Sa utos na itigil ang paniningil ng premium sa OFWs PHILHEALTH OFFICIALS DINEDMA SI DIGONG

MISTULANG binabalewala ng mga opisyales ang kautusan ni Pangulong Rodrigo Duterte na itigil ang paniningil ng premium sa mga Overseas Filipino Worker (OFW).

Ito ang lumabas sa pagdinig ng House account committee na pinamumunuan ni Rep. Mike Defensor, kaugnay ng usapin ng health premium na patuloy na inirereklamo ng OFWs.

“Nagsabi ang Pangulong Duterte. Ang sabi ni Presidente, voluntary payment of premiums for OFWs, tapos pinatigil niya ito. Duterte orders make 3% premium payment of OFWs voluntary. Noong May 4 pa ito sinabi ng ating Pangulo,” ani Defensor.

Gayunpaman, hindi ito nasunod, ayon kay Atty. Thorrsson Montes Keith, dating hepe ng anti-fraud ng PhilHealth, dahil patuloy na pinagbabayad ang mga OFW bago sila makaalis para magtrabaho sa ibang bansa.

“Naglabas sila ng advisory…ganito ang advisory..payment of contribution voluntary for OFWs pero naglagay sila na..mayroong flexible payment. Yung title lang po ang voluntary pero sa laman po ng advisory magbabayad pa rin ang OFWs,” ani Keith kay Defensor.

“So ibig mong sabihin, nilalabag mismo nila ang utos ng ating Pangulo?,” tanong ni Defensor na sinagot naman ni Keith ng “opo sir, nilalabag ang utos ng Pangulo natin”.

Ikinadismaya ito ni Defensor dahil kapag hindi nakapagbayad nang buong premium ang mga OFW ay hindi sila bibigyan ng Overseas Employment Certificate (OEC) para makapagtrabaho sa ibang bansa.

Dehadong-dehado aniya rito ang mga OFW dahil sinisingil din ang mga ito ng penalty na aabot ng 3% sa bawat buwan na hindi sila makapaghulog sa kanilang premium sa PhilHealth.

HUHUBARAN
NG MASKARA

Kung dati ay walang mukha ang mga miyembro ng mafia sa PhilHealth na nagpista sa pondo ng mga miyembro mula 2013, ngayon ay makikilala na ang mga ito.

Ito ang tiniyak ni Rep. Defensor kaugnay ng sinimulang imbestigasyon sa mga katiwalian sa PhilHealth.

Ayon sa mambabatas, makikilala ang mga miyembro ng sindikato sa mas malalim na pag- iimbestiga sa all case rate (ACR) policy na binuo noong 2011 at sinimulang ipatupad noong 2013 o
panahon ni dating Pangulong Benigno “Noynoy” Aquino III.

“Ang mga kasapi, ‘yan po ay makikita natin sa mas malalim na pag-iimbestiga ng komiteng ito.

Makikita natin kung sino ang mga kasabwat sa pagpapatupad ng ganitong sistema,” ani Defensor.

Una nang sinabi ni Defensor na nagsimula ang mafia sa ACR policy ng PhilHealth kung saan, nagtakda ang mga ito ng halaga ng kanilang bababayaran sa isang sakit na ipinagamot ng isang
miyembro, imbes na ang aktwal na hospital bill nito.

SOBRANG PONDO

Samantala, nangangamba naman si Marikina Rep. Estella Quimbo na mauuwi talaga sa katiwalian ang P45 Billion na inilalaan ng PhilHealth para bayaran ang hospital bill ng mga COVID-19 patient.

Sa interpelasyon ni Quimbo sa senior vice president for actuarial services ng PhilHealth na si Nerissa Santiago, nagulantang ang mambabatas dahil naglaan ang  mga ito ng P45 Billion na pondo na sobra aniyang laki.

Depensa ni Santiago, tinataya nila na aabot sa 209,000 ang COVID-19 case sa bansa kaya naglaan ang mga ito ng P45 Billion bagay na kinontra ni Quimbo.

Hindi aniya nakapagtataka na maubusan ng pondo ang ahensya sa ganitong gawain ng mga opisyales ng state insurance firm na nauuwi sa katiwalian. (BERNARD TAGUINOD)

51

Related posts

Leave a Comment