MGA EHERSISYONG MAGPAPASIGLA SA UMAGA

EHERSISYO-5

MAGANDANG simulan ang umaga ng ehersisyo na gigising talaga sa daloy ng iyong dugo.

Marami nang pag-aaral ang nakapagpatunay sa mga benepisyong hatid ng regular na pag-eehersisyo sa ating kalusugan, lalo na sa ating puso, baga, at mga buto at kalamnan.

Kaya naman mainam talaga na ito ang pinakaunang gawin sa uma­ga. Narito ang ilan sa mga simpleng ehersisyo na talaga namang manggigising ng buong araw mo:

JOGGING

Ang simpleng paglalakad o pagtakbo o jogging sa umaga ay mabuti para sa kalusugan ng puso. Ayos ito gawin sa mga mapupunong lugar para makalanghap ng sariwang hangin habang tumatakbo.

PUSH UP

Push upMadali lang itong gawin at pwedeng-pwedeng isingit sa busy schedule mo. Kahit saan basta’t may malawak na sahig na pwede kang humiga at mag-push up, go lang nang go. Gawin ito nang paulit-ulit na kasabay ng tamang paghinga — inhale kapag binababa ang katawan, at exhale naman kung itataas ang katawan. Matutulungan nitong palakasin ang mga kalamnan sa braso, balikat, at dibdib. Pwede ka pang magka-abs!

SQUAT

Magandang pampalakas ng hita, binti, at balakang ang leg squats. Kinakailangan lamang ibaba at iangat ang katawan sa pamamagitan ng tila pag-upo sa ere. Gawin ito pababa at pataas ng 12 hanggang 15 na ulit. Ingat lang sa mga nirarayuma.

LUNGES

lungesAng lunges ay ang paghakbang ng isang binti habang dumadahilig paharap (leaning forward). Pinapanatili ang posisyon nang ilang segundo pagkatapos ay ipapalit naman ang kabilang binti. Inuulit ito nang 12 hanggang 15, o depende sa ninanais.

JUMPING JACK

Karaniwan nang ginagawa ang jumping jack bilang warm-up exercise. Tatalon pataas kasabay ng pagbuka ng hita at paglapat naman ng mga kamay habang nakataas. Nakatutulong ito sa mga kalamnan ng hita at pati na sa balikat. Mas magandang gawin ito sa malawak na lugar.

Please follow and like us:
Read More

MARIJUANA GAMOT SA ECZEMA AT PSORIASIS

MARIJUANA-10

PARAMI na nang parami ang mga nagpapatunay na nakagagamot ng iba’t ibang klase ng sakit ang marijuana o ang cannabis, gaya ng eczema at psoriasis.

Sinabi ng researchers sa University of Colorado na may isang compound sa nasabing droga na nakatutulong upang mapagaling ang mga karaniwang kondisyon sa ating balat.

PsoriasisNagsagawa ang scientists ng trials sa anti-inflammatory compound na ang tawag ay CBD (cannabidiol) na makikita sa cannabis. Sabi sa pag-aaral, hindi umano ito mapanganib o nakaka-high.

Sinabi ni Dr. Robert Dellavalle, ang nanguna sa research na, “There’s a large segment of the population that doesn’t like using steroids, even if they are topical steroids on their skin. CBD could be an alternative, natural product for them to try.”

Ang naturang sangkap ay aprubado rin umano ng World Health Organization. Ilang health chiefs din sa buong mundo ang nagpatunay na wala itong “adverse effects”.

Ang kasamang researchers ni Dr. Dellavalle ay pawang nagtatrabaho sa may 40 may sakit na Parkinson’s at may kondisyon na seborrheic dermatitis.

Sinabi naman ni Ian Hamilton, drug researcher sa New York University na: “There is emerging evidence that chemicals within cannabis might offer potential health benefits.

“But we will need more than one research trial to be done before we can say whether this works or not.”

Aniya, posibleng tu­ma­gal pa ng maraming taon ang mga research bago makapag-produce ng gamot laban sa skin conditions.

EczemaNabatid na ang eczema, isang grupo ng disease na nagdudulot ng inflammation sa balat ay umatake na sa 6 million katao sa UK.

Kabilang sa mayroon nito ay ang sikat na singer na si Adele.

Higit naman sa 650,000 sa naturang bansa ang may taglay namang psoriasis, isang kondisyon sa balat na namumula, namamaga, nagsusugat at makati. Kumakalat ang psoriasis maging sa anit.

