Pagpabor ni Velasco sa mga kaalyado sinita sa Senado DAGDAG-BAWAS SA 2021 BUDGET BINIRA

TINAWAG ni Sen. Panfilo Lacson na “improper” o hindi aksyon ng isang lider ang ginawang dagdag-bawas ni House Speaker Lord Allan Velasco sa pondo ng mga kaalyado at kritikong kongresista na kitang-kita umano sa ipinasa ng Kamara na 2021 national budget.

Ayon kay Lacson, halata ang pagpabor ni Velasco sa kanyang mga supporter samantalang kitang-kita rin ang paglaglag nito sa mga kongresista na kaanib ni dating House Speaker at Taguig Rep. Alan Peter Cayetano.

“Congressmen interfered in the aportionment of the lump sum appropriations under the Department of Public Works and Highways (DPWH) budget. That’s the reason why may mga na-register na increases and decreases when the leadership changed in the House of Representatives. Evidently, noticeable ito, na yung mga malalapit sa bagong Speaker, mayroong naka-register na mga increases at yung mga malalapit sa dating Speaker, `yun ang naka-experience naman ng reduction,” paliwanag ni Lacson.

Hindi na inisa-isa ni Lacson ang mga binawasan ng budget maliban kay Camarines Sur Rep. LRay Villafuerte na siyang may pinakamalaking kaltas habang ang ilan na nakatamasa ng malaking budget increase ay ang Benguet, Albay at Abra.

Kinumpirma ni Lacson na hindi naman nabawasan ang budget ni Cayetano sa kanyang distrito.

Sinabi ni Lacson na mali ang ginawang dagdag-bawas sa pondo dahil lalong naging malaki ang disparity o agwat ng naging hatian ng pondo sa pagitan ng mga kongresista, halimbawa na ang P15.351Billion sa isang distrito kumpara sa P620M sa ilan.

Una nang kinumpirma ni Cayetano ang naging rebelasyon ni Lacson. Aniya, P300M hanggang P1 billion ang naging kapalit ng pagsuporta ng mga kongresista kay Velasco, ito umano ang dahilan kung bakit nagmamadali sa turnover ng Speakership noong Oktubre.

Dinepensahan din ni Cayetano ang mga kongresista na malapit sa kanya na wala sa Top 10 na may malaking budget, sa katunayan ang mga pwesto nito sa listahan ay pang 155, 204, 219, 193 at 154.

Itinanggi ni ACT-CIS Party-list Rep. Eric Yap, chairman ng House Committee on Appropriations ang alegasyon ni Lacson na ang mga kaalyado ni Velasco ang nakakuha ng “last minute” increase sa alokasyon sa General Appropriations Bill (GAB). Gayunpaman, nanindigan si Lacson na malinaw ang listahan, mula P396B ay biglang lumobo sa P474 ang infrastructure budget ng mga mambabatas na nakapaloob sa DPWH 2021 budget.

Samantala, sinabi ni House Minority Leader Stephen Paduano na ang district allocations na kinukuwestiyon ni Lacson ay maaari pa namang mabago sa bicameral conference committee. (ESTONG REYES)

50

Related posts

Leave a Comment