BINITBIT ng Manila Police District ang actor na si Matt Evans sa bisa ng warrant of arrest sa kasong paglabag sa Republic Act 9262 o “Anti-Violence Against Women and Their Children Act of 2004”
kaugnay sa kasong isinampa ng kanyang dating live-in partner na si Johnelline Hickins.
Ayon sa report ng District-Warrant and Subpoena Section ng MPD, alas-11:30 ng tanghali nitong Biyernes (Hulyo 31) nang arestuhin si Evans o Matthew Evans Nicolas sa tunay na buhay sa kanyang bahay sa A.H. Lacson Avenue, Sampaloc, Manila ng grupo nina P/Executive Master Sgt. Manuel Aceveda, P/SMS Rem Sychangco, P/Msg June Ricohermoso, at P/SSG Albert Acevedo sa bisa ng warrant of arrest na inisyu ni Pasig Regional Trial Court (RTC) Branch 12, Presiding Judge Carmencita Lacandazo Logan.
Nasa kustodiya ng WSS si Evans habang hindi nakapaglalagak ng piyansa na halagang P36,000.00.
Si Evans na kasal sa negosyanteng si Riza Katrina Evans, ay nagsimulang makilala sa TV reality show na Pinoy Big Brother at naging bida sa teleserye na “Da Adventures of Pedro Penduko”, “Tanging Yaman” at “Rosalka”. (RENE CRISOSTOMO)
51 
