Hindi binigyan ng pera SENIOR, PINANA NG ANAK

0

QUEZON – Natuhog ang isang senior citizen matapos na panain ng kanyang binatang anak na hindi niya binigyan ng pera sa bayan ng Tiaong sa lalawigang ito, noong Biyernes ng umaga.

Nakatusok pa ang bakal na pana sa tiyan ng biktimang si Demetrio Del Mundo Maliglig, 69-anyos, nang isugod sa ospital sa Lucena City.

Batay sa report ng Tiaong Police, bandang alas-7:20 ng umaga nang humingi ng pera ang suspek na si Jayson Wagan Maliglig, 18-anyos, sa kanyang tatay habang sila ay nasa kanilang bahay sa Barangay San Jose.

Ngunit nang walang maibigay na pera ang tatay ay nagalit ang anak at nagtalo ang mag-ama hanggang sa kumuha ng spear gun ang binata at pinana ang biktima.

Isinugod sa ospital ang biktima na tinamaan sa tiyan habang naaresto naman ng nagrespondeng mga pulis ang suspek.

Nahaharap ang suspek sa kasong frustrated parricide at paglabag sa RA 3553 (An Act to Prohibit the Possession of Deadly Arrow). (NILOU DEL CARMEN)

Read More

SMB-TNT DO-OR-DIE NA!

0

SADYANG walang tulak-kabigin sa tapatang Talk N’ Text at San Miguel Beer. Nitong Biyernes ay nakapwersa ng decider Game 7 ang SMB makaraang muling magwagi laban sa TNT, 103-90.

Dahil sa panalo ng Beermen ay nagtabla sila sa ikatlong pagkakataon ng Tropang Giga, sa Game 6 ng 2021 PBA Philippine Cup Semifinals sa Don Honorio Ventura State University gym sa Bacolor, Pampanga.

Nakaungos sa Game 1 ang TNT, ngunit agad bumawi ang SMB sa Game 2. Muling lumamang ng Tropang Giga sa Game 3, ngunit maagap na nakabalikwas ang Beermen sa Game 4.

Kinuha ng tropa ni coach Chot Reyes ang ikatlong panalo noong Miyerkoles, subalit Biyernes ay itinablang muli ng mga bata ni coach Leo Austria ang serye sa 3-3.

Muling bumida para sa Beermen si big man Mo Tautuaa na umiskor ng team-high 24 points sa Game 6.

Bumawi naman si Marcio Lassiter sa kanyang disappointing Game 5 performance at kumamada ng 19 puntos kabilang ang three consecutive triples sa first quarter nq nagbigay sa SMB ng double digit lead, 14-4, at mula rito ay hindi na nakahabol ang TNT.

Read More

PBA LEGEND MAY KAKAIBANG SAKIT

0

Ni ANN ENCARNACION

MAYROONG kakaibang sakit ang tinaguriang “Living ­Legend” ng PBA na si Robert Jaworski.

Sa pahayag ni Dr. Edwin Bien, isang integrated medicine practitioner, maaaring may ‘high ferritin disorder’ ang ­dating basketball player-coach, na nagpasikat din ng “never-say-die” mantra ng Barangay Ginebra.

Inamin ni Bien, ang kanyang obserbasyon ay base lang sa naging pahayag kamakailan ng dati ring basketball player na anak ni Jaworski na si Dodot Jr.

“Iron level is high, but at the same time anemic siya,” ang sabi ni Dodot kay Randy ­Caluag ng Manila Standard.

“We’ve been trying to look for doctors here and abroad, but none of them can understand kung ano ‘yung nangyayari sa kanya,” pahayag naman nito kay Anthony Taberna sa Youtube channel ng huli.

Paliwanag ni Bien, ang ‘high ferritin disorder’ ay kadalasang resulta ng maramihang pag-inom ng alcohol. At dahil kilalang hindi alcohol drinker si Jaworski, maaaring may ibang dahilan ang kanyang sakit, na mas nakababahala. “Ang mahirap, if the cause is due to other conditions like genetics, leukemia, lymphoma or thyroid disorder.”

Ayon sa Mayo Clinic: “A ferritin test helps your doctor understand how much iron your body stores. If a ferritin test reveals that your blood ferritin level is lower than normal, it indicates your body’s iron stores are low and you have iron deficiency. As a result, you could be anemic.”

