SAMSON-GARCIA/JESSE KABEL/CHRISTIAN DALE)

Read More

KULONG SA ANAK NA MAGPAPABAYA SA MAGULANG

0

INIHAIN ni Senador Manuel “Lito” Lapid ang isang panukala na magpapakulong sa anak na magpapabaya at hindi susuportahan ang matatanda partikular ang mga may sakit at hindi makalakad na senior citizens.

Sa pahayag, sinabi ni Lapid na pagtitibayin ng Senate Bill 2061 ang tungkulin ng anak ng matatanda, may sakit o incapacitated parents.

Sinabi ni Lapid na naging invisible issue sa Pilipinas ang pang-aabuso laban sa matatanda, disabled at hindi na makalakad na magulang kabilang ang pisikal, seksuwal, psychological, emosyunal at financial abuse, pag-aabandona, pagpapabaya at seryosong pagkawala ng dignidad at respeto, ayon sa Commission on Human Rights.

“Nakakalungkot isipin na ang mga magulang na nagpakapagod noong panahong malakas pa sila para masuportahan ang kanilang mga anak, ay kaya na lamang tiisin at abandonahin sa panahong matanda na sila. Wag sana nating makalimutan na hindi naman nagkulang ang mga magulang na ito sa pagsuporta sa kanilang mga anak kaya dapat lang na siguruhin ng ating gobyerno sa pamamagitan ng panukalang isinusulong ko, na masuklian man lang ang mga pagsasakripisyo ng mga magulang sa oras na sila ay matanda at mahina na,” paliwanag ni Lapid.

Ayon kay Lapid, bibigyan ng karapatan ng Senate Bill No. 2061 ang matatanda na nangangailangan sa pamamagitan ng kinatawan ng Department of Social Welfare and Development, na maghain ng kaukulang kasong kriminal laban sa kanyang mga anak kapag hindi siya sinuportahan.

Tinukoy ng panukala na ang salitang support ay “everything indispensible for sustenance, dwelling, clothing, and medical attendance.”

Sinomang mapatutunayan sa kabila ng may kapasidad, na magpabaya ng suporta sa kanilang magulang ay maaaring panagutin sa krimen at maaaring maparusahan ng arresto menor bilang pinakamababa at arresto mayor bilang pinakamataas.

Aabot sa halagang P200,000 pero hindi hihigit sa P500,000, o nasa kautusan ng korte, ang multang ipapataw sa sinomang magpapabaya sa kanilang magulang.

“Kung ang mga magulang ay pwede parusahan ng pang-aabuso sa mga bata oras na hindi nila nagampanan ang kanilang tungkulin na magbigay ng pangunahing pangangailangan ng kanilang mga anak gaya ng pagkain, tirahan at pagpapagamot, dapat parehas na proteksyon din ang ibigay sa mga magulang oras na tumanda na sila. Dapat siguruhin na mabibigyan din sila ng tulong ng kanilang mga anak na may kakayanan naman lalo sa panahong mahina, matanda at may sakit na sila. Hindi dapat hayaan ng ating lipunan na basta pabayaan ang mga magulang sa oras ng kanilang pangangailangan,” dagdag ni Lapid. (ESTONG REYES)

Read More

DRIVER PATAY, TRADER SUGATAN SA AMBUSH

0

BATANGAS – Patay ang ang isang truck driver habang sugatan ang kasamang negosyante makaraang pagbabarilin ng riding in tandem habang sakay ng truck sa bayan ng San Jose sa lalawigang ito, nitong Huwebes ng madaling araw.

Kinilala ng San Jose Police ang biktimang si Virgilio Monforte Noel Jr., 40-anyos, idineklarang dead on the spot.

Isinugod naman sa ospital ang kasama nitong negosyante ng itlog na si Milo Guce Raz, 53, tinamaan sa katawan ng mga bala ng .45 kalibreng baril.

Batay sa report ng San Jose sa Police, sakay ang dalawa sa truck galing sa barangay road at magde-deliver ng mga itlog ngunit pagsapit sa bukana ng national highway ay pinagbabaril ang mga ito ng backrider ng motorsiklong biglang humarang sa kanilang unahan.

Agad ding tumakas ang mga suspek matapos ang pamamaril.

Ayon sa pulisya, posibleng ang negosyante ang target ng mga suspek ngunit nadamay ang driver.

