CITY OF MALOLOS, Bulacan – Labing-walong preso at isang jail guard sa Bulacan Provincial Jail ang muling nagpositibo sa coronavirus disease at kasalukuyan nang naka-isolate.
Ayon kay provincial warden Ret. Col. Marcos Rivero, ang 18 detainees at prison guard ay sumalang sa swab test nitong nakaraang Biyernes makaraang makitaan ng sintomas.
Ang mga preso ay nasa edad 50 pataas na mayroong lagnat at ubo at naka-isolate sa isang selda habang ang jail guard ay naka-home quarantine sa sa bayan ng Pandi.
“Ang instruction ni Gov. Daniel Fernando ay panatilihin ang pag-inom ng vitamins, panatilihin ang pagiging-malinis ng isolation facility at mag-suob para sa mabilis na recovery ng mga apektadong inmates,” ani Rivero.
Ayon kay Rivero, ang 18 preso ay nahawa sa kapwa preso na namatay sa sakit na tuberculosis at pneumonia na kalaunan ay nagpositibo rin sa nasabing infectious disease.
“Kaya agad na pinag-utos ni Gov. Fernando na ipa-swab test ang lahat ng inmates na may nararamdamang lagnat at ubo,” sabi ni Rivero.
Patuloy ang isinasagawang monitoring sa kondisyon ng mga naturang preso na asymptomatic at kung meron mang magiging symptomatic ay agad ililipat ng selda upang i-quarantine at para hindi kumalat sa buong piitan ang nakamamatay na virus.
Pinasalamatan ni Rivero ang Provincial Government sa pangunguna ni Gob Fernando sa patuloy na pagbibigay ng suporta sa inmates sa nasabing provincial jail.
Nabatid na ipinagbawal pansamantala ni Rivero ang dalaw sa kulungan mula pa noong Marso.
Noong July 17, 2020 ay 18 ding inmates or Persons Deprived of Liberty (PDL) at tatlong jail guards ang nagpositibo sa COVID-19 na pawang magagaling na ngayon.
Samantala, base sa tala ng Provincial Health Office (PHO), 64 na bagong covid patient ang nadagdag kaya pumalo na sa kabuang 3,893 ang kaso sa lalawigan ng Bulacan.
Sa 3,893 na bilang ay 2,422 ang nakarekober 1,382 ang active cases kung saan 853 ang symptomatic at 529 ang asymptomatic habang 89 na ang nasawi. (ELOISA SILVERIO)
61 
