HUWAG MAWALAN NG PAG-ASA

PINAGLALARUAN sa social media ang kapalpakan ng ­gobyerno sa pagbili ng sapat na bakuna laban sa COVID-19 at kung bibigyan mo ng kahulugan ito, ang kanilang pang-aasar sa pamahalaan ay parang nawawalan na sila ng pag-asa.

Tulad ng lamang ng mga kumalat na message sa social medial na nagsasabing dumating ang COVID-19 vaccines sa Indonesia noong Disyembre 6, 2020, sa Singapore ay noong December 21, 2020, ­Myanmar ay January 22, 2021 at Cambodia ay February 7, 2021.

Dumating naman ang bakuna sa Laos noong February 8, 2021, sa  Brunei noong February 11, 2021, Malaysia ay February 20, 2021, Thailand noong February 24, 2021 at Vietnam ay February 24. 2021 din.

Pagdating sa Pilipinas, ang nakalagay ay February 31, 2021 darating ang covid-19 vaccines. Sa unang tingin, darating na pero, walang 31 ang Pebrero dahil hanggang 28 lang.

Ibig sabihin, parang nawawalan na ng pag-asa ang mga Pinoy na darating sa lalong madaling panahon ang mga bakunang kailangan para makasabay tayo sa pagbangon ng iba pa mula sa Southeast Asia.

Kung maiiwan tayo sa pagpapabakuna, maiiwan din tayo ng ating mga kapitibahay na bansa sa pagbangon. Iniiwan na tayo sa larangan ng ekonomiya, lalo tayong mapag-iiwanan kapag nagteka-teka ang gobyerno.

Isa pa sa mga meme ng mga netizen ay ang mga tarpaulin ni Davao City Mayor at presidential daughter Sara Duterte na nagsasabing “Run Sara Run” pero ang vaccine wala pa.
Inuuna pa raw ang pulitika kesa sa kalusugan ng mamamayang Filipino dahil mas nauna pang kumalat ang tarpaulin para hikayatin si Mayor Sara na tumakbong pangulo sa 2022 kesa sa COVID-19 vaccine.

Dapat daw naunang kumalat ang COVID-19 vaccine bago ipinakalat ang tarpaulin ni Mayor Sara lalo na sa Metro Manila pero baliktad ang nangyari kaya parang lalong nawawalan ng pag-asa ang mga Filipino.

Pero sabi ko nga sa ating titulo, huwag mawalan ng pag-asa. Darating at darating din ang bakuna para labanan ang COVID-19 pandemic na kumalat sa buong mundo dahil naging iresponsable ang China.

Sabi nga ni Presidential spokesman Harry Roque darating ang bakuna sa Linggo at mismong si Pangulong Rodrigo Duterte ang sasalubong. Yun nga lang, Sinovac vaccines ang darating na gawang China.

Wala pang impormasyon kung kailan darating ang Astrazeneca, Pfizer, Moderna at iba pang bakuna na hindi gawang China pero ang sigurado darating na raw ang unang batch ng bakuna… ang Sinovac.

Pero nakakabahala kung papaano kukumbinsihin ng gobyerno ang mga tao na magpabakuna ng Sinovac lalo na’t sinabi ni Director General Eric Domingo na hindi niya inirerekomenda na gamitin ang gamot na ito sa mga medical frontliners at senior citizens dahil mababa ang efficacy.

Kahit ano pang paglilinaw ni Domingo, nasabi na niya ang kanyang sinabi kaya masisisi mo ba ang mga tao kung aayawan ang Sinovac dahil kumpara sa ibang bakuna siya ang lumalabas na may pinamakababang efficacy?

Anong mangyayari kung ayaw tanggapin ng mga tao ang Sinovac, ipipilit sa ayaw at sa gusto dahil sabi nga noon ni ­Secretary Roque, huwag mamili dahil libre naman itong ibibigay?

Gagamitin daw muna ang darating na Sinovac sa mga pulis, sundalo at iba pang armed personnels, pero ang tanong, lahat ba sila ay gustong magpaturok ng Sinovac o gagamitin ang ­sistema sa mga ito na “sumunod na muna, saka na magtanong.”

100

Related posts

Leave a Comment