Category: OPINYON

DUMULOG sa AKOOFW si Lovely Toledo, OFW mula sa Tupi, South Cotabato na kasalukuyang nagtatrabaho sa Riyadh, Saudi Arabia.

Ayon kay Lovely, nakarating siya sa Riyadh, sa pamamagitan ng MEJA International Manpower Agency at ang kanyang ahensya sa Saudi Arabia ay Panorama Recruitment Agency.

Ang isinumbong ni Lovely ay ang pananakit sa kanya ng kanyang employer.

Diumano, noong July 24 ng taong kasalukuyan ay naganap ang pananakit sa kanya.

Ayon sa kanya, sinipa at sinampal siya ng kanyang among lalaki.

Mabuti na lamang at hindi siya napuruhan ng sampal sa mukha dahil nakailag siya.

Ngunit, tinamaan naman siya sa kanyang ulo.

Pilit na kinukuha ng kanyang amo ang kanyang hawak na celfone, ngunit naitago niya ito dahil alam niya na ito na lamang ang natatangi niyang sandata para siya ay masaklolohan.

Matindi ang takot ni Lovely, kaya siya ay nakiusap na agaran siyang masaklolohan.

Agad kong ipinarating ang sumbong na ito ni Lovely kay Overseas Workers Welfare Administration (OWWA) Welfare Officer Racquel Kunting upang siya ang makipag-ugnayan sa ahensya nito para mabilis na makaalis si Lovely sa malupit na employer nito.

Samantala, labis-labis din ang pakiusap ni Maribel Inocillas upang siya ay matulungang makauwi sa Pilipinas.

Ayon kay Maribel, noon pang April 29, 2018 siya ­nakarating sa Dammam, Saudi Arabia, sa pamamagitan ng ­Supreme Agency.

Ngunit, ang nasabing ahensya ay nagsara, kaya wala na siyang matakbuhan para mahingian ng tulong.

Nakiusap si Maribel na siya ay makauwi sa Pilipinas dahil matagal nang tapos ang kanyang dalawang taong kontrata bilang kasambahay.

Maraming beses na siyang nakiusap sa kanyang employer para pauwiin siya sa Pilipinas, ngunit ito ay nagbingi-bingihan lamang sa kanyang pakiusap.

Read More

BAGAMAT wala pang pormal na pahayag para sa 2022 national at local elections si dating Senador Ferdinand “Bongbong” Marcos Jr., nagpakita na ng kanilang solidong suporta sa mga Marcos ang mga leader at politiko sa Ilocandia.

Ito’y makaraang tugunan ng nasabing mga personalidad ang paanyaya ni Senadora Imee Marcos na “PRE-SONA MERIYENDA” sa kanilang ancestral home sa San Juan City, Metro Manila.

Batay sa talaan ng mga dumalo, umabot sa 50 mga ­congressman at mga political leader ang nakisalo sa PRE-­SONA MERYENDA ng mga Marcos na nagpapatibay lamang ito ng kanilang solidong pagsuporta sa mga Marcos.

Nakilala ang tinaguriang “Solid North” noong panahon ni dating Pangulong Ferdinand E. Marcos kung saan karamihan, o halos lahat, sa lahing Ilocano ay sumusuporta noon sa kanya na tinawag din sa Ilocandia na “Apo Lakay”.

Ngayong nakapagpakita ng kanilang lakas ang Ilocandia na solidong sumusuporta sa mga Marcos, tanging ang anunsyo mula kay Bongbong Marcos, o BBM, ang inaantabayanan nila upang pormal nang ikampanya ang kanilang pambato para sa presidential race sa 2022.

Batid ng mga Ilokano na ­inagawan ng panalo noong panahon ng administrasyong Aquino ang kanilang kababayan na si BBM, gamit ang makabagong makina ng halalan.

Kung mayroong Solid North, mayroon kayang matatawag na Solid South?

Ito’y makaraang aminin ni Mayor Sara Duterte-Carpio sa panayam sa kanya sa Cebu City ang pagkandidato niya sa pampanguluhang eleksyon.

Ang problema ni Mayor Sara ay si Senador Manny Pacquiao na taga-General Santos City, isang Mindanaoan na sinasabing isa sa mga kakandidato bilang pangulo na baka magbise sa kanya si Senador Aquilino “Koko” Pimentel upang ipakita naman sa Partido Demokratiko Pilipino – Lakas ng Bayan (PDP-Laban) Cusi faction ang kanilang kinaaanibang political party ang kanilang pagkadismaya sa ginawang pagpapatalsik sa kanila ng PDP -Laban na umano’y may basbas ni Pangulong Duterte.