Please follow and like us:
Read More

IBAT’T IBANG PANALONG SARAP SA FRIULI TRATTORIA

(ANN ESTERNON)

Tayong mga Pinoy na mahilig kumain ay palaging naghahanap hanggang maaari ng mga pagkaing masasarap kahit ang presyo nito ay may kamahalaan.

Pero iba pa rin naman na makahanap tayo ng mga pagkain na sobra sa sarap pero ang presyo ay sasakto sa ating mga budget para kahit makarami ng kain ay uulit at uulit lamang dahil sulit na sulit ito.

Dito lamang sa UP Village sa Quezon City ay may isang pizza parlor na talaga namang dinarayo ng marami.

Ang kuwento, mura at masarap ang mga pagkain dito kaya naman naengganyo ka-ming sadyain ang lugar.

Ang tinutukoy natin ay ang kauna-unahang pizza store nila na nasa kahabaan lamang ng Maginhawa St. kung saan matatagpuan dito ang Friuli Trattoria.

Maliit ang pwesto nito. Tipikal na kainan – simpleng tables and chairs. May second floor na mas malaki ang espasyo. Pero, gayunman hindi natatapos ang kuwento sa hitsura lamang nito.

PINAGMULAN NG PANGALAN

friuli trattoria-4Bakit Friuli Trattoria?

Isang historical region ang Friuli sa Italy. Ang Trattoria ay isang murang Italian-style na kainan. Hmmm… sakto lang pala ang pangalan ng resto kung ganoon. Pero mabibitin kayo sa kain. Ang sigurado eh babalik kayo rito at manghahatak ng ibang masasama.

Unang nagpakilala ang sarap ng kanilang pizza noong 2006. At dahil sa hindi matatawarang sarap ng kanilang mga pagkain at serbisyo ay nasundan ito ng mga sangay sa iba pang mga lugar.

Sa oras pa lamang ng operasyon nila ay malalaman nang tunay silang puntahan ng mga tao dahil bukas ito mula alas-9:00 ng umaga hanggang alas-2:00 ng madaling-araw.

Karaniwang mga parok-yano ng Friuli Trattoria ay mga estudyante dahil ang lugar na ito ay malapit lamang sa mga eskuwelahan.

At dahil mga estudyante ang kanilang mga suki, ang presyo ng mga pagkain dito ay pang-estudyante rin naman. Bagama’t mura ay hindi naman tinipid sa kalidad at sa lasa.

URI NG MGA PIZZA

friuli trattoria-3Ang mga ipinagmamalaki nilang mga pizza na tunay naman talagang best sellers ay ang Tre Formaggi, Margherita, Viva Venezia, Pancetta, at Spiced Romano na nasa presyo lamang na mula P240 hanggang P290.

Mayroon din silang classic Hawaiian, Marinara, Pepperoni, All-Meat na nasa presyong mula P225 hanggang P295.

Samantala, ipinagmamalaki rin ng Friuli Trattoria ang uri ng kanilang pizza na Vegetale o mga pizza na pinasarap ng mga gulay. Ito ay mula sa Buono Vendure, Funghi Pizza, at Antonio’s Pizza. Ang mga ito ay may lahok na tomatoes, onions, mushrooms, eggplants, black olives at iba pa.

Magandang offer din nila ang kanilang “Half and Half” kung saan kapag hindi ka makapagdesisyon ng gugustuhin mula sa dami ng pizza nila ay pwedeng ang kalahati nito ay isang uri habang ang kalahati ay isang uri pa ng pizza. Ang presyo nito ay idedepende sa kung anong uri ng pizza ang mas mataas ang presyo.

Pwede rin namang magpadagdag pa ng toppings mula sa extra cheese, veggies at special toppings.

Hinahabol din ng mga parokyano rito ang iba pa nilang meal tulad ng mga pasta, at desserts.

Sa pasta ay wala ring pagsisisihan sa sarap ng kanilang Puttanesca, Pesto, Carbonara at iba pa. Panalo rin sa sarap ang kanilang Mozarella Sticks at Toasted Ravioli.

Mabibitin tayo sa kuwentuhan kung ito lamang ang pagbabasehan. Mas iba pa rin kung sasadyain ang lugar para kayo mismo ang huhusga para rito.

