Thrilla in Manila: Pagkatapos ng laban, tapos na rin ang away

SPORT FEATURE Ni EDDIE ALINEA

NOONG gabing natuldukan ang limang taon at tatlong labang serye sa pagitan ni heavyweight champion Muhammad Ali at ni dati ring kampeong Smokin’ Joe Frazier, nagpahayag si Ali na tapos na ang “digmaang” namagitan sa kanilang ­dalawa.

Ang mga salitang binitiwan ni Ali, pagkaraang maipagtanggol ang kanyang korona sa pamamagitan ng 14th round TKO, pagpasok pa lamang sa kanyang silid bihisan ay naging hudyat na magiging tahimik na ang mundo nila mula noong araw na iyon.

“We went to Manila, Joe and me, as champions, and we came back as old men,” sabi niya sa mga miyembro ng media.

Inihagis ang tuwalya ng trainer-manager ng natalong si Frazier, si Eddie Futch, sa gitna ng parisukat na lona makaraan ang 14 na yugtong bugbugan bilang senyales na isinuko nito ang laban.

Paliwanag ni Futch, ginawa niya iyon upang maiwasan ang tuluyang pagkabulag ng kanyang ­estudyante na aniya’y halos hindi na nakakikita.

Halos sumuko na rin ang kampeon matapos ang 10 round na nakalaylay na sa lubid at gusto na ring magsabi sa kanyang trainer na si Angelo Dundee para itigil na ang laban.

“I always bring out the beast in the men I fight, but Joe Frazier, I’ll tell the whole world right now, bring out the best in me.

That’s one heeluva man, and God bless him,” deklara ni Ali na nagsilbi sanang musika sa pandinig ni Frazier kung narinig lamang ng ­challenger ang mga pangungusap nito.

“I’m happy there are no more Joe Frazier to fight. I will never call him gorilla again,” pangako ni Ali habang ipinatawag ang anak ni Frazier na si Marvis.

“Tell your dad the things I said, I really didn’t mean,” bilin niya kay Marvis na agad namang tumakbo patungo sa silid bihisan ng ama para ihatid ang mensahe ng kampeon.

“Tell that to me personally himself,” ani Smokin’ Joe sa anak.

Binalingan din agad nito ang mga nakikinig at nagsabing: “Man, I hit him (Ali) with punches that’d bring the wall of a city. Lawdy … Lawdy …he’s a great champion.”

Sabay-sabay na lumisan si Frazier at ang media sa Philippine Coliseum (Araneta Coliseum) matapos ang kuwentuhan, patungong Hyatt Hotel kung saan siya pansamantalang nakatira at magdamag na hinandugan ng mga awiting siya mismo ang humiling.

Kasama sa naturang piging sina Games and Amusements Board chair Luis Tabuena at kalihim ng agrikultura Arturo “Bong” Tangco.

Samantala, si Ali ay isinugod sa ospital matapos ang laban para magpagamot bago dumating sa victory party na inihandog sa kanya ni Unang Ginang Imelda Marcos sa Palasyo ng Malakanyang.

Kinabukasan ng umaga sa kanyang suite sa Manila Hilton, inamin niya sa mga reporter na umihi siya ng dugo mula pa nang matapos ang laban.

“Everything in me is on flame,” aniya habang ipinakikita ang namamagang mga kamay na hindi niya maitikom.

“What’s this man do to me? Why did I do this? Couple of times like I was leaving my body. The animal (Frazier) could have killed me. That man weren’t human in there. I must be crazy for what?

This is it for me. It’s over,” sabi pa ni Ali.

69

Related posts

Leave a Comment