Isa pa sa mga problema kung bakit hindi magiging solido ang Timog ay si Senate President Vicente Sotto III na ­pinapurihan pa ni Pangulong Duterte sa kanyang huling State of the Nation Address (SONA) na kakandidato bilang ­pangalawang pangulo ng bansa kasama si Senador Panfilo “Ping” Lacson bilang kanyang pangulo.

Sina Sotto at Lacson ay sinasabing dala, o bitbit, ng Central Visayas Region, partikular ng Cebu.

‘Pag nagkagayon, dito makikita ang kalamangan ng tinaguriang Solid North sa pagsuporta sa kanilang kandidatong si BBM.

Batay naman sa pagtaya ng mga analyst, ‘di bababa sa limang mga presidentiable ang maglalaban-laban sa eleksyon.

Read More

NAPAKAMAHAL ng presyo ng sibuyas hanggang ngayon.

Ang solusyon dito ng mga negosyante, ekonomista at mga opisyal ng Department of Agriculture (DA), partikular ang Bureau of Plant Industry (BPI), ay umangkat ng sibuyas mula sa mga katabing bansa.

Kapag maraming sibuyas sa palengke, siguradong matitigil ang pagtaas ng presyo ng sibuyas at mapabababa pa ang kasalukuyang presyo nito.

Iyan ay batay sa Law of Supply and Demand na pare-pareho nating pinag-aralan noong kolehiyo tayo.

Kahit nga ang mga tindera ng sibuyas ay ikinakatwiran ang nasabing batas ng galaw at balanse ng mga produkto sa palengke alinsunod sa kailangan ng mga tao tuwing tumataas ang presyo ng sibuyas.

Importanteng sangkap ang sibuyas sa pagluluto ng mga Filipino.

Isa ito sa mga ginagamit ng mga nagluluto upang maging malinamnam ang kakaining ulam ng bawat pamilya.

Nagdududa lang ako kung bakit madalas na hinaharang ng mga tauhan ng Bureau of Customs (BOC) ang inangkat ng mga negosyante na mga sibuyas.

Kadalasan, “misdeclaration” ang ikinakaso ng BOC dahil sa halip na puting sibuyas ang banggitin ng mga tauhan ng mga importer at ng kanilang Customs broker sa BOC, pulang sibuyas ang deklarasyon.

Sayang ang mga sibuyas na umaabot P10 milyon, o higit pa ang halaga, dahil hindi ito makalalabas sa mga teritoryo ng BOC.

Sa aking pagtatanong sa mga taong kabisado ang mundo ng importasyon ng sibuyas, nabanggit na mayroong korapsyon sa importasyon ng sibuyas.

Pokaragat na ‘yan!

Napakatindi raw ng korapsyon sa importasyon ng sibuyas, giit sa akin.

Matagal na raw nangyayari ‘yan.

Ang mga may pakana ng korapsyon ay ang mga korap sa DA at BPI.

Maliban d’yan, malaki raw ang ‘bayad’ at ‘padulas’ sa importation permit.

At kapag nakapasok na ang mga produktong agrikultural tulad ng sibuyas saanmang teritoryo ng BOC ay kung anu-ano ang ipinasisilip ng DA/BAI.

Pokaragat na ‘yan!

Ang kalakaran daw ay DPWH (‘Di Puwedeng Walang Hatag).

Kung totoo ito, napakasahol naman ng mga korap sa DA dahil mayroon nang korapsyon sa importasyon ng baboy na kinasasangkutan naman ng mga korap sa DA at Bureau of Animal Industry (BAI), tapos dito naman sa importasyon ng sibuyas.

Pokaragat na ‘yan!

Iyong mga korap lang ha, iyong mga masisiba nang husto sa pera ang binabanggit ko, kaya huwag kayong basta-basta magsasalita!

Mayroon umanong kumukuwestiyon mula sa DA/BPI hinggil sa pagpasok ng mga sibuyas sa bansa.

Kaya, sobrang higpit ng pagbusisi ng mga tauhan ng BOC upang siguradong wala umanong nilabag na batas, o anumang alituntunin, ang mga importer ng sibuyas.

Ang alam ko, isa ang DA sa mga unang kagawarang iniimbestigahan ng Task Force Against Corruption (TFAC) na pinamumunuan ni Justice Secretary Menardo Guevarra.

