BUHAY PINOY

FOR THE FLAG

Nasa $2.6 billion ang naitalang remittance ng overseas Filipino workers para nitong nakaraang buwan ng Mayo.

Mayaman ang Pilipinas sa remittance na hinihigop naman ng mga multi-bilyonaryong negosyante sa bansa.

Pero kung pamimiliin ang OFWs kung mayroon lamang ding trabahong makasasapat sa pangangailangan at makatutustos sa mga pangarap nila rito sa bansa ay pihadong mas gugustuhin nila rito.

Ating busisiing bahagya kung bakit umabot na salat sa trabaho sa mahal nating bansa na nagtutulak sa ating mga kababayan na makipagsapalaran sa ibayong dagat, kung bakit nasa 50% ng ating mga kababayan ay nakaranas ng matin-ding kahirapan at kagutuman, kung bakit na tayo na sana ay isang agricultural country ay nag-aangkat ng basic agricultural products katulad ng bigas mula sa ibang bansa at kung bakit marami sa ating mga kababayan ay nagsisilikasan papuntang ibayong dagat para maghanapbuhay.

Isa sa apat na Filipinong nasa hustong edad ay walang trabaho. May makabagong teknolohiya nga na available at nagagamit natin sa ating social life katulad ng cellphone at ng Internet, ngunit hindi pa ito talaga nagagamit ng pamahalaan para sa edukasyon ng ating mga mag-aaral, lalo na sa paglinang ng mga kapaki-pakinabang na skills na magagamit nila sa pangangailangan ng merkado.

Dugtungan na ‘yan, dahil salat ang trabaho para sa kababayan nating kulang sa skills at edukasyon, at paglisan ng mga negosyo mula sa bansa dahil sa korapsyon, kriminalidad, panggugulo ng ilang elemento at taas na buwis sa pagnenegosyo, ay marami ang nagugutom, mahigit 50 milyong Filipino po o higit sa 11 milyong sambayanan sa buong kapuluan.

Nag-aangkat tayo ng mga produktong bigas, asukal, sibuyas, bawang at marami pang iba na naitatanim naman sa ating sariling bansa ngunit dahil na rin sa globalisasyon at sa pangangailangan ng ating mga mamimili ng mga produktong mas mababa ang presyo ay napipilitan tayo.

Mahigit sa 10% ng mga Filipino ay nagsisipag-abroad upang maghanapbuhay sa ibang bansa o kaya ay upang doon na manirahan. Pagtakas po ito sa kahirapan at upang maiahon ang kani-kanilang pamilyang naiiwan sa bansa.

Ang mga kasagutang sinusubukan ng pamahalaan ay iyang microfinance na tutulong sa mga maliliit nating mga kababayan na makapagnegosyo o kaya ay magkaroon ng puhunan para sa kanilang sakahan at paghahayupan. Pero iilan lamang ang nakikinabang nito, at ang tulong ng pamahalaan sa microfinance industry na bilyun-bilyong piso sa mga nakaraang taon ay mukhang napunta lamang sa wala. (For the Flag / ED CORDEVILLA)

106

Related posts

Leave a Comment