Sinabi ni Dodot, kandidatong vice mayor ng Pasig sa 2022 elections, ang kanyang 75-anyos na amang nakatakdang maluklok sa Hall of Fame ng Philippine sports ay nasa maayos na kundisyon kumpara noong mga nakaraang taon. Ngunit humiling siya ng dasal sa lahat para sa tuluyang paggaling ng “Living Legend.”

Read More

BATAS SA PAUPAHAN NABALEWALA

0

BINABALEWALA ng mga may-ari ng paupahan sa Metro Manila at iba pang urbanized cities sa buong bansa ang batas sa paupahan o ang Rent Control Act in the Philippines (RA 9653).

Maraming kawawang mga pamilya ang pinaalis sa kani-kanilang mga inuupahang bahay ng kanilang landlords, habang nasa kasagsagan ng lockdown sa buong bansa dahil sa COVID-19 pandemic.

Halos dalawang taon na ang COVID-19 mula noong Marso 2020, dito rin nagsimula ang kalbaryo ng mga nangungupahan.
Marami ang nawalan ng hanapbuhay o trabaho.

Marami kasi sa mga kumpanya ang pansamantalang nagsipagsara dahil halos lahat ng mga tao ay hindi makalabas sa kani-kanilang mga tahanan dulot ng COVID-19 pandemic.

Sinabayan pa nang mahigpit na quarantine protocols na ipinatutupad ng gobyerno.

Dahil sa epekto ng COVID-19, marami sa mga negosyo ang tuluyan nang nagsipagsara at hindi na nakabawi sa kanilang pagkalugi.

Umasa na lang sa ayuda ng pamahalaan ang nakararaming Pinoy na hindi naman sapat para masuportahan ang pangangailangan ng mamamayan.
Nariyan pa ang problema sa buwanang renta ng mga nangungupahan.

Kaya karamihan sa kanila ay pinalayas dahil wala na silang maibayad na buwanang renta.

Hindi dapat binabale­wala ang batas sa paupahan o ang Rent Control Act in the Philippines (Republic Act 9653).

Sakop nito ang nangungupahan na may renta na P10K pababa sa Metro Manila at highly urbanized cities sa buong bansa.

Kasama rito ang apartments, boarding houses, bedspace, dormitories, rooms for rent, land or house and lot.

Sa Civil Code of the Philippines naman, nakalagay sa lease provisions ang renta na higit sa P10K sa commercial spaces at rent-to-own units.

May limit ang pagtataas ng renta, sa buwanang renta na P4,999 pababa ay may maximum rent increase lamang na 2%; ang P5,000 hanggang P8,999 ay may maximum rent increase ­lamang na 7%, at ang P9,000 hanggang P10,000 ay pinapayagan lamang ang maximum rent increase na 11% sa loob o isang taon habang okupado ang mga unit.

Hindi rin pinapayagan ng RA 9653 na magtaas ng renta ng dalawang beses sa loob ng isang taon ang bedspace, boarding houses, dorms at rooms na inuupahan ng mga estudyante.

Walang hihingi ng deposit na lalagpas ng 2 buwan at 1 buwang advance.

Kailangan din ang 2 buwang deposit ay nakalagak sa bangko at kung natapos na ang kontrata ang ­nangungupahan ay ma­kukuha niya ang deposit kasama ang interest.

Depende kung wala siyang bayarin na naiwan tulad ng bill ng tubig, ­kuryente, nasira sa unit habang nakatira siya.

Dahil ang kanyang 2 buwang deposit ay gagawing pantapal sa kanilang naiwang mga bayarin.

Wala ring paaalising nangungupahan na walang sapat na basehan, ayon sa RA 9653.

Ito ang dahilan para paalisin ang mga nangungupahan ng may-ari ng unit:

1) Subleasing the property – pinaupahan niya sa iba ang kanyang inuupahan na unit na hindi alam ng may-ari.

2) Overdue rental payments – hindi nakababayad ng 3 buwang renta o higit pa.

3) Owner’s legitimate need to use the property – kung gagamitin ng may-ari ang unit. Pero hindi pwersahan ang pagpapaalis dahil kailangan niyang bigyan ng formal notice ang nag-uupa ng 3 buwan in advance.

4) Necessary house repairs – kung kinakailangang ayusin ang gusali o apartment.

5) Lease contract expiration – natapos na ang kontrata ng nangungupahan.

Nakapaloob din sa RA 9653 na illegal din ang pagpapaalis sa mga nangungupahan na ang dahilan ay pagkabenta at pagkasanla ng gusali o apartment sa third party.