Ang imbestigasyon ay batay sa utos ni Pangulong Rodrigo Duterte makaraang malaman niya na palpak ang Presidential Anti-Crime Commission (PACC) mula kay Dante Jimenez hanggang kay Greco Belgica sa pag-iimbestiga laban sa katiwalian, korapsyon at pandarambong sa pamahalaan.

Ngunit, hanggang ngayon ay wala akong balita kung kasama sa mga inireklamo sa TFAC ang sinumang opisyal at kawani ng DA/BPI dahil sa korapsyon, partikular sa importasyon ng sibuyas.

Inanunsiyo kamakalawa ng beteranong senador na tatakbo sa halalan sa susunod na taon na sunud-sunod ang ilulunsad na imbestigasyon ng Senado ngayong pumasok na ito sa ikatlong sesyon laban sa mga korap na kagawaran.

DA ang isa sa puntirya ng mga senador.

oOo

CP: 09985650271 / Viber #: 09457016911

Read More

HABANG isinusulat ko ito umaga ng Lunes, nakatakda pa lamang sa hapon, alas-kuwatro to be exact, ang ikaanim at huling State of the Nation Address (SONA) ni Pangulong Rodrigo Duterte.

Maaga ang deadline ng Opinion Section, kaya kailangang maisulat ko na itong kolum ko dahil hindi ko na mahintay ang sasabihin at ipapangako ng ating pangulo (sa ayaw at sa gusto n’yo) na kanyang gagawin sa natitirang 11 buwan mula ngayon.

Siguro napapansin n’yo, walang ipinagkaiba ang SONA ng pangulo ng bansa sa panahon ng kampanya.

Hindi lang ito nangyayari sa panahon ni Mr. Duterte, kundi maging sa mga nakaraang pangulo ng ating mahal na bayan.

Ang pagkakaiba lang, isang tao na lamang ang mangangako sa atin ng bituin at buwan sa SONA, hindi tulad sa kampanya na malilito ka sa dami ng mga nangangako dahil napakarami ang tumatakbo.

Kapag kampanya, walang pulitiko ang walang political promises.

Ang karaniwang naririnig sa kanila ay kapag sila ang ibinoto, dadami ang trabaho, mawawakasan na ang katiwalian sa gobyerno, tataas ang sahod ng mga manggawa, magkakaron ng hustiya, ipagtatanggol ang ating bayan, peace and order, uunlad ang bayan at kung anu-ano pa.

Karaniwang naniniwala sa kanila ang mga tao, pero ‘yung pinakamatindi ang boladas ang mananalo at nagpapakita ng tapang at dedikasyon sa kampanya pa lamang, pero kapag nanalo na, hindi natutupad ang mga ipinangako nila at kung mayroon mang matutupad, mabibilang lang sa daliri ang kanilang achievements.

Muling uulitin ng nanalong pangulo ang kanyang political promises sa SONA at isasalarawan sa atin ang mga gagawin niya para matupad ang mga ipangako noong kampanya.

Sa unang SONA, ang taas ng pag-asa ng taumbayan at talagang naniwala ang lahat na gagawin niya dahil siya ang nakaupo, pero along the way ika nga nila, bihira ang pangulo na nakatupad ng kanyang political promises.

‘Yung karaniwang naririnig natin na susugpuin ang katiwalian, lahat ng naging pangulo ng bansa ay ipinangako na ‘yan, pero lahat sila ay bigo dahil tumitindi pa rin ang katiwalian sa pamahalaan.

Bakit nangyayari ito?

Maaaring ang ihinalal nating pangulo ay hindi corrupt, pero ‘yung mga nakapaligid sa kanya ay hindi tayo sigurado.

Walang naging pangulo ng bansa na hindi nasabit ang mga ‘malalapit sa kanya’ sa katiwalian.

Hindi na ako magbabanggit ng mga taong malalapit kina dating Pangulong Cory Aquino, Fidel Ramos, Joseph Estrada, Gloria Macapagal Arroyo, Benigno “Noynoy” Aquino III at Duterte ang nasabit ang pangalan sa katiwalian.

Lahat din ng mga nabanggit na dating pangulo at maging si Duterte ay nangako na pauunlarin ang bansa, pero nananatili pa rin ang matinding kahirapang nararanasan ng sambayanang Filipino.