BRANCHES

friuli trattoria-5Unang naging store ng Friuli Trattoria ay ang Maginhawa St. sa Quezon City.

Kalaunan ay nagkaroon na rin sila ng branches sa iba pang mga lugar.

Bukas din sila sa deliveries at reservations, tumawag lamang sa 5046502, at 09178778411.

 

*#79A Maginhawa St.

UP Village Quezon City

(02) 434 1416

 

* UP Town Center,

216 Katipunan Ave.

Diliman, Quezon City

 

*Philam

West Avenue, 27 W. Lawin,

Quezon City

Please follow and like us:
Read More

MGA SINTOMAS AT SANHI NG LAGNAT

LAGNAT

ANG lagnat o “fever” ay isang karaniwang sakit lalo na ngayong tag-ulan. Pero isa rin ito sa mga sakit na may iba’t ibang pwedeng pagmulan at hindi rin dapat balewalain.

ANO BA ANG LAGNAT?

Ang lagnat ay sintomas lamang ng sakit na dumapo sa katawan. Tuwing may impeksyon, sakit o iba pang sanhi, nagiging aktibo ang ating hypothalamus at tinataasan nito ang temperature ng ating katawan para magbigay ng signal na mayroong mali.

Ang hypothalamus ay isang parte ng utak na may direct control sa temperature ng ating katawan.

Bagama’t ang lagnat ay normal na proseso ng ating katawan para depensahan ito mula sa impeksyon dulot ng mikrobyo, maaari rin na ito ay dulot ng tonsillitis, sipon at iba pang mga sakit.

MGA SINTOMAS

– Temperature na higit sa 37.8°C

– Mabigat na pakiramdam

– Pagsakit ng kasukasuan o joints

– Pagsakit ng ulo

– Pagsusuka

– Pagkahilo

– Pagkawalan ng gana sa pagkain

MGA SANHI NG LAGNAT

– Trangkaso o flu

– Sipon o common colds

– Impeksyon sa tainga

– Impeksyon sa lalamunan o tonsillitis

– Sakit sa bato o UTI

– Pulmonya o “pneumonia”

– Sakit sa tiyan o gastroenteritis

– Bulutong tubig o chicken pox

– Tigdas o measles

– Sobrang pagkahapo o “fatigue”

– Pagbakuna o vaccination shots

MGA DAPAT GAWIN KAPAG MAY LAGNAT

– Uminom ng paracetamol

Ang paracetamol ay isang mainam na gamot para mapababa ang temperature at mabawasan ang pananakit ng katawan.

– Paglagay ng cold-compress sa noo

Ang paglagay ng malamig na bimpo sa noo ay isang mainam na paraan para mapababa ang temperature ng katawan

– Pag-inom ng mara­ming tubig

Dahil sa mataas na temperatura, nauubos o natutuyo ang fluid sa katawan, kaya dapat parating uminom ng tubig para maiwasan ang dehydration.

– Pagligo gamit ang sponge bath

Para mapanatiling malinis at presko, pwedeng maligo o magpunas gamit ng bimpo o sponge na binasa gamit ang mali­gamgam na tubig.

– Pagsuot ng preskong damit

Siguraduhin na presko ang suot para kumpor­table at hindi madalas pagpawisan.

– Pagpalit ng damit nang regular

Kapag pinagpawisan, agad na mag-sponge bath at magpalit ng panibagong damit para maiwasang lumala ang lagnat nito.

MGA DAPAT IWASAN KUNG MAY LAGNAT

– Pag-inom ng iba’t ibang gamot

Maliban sa paracetamol, iwasang uminom ng iba pang gamot lalung-lalo na kung hindi naman nireseta ng doktor.

– Iwasang maligo gamit ang malamig na tubig o pagpunas ng alcohol

Maaaring lumala ang lagnat kung maliligo gamit ang malamig na tubig o magpupunas ng alcohol. Gumamit lamang ng maligamgam o ‘lukewarm’ na tubig sa pagpunas o pagligo.

– Iwasan na balutin sa makapal na kumot ang maysakit

Importante na mapanatiling presko at kumpor­table ang pakiramdam para hindi tumaas pa ang temperatura.

KAILAN DAPAT KUMONSULTA SA DOKTOR?

Ang lagnat ay kusang gumagaling, pero maaari rin na ito ay sanhi ng isang malubhang sakit, kung kaya’t may mga pagkakataon na kakailanganin nang lumapit sa isang doktor.