Bagama’t naibenta na at naisanla ang apartment o gusali ay hindi maaaring paalisin ang nangungupahan ng bagong may-ari.

Kung ikaw ay COVID-19 patient o frontliner na hindi nakababayad ng renta sa rason na quarantine period at grace period.

Ang may-ari ay hindi maaaring magpaalis sa ­nangungupahan sa kanya sa panahon ng ECQ, MECQ at GCQ status.

Ang sino mang lalabag sa batas na ito (RA 9653) ay pagmumultahin ng P10k at pagkakakulong ng 2 buwan o pareho.

Read More

‘YAN ANG PROBLEMA NG MAGSASAKA

0

ANG isa sa ginagawang mga propaganda ng mga kandidato kapag panahon ng kampanya ay paunlarin ang sektor ng pagsasaka kaya sa mga nakaraang halalan, may mga senatorial candidate na kinukunan ng video sa bukid para sa kanilang TV Commercials.

‘Yung mga magsasaka naman ay nadadala sa kanilang propaganda lalo na’t kailangan na kailangan nila ang tulong mula sa national government para umangat naman ang kanilang kalagayan.

Pero kapag nanalo na ang mga kandidatong ibinoto ng mga magsasaka ay hindi na sila maaalala at matatapos na ang termino nila ay wala pa ring nangyayari sa sektor ng pagsasaka sa ating bansa.

Kanya-kanyang diskarte na lang ang mga magsasaka para makapagtanim dahil hindi naman talaga nila ramdam ang national government kahit bilyon-bilyon ang inilalaang pondo sa sektor na ito kada taon.

Kumakapit sila sa mga middleman para makapagtanim, maabonohan at mai­spreyan ng pesticide ang kanilang tanim na ang kapalit ay ibenta sa inutangan ang kanilang ani at ibabawas na dun ang kanilang utang kasama na ang tubo.

Ginagawa ito ng mga magsasaka lalo na ‘yung mga walang puhunan dahil wala naman talagang tulong ang national government sa kanila, sa totoo lang.

Kung may dumating man na tulong at tuwing nasasalanta ng kalamidad ay idinadaan pa ‘yun sa local officials at ‘yung local officials, mga tauhan at supporters lang nila ang nakikinabang at hindi ‘yung talagang mahihirap na walang puhunan sa pagtatanim.

Kapag panahon naman ng anihan, napipilitan ang mga magsasaka na ibenta ang bagong aning palay sa mga middleman dahil walang post harvest facilities kung saan puwede sana nilang patuyuin ang kanilang ani.

Siyempre dahil ibinebenta nang fresh o hindi pa natutuyo ang ani, binabarat ng mga middleman ang kanilang ani kaya kung kumita man ang mga magsasaka ay kakarampot lang at hindi sapat sa kanilang gastusin hanggang sa dumating ang susunod na anihan.

Madalas din na minamalas ang mga magsasaka lalo na’t regular na nagkakaroon ng bagyo sa panahon ng anihan o Ber months kaya karaniwang nasisira ang kanilang pananim.

Isa o dalawang linggo na lang aanihin na ang kanilang tanim pero wawasakin lang ng bagyo kaya ‘yung inaasahan nilang pambayad sa kanilang utang at kahit papaano ay magkaroon sila ng panggastos, maglalaho pa.

May mga magsasaka naman ang nakapag-ani na pero inabutan ng bagyo kaya nabubulok na lang ang kanilang ani lalo na kung tatlong araw nang hindi naibi­bilad ang kanilang produkto lalo na ang mais.

Ramdam ko ang bigat sa loob ng mga magsasaka sa Baggao, Cagayan dahil sa pagkasira ng kanilang aning mais na inabutan ng baha nang manalasa ang bagyong si Maring sa Norte.

Kung baga, pera na, naging bato pa kaya ramdam na ramdam ko ang sakit na nararamdaman nila dahil laki ako sa probinsya kung saan ang pangunahing hanapbuhay ay pagsasaka.

Tinagurian tayong agricultural country pero kulang na kulang ang tulong ng gobyerno sa mga magsasaka. Ang mga pangakong modernisasyon sa agriculture sector ay hindi pa rin nangyayari. Naiwasan ­sanang masira ang mga ­aning mais at palay kung moderno na ang pagsasaka sa ating bansa.

Read More

PWERSAHAN SA BAKUNAHAN

0

MULING nagpamalas ng pagiging brusko si Pangulong Rodrigo Duterte nang humarap sa kanyang dumadalas na paglabas sa telebisyon para mag-ulat kaugnay ng ginagawa ng ­administrasyon sa laban kontra pandemya.

