2 PASLIT PATAY SA SUNOG

0

DALAWANG 3-anyos na paslit ang namatay sa nangyaring sunog noong Sabado ng gabi sa Caloocan City.

Hindi umabot nang buhay sa Caloocan City Medical Center sanhi ng nalapnos na katawan ang biktimang si Kendal Janda, babae, habang nalagutan ng hininga bago makarating sa Tondo Medical Center sanhi ng suffocation si Mikho Cabansag.

Nabatid mula sa Caloocan City Bureau of Fire Protection (BFP), dakong alas-6:35 ng gabi nang nakatanggap sila ng tawag mula sa 911 hinggil sa nangyaring sunog sa #190 Ana Bustamante St., 2nd Avenue, Brgy. 43 kaya mabilis silang nagresponde sa lugar.

Isang nagngangalang Alvin Ramos na residente ng naturang lugar, ang tumulong na makuha sa nasusunog na bahay ang mga biktima at mabilis na isinugod ang mga ito sa pagamutan.

Tatlong pamilya ang naapektuhan ng sunog na nagsimula sa isang kwarto sa unang palapag ng bahay habang tinatayang umabot sa P60,000 ang napinsalang mga ari-arian.

Patuloy ang imbestigasyon ng Caloocan City BFP sa insidente. (ALAIN AJERO)

Read More

HUMAN TRAFFICKING SA BI HUHUBARAN NG 3 PINAY

0

INAASAHANG makatutulong ang tatlong Pilipina na nakabalik sa Pilipinas mula Syria nitong Sabado, na patunayang ang sindikato sa Bureau of Immigration (BI) ang kumilos upang maging biktima sila ng human trafficking.

Sinalubong ang tatlo ng mga opisyal ng Department of Foreign Affairs (DFA) sa Ninoy Aquino International Airport (NAIA) bago sila isinailalim sa 14-araw na kwarantina upang malaman kung positibo sila sa coronavirus disease – 2019 (COVID-19) o hindi, bago sila ihatid sa kani-kanilang pamilya.

Tiniyak ng Office of the Undersecretary of Migrant Workers Affairs (OUMWA) ng DFA na tutulungan ang tatlong overseas Filipino workers (OFWs) upang makabangon mula sa napakasamang karanasan bilang biktima ng human trafficking.

Kasama sa tulong ang pag-alalay sa tatlo kaugnay sa pagsasampa ng mga kasong kriminal laban sa mga taong naging dahilan ng pagkakalaglag nila sa human trafficking, kabilang ang ilang opisyal at kawani ng BI, dahil sa paglabag sa Republic Act 9208 (Anti-Human Trafficking in Persons Act) at Republic Act 8042 (Migrant Workers Act).

Mahigit isang linggo na ang nakalipas nang ibunyag ng SAKSI Ngayon ang raket sa human trafficking na mayroon nang dalawang taon ginagawa ng ilang opisyal at kawani ng BI.

Batay sa impormasyon, P50,000 ang ibinabayad ng sindikato sa BI sa bawat isang Pilipina na makakaalis ng bansa kahit biktima siya ng human trafficking dahil ‘aprubado’ sa naturang sindikato.

Ang pinuno ng sindikato ng human trafficking ay natukoy sa alyas na “REM”.

Sa unang imbestigasyon ng isang komite sa Senado hinggil sa human trafficking, natumbok ng mga senador na ilang opisyal at kawani ng BI na sangkot sa korapsyon sa visa upon arrival (VUA) ng BI-NAIA, ay pasok din sa negosyong human trafficking.

Hindi pa tapos ang imbestigasyon ng Senado ukol sa human trafficking. (NELSON S. BADILLA)

Read More

Mag-iisponsor ng bakuna sa teachers, students BIGYAN NG TAX BENEFITS – DEFENSOR

0

NAGHAIN ng panukalang batas si Anakalusugan Party-list Rep. Mike Defensor para bigyan ng tax benefits ang mga pribadong kumpanya o mayayamang Filipino na sasagot sa COVID-19 vaccination ng lahat ng guro sa Pilipinas.

Ginawa ni Defensor ang nasabing pahayag habang naghahanda na umano ang pharmaceutical companies sa pagtuklas ng bakuna laban sa COVID-19 para sa mga kabataang edad 18 pababa.

“Private entities paying for the COVID-19 jabs of teachers and children will be entitled to claim 150 percent of what they spent for the shots as “additional deduction” from gross income subject to tax,” ani Defensor.
Sa ngayon ay mayroong umaabot sa 933,000 bilang ng mga guro sa bansa habang 23 million naman ang mga kabataan na nag-aaral sa mga pampublikong paaralan na kailangang mabakunahan upang masiguro ang kaligtasan ng mga ito sa COVID-19.

