(Ni KEVIN COLLANTES)
Tatanggalan ng prangkisa ng Department of Transportation (DOTr) ang mga operators na mabibigong tumalima sa Public Utility Vehicle Modernization Progran (PUVMP) hanggang sa deadline nito sa taong 2020.
Ayon kay Transportation Undersecretary Mark de Leon, sa taong 2020 ay bibigyan muna nila ng notice ang mga naturang operators at kung hindi pa sila tumatalima sa programa ay babawian na sila ng prangkisa.
“By 2020 bibigyan kayo ng notice, kapag hindi pa kayo gustong mag-modernize, io-open po namin ang inyong prangkisa sa ibang operators,” babala pa ni De Leon, sa panayam sa radyo.
“Let’s stick to the deadline at kung hindi kayo makaka-comply, pasensyahahan na lamang po tayo,” aniya pa.
Ayon sa DOTr, layunin ng programa na i-modernize at i-phase out na ang mga lumang passenger jeepney at palitan ng Euro 4 compliant vehicles na kayang tumakbo sa renewable energy.
Bawat unit ng naturang behikulo ay nagkakahalaga ng mula P1 milyon hanggang P2.2 milyon.
Sa ilalim ng programa, pagkakalooban naman ng P80,000 na subsidiya ng pamahalaan ang mga mag-a-avail ng behikulo.
Ire-require din ng pamahalaan ang mga operator na may parehong ruta na i-consolidate ang kanilang prangkisa ipang maiwasan na ang kultura ng kumpetisyon sa transport service.
Paliwanag ni De Leon, sa pamamagitan nito ay magiging swelduhan na ang mga driver.
“Kapag boundary system kasi ang ating mga driver, nagiging kumpetisyon sa kalsada dahil sa pagkuha ng mga pasahero,” anang opisyal.
Umaasa naman si De Leon na sa tulong ng PUV modernization program ay magiging mas madali na rin ang sistema ng transportasyon sa bansa.
Matatandaang noong Setyembre 30 ay nagdaos ng nationwide transport strike ang ilang transport groups upang ipakita ang kanilang pagtutol sa PUV modernization program dahil hindi umano nila ito kakayanin.
Sa kabila nito, nanindigan naman si De Leon na hindi na maaari pang maantala ang PUV modernization.
Paliwanag nito, maaari rin namang makakuha ng discount ang mga operators kung kabilang sila sa isang operatiba.
236 