Ang mga sumusunod ay mga sintomas o senyales na kinakailangan nang ikonsulta ang lagnat sa doktor:

– Lagnat na pabalik-balik

– Temperatura na higit sa 39°C

– Pagkaranas ng kumbolsyon

– Pagkaranas ng sobrang pagdumi

– Pagkaranas ng matinding pananakit ng ulo

– Pagkaranas ng matinding pananakit ng katawan

May mga mararamdaman tayong mga pangkaraniwang sakit na hindi rin dapat balewalain. Ugaliin ang pag-inom ng vitamins o pagkain ng mga masusustansiyang pagkain para lumakas ang resistensiya laban sa mga ganitong sakit.

Please follow and like us:
Read More

MURO-AMI: TRADISYONG DELIKADO SA KARAGATAN

MURO-AMI-1

Kung yamang tubig lamang ang pag-uusapan ay talaga namang sagana ang Pilipinas diyan.

Magtataka pa ba naman tayo gayong napalilibutan ang bansa ng tubig at dahil dito ay sagana tayo sa mga makukuha sa ilalim ng tubig na ito. Pero ang totoo hindi tayo ganoon kasagana dahil marami sa atin ang nagpapabaya at walang alam kung paano ito gagamitin, iingatan at pasasaganahin.

Sa isang datos, umaabot sa halos limang milyong katao ang nabubuhay sa pangingisda sa Southeast Asia.

Dito sa atin, 80 hanggang 90 porsento ng pinagkakakitaan ay nanggagaling sa pangingisda. Ngunit may iba rin naman sa ating mga kababayan ang tila buhay lamang nila ang inaatupag at walang paggalang sa mga buhay na nasa ilalim ng karagatan.

May kanya-kanyang paraan para makuha ang anumang makukuha sa ilalim ng dagat para kumita ng salapi. Hindi rin naman lingid sa kaalaman natin na may pumaparaang hindi patas at nagiging ilegal ang kanilang ikinabubuhay mula rito tulad ng pagdidinamita at ang kilalang muro-ami.

May mga gumagamit ng mga dinamita bilang madaliang paraan para lamang makapangisda nang marami. Ngunit sa pagdidinamitang ito ay nasisira rin naman ang ating coral reefs.

Samantala, ang muro-ami o muroami ay katagang ginagamit bilang pamamaraan ng pangingisda – epektibo ngunit delikado.

Ang coral reef ay ecosystem na nasa ilalim ng tubig na dapat sana ay naiingatan.

Ang mga koral ay matatagpuan saan mang karagatan sa buong mundo.

Muro ami 2Ayon sa kasaysayan, nagsimula ang muro-ami sa Pilipinas noong 1930s na ipinakilala at itinuro sa ating mga Pinoy ng mga Hapon.

Ang muro-ami ay epekibong paraan para ang mga mahihirap kuning mga isda tulad ng labahita, dalagang-bukid at iba pa nito ay maling malambat.

Ang mga nagsagawa ng muro-ami ay ang mga menor de edad na ang mga pinipili ay mga lalaki. Hindi basta simpleng dami nila ang kailangan para magawa ang pamamaraang ito. Karaniwang umaabot sa isandaang bilang ng mga batang lalaki ang isinasabak sa ganitong gawain.

Karaniwan ding isang malaking barko ang mga sinasakyan ng mga bata at sa kalagitnaan ng karagatan ay gagamit dito ng napakalaking lambat hanggang sa bumababa ito sa tubig at pumailalim pa.

Goggles lamang ang gadget ng mga diver kaya’t ang mga kilos nito sa ilalim ng dagat ay kailangang madalian dahil delikado at maaari nilang ikapahamak.  Minsan pa ay may namamatay sa kanila kapag sadyang kinukulang sa hangin.

Susundan ito ng pagtalon sa tubig at pagsisid ng mga bata ng may lalim na 90 talampakan. Hawak ng mga batang ito ang kanilang mga matitibay na bato o metal weights na siyang ipupukpok sa mga koral upang gambalain at palabasin ang mga iba’t ibang uri ng isda at lamang-dagat na naririto.

Kapag nakalabas na ang mga isdang ito hanggang sa sila ay pumormang isang malaking grupo ay agad din namang kikilos ang mga bata upang masigurong malalambat talaga ang kanilang mga target.