Hindi kasama ang mga kabataan sa pinondohan ng gobyerno sa vaccination program dahil para sa mga taong edad 18 pataas pa lamang ang natuklasang bakuna laban sa COVID-19 kaya dapat itong paghandaan.

“We want to ramp up the immunization of our teachers, and later, our children, by encouraging the private sector to come in and help,” ani Defensor, vice chairperson ng House Committee on Welfare of Children.

Dahil dito, pinaamyendahan ng mambabatas ang Adopt-a-School program na naestablisa sa pamamagitan ng Republic Act (RA) 8525 noong 1998 kung saan binibigyan ng tax incentives ang mga korporasyon at mayayamang indibidwal na tutulong sa sektor ng edukasyon upang mabawasan ang problema tulad ng kakulangan ng silid-aralan.

“We recognize that many businesses and affluent families are already helping to suppress the pandemic in so many ways, such as by spending for the inoculation of their employees and their dependents,” ayon sa mambabatas.

Kapag naipasa ang nasabing panukala, sinumang korporasyon na gagastos ng P10 million halimbawa, sa pagbili ng COVID-19 vaccine para sa mga kabataan na inaasahang ilalabas sa 2022, ay magkakaroon ng extra deduction na P15 million sa kanilang gross income tax.

“Our bill will help prevent ‘donor fatigue’ and encourage more private entities to help some more by contributing to the vaccination of our teachers and children,” ayon pa sa mambabatas. (BERNARD TAGUINOD)

Read More

POWER COMPANIES AT TELCOS, PINAGHAHANDA SA BAGYONG BISING

0

NANAWAGAN si Senador Sherwin Gatchalian sa mga electric power, distributors at companies na tiyakin ang sapat na suplay ng kuryente sa mga lugar na maapektuhan ng bagyong Bising.

“Malakas ito dahil super typhoon, marami tayong mga lalawigan ay tingin ko ay makakaranas ng malakas na hangin at ang ginagawa ng mga utilities natin, mga distributors, lalo na mga kooperatiba ay nagpe-preempt sila,” saad ni Gatchalian.

“Ibig sabihin pinapatay muna nila ang kuryente para kapag pumasok ang bagyo ay hindi makuryente ang kanilang mga constituents at nagkakaroon sila ng paghahanda para hindi magkaroon ng aksidente sa kanilang mga constituents,” dagdag pa nito.

Kasabay nito, inatasan ng National Telecommunications Commission (NTC) ang mga network company na tiyaking sapat ang mga tauhan sa mga lugar na tatamaan ng Bagyong Bising.

Sa nilagdaang memorandum order ni NTC Commissioner Gamaliel Cordoba, ipinahahanda rin ang mga generator na may extra fuel, tools at spare equipment.

Ayon sa NTC batay sa abiso ng PAGASA ang Typhoon Bising ay maaring magdulot ng hanggang sa malakas at kung minsan ay matinding pag-ulan sa Eastern Visayas at Camotes Islands.

Inatasan din ang mga telco na madaliin ang repair at restoration ng telecommunication services sa mga lugar na maaapektuhan ng bagyo.

Sinabi ni Cordoba na dapat ay makapagsumite ng status updates ang mga telco kada anim na oras sa kanilang isasagawang restoration activities.

Pinagtatalaga rin ng Libreng Tawag at Libreng Charging Stations ang mga telco sa mga lugar na mawawalan ng koneksyon.

Paalala ng NTC sa mga telco, makipag-ugnayan sa mga LGU at tiyaking susundin ang health protocols. (DANG SAMSON-GARCIA)

Read More

COMMUNITY PANTRIES, PARAMIHIN

0

HINIMOK ni Senador Sonny Angara ang gobyerno at private entities na gayahin ang community pantries na kumakalat ngayon sa iba’t ibang panig ng bansa.

Sinimulan ang community pantry sa Maginhawa sa Quezon City at ngayon ay makikita na rin sa iba’t ibang lugar sa Metro Manila at karatig lalawigan na naglalayong tulungan ang mga higit na nangangailagan.

“It is encouraging to see more Filipinos demonstrating the bayanihan spirit by putting up community pantries for the benefit of people who are struggling during these very challenging times,” saad ni Angara.

“Maliit na bagay kung tutuusin ang pamamahagi ng libreng gulay, prutas, bigas, tubig o noodles ng isang tao, pamilya o grupo ng tao, para sa mga naghihirap sa panahon na ito dahil sa nawalan sila ng hanapbuhay ay malaking tulong na ito para mapatid ang gutom hanggang sa makaahon na sila muli sa pandemiya na hinaharap ng ating bansa,” diin pa ni Angara.