Sa kanyang mensaheng ipinaabot sa publiko, muling nagpaandar ang Pangulo. Aniya, uutusan na raw niya ang Philippine National Police (PNP) na samahan ang mga kawani ng Department of Health para hanapin ang mga bantulot na magpabakuna para sa pwersahang turukan.

Bahagi ng paandar ni Duterte ang mala-akyat bahay na diskarte – ang pasukin ang bahay ng mga hindi pa bakunado at turukan sa ­kahimbingan ng tulog ng mga ito.
Giit ng Pangulo, dapat nang makamit ang herd immunity.

Susmaryosep! Marso pa nang simulan ng ­gobyerno ang turukan. Supply – hindi ang mga tao ang problema sa likod ng kabiguan ng gobyernong mahagip ang target nitong herd immunity.

At nang dumating ang supply, bigo ang mga ahensyang itinalaga para sa information and education drive na ipaunawa nang lubos sa publiko ang buting dala ng bakuna kontra COVID-19.

Ang masaklap, naglabasan ang ulat sa hindi magandang epekto nito sa ilan na dapat sana’y naipaliwanag ng mga inatasan.

Ang higit na nakababahala ay ang pamumulitika sa bakuna ng mga nasa pwesto. Ayon mismo kay vaccine czar Carlito Galvez ay pinipiit ng mga nakaupong gobernador at mayor sa iba’t ibang panig ng bansa ang pagbibitaw ng mga bakunang halos mag-expire na sa mga regional offices ng Department of Health (DOH).

Kung may dapat gamitan ng kamay na bakal, hindi ang publiko kundi ang mga politikong tinutukoy ni Galvez.

Kung tutuusin, batid ng Pangulong mali ang kanyang direktiba. Isa siyang abogadong aral sa probisyong ginagarantiyahan sa ilalim ng Saligang Batas na kanyang sinumpaang poprotektahan nang siya ay maluklok sa pwesto taong 2016.

Sa isang banda, nakasanayan na niya ang pagpapaikot ng batas mula pa nang siya’y pumasok sa gobyerno. Ang tokhang, ang naudlot na pagtakbo bilang bise-presidente, ang pagtangging ilabas ang kanyang Statement of Assets, Liabilities and Net Worth (SALN), ang giit na pagpalit ng kanyang anak sa Palasyo, ang pananabotahe sa trabaho ng Kongreso – ilan lang yan sa mga pruweba ng mga galawang brusko, kesehodang may batas na dapat sundin sinuman ang nasa pwesto.
Karapatang pantao ba kamo? Tinatawanan lang ‘yan ng administrasyon.

Read More

DOLE, HINIMOK NA BUMUO PA NG SPECIAL PROGRAM PARA SA MGA WALANG TRABAHO

0

MATAPOS maalarma sa datos ng unemployment, hinimok ni Senador Sonny Angara ang Department of Labor and Employment (DOLE) na bumuo ng special programs para sa lahat ng apektado ng COVID 19 pandemic.

Kasabay nito, pinuri ni Angara ang ahensya sa mga magagandang programang ipinatupad katulad ng Special Program for the Employment of Students (SPES), Tulong Panghanapbuhay sa Ating Disadvantaged/Displaced Workers (TUPAD) at Covid19 Adjustment Measures Program (CAMP).

Sinabi ni Angara na bagama’t mahalaga ang mga programang ito sa panahon ng krisis, kailangan din itong palawigin sa iba pang sektor upang matiyak na walang maiiwan.

“Malayo pa sa 2019 levels ang recovery ng ating mga local industries tulad ng tourism, transportation and the associated industries. We should come up with special programs that are targeted towards the heavily affected industries,” saad ni Angara.

“It’s a well established fact that Covid has exacerbated or made inequality worse. We’re adding to the ranks of poor people if we do not develop programs on the fly,” dagdag nito.

Tinawag na alarming ng Chairman ng Senate Committee on Finance ang employment data partikular ang 8.1 percent unemployment rate noong August 2021 na iniulat ng Philippine Statistics Authority. (DANG SAMSON-GARCIA)

Read More

Kakayahan sa pagbili ng shares sa Malampaya kwestyonable UDENNA LUBOG SA UTANG?

