SUMADSAD nang todo ang ekonomiya ng Pilipinas sa ikalawang quarter ngayong taon dahil sa epekto ng coronavirus contagion sa pamumuhay ng sambayang Filipino, ayon sa Philippine
Statistics Authority (PSA).
Inihayag ng PSA na bumagsak ng 16.5 percent ang ekonomiya ng bansa mula Abril hanggang Hunyo kasunod ng mga ipinatupad na community lockdown na bahagi ng hakbangin ng gobyerno na
mapigilan ang pagkalat ng COVID-19.
Sa virtual press briefing, inihayag ng PSA na dahil sa pagbulusok ay itinuturing na nasa recession ang ekonomiya ng Pilipinas.
Una nang inihayag ni Bangko Sentral ng Pilipinas (BSP) Governor Benjamin Diokno na kapag nagkaroon ng magkasunod na quarters ng contractions, maituturing na itong technical recession.
Sinabi ni PSA Usec. Claire Dennis Mapa, pinaralisa ng mga lockdown ang domestic activities lalo na noong pinairal ang enhanced community quarantine (ECQ) sa Metro Manila at iba pang high-risk areas mula Marso 17 hanggang Mayo 15 at sinundan ng modified enhanced community quarantine (MECQ) hanggang Mayo 31.
BAD NUMBERS
Para naman sa isang lider ng mababang kapulungan ng Kongreso, “bad number” ang naitalang
numero sa Gross Domestic Product (GDP) ng Pilipinas na pinakamalala sa mga bansa sa Asya.
“This is a bad number,” pahayag ni House ways and means committee chairman Joey Salceda matapos umabot sa -16.5% ang GDP ng Pilipinas na mas malala sa -12.6% ng Singapore at -5.3% ng
Indonesia na kabilang din sa labis na naapektuhan ng COVID-19 pandemic.
Ito ang pinakamalalang kalagayan ng ekonomiya ng Pilipinas sa nakaraang 34 taon. (JESSE KABEL/BERNARD TAGUINOD)
103 