Mapanganib ang muro-ami dahil sinisira nito ang coral reefs at naaabuso ang mga bata.

Nakalulungkot na batay sa pag-aaral, kapag nasira ang coral reefs ay aabot pa ng 35 hanggang 50 taon para ito ay maka-recover pero hanggang sa 50 porsyento lamang.

Ang nakalulungkot pa rin dito, may balita pa ring may gumagawa pa ng tradisyong muro-ami. Kawawa ang karagatan at ang mga nabubuhay dito. Ganoon din ang mga bata at iba pang divers na nagsasagawa nito.

Please follow and like us:
Read More

MGA PARAAN PARA BUMANGO ANG BAHAY

ESSENTIAL SMELL DIFFUSERS

Ang isang paraan para maging mabango ang bawat kuwarto ng bahay ay hayaang maging bukas ang mga bintana nito nang pansamantala upang ang hindi kaaya-ayang amoy ay makalabas muna at ang fresh air ay makapasok.

Pero ang naturang suhestiyon ay hindi rin naman laging maaasahan.

Para sa kaligtasan ng ating kalusugan ay iwas din naman tayo para makaiwas tayo sa mga synthetic scent na maraming mga kemikal. At upang iwasan ito ay mayroon namang opsyon para rito gaya ng mga sumusunod…

– ESSENTIAL SMELL DIFFUSERS. Lagyan lamang ito ng tubig at patakan ng ilang beses ng essential oils.

– SCENTED CLEANING VINEGAR. Pwede rito ang lemon scented vinegar para sa paglilinis. Gumamit lamang ng white vinegar, lagayan, balat ng citrus fruits tulad ng oranges, lemons, limes, grapefruits at pwede ring lagyan ng herbs. Ilagay lahat ng balat at isunod ang herbs sa isang maliit na pan, ilagay ang suka at painitan ito nang bahagya. Hayaang lumamig at iwan nang magdamag at pwede nang ipanglinis ito.

– CINNAMON AND GINGER. Magpakulo ng luya na sinamahan ng ginger. Kapag lumamig na ay isalin sa open jar. Huwag itong takpan upang sumingaw lamang ang masarap at mabangong amoy nito sa bahay.

Please follow and like us:
Read More

DIY: FLOWER GARLAND PARA SA BAHAY

garland

Hindi lahat ng do it yourself (DIY) project ay madaling gawin pero mayroon sa mga ito na mapagtitiyagaan lalo kung ang target natin ay mapaganda ang bahay sa gagawing ito.

Ang DIY na ito ay ang flower garland na madalas ilagay sa loob ng bahay partikular sa mga bintana.

Ang flower garland na ito ay walang pinipiling okasyon kaya’t anytime ay pwedeng idisplay o kahit sa buong taon basta maging maalaga lamang dito na hindi marumihan. Ang pwede at mas magandang uri nito ay ang mga artificial flower para hindi magastos kumpara sa paggamit ng fresh flowers.

Pwede rin namang gumamit ng paper flowers bilang alternative.

Kung gusto naman na maging motif ito ay perfect ito para sa isang wedding occasion, baby shower, nursery room para sa baby girl.

Sa color scheme ay mas may dating kung ito ang soft corals and peaches.

MGA KAKAILANGANIN

– iba’t ibang uri ng artificial flower

– iba’t ibang uri ng artificial greens o leaves

– cotton rope

– floral wire

– hot glue

– wire cutters

– scissors

PARAAN NG PAGGAWA:

Tanggalin ang mga artificial flower mula sa stems. Sunod ay kunin ang tali at gumawa ng loop sa isang dulo nito saka talian ng floral wire upang hindi makawala.

Sa kabilang dulo ng tali ay gumawa rin ng loop at lagyan din ng floral wire.

Isunod dito ang paglalagay ng isang piraso ng greenery sa ibabaw ng tali at gumamit ng floral wire para ma-attach ang tali sa tangkay. Putulin ang sobrang tangkay gamit ang wire cutters.

Sa kabilang dulo ng tali, muling ulitin ang paglalagay ng isang piraso ng greenery sa ibabaw ng tali at gumamit ng floral wire para ma-attach ang tali sa tangkay. Siguraduhing magiging balanse ang itsura.

Patuloy na lagyan ng greenery hanggang sa maging balanse at maganda ang pagdedekorasyon dito.

