IBINULGAR ni Senador Richard Gordon ang umano’y sindikato ng COVID-19 test sa airport na posibleng isa sa layunin ng ilang tiwali sa PhilHealth kaya’t dine-delay ang pagbabayad ng utang sa Philippine Red Cross na umaabot na sa P1.1 bilyon.
Sinabi ni Gordon na sinamantala ng ilang sindikato ang kawalan ng pwesto ng PRC sa paliparan at agad na sinasalubong ang mga OFW at dadalhin sa linya kung saan mas mahal ang singil sa test.
“Sa Airport ang test dun P3500, wala [kaming] pwesto dun, hanggang 4 days ago naglagay na ako [ng] pwesto. Umaangal na mga OFW at pasahero dahil dinadala sila sa linya na naniningil ng P10K or P7K, gusto mo mabilis P10K, kung gusto mo pinakamabilis P20K,” saad ni Gordon.
“‘Yan ang titignan natin, talagang may nagsasamantala,” diin pa ng senador.
Isa pa anyang naging kita ng mga sindikato ay ang paghihintay sa resulta ng test kung saan dinadala nila sa hotel ang OFW o pasahero kaya may komisyon sila sa mga ito.
Samantala, nangako si Gordon na sa sandaling magbayad ang PhilHealth ng utang sa kanila ay agad na muling aarangkada ang pagsusuri ng PRC subalit dapat sumunod na anya sa kontrata.
“Papayagan namin kung P930 million ang babayaran nila tapos within 3 days bayaran ang balance at mula ngayon pairalin ang kontrata, every three days bayad. Natatakot ako baka mabangkarote ang PRC. This is the 2nd time, dati may utang sila P750 million, pinatigil ko, nagbayad sila,” paliwanag ni Gordon. (DANG SAMSON-GARCIA)
228 
