HUMINGI ng pang-unawa at paumanhin ang Malakanyang sa mga Pilipino na may kamag-anak na nahihirapang umuwi ng Pilipinas ngayong Kapaskuhan.
Kailangan kasing muling i-adjust ng pamahalaan ang testing at quarantine protocols para i-delay o maantala ang pagpasok ng coronavirus (COVID-19) Omicron variant sa bansa.
Ang pahayag na ito ni acting Presidential spokesperson at Cabinet Secretary Karlo Nograles ay matapos na magpalabas ang Inter-Agency Task Force (IATF) for the Management of Emerging
Infectious Diseases ng bagong testing at quarantine protocols para sa mga biyahero mula sa non-red list countries, nitong Huwebes.
Umaasa si Nograles na mauunawaan ng publiko kung bakit nagdesisyon ang IATF na muling i-adjust ang travel at quarantine restrictions.
“Whatever changes or amendments adopted are prompted by a continuous assessment of prevailing conditions. Tuloy-tuloy po ang assessment natin ng mga developments sa buong mundo,” ayon kay Nograles.
Samantala, hiniling ni Nograles sa international travelers na mahigpit sundin ang protocols.
Pinaalalahanan din niya ang implementing agencies na sundin ang guidelines na ipinalabas ng IATF. (CHRISTIAN DALE)
47 
