Pahayag ng spokesman ng dating senador “BBM NASA MAAYOS NANG KONDISYON”

BONGBONG MARCOS-3
0

“GUMAGANDA na ang kondisyong pangkalusugan ni dating Sen. Ferdinand ‘Bongbong’ Marcos, Jr. makaraang ihayag sa resulta ng clinical test na isinagawa ng Research Institute for Tropical Medicine (RITM) na siya’y positibo sa COVID-19,” pahayag ito ngayon ng spokesman ng dating senador na si Atty. Victor Rodriguez.

Ayon kay Atty. Rodriguez, isa lang si BBM sa libong Filipino na nakikipaglaban sa mapanganib na mikrobyo at kasalukuyan ay nilalapatan ng lunas sa isang ‘isolation area.’

“Pagkagaling ko sa Europa, tumungo agad ako noong sumunod na araw, Marso 14, 2020 sa isang ospital upang magpasuri dahil sa medyo may pananakit ang aking dibdib at upang matiyak ang aking kondisyong pangkalusugan dahil sa mga panahong ‘yon ay lumalaganap na ang corona virus,” sabi umano ng dating senador, ayon sa paglalahad ni Rodriguez.

Pahayag pa ng dating senador ayon sa kanyang tagapagsalita: “Pero umuwi na lang ako kasi sobrang dami ng pasyente noon sa pinuntahan kong ospital kaya hindi na ako nagpumilit na magpaasikaso upang mabigyan ng tamang atensiyon ang mga pasyenteng nauna sa akin… na maaaring mas masama ang pakiramdam.”

Ayon pa kay Rodriguez, ang tanging pagkakataon na lumabas si dating Senador Marcos mula noon sa kanyang kwarto ay noon lang Marso 22, 2020 para magtungo sa emergency room ng parehong ospital makaraang siya’y makaranas ng hirap sa paghinga, kung saan isinagawa ang ‘COVID-19’ test sa kanya at pinayuhang mag-self quarantine.”

“Simula noong Marso 13, 2020 hanggang sa ngayon ay sinusunod ng dating senador ang health protocol sa mga PUI at taimtim at tahimik nyang tinupad ang ipinaiiral na proseso ng gamutan, ‘tulad ng safety mask at self-quarantine, at walang ingay na inilayo ang kanyang sarili maging sa kanyang pamilya ‘gaya ng isang simple, responsable at ordinaryong pasyente,” pagtatapos na pahayag ni Rodriquez.

Ang resulta ng COVID-19 test sa senador ay inilabas ng RITM noong hapon ng Marso 28, 2020 kung saan sinasabing siya’y nagpositibo sa naturang virus. SAKSI NGAYON NEWS TEAM

 
"COMMENT DISCLAIMER: Reader comments posted on this Web site are not in any way endorsed by SAKSI NGAYON. Comments are views by saksingayon.com readers who exercise their right to free expression and they do not necessarily represent or reflect the position or viewpoint of saksingayon.com. While reserving this publication’s right to delete comments that are deemed offensive, indecent or inconsistent with SAKSI NGAYON editorial standards, SAKSI NGAYON may not be held liable for any false information posted by readers in this comments section."

Related posts

Leave a Comment