Binigyang-diin ni Angara na ang maliliit na aksyon na ito ng pribadong mamamayan ay may malawak na epekto at marami ang natutulungan.

“We encourage our local government units, the national government, and even private businesses who can afford it to replicate and even scale up these community pantries to cater to even more people,” diin ni Angara.

“One small gesture when duplicated by a large number of people will amount to something very meaningful,” dagdag nito. (DANG SAMSON-GARCIA)

Read More

HALOS 90% VACCINATION TARGET SA SJDM NAABOT NA

0

NAABOT ng lokal na pamahalaang lungsod ng San Jose Del Monte ang halos 90 porsiyento ng kanilang target na mabakunahang health workers.

Sa pinakahuling datos na inilabas ng Public Information Office (PIO) ng lungsod, lumabas na mula Abril 6, 2021 ay nabakunahan na ng kanilang City Health Department ang may 3,459 mula sa kabuuang bilang na 3,895 na health workers o 88.81 porsiyento ng kanilang target.

Tumanggap ang mga health worker ng bakuna kung hindi man Sinovac ay AstraZeneca.

Nagawa rin ng lungsod na mabakunahan ang 100 porsiyento ng target nilang 220 mamamayan na may comorbidities na nasa kategoryang A3 na pawang nagparehistro upang makapagpabakuna. Gayunman, sinabi ng PIO na ina-update pa ng lungsod ang mga nasa kategoryang A3 batay sa karagdagang datos at mga bagong nagpatala.

Ipinagpatuloy rin ng lungsod ang pagbabakuna sa may 22,039 na mga senior citizen na nagparehistro upang mabigyan ng unang dose ng bakuna. Nauna nang itinigil pansamantala ng pambansang pamahalaan ang paggamit ng AstraZeneca sa mga may edad dahil sa isyu ng kaligtasan.

Umabot naman sa 20 vaccine sites ang itinalaga ng lokal na pamahalaan, kabilang dito ang mga pagamutan at pampublikong paaralan para sa kanilang vaccination program.

Sinabi ni SJDM Rep. Florida Robes na bagama’t target ng lungsod na mabakunahan ang 70 porsiyento ng tinatayang isang milyong residente upang makamit ang kawan ng mga maililigtas sa sakit, ginagawa naman aniya ng lungsod ang lahat ng makakaya upang makatanggap ng bakuna ang lahat ng kanilang mamamayan upang matiyak na lahat ay protektado.

“No San Joseño should be left behind in this vaccination drive and we will work hard to achieve that for the people of San Jose. We are aiming for 100 percent vaccination! This is the only way for us to move forward from this pandemic,” ayon pa kay Robes. (TJ DELOS REYES)

Read More

FRONTLINERS MULA VISAYAS PINASALAMATAN

0

NAGPAABOT ng pasasalamat si Senator Christopher ‘Bong’ Go, na siya ring chair ng Senate Committee on Health, sa ikalawang batch ng medical frontliners mula sa Visayas, na nagboluntaryong mai-deploy sa mga pagamutan at health care facilities sa National Capital Region (NCR) upang tumulong sa paglaban sa COVID-19 pandemic.

Nauna rito, noong Biyernes, Abril 16, isang ceremonial send-off ang idinaos sa Cebu City para sa may 30 nurses mula sa Central Visayas. Ang 20 sa kanila ay itatalaga sa National Center for Mental Health (NCMH) sa Mandaluyong City habang ang iba ay ide-deploy naman sa Las Piñas General Hospital at Satellite Trauma Center.

Noong Abril 8, isang send-off na rin ang isinagawa sa unang batch naman ng volunteers na binubuo ng 50 medical frontliners, mula sa Vicente Sotto Memorial Medical Center sa Cebu City at Department of Health – Central Visayas.

“Last week, dumating na sa Maynila ang unang batch ng health workers mula sa Visayas, at ngayon may panibagong batch na naman na kayong ipapadala para tumulong sa mga kababayan natin sa NCR Plus areas. Maraming salamat sa inyong patuloy na pagmamalasakit sa ating kapwa Pilipino,” ani Go, sa isang video message.

“Bawat isa naman sa atin ay may ginagampanang papel sa laban kontra COVID-19. Hindi ito laban ng gobyerno lamang, kung hindi laban ito ng sambayanang Pilipino at ng buong mundo,” dagdag pa niya.

Matatandaang dahil sa lumalaking pangangailangan para sa medical human resources, una nang umapela ang senador sa mga health worker sa non-critical areas na tumulong sa medical frontliners na nagsisilbi sa critical areas.

