AFP AT PNP NASA HOT PURSUIT OPERATION SA DINUKOT NA FIL-AM

NAGKUKUMAHOG ngayon ang mga operatiba ng Armed Forces of the Philippines at Philippine National Police para mabawi ang dinukot na Filipino-American businessman sa Sirawai, Zamboanga del Norte.

Ayon kay Maj. Gen. Generoso Ponio, commander ng Army’s 1st Infantry Division, katulong ang PNP at iba pang security forces ng gobyerno ay tinutugis nila ang mga armadong kalalakihan na tumangay kay Rex Triplet, 64-anyos na tubong Sirawai, Zamboanga del Norte.

Sa impormasyong ibinahagi ni Sirawai Municipal Police Station Chief Maj. Matinong, kasama ng biktimang si Rex Triplet, ang 23-anyos na asawang si Celsa Maani Triplet, nang maganap ang pagdukot.

Ayon kay Maj Matinong sakay ng kanilang kulay itim na XRM motorcycle ang mag-asawa na pauwi na sana nang harangin ng apat na armadong kalalakihan na nakasuot ng camouflage uniforms at armado umano ng M203 automatic rifle at tatlong short firearms.

Nagawang makatakas ng asawa ni Triplet at nakahingi ng tulong sa mga lokal na opisyal ng Barangay Tapanayan.

Sinasabing kinaladkad ang biktima papasok sa magubat na bahagi ng