0

(ESTONG REYES)

HINDI pa man tapos ang pagsusuri sa kakayahan ng Udenna Corporation na bilhin ang controlling stakes ng Shell Philippines Exploration B.V. (SPEX) sa Malampaya gas field, kinuwestyon ni Senador Win Gatchalian ang pinansyal na estado ng kumpanya matapos suspendihin ng PH Resorts Group Holdings Inc., na pag-aari rin ng Udenna, ang casino project nito sa Clark dahil sa pagkalubog sa utang.

“Maliwanag na red flag ito sa tunay na estado ng Udenna. Paano natin mapagkakatiwalaan ang kumpanyang lubog sa utang? Una, nabili ng Udenna ang 45% stake ng Chevron sa Malampaya sa pamamagitan ng loans. Ngayon, gusto naman ng Udenna na mapasakamay nito ang stake ng SPEX na siyang operator mismo ng Malampaya,” ani Gatchalian.

“Hindi isang ordinaryong asset ang Malampaya. Kaya kailangang siguruhin natin na anomang transaksyon na may kinalaman dito ay dapat dumaan sa masusing pagsusuri at due diligence ng gobyerno upang magarantiya sa mga kababayan natin na ang sinoman na papalit na kumpanya ay talagang kwalipikado at may kakayahang magsuplay ng kuryente,” dagdag pa ng senador.

Pinupunan ng Malampaya ang aabot sa 26% na pangangailangang suplay ng kuryente o tinatayang 3.7 milyong sambahayan sa Luzon.

Sa isang pagdinig na isinagawa ng Senado noong Hulyo, sinabi ni Philippine National Oil Company-Exploration Corp. (PNOC-EC) president and chief executive officer Rozzano Briguez sa Energy Committee na ang $375 milyon sa kabuuang $565 milyong ipinambili sa Chevron ng UC Malampaya Philippines Pte. Ltd. na isang kumpanya sa ilalim ng Udenna Corp. ay inutang mula sa tatlong bangko at ang natitirang $157 milyon ay nagmula sa “net entitlements” ng Malampaya samantalang ang $33 milyon naman ay galing sa stock issuance ng kumpanya.

Ang PNOC-EC ay nagmamay-ari ng 10% ng Malampaya project.

Matatandaang napabalita noon lamang Mayo ang paglagda sa kasunduan ng Shell Petroleum NV at Malampaya Energy XP Pte Ltd., isang subsidiary company ng Udenna Corp., kaugnay ng bentahan sa stake ng Shell sa Malampaya.

Batay sa mga naglabasang balita, popondohan ng foreign banks ang ipambibili ng negosyanteng si Dennis Uy, may-ari ng Udenna, sa SPEX. Ang natukoy na foreign banks din mismo umano ang nagpondo sa ipinambili ni Uy sa stake ng Chevron sa Malampaya.

Samantala, sa isyu ng PH Resorts Group, napabalitang umabot na sa P7.2 milyon ang utang ng naturang kumpanya at tinaningan na ito ng mga creditor bank, bagay na naging dahilan upang suspendihin muna ang casino project sa Clark.

Read More

Para lang sa mga immunocompromised THIRD DOSE SA NATURUKAN NG CHINA VAX

0

INIREKOMENDA ng World Health Organization (WHO) nitong Huwebes ang pagbibigay ng third dose ng COVID-19 vaccine sa mga taong may immunocompromised condition o hindi kayang makapag-develop ng full immunity matapos ang dalawang doses.

“We are now in a position to say that for people with immunocompromised conditions who have been unable to develop full immunity, WHO is supporting a third dose as an extended primary course,” ayon kay WHO Representative to the Philippines Dr. Rabindra Abeyasinghe sa virtual press briefing ni Presidential spokesperson Harry Roque.

“Even if they are less than 60 years old, we will advocate for the third dose,” dagdag na pahayag nito.

Paglilinaw ni Abeyasinghe, ang third dose ay iba mula sa boosters para sa general population.

Sinabi pa niya na inirekomenda ng WHO ang third dose para sa mga taong kabilang sa A2 population, o elderly population, na nakatanggap ng primary vaccination course gamit ang Sinovac o Sinopharm “to potentiate its immunogenicity.”

“Our recommendation now is that in addition to immunocompromised individuals, that we include all individuals who have received primary vaccination course of two doses with Sinovac or Sinopharm to receive a third dose, provided it’s more than three months since the completion of the first two doses,” paglilinaw pa rin ni Abeyasinghe.

“We don’t have a recommendation for the general population,” dagdag na pahayag nito. (CHRISTIAN DALE)

Read More