Limitado pa rin ang oportunidad sa bansa kahit pinangakuan tayo na dadami ang trabaho kapag sila ay na-nalo, kaya milyun-milyon ang nakikipagsapalaran sa ibang bansa dahil kung mananatili sila sa Pilipinas, mamamatay silang dilat ang mata sa kahirapan.

Ang kapansin-pansin sa lahat, ang umuunlad lang ang buhay ay ‘yung mga nakasama ng mga pangulo sa pagpapatakbo ng gobyerno, pero ang mga pangkaraniwang tao na bumoto sa kanya, lugmok pa rin sa hirap.

Sana lang, huwag paasahin nang husto ang mga tao, hindi lang sa panahon ng kampanya, kundi maging sa SONA dahil lalo silang nadedepress kapag hindi natupad ang political promises.

Read More

PIHADONG masayang-masaya ang pinuno ng Presidential Anti-Corruption Commission (PACC) na si Greco Belgica dahil isa siya sa mga nabanggit ni Pangulong Rodrigo Duterte na posibleng tumakbong senador sa tiket ng Partido Demokratiko Pilipino – Lakas ng Bayan (PDP – Laban).

Siyempre, malaki ang bentahe kapag tumakbong senador sa tiket ng administrasyon dahil posibleng manalo kahit tablado at kinamumuhian ng mamamayan ang kandidato.

Hindi ba’t mayroong mga nanalo noong halalang 2019 na kakampi ng administrasyong Duterte kahit hindi karapat-dapat na maging senador?

Pokaragat na ‘yan!

Kasama na sa PACC si Belgica simula nang itatag ito ni Duterte.

Hindi lang nabalita sa media kung isa sa mga inimbestigahan ng PACC ang Department of Agriculture (DA), partikular ang Bureau of Animal Industry (BAI).

Malaki ang papel ng BAI sa industriya ng baboy, manok at iba pang kaugnay na produkto, lalo pa’t mula 2019 ay malaki na ang itinaas sa presyo ng mga nasabing produkto.

Bagamat pinuno ng BAI ang DA, trabaho, tungkulin at obligasyon ng una na aksyonan ang problema sa napakataas na presyo ng baboy, manok at baka sa palengke.

Sa pamumuno ni Dr. William Dar, napakilos ng DA at BAI si Pangulong Rodrigo Duterte at ang National Economic and Development Authority (NEDA) hinggil sa importasyon ng baboy.

Maging ang Senado ay pumanig sa kagustuhan ng DA at BAI na magkaroon ng malaganap na importasyon ng baboy.

Nagkaintindihan ang mga opisyal ng DA, BAI, NEDA at mga Senador na obligadong lampasan ang minimum access volume (MAV) ng baboy upang mapababa ang presyo ng mga baboy sa palengke.

Naganap ang importasyon, ngunit napakataas pa rin ng presyo ng baboy.

Pokaragat na ‘yan!

Nangangahulugan lamang na hindi tamang solusyon ang importasyon ng baboy nang lampas sa MAV, taliwas sa iginiit ni Dar at ng BAI.

Alam naman ng mga opisyal at kawani sa BAI – maging ni Dar – na hindi solusyon ang importasyon ng baboy upang mapababa ang presyo ng baboy sa dating presyo nito.

Alam na alam ni Dar at ng mga opisyal ng BAI na kahit kailan ay hindi napababa ang presyo ng baboy, sa pamamagitan ng importasyon ng produktong ito.
Hindi naman bagito si Dar sa DA.

Naging kalihim na rin siya nito noong panahon ni Gloria Macapagal Arroyo, kaya siguradong kabisado na niya ang industriya ng baboy.

Pokaragat na ‘yan!

Kawawa ang mga mamimili ng karne ng baboy dahil sa kita nila manggagaling ang bayad sa biniling baboy.

Ang mga nagtitinda ng baboy ay tiyak na kumikita pa rin kahit tumindi ang importasyon ng baboy.

Hindi puwedeng hindi kumita ang mga manininda dahil walang saysay kung magnenegosyo sila nang hindi kikita.

Ngunit, kung kitaan lang ang pag-uusapan, pihadong napakalaki ng kita ng mga importer dahil sila ang nagtatakda ng presyo ng baboy sa palengke, sa panahong nakarating na sa mga palengke ang inangkat na mga baboy.

Hindi pahuhuli ang mga korap na opisyal sa BAI at DA sa kitaan.

Kung ang pamahalaan ay nabubuhay sa korapsyon, hindi puwedeng hindi kasali ang mga korap sa DA at BAI kapag mayroong patakaran ang importasyon, lalo pa’t pinayagan ni Duterte na lampas sa MAV ang aangkating mga baboy.

