NANAWAGAN ang Department of Interior and Local Government (DILG) sa publiko na ipagbigay-alam sa kanila ang sinomang kapitan o opisyal ng barangay na humihingi muna ng voter’s ID sa kanilang mga nasasakupan bago mabigyan ng rasyong food packs.

Sinabi ni DILG Undersecretary Jonathan Malaya, walang ganoong patakaran na dapat ipatupad lalo na’t lahat aniya sa mga panahong ito ay nangangailangan.

Hindi aniya dapat pairalin ang anomang anyo ng pulitika sa ganitong klase ng sitwasyon at krisis na kung saan ay pawang apektado ang lahat.

Sa kabilang dako, nanindigan naman si Usec. Malaya na per household ang pagbibigay ng food packs na tatagal ng 3 araw at wala nang kailangan pang i-presenta sa mga opisyal ng barangay na anomang dokumento bago sila mabiyayaan ng rasyon.

Kaya’t ang apela ni Usec. Malaya, huwag mag-atubiling isumbong sa kanila ang mga nagpapatupad ng No voter’s ID, No food pack policy at agad nila itong aaksiyunan. CHRISTIAN  DALE