Patuloy ang imbestigasyon sa pangyayari at inaalam ang motibo sa krimen. (NILOU DEL CARMEN)

 

Read More

TANDEM BULAGTA SA ENGKWENTRO

0

LAGUNA – Patay ang dalawang hindi kilalang lalaking magka-angkas sa motorsiklo matapos makipagbarilan sa mga miyembro ng Highway Patrol Group at SWAT team ng Biñan City PNP sa ikinasang Oplan Sita nitong Huwebes ng madaling araw.

Ayon sa Biñan City Police, nangyari ang engkwentro sa Langkiwa-Timbao Road, sakop ng Barangay Langkiwa dakong alas-3:25 ng madaling araw.

Batay sa report, pinara ng mga tauhan ng HPG at SWAT team ang motorsiklong sinasakyan ng tatlong suspek ngunit sa halip na tumigil ay tumalon ang dalawang backrider at pinaputukan ang mga awtoridad.

Nagkaroon ng palitan ng putok na nagresulta sa agarang pagkamatay ng dalawang suspek.

Tumakas naman ang nagmamaneho ng motorsiklo.

Inalam pa ng mga awtoridad ang pagkakakilanlan ng dalawang napatay at kung anong grupo kabilang ang mga ito. (NILOU DEL CARMEN)

Read More

EX-CAVITE GOV. MALIKSI PUMANAW NA

0

PUMANAW na si dating Cavite Governor Erineo “Ayong” Maliksi noong Miyerkoles sa edad na 82-anyos.

Sa Facebook account ni Imus City Mayor Emmanuel Maliksi, inihayag nito ang pagpanaw ng kanyang ama bagama’t hindi binanggit kung ano ang dahilan ng pagkamatay nito.

“Ang aming pamilya ay lubos na nagdadalamhati sa pagpanaw ng aking ama, Erineo “Ayong Maliksi,” ayon sa kanyang FB account.

“Higit sa pagiging isang serbisyo-publiko, ikaw ay naging isang mapagmahal at mapagkalingang ama sa amin. Maraming salamat sa inyong pagmamahal at sa mga aral na patuloy naming babaunin,” ayon pa kay Mayor Manny Maliksi.

Nagsimula ang political career ni Maliksi bilang vice mayor ng Imus City mula 1980 hanggang1986. Naging mayor ng Imus City noong 1988 hanggang 1998.

Naging gobernador siya ng Cavite mula 2001 hanggang 2010, naging miyembro ng Mababang Kapulungan mula 1998 hanggang 2001 at mula 2010 hanggang 2013.

Nagsilbi ring siyang chairman ng Philippine Charity Sweepstake Office (PCSO) mula 2015 hanggang 2016 sa ilalim ng administarsyon ni dating Pangulong Benigno Aguino III. (SIGFRED ADSUARA)

Read More

RETIRADONG PULIS ITINUMBA SA BRGY. HALL

0

LAGUNA – Patay ang isang retiradong pulis habang malubhang nasugatan ang hepe ng barangay tanod makaraang pagbabarilin ng hindi kilalang lalaki sa loob ng barangay hall sa Purok 1, Brgy. Mapagong, Calamba City sa lalawigang ito, noong Miyerkoles ng gabi.

Kinilala ang mga biktimang sina Apolonio Comia Naredo, Jr., 52, retiradong pulis, at Rigor Rivera Medes, 38, hepe ng BPSO sa nasabing lugar.

Ayon sa ulat ng Calamba City Police Station, bandang alas-7:30 ng gabi nang mangyari ang pamamaril habang nanonood ng telebisyon ang mga biktima sa loob ng barangay hall.

Bigla na lamang umanong dumating ang isang lalaking may bitbit na ‘di pa malamang kalibre ng baril, saka pinagbabaril sina Naredo at Medes nang walang dahilan.

Pagkaraan ay dali-daling kinuha ng suspek ang sling bag na nakasabit sa katawan ni Naredo at mabilis na tumakas.

Agad nalagutan ng hininga sa insidente si Naredo habang isinugod sa JP Hospital si Medez para malapatan ng lunas. (CYRILL QUILO)

 

Read More

11 kidnappers arestado 4 CHINESE NASAGIP NG PNP-AKG

0

APAT na Chinese nationals na kidnap for ransom victims, ang nasagip ng mga tauhan ng Philippine National Police – Anti-Kidnapping Group sa magkahiwalay na rescue operation sa Quezon City at Pampanga noong Miyerkoles ng gabi.

