(NI BETH JULIAN)
IKINALUNGKOT ng Malacanang ang malagim na sinapit ng isang batang lalaki sa San Antonio, Makati City na natagpuang patay at nakitaan ng senyales ng panggagahasa.
Sinabi ni Presidential Spokesperson Salvador Panelo, nagpapaabot ng pakikiramay sa pamilya ng bata ang Malacanang partikular si Pangulong Rodrigo Duterte sa sinapit nito.
Ayon kay Panelo, ito ang dahilan kung bakit nais ng Pangulo na magtuluy-tuloy lamang ang maigting na kampanya kontra ilegal na droga.
Iginiit ni Panelo na ang nasabing uri ng krimen ay hindi titigil kung hindi tuluyang mapupuksa ang mga sindikato ng ilegal na droga.
Gayunman, hindi naman nakikita ni Panelo na mayroong pagkukulang ang mga alagad ng batas sa pagsugpo ng ilegal na droga.
Depensa ni Panelo, sadyang mahirap puksain ang operasyon ng ilegal na droga kung hindi makikipagtulungan ang mismong taumbayan.
Aminado si Panelo na marami talagang naeenganyong pumasok sa kalakalan ng ilegal na droga dahil tawag ng pangangailangan sa salapi.
101 