Maaaring gumamit ng ilang foliage mula sa floral bouquet para malagyan ang anumang mga empty space.

Gumamit ng hot glue para maidikit ang mga bulaklak sa tali at siguraduhing pantay ang pagkakalagay nito.

Kapag nabuo na ang magandang garland ay ilagay na ito at i-secure sa inyong bintana o kung saang parte ng looban ng inyong bahay.

Please follow and like us:
Read More

PAGKAING BUKID: LARAWAN NG SARAP

Ararawan

Ang buhay ng mga magsasaka o ang mga taong laki sa mga lalawigan ay sanay sa payak lamang na pamumuhay at kabilang dito ay ang kanilang mga kinakain.

Ang mga pagkaing ating tinutukoy ay ang mga putaheng bagay na bagay lamang sa simpleng salu-salo pero walang dudang makapagbibigay ng totoong kabusugan sa ating sikmura.

Ang mga putaheng ito ay karaniwang tinatawag na pagkaing bukid o sa bukirin o sa simpleng tahanan lamang madalas na nakakain. Larawan ang mga pagkain ito ng kasimplehang pamumuhay ng ating mga kababayan.

Karaniwan din na ang mga lahok sa mga pagkaing ito ay galing mismo sa bukirin o nakukuha sa kalapit na bukirin.

Alamin nating ang mga pagkaing bukid na ito…

ARARAWAN

Ang pagkaing exotic na ito ay popular sa mga taga Norte partikular sa mga Kapampangan at mga Ilocano.

Ang ararawan ay termino para sa cricket, kamaru o sa mga Katagalugan ito ay tinatawag na kuliglig o susuhong.

Ang lutong bagay dito ay adobo at pwede rin namang simpleng pinirito o ginisa lamang.

Nililinis muna ang ararawan at tinatanggal ang mga lamang-loob nito habang ang iba ay mas gustong ang internal organs nito ay kumpletong nasa loob pa rin.

Sa pagluluto ay karaniwang pinakukuluan muna ang ararawan sa loob ng limang minuto, saka tatanggalin mula sa pinagkuluan at iluluto naman sa nais na espesyal na putahe.

TIPAKLONG

Kung may ararawan ay mayroon din namang nabubuhay na o sasakto na sa pagkain tulad ng tipaklong.

Silam-silam ito kung tawagin sa Isabela. Gamit ang kamay, ito ay hinuhuli ng mga magsasaka lalo na sa kanilang mga taniman.

Sa paghahanda nito ay tinatanggalan ang mga tipaklong ng mga pakpak at pangil. May iba naman na walang anumang tinatanggal sa tipaklong na kanilang nahuli.

Ang pagkakaiba sa ibang pagkaing bukid, ito ay kinakain nang buhay. Ayon sa mga kumakain nito, mas kakaiba raw ang lasa ng tipaklong kung kakainin nang sariwa, buhay na buhay o sadyang gumagalaw pa.

Nakagawian nang kainin ito bilang pamatid-gutom na rin ng mga magbubukid. Wala rin namang napabalitang may namatay na sa pagkain nang buhay na tipaklong.

BISUKOL

Ang bisukol (sa Ilocano) o kuhol ay masarap ding kainin at hilig na hilig ng mga taga-bukid.

Kapag ito ang usapin sa pagkain, mas maraming pumipili nito kung ang pagkakaluto ay ginataang kuhol na may rekadong kangkong, sili, bawang, sibuyas o ano pang magpapakumpleto sa sarap ng pagkaing ito.

PALAKA

OLYMPUS DIGITAL CAMERA

Natural na papasok sa usapang pagkaing bukid ang palaka. Natural ding ang uri nito ay palakang bukid na sinasabing malinis kumpara sa iba dahil sa bukirin lamang ito mas madalas na makuha.

Kalasa nito ay katulad lamang sa manok na malinamnam at depende sa pagkakaluto ay talaga namang kasasabikan.

Ilan sa mga piling uri ng pagluluto rito ay ang adobo, pinirito, ginisa, at ginataan sa kamias.

KANGKONG AT TALBOS NG KAMOTE

Kasimplehan man, wala ring tatalo sa sarap ng ensaladang kangkong o talbos ng kamote.

May mga taong sadyang nagkakasya na rito bilang pagkain lalo na sa katanghalian matapos ang kalahating araw na pagtatrabaho sa bukirin.