Sa ulat na isinumite sa tanggapan ni PNP-AKG Director P/BGen. Jonnel C. Estomo, arestado sa nasabing operasyon ang 11 suspek na kinabibilangan ng Chinese at Malaysian nationals at ilang Filipino.

Ayon sa inisyal na ulat na ibinahagi ni PNP-AKG spokesman, P/Lt. Col. Rannie Lumactod, nagkaroon ng ‘break’ sa kaso nang makatangap ng intelligence information ang PNP – Anti-Kidnapping Action Committee.

Sinasabing isa sa mga mino-monitor na KFR victims ang nakatakdang dalhin sa isang diagnostic center sa Quezon City para sumailalim sa Reverse Transcription-Polymerase Chain Reaction (RT-PCR) o swab test.

Bunsod nito, isang rescue operation ang ikinasa ng mga tauhan ni BGen. Estomo na nagresulta sa pagkakasagip sa biktimang si alyas “Ming” at pagkakadakip sa mga kidnapper nito na sina Liang Khai Chean, 28-anyos, Malaysian; Chinese national na si Mou Yun Peng, 35, at Benjie Labor, 43, isang Filipino.

Sinasabing nagpa-swab test umano ang mga ito dahil may balak na umalis ng bansa.

Nabatid na bahagi ng modus ng Chinese KFR syndicate na pabalikin ng China ang kanilang mga naging biktima oras na nagkabayaran para iligaw ang imbestigasyon.

Sa isinagawang ‘de-briefing’ sa biktima, nabulgar na may iba pa siyang mga kasamang KFR victims at nasa isang safehouse sa Mexico, Pampanga.

Sa follow-up operations ng PNP-AKG, sinalakay ang bahay na itinuro ng unang nasagip na biktima, sa Sta. Cruz sa bayan ng Mexico.

Dito na-rescue ng mga awtoridad ang tatlo pang mga biktima na kinilala sa alyas na “Zhang”, “Shi” at “Wu”.

Nahuli sa nasabing safehouse ang mga kidnapper na kinabibilangan ng dalawang Chinese at anim na mga Pinoy.

Kasalukuyang nasa kustodiya ng PNP-AKG Headquarters sa Camp Crame, Quezon City ang mga suspek. (JESSE KABEL)

 

Read More

IBP-QC MEMBERS HINIKAYAT BUMOTO

0

NANAWAGAN ang sekretarya ng Integrated Bar of the Philippines (IBP), sangay ng Quezon City, na si Maria Angelica “Angie” de Ramos sa mga miyembro nito na mayroong malinis na katayuan na lumahok sa eleksyon at maghalal ng mga opisyal nito sa Sabado (Pebrero 27).

Sinegundahan ni Atty. Lennard Constantine “Leng” Serrano ang panawagan ni De Ramos at nilinaw sa kasapian na sila ay maaaring makaboto nang personal, o sa pamamagitan ng online dahil sa limitasyong kinakaharap dulot ng COVID-19.

Ang IBP-QC ang pinakamalaking sangay ng IBP sa buong bansa.

Itinuturing at kinikilala ang IBP bilang isa sa mga prestihiyoso at solidong kapatiran ng mga abogado sa Pilipinas.

Tinuran din ng mga opisyal ng IBP na kailangan ang pisikal na presensya sa lugar na pagdarausan ng halalan ng mga nominado sa anomang posisyon upang personal nilang tanggapin ang nominasyon at mahalal sa posisyon.

Ito’y makaraang magpasya ang pamunuan ng IBP-QC na hindi pinahihintulutan ang nominasyon at eleksyon sa online, pahayag ni Atty. Maria Andreameda “Maida” Catubay.

Nilinaw naman nina Alton C. Durban at Frances Mae “Cherryl” Ontalan na tanging mga miyembro na nagbayad ng butaw para sa taong 2021, walang pagkakautang at itinuturing at kinikilalang kasapi na mayroong magandang katayuan sa IBP ang pinahihintulutang maghalal at mahalal na opisyal.

Ipinayo ni Atty. Arbie C. Buenaflor sa kasapian na agahan ang pagtungo sa lugar na pagdarausan ng halalan upang maiwasan ang siksikan at pagkaantala ng eleksyon.

Alas-8:00 ng umaga magsisimula ang halalan at magtatapos ng 4:00 ng hapon sa lobby ng Quezon City Hall.

Pinayuhan din ang mga boboto, sa pamamagitan ng online, na agahan ang pagpapadala ng kanilang boto.