Pokaragat na ‘yan!

‘Di puwedeng walang hatag (DPWH) sa mga korap sa DA at BAI.

oOo

CP: 09985650271 / Viber #: 09457016911

Read More

NAKATANGGAP na naman ako ng reklamo ng OFW na nagtatrabaho sa Saudi Arabia.

Sa kanyang sulat, ikinuwento ni Pahmia Bukol ang matinding paghihirap na kanyang dinaranas mula sa kanyang among babae.

Literal na pang-aalipin ang ginagawa sa kanya ng kanyang amo dahil maging ang kanyang pagkain ay ipinagdaramot sa kanya.

Si Pahmia ay dumating sa Khamis Mushait, Abha, Saudi Arabia noong Pebrero 12 ng taong kasalukuyan, sa pamamagitan ng New Frontier Resources, Inc.

Ayon kay Pahmia: “Noong una maayos pa sila makisama, pero noong umabot na ako ng 2 months [ay] hindi na sila maayos magbigay ng pagkain. Ako po lahat ang bumibili ng mga gamit at pagkain ko na dapat po ay ang employer ko ang dapat mag-provide. Noodles at kubos lang po ang pinapakain sa akin. Tapos noong umabot na po ako ng 4 months ay lalong nag-iba ang kanilang ­pagtrato sa akin. Minsan pa nga ay pagkatapos ko po ­maglinis ay nagpahinga lang po ako nang kaunti at uminom ng tubig ay bigla akong hinampas ng mop na gamit ko sa paglalampaso ng sahig”.

“Last week po ay sinabunutan po ako ng amo kong babae, buti na lang po ay nagpunta ang anak ng amo kong lalaki na siyang tunay ko pong employer. Nagsumbong po ako sa ginagawa ng nanay niya sa akin. Matapos nito ay dinala na niya ako sa bahay niya at kinabukasan po dinala na ako sa ahensya ko rito sa Saudi Arabia”.

“Pero, imbes na ako ay pangalagaan ng ahensya ko ay pinabalik lang ako nito muli sa aking malupit na among babae. Ayon sa ­aking ahensya, nagbayad daw ang amo kong babae sa kanilang ahensya, kung kaya dapat na siya ay bumalik na lamang dito. Kinaka-takot ko lang po [ay] baka mas lalo pa akong saktan ng amo kong babae dahil sa aking pagsusumbong sa kanyang anak”.

Sa pagtatapos ng liham ni Pahmia, nakikiusap ito na: “Gusto ko na lang po umuwi kasi po ay may trauma na ako at baka kung ano pang masama ang mangyari sa akin dito. Kaya, humihingi po ako ng tulong na makauwi ako sa Pilipinas sa lalong madaling panahon”.

***

KUNG mayroon kayong nais idulog o ipaabot sa inyong abang lingkod, maaari kayong sumulat sa akin sa e-mail address saksi.ngayon@gmail.com o drchieumandap@yahoo.com.

Read More

TILA sampal sa huling State of the Nation Address, o SONA, ni Pangulong Rodrigo Duterte ang pananatili ng isang tauhan ng Bureau of Immigration (BI) sa Ninoy Aquino International Airport (NAIA) na garapalang kinokotongan ang mga Chinese national na hinaharang ang pagpasok sa bansa ng mga immigration officers.

Ayon sa ating nakalap na impormasyon, si alyas “GL” na isang immigration assistant na nakatalaga sa Border Control Intelligence Unit (BCIU) sa NAIA – Terminal 3 ay inilipat lang sa Terminal 1, imbes na ito ay tanggalin sa airport upang maiwasan na masangkot muli ito sa ­pagharass sa mga dayuhan.

Matatandaang dumating sa bansa noong June 9 ang tatlong Chinese nationals na sina Luo Zhiping, Yang Weirin at Zhou Qiang na hinarang ang pagpasok ng mga ito sa Terminal 3 at kinotongan ng halagang P1.2 milyon na nakapagbigay na ng ­paunang bayad na P800,000 sa pangakong aayusin sa main office ng BI ang kanilang recall of exclusion order, ngunit niloko ang tatlong dayuhan at pinabalik na sa kanilang bansa noong July 13 at sa kasamaang palad ay hindi ibinalik ang kanilang pera.

