MULING nagpatupad ng malawakang balasahan matapos ang bahagyang galawan sa ilang top key position sa Philippine National Police hierarchy at one star rank promotion sa may anim na senior police officer nitong nakalipas na linggo.

Simula ngayong Martes, December 1, 2020 opisyal nang manunungkulan sa kani-kanilang bagong posisyon ang may 27 senior officers ng PNP.

Nilinaw ni PNP Chief Director Gen. Debold Sinas na ang ipatutupad na balasahan sa ilang key position sa loob ng PNP ay base sa consensus ng command group at bunsod sa napipintong pagreretiro ng pitong heneral.

Nabatid na ilan sa mga magreretiro ay hiniling na mag-non-duty status habang hinihintay ang kanilang 56th birthday or mandatory retirement day.

Apektado sa ipinatupad na reshuffle si P/MGen. Celso Pestaño na inilipat sa Office of the Chief PNP mula sa Directorate for Information and Communications Technology Management (DICTM).

Si Pestaño ay hahalinhan sa DICTM ni P/BGen. Albert Ferro na hinugot sa Police Regional Office 7 Central Visayas.

Habang ang pinuno ng Quezon City Police District (QCPD) na si P/BGen. Ronnie Montejo ay hinirang na incoming Regional Director ng Central Visayas PNP kapalit ni Ferro.

Itinalaga naman sa Police Regional Office 9 Zamboanga Peninsula si P/BGen. Rolando Ylagan, ang pinuno ng Northern Police District bilang kahalili ni P/BGen. Jesus Cambay na itinalaga bilang DIPO Southern Luzon kapalit ni P/MGen. Jonas Calleja na inilagay naman sa Office of the Chief PNP.

Inilipat naman sa Directorate for Plans si P/BGen. Rene Pamuspusan, ang kasalukuyang regional director ng Police Regional Office 6 Western Visayas at papalitan siya ni P/BGen. Rolando Miranda, ang District Director ng Manila Police District (MPD).

Mula naman sa NCRPO, inilipat si P/BGen. Ronald Olay sa Directorate for Operations (DO) habang si P/BGen. Antonio Yarra ay inilipat mula NCRPO patungong Police Regional Office 4A Calabarzon.

Mula sa Office of the Chief PNP, inilipat naman sa Directorate for Plans si P/BGen. Walter Castillejos habang balik naman sa NCRPO si P/BGen. Eliseo Cruz.

Inilipat naman sa DICTM si P/BGen. Armado de Leon mula sa Directorate for Human Resource Doctrine and Development at papalitan ito ni P/BGen. Herminio Tadeo Jr. na siya namang papalit kay De Leon.

Mula sa DIPO Southern Luzon, inilipat sa Office of the Chief PNP si P/BGen. Mario Rariza Jr.

Inilipat naman si P/BGen. Wilfredo Cayat mula sa Philippine National Police Academy (PNPA) patungo sa Office of the Chief PNP.

Habang napunta sa PNP Communications and Electronic Services si P/BGen. Conrado Pajarillo Gungon Jr. mula sa Directorate for Integrated Police Operations o DIPO sa Western Mindanao.

Hinalinhan ni Gungon sa Communications and Electronic Services si P/BGen. Joey Runes na napunta naman sa Office of the Chief PNP.

Mula naman sa Directorate for Operations, inilipat si P/BGen. Danilo Macerin sa NCRPO kapalit ni P/BGen. Ronald Olay na inilipat din sa Office of the Chief PNP.

Nabatid na may pito pang senior officers na may ranggong colonel ang itinalaga sa bago nilang pwesto, kabilang dito ang dating tagapagsalita ng PNP na si PCol. Ysmael Yu.

Si Col. Arcadio Jamora, Jr. ay inilagay bilang acting Commandant of Cadets ng PNP Academy sa Silang, Cavite habang si Col. Jose Santiago Jr. ay magsisilbing executive officer ng DIPO Western Mindanao.

Hinirang naman si Col. Narciso Domingo bilang deputy director for Operations ng Police Regional Office 3 habang si Col. Juan Añonuevo ay executive officer ng Directorate for Integrated Police Operations para sa Northern Luzon. (JESSE KABEL)