Dahil hindi magastos ay madali rin namang ihanda at pagsaluhan.

Ang iba pang mga nilalahok dito ay kamatis, sibuyas, bawang, at paminsan na sinasamahan din ng katas ng kalamansi para ito ay mas maging malasa.

Isa pang uri ng putahe para sa kangkong ay ang ginisa nito lalo na kung maraming kamatis at napakuluan nang maayos para lumabas ang tunay na lasa at sarap.

UOK

UOKMay mga pagkain talaga na bagama’t kakaiba ay pwedeng maging angat ang lasa at maging bahagi na ng ating hapag kainan.

Ang uok o woodworm (o coconut worm) ay masarap kainin lalo na kung ito ay inadobo.

Ang uok ay larva ng salaginto na matatagpuan sa katawan o torso ng puno ng niyog.

Please follow and like us:
Read More

FIBROADENOMA: BUKOL SA DIBDIB

FIBROADENOMA

Naging usap-usapan noon online ang litrato ng isang babae na mayroong sensitibong kondisyon.

Ayon sa post, si Jonalyne ay mayroong sensitibong kondisyon na nagdulot ng sobrang paglobo ng kaniyang dibdib. Pinaniniwalaan ni Jonalyne na ang kaniyang kondisyon ay dulot lamang ng kaniyang pagbubuntis.

Maraming netizen ang nagulat at nagbigay ng kanilang mga reaksyon ngunit isa sa mga ito ang nakapagsabing baka ito ay fibroadenoma.

ANO BA ANG FIBROADENOMA?

Ang Fibroadenoma ay non-cancerous breast tumor na binubuo ng glandular tissue at stromal (connective) tissue.

Kababaihan lamang ang karaniwang nagkakaroon nito na maaaring makita sa kahit anong edad. Ito ang kadalasang lumiliit pagtapos ng menopause.

Ang ibang fibroadenomas ay maaaring makapa pero ang iba ay matutuklasan lamang kapag ginamitan ng mammogram at ultrasound.

SANHI NG FIBROADENOMA

Hindi pa natutuklasan sa ngayon kung ano nga ba ang sanhi ng fibroadenoma. Pinaniniwalaan lang na ito ay lumalabas dahil sa pagtaas ng sensitivity sa estrogen (primary female sex hormone).

MGA URI NG FIBROADENOMA

SIMPLE FIBROADENOMA

Karamihan ng mga fibroadenoma ay may la­king 1–3cm, ito ay tinatawag na Simple Fibro­adenoma. Kapag tiningnan sa microscope, ang mga ito ay pare-pareho lang at hindi nito pinapalaki ang tiyansa ng pagkakaroon ng breast cancer.

COMPLEX FIBROADENOMA

Kapag ang nakita sa microscope ay iba’t ibang katangian ng cells, ito ay Complex Fibroadenoma.

Kapag nagkaroon ng Complex Fibroadenoma, nangangahulugan lamang ito na may kaunting tiyansa na ito ay maging breast cancer sa hinaharap.

GIANT OR JUVENILE FIBROADENOMA

Kadalasan, ang fibroadenoma na ito ay lumalaki nang mahigit sa 5cm. Ito ay kadalasang nakikita sa mga teenager na babae.

Nagdudulot ba ito ng breast cancer?

Ang mga babaeng may Complex Fibroade­noma ay mayroong maliit na tiyansa ng pag-deve­lop ng breast cancer.

PAANO ITO MAGAGAMOT?

Maraming doktor ang nagrerekomendang tanggalin ang mga fibroadenoma lalo na kung ito ay nagdudulot ng mga pagbabago sa laki ng dibdib at upang makasiguro na rin na hindi cancer ang nagdudulot nito.

Kung minsan kasi, ang tumor na ito ay tumitigil nang kusa sa paglaki o pagliit nang walang ginagawang paggamot kaya’t maaari itong hayaan at patuloy na bantayan hanggang makasiguro ang mga doktor na ito ay fibroadenoma at hindi breast cancer.

Pinapayuhan ng mga doctor ang mga babaeng may fibroadenoma na patuloy na komunsulta sa espesyalista upang makasigurado na hindi ito lalaki.

Samantala, hindi pa nakukumpirma kung ang kondisyon na ito ni Jonalyne ay dulot ng fibro­adenoma.

Please follow and like us:
Read More