Bakit kaya hindi ito ­kayang tanggalin sa airport ng kanyang superior ­officers sa BI kasama rin kaya sa nakinabang sa P800,000 ang kanyang mga opisyal sa BCIU at Intelligence Division na nasunog na ang pera, kung kayat hindi na ito naibalik?

Ngayong araw sa SONA ng pangulo ay inaasahang ibibida nito ang walang humpay na pagtulong ng Chinese government sa pagdonate ng vaccine laban sa COVID – 19, ngunit alam kaya ng ­pangulo ang ginagawang harassment ng mga tauhan ng BI sa airport na si alias GL sa mga Tsekwa?

Ganu’n din ang pangongotong ni alyas “Macho Chiquito” sa BI main office sa mga dayuhang Chinese na nakapag overstay na sa bansa dahil sa tagal ng pandemic.

Ang malalang korapsyon na ito sa BI ay gawain lamang ng ilang opisyal ng ahensya na nais magpayaman sa kanilang sarili gamit ang kanilang kapangyarihan, ngunit hindi naman lahat ay mga korap.

oOo

PARA sa inyong Sumbong at Reaksyon, itext lamang ako sa 09158888410.

(ANG mga ipinapahayag sa kolum na ito ay sariling opinyon ng sumulat at hindi saloobin ng pahayagang SAKSI Ngayon – Patnugot)

Read More

KASUNOD ng balita ukol sa pagkakaroon ng lokal na kaso ng Delta Variant ng COVID -19 sa bansa noong nakaraang linggo, kinumpirma ng Department of Health (DOH) ang lokal na transmisyon nito noong ika-22 ng Hulyo.

Nauna nang sinabi ni Health Undersecretary Maria Rosario Vergeire sa isang briefing na hindi raw mapipigilan ang pagpasok ng Delta Variant sa bansa.

Ang ipinatupad na travel ban ng Pilipinas sa mga bansang may naitalang mataas na kaso ng Delta Variant ay hakbang lamang upang mabigyan ng karagdagang panahon ang pamahalaan upang mapaghandaan ang napipintong pagpasok nito.

Sa kasalukuyan, umabot na sa 47 ang bilang ng kaso ng Delta Variant na naitala ng ahensya.

Sa kabuuang bilang na ito, walo ang nananatiling aktibo kung saan ang mga ­pasyente ay kapwa mga wala pang ­bakuna kontra COVID – 19.

Ayon sa Centers for ­Disease Control and Prevention (CDC), ang Delta Variant ay maituturing na isa sa mga pinakanakakahawang respiratory disease na nakita ng mga siyentipiko.

Ito ay mabilis makahawa dahil ang isang indibidwal na may mayroong Delta Variant ng COVID-19 ay tinatayang mayroong 1,000 beses na higit na mas mataas na viral load kung ikukumpara sa orihinal na uri nito.

Ang magandang balita ay epektibong pangontra sa Delta Variant ng COVID-19 ang bakuna.

Ngayong kumpirmado na ang pagkakaroon ng lokal na transmisyon nito sa ating bansa, dapat ay mas maging agresibo ang ating programang pagpapabakuna.

Ito lamang ang tanging epektibong paraan upang makontrol at malabanan ang mas mapangahas na Delta Variant.

Ayon sa datos ng DOH, noong ika-18 ng Hulyo, mayroong 15,096,261 dosis ng bakuna ang naipamahagi na.

Sa kabuuang bilang na ito, 10,388,188 ang naibahagi bilang unang dosis, habang 4,708,073 naman ang naipamahagi bilang ikalawang dosis.

Tinatayang nasa 9.43% ng populasyon ang nakakuha na ng unang dosis ng bakuna, habang nasa 4.27% pa lamang ang nakakumpleto nito.

Kailangang paigtingin ang programang pagpapabakuna ng bansa kaugnay ng nagbabadyang pagkalat ng Delta Variant.

Makiisa tayo sa pamahalaan at magpabakuna sa lalong madaling panahon para sa karagdagang proteksyon.

Huwag nang matakot at lalong huwag nang maging mapili sa tatak ng bakuna.

Kailangan ng pamahalaan ang ating suporta.

Hindi biro ang kasalukuyang sitwasyon ng Indonesia, India, at iba pang bansang nauna nang naapektuhan ng Delta Variant.

Huwag nating hayaang mangyari ito sa Pilipinas.

May panahon pa.

Ako ay naniniwalang may magagawa pa tayo upang ­paghandaan ang Delta Variant na ito.

Read More