BI-POD AT TCEU OFFICIALS, INUTIL?

LAGING paalala pa rin ng mga health official ang paghuhugas ng kamay upang makaiwas sa COVID-19 kung kaya’t ito rin ang ginagawa ng ilang mga opisyal ng Bureau of Immigration sa NAIA matapos mabuking ang kanilang raket kasabwat ang ilang maimpluwensyang travel agencies kagaya ng Huayi Group Inc. na siyang lumakad umano ng papeles sa main office upang mabawi ang Exclusion Order o pagharang sa mga nahuhuling dayuhan partikular ang mga Chinese national na bitbit ang isang endorsement galing DFA.

Kamakailan ay 17 Chinese nationals umano ang hinarang ng mga tauhan ng Port Operations Division (POD) at Travel Control Enforcement Unit sa NAIA dahil sa nakakadudang dahilan ng mga ito sa pagpasok sa bansa kahit mayroon silang endorsement mula sa Department of Foreign Affairs?

Hmm.. Pero bakit kaya ang nangyari ay tila holdap na ginawa ng Huayi Group Inc. sa 7 Chinese na hiningan diumano ng P350k kada isa o may total na P2.4M para maglabas ang Office of the Commissioner ng Recall of Exclusion Order o pagbawi sa kanilang pagharang sa mga dayuhan at payagan ang mga ito na makapasok.

Sabagay sino ba naman ang bugok na opisyal ng POD at TCEU ang iimbestigahan ang kanilang Boss? Eh di sinipa kayo sa tumbong.

Matapos ang ating pambibisto sa raket ng mga tiwaling opisyal ng BI-POD, TCEU ay isang nagpakilalang kaibigan umano ni Candy Tan ang tumawag sa inyong lingkod upang sabihin na ang nangyaring pagpapalusot umano ng mga tauhan ng TCEU sa mga OFW na kulang ang travel permits sa Cebu airport ay wala na sa kapangyarihan ni Tan at isinisi sa main office na siyang may hawak sa mga ito.

Idinagdag pa ng isang nagpakilalang kaibigan ni Tan na maaaring nalusutan nga sila sa Mactan Airport dahil walang CCTV sa lugar nang mangyari ito? Aba eh kahit nga may CCTV nalulusutan kayo kaya nga nahuli ang isang Marsalek.

Matapos ang issue ng Pastillas scheme na halos puro naman hearsay ang alegasyon ng mga whistleblower ay nanlamig muna ang kalokohan ng mga demonyong tauhan ng BI sa airport na daig pa ang inyong mga dyowa sa panlalamig.

Ngunit bumalik naman ang init matapos ang ilang buwan nang magkaroon ng re-shuffle sa NAIA.

Samantala, Ano na kayang nangyari sa imbestigasyon ng NBI sa pagkakahuli sa entrapment operation sa isang liaison officer ng law firm na si Vivian Lara sa loob ng Legal Division ng BI upang lakarin ang pagpasok ng 3 Chinese nationals sa bansa kapalit ang P900k na nakuha umano sa kanya bilang entrapment money. Mayroon pa kayang involved dito na opisyal ng Legal Division at bakit dito ginawa ang transaction. Matagal na kaya itong nangyayari kung hindi ito nabuking? Kaya ba ng kontak nito sa Legal na magparating ng Chinese sa airport?? Abangan!!

Para sa inyong Sumbong at Reaksyon maari ninyo akong itext sa 09158888410.

70

Related posts

Leave a Comment