Naglunsad din siya ng inisyatiba, sa pakikipag-kolaborasyon sa Office of the Presidential Assistant to the Visayas (OPAV), DOH regional offices, local government units, hospitals na may Malasakit Centers, at Project Balik Buhay member-private hospitals, na mag-mobilize ng volunteer medical frontliners para tumulong sa sitwasyong pangkalusugan.

Bawat volunteer ay pagkakalooban ng karagdagang 20% premium sa kanilang basic salary para sa emergency hiring, base sa Bayanihan 2 funds, at hiwalay na insentibo mula sa OPAV, bukod pa sa karagdagang allowance mula sa provincial government ng Cebu at ng Cebu City government.

Ang lahat naman ng COVID-19 testing at transportation expenses sa NCR ay sasagutin din ng DOH, habang ang pagamutan naman kung saan sila maitatalaga ang siyang sasagot sa kanilang pagkain, akomodasyon at transport costs.

Sa kanyang mensahe, tiniyak namang muli ng senador na ang mga medical frontliner ay mananatiling pangunahing prayoridad ng pamahalaan sa kanilang vaccination drive.

Mahigpit din ang payo ng senador sa mga medical frontliner na magpabakuna sa sandaling magkaroon ng pagkakataon upang mabigyan sila ng proteksiyon laban sa virus.

Binigyang-diin din niya ang kahalagahan ng pagtutulungan ng lahat ng sektor at nanawagan pa ng kooperasyon upang matagumpay na malampasan ng bansa ang hamong ito na dulot ng krisis. (CHRISTIAN DALE)

Read More

VAN SUMALPOK, PASAHERO PATAY

0

PATAY ang isang 45-anyos na babae nang sumalpok ang sinasakyan niyang delivery van sa isang sa poste, habang malubhang nasugatan ang driver nito, noong Biyernes ng madaling-araw sa Caloocan City.

Idineklarang patay ng medical personnel ng Caloocan North Disaster Risk Reduction Management Office (DRRMO) ang biktimang si Margie Guardo, ng #3 Dhaka St., Vista Verde, Brgy. 167, habang ang driver ng Suzuki Carry Cab na may plakang NGJ-4926, na si Candar, 26, ng parehong address, ay itinakbo sa Caloocan City Medical Center.

Ayon sa pulisya, humaharurot ang sasakyan ng mga biktima sa Gen. Luis Road patungong Caybiga dakong alas-12:05 ng madaling araw.

Nawalan umano ng kontrol si Candar sa manibela pagsapit sa kanto ng Master Road sa Brgy. 165 at sumalpok ang minamaneho niyang sasakyan sa kongkretong poste.

Sa lakas ng pagsalpok, nawasak ang sasakyan at nagpaikot-ikot nang ilang metro hanggang sa mapunta sa kabilang linya na ikinapinsala ng mga sakay nito.

Kakasuhan ng reckless imprudence resulting in homicide, physical injury and damage to property si Candar. (ALAIN AJERO)

Read More

25 DAGDAG SA CAMANAVA COVID DEATHS

0

UMABOT sa 25 ang namatay dahil sa COVID-19 sa CAMANAVA (Caloocan, Malabon, Navotas, Valenzuela) area sa pinakahuling ulat ng city health offices ng nabanggit na mga lungsod.

Ayon sa ulat, 15 ang patay sa Caloocan City noong Abril 16 at lumobo sa 1,793 ang active cases. Pumalo na sa 22,617 ang total confirmed cases. Sa bilang na ito ay 20,168 na ang gumaling at 656 na ang namatay.

Apat naman ang namatay sa Navotas noong Abril 15 at 1,060 ang active cases makaraang 109 ang nagpositibo at 96 ang gumaling. Sumampa na sa 9,748 ang tinamaan ng COVID sa lungsod, at sa bilang na ito ay 8,405 na ang gumaling at 283 na ang namatay.

Tatlo naman ang namatay sa Malabon City noong Abril 16 at 371 na ang COVID death toll. Habang 143 ang nadagdag na confirmed cases at sa kabuuan ay 11,235 na ang positive cases, 875 dito ang active cases. Umabot naman sa 94 ang gumaling.

Tatlo naman ang binawian ng buhay sa Valenzuela City noong Abril 16 at 1,235 ang active cases matapos na 178 ang gumaling ngunit 198 naman ang nagpositibo. Pumanhik na sa 15,243 ang nasapol ng pandemya sa siyudad, kung saan 13,633 na ang gumaling at 375 na ang namatay. (ALAIN AJERO)

 

Read More