Mistulang naging 3-in-1 ang naging pahayag ni Pangulong Rodrigo Roa Duterte sa kanyang pagsasalita sa pagdiriwang ng Araw ng Pasasalamat sa mga OFW na ginanap sa Camp Aguinaldo noong Biyernes.

Sa simula pa lamang ng programa ay maraming OFW leaders na nanana­langin na sana ay magbanggit si Pres. Duterte ng mga programa na matagal nang hinihiling ng mga OFW katulad ng Department of OFW at OFW Hospital.

Kabilang sa mga ipinahayag niya ay ang mabilis na pagbuo ng mekanismo para sa pagkakaroon ng Department of OFW. Iniutos kay Department of Labor and Employment Secretary Silvestre Bello na simulan na ang pagbuo ng meka­nismo at iba pa na dapat na matapos sa Agosto. Kanya ring mamadaliin ang pagkakaroon ng Department of OFW at isasabatas sa Dis­yembre ngayong taon.

Ikalawa sa ipinangako ni Pres. Duterte ay ang magkaroon ng ekslusibong ospital para sa mga OFW at mga pamilya nito. Ipinag­utos ng pangulo na pagandahin at kumpletuhin ang OFW Hospital sa Nueva Ecija at mabubuo pa ang iba nito sa iba pang panig ng Pilipinas.

Nauna rito ay kasama ang Ako OFW sa paglulunsad o groundbreaking ng OFW Hospital sa Pampangga na inaasahang matatapos sa loob ng dalawang taon sa tulong ni G. Enrique Razon, PAGCOR, OWWA at pati na rin ng Provincial Government ng Pampangga.

Ikatlo sa naging pangako ni Pangulong Duterte ay ang aking kahilingan na inilathala noong Hunyo 14, sa aking kolum na ito na kung saan ako ay nanawagan sa pagtatalaga ng Police Attaché sa Kuwait. Ayon sa Pangulong Duterte ay ipag-uutos n’ya ang pagtatalaga ng Police Attaché sa lahat ng bansa na may mga OFW. Ito aniya ang siyang magbibigay ng tulong legal at siya ring malalapitan ng mga OFW sakaling sila ay may problemang kinakaharap sa ibang bansa.

Siyempre pa, hindi natin dapat kalimutan ang mga taong tunay na nagbigay ng kanilang dedikasyon at oras sa okasyon na ito. Pa­ngunahin dito ay sina PNP BGen Rhodel O. Sermonia, DDS Chairperson Gemma Sotto, Ako OFW National Pres. Marcia Gonzalez-Sadi­con, Bishop Andy Alcoba at buong Food Committee, Cezar Gervacio at Mike Pera at Marshall Committee, Zeny Concepcion at volunteers sa First Aid Committee, Julex Mendoza, Janice Salcedo, Dang Mangalino at iba pang OFW Leaders at pati na rin ang donors ng pagkain at paprem­yo na sina Lucy Sermonia ng CLADS, Al Alamia Manpower at Honor Manpower. (Ako OFW /  DR. CHIE LEAGUE UMANDAP)