WALA pang nakikitang pangangailangan o dahilan ang pamahalaan para magpatupad ng mahigpit na community quarantine sa kabila ng pagsirit ng bilang ng bagong COVID-19 cases.
Ito ang inihayag ni Cabinet Secretary Karlo Nograles sabay sabing maaari namang magpatupad ang local governments ng granular lockdowns.
“Right now, hindi naman kinakailangan—if you’re talking about mag-MECQ (modified enhanced community quarantine) ba tayo or ECQ (enhanced community quarantine). Hindi naman po kailangan,” ang pahayag ni CabSec Nograles nang tanungin kung may tsansa ba na ang bansa ay isailalim sa “stricter lockdown.”
“The LGUs already have a localized and granular lockdown mechanism. Kumbaga ‘yan na ‘yung ECQ na granular and localized level per barangay, per street, per building, per purok, per sitio. They can already do that,” aniya pa rin.
Sinabi pa ni CabSec Nograles na ang “quick response and actions” ng mga lokal na pamahalaan ay imo-monitor sa susunod na dalawang linggo “and then we’ll take it from there.”
Ang Metro Manila at ang 9 na iba pang lugar sa Pilipinas ay nasa ilalim ng general community quarantine, itinuturing na 2nd loosest level, ngayong buwan.
Ang natitirang bahagi ng bansa ay nasa ilalim naman ng modified general community quarantine, itinuturing na “least stringent restriction.”
Ayon kay CabSec Nograles, ang pagtaas ng bilang ay hindi masasabing “conclusively” na ina-attribute sa mas transmissible variants na orihinal na na-detect sa United Kingdom at South Africa. (CHRISTIAN DALE)
54 