Sina Kathleen Stacey “Kasey” Villordon, Marie Cielo “Cielo” Ceñidoza, Cerizar Vicente “Donvic” Torio, Raul Ricardo “Raul” Francisco at Bantuas “Banjo” Lucman, at maging ang mga dating pangulo ng IBP-QC, mga opisyal at kasapian, at mga opisyal at mga kasapi ng QC Trial Lawyers League ang magtitiyak na magiging maayos at matiwasay ang halalan.

Mahigpit ding paiiralin ang health protocols partikular ang social distancing upang makaiwas sa COVID-19. (NELSON S. BADILLA)

 

Read More

Parke sa Navotas, lockdown din 14-DAY STRICT LOCKDOWN SA 55 BARANGAY SA PASAY

0

IPATUTUPAD sa loob ng 14-araw ang “strict lockdown” sa 55 barangay sa Pasay City upang matiyak na hindi kumalat ang COVID-19 sa buong lungsod.

Inihayag ito ng City Health Office nang umabot sa mahigit 400 ang mga kaso ng COVID-19 sa lungsod mula sa mahigit 300 nitong nakalipas na linggo.

Naniniwala ang City Health Office na ang istriktong 14-day lockdown ang sagot sa mabilis na pagtaas ng mga kaso ng COVID-19 sa lungsod.

Batay sa rekord ng City Health Office, umabot na sa 7,650 ang kumpirmadong kaso ng COVID-19, habang naitala sa 7,059 ang mga gumaling at 196 ang namatay. (MARINHEL T. BADILLA)

Samantala, makaraang isailalim sa granular lockdown ang Navotas City Hall dahil sa pagpositibo sa COVID-19 ng 24 kawani nito, pansamantalang isasara rin ang Navotas Centennial Park simula Pebrero 25, hanggang sa susunod na abiso ng lungsod.

Ani Mayor Toby Tiangco, ang naturang hakbang ay sa paghahangad na pigilan ang mga pagkakataon na magkaroon ng malakihang pagtitipon-tipon dahil maaari itong maging ‘super spreader event’ o aktibidad na pagmumulan ng malawakang hawaan ng COVID-19.

Inilahad ng punong lungsod na noong Pebrero 6 ay 33 na lamang ang active cases sa lungsod, pinakamababa sa taong ito. Ngunit noong Pebrero 24 ay sumirit ito sa 209 matapos na 15 ang magpositibo at walo lamang ang gumaling.

Binigyang-diin ni Tiangco na kailangang pigilan ang lalong pagdami ng mga kaso at ito ay magagawa sa pamamagitan ng pagpapatupad ng precautionary measures.

“Araw-araw, lalo na pag-Sabado at Linggo, dinadayo po ang Navotas Centennial Park ng mga gustong mag-exercise o tumambay lamang. Nakikita po nating dagsa ang mga tao rito, Navoteño man o hindi, at madalas sila ay nagkukumpulan kahit ilang beses na po tayong nagpaalala na panatilihin ang social distancing,” patuloy niya.

Giit ng alkalde, dahil sa pagtaaas ng mga kaso at pangangailangan na magpatupad ng mga polisiya para mapangalagaan ang kalusugan ng ating mamamayan, bagama’t di niya nais, ay kailangang maghigpit para sa kabutihan ng lahat.

Kaugnay pa rin ng lockdown sa City Hall, nagpadala ng pormal na liham si Tiangco sa Sangguniang Panlungsod, sa pangunguna ni Vice Mayor Clint Geronimo, kung saan nakasaad ang kahilingang “extremely certified urgent” para palawigin ang palugit sa pagbabayad ng sumusunod mula Pebrero 28, 2021 hanggang Marso 5, 2021: business permit/license; permit to operate para sa mga tricycle at pedicab/de padyak na may plakang nagtatapos sa 4, 5 at 6; permit to operate para sa mga tricycle, pedicab/de padyak at e-bike na kailangan nang i-renew at mag-i-expire ngayong Pebrero 2021, at regulatory sticker para sa public utility jeepney (PUJ) na may plakang nagtatapos sa 2.

“Hangad po natin ang agarang pagpasa ng ordinansa ukol dito. Patuloy po tayong mag-ingat lalo na’t dumadami na naman po ang ating mga kaso. ‘Wag po tayong pakampante dahil nariyan pa po ang panganib na magkasakit,” ani Tiangco. (MARINHEL T. BADILLA/ALAIN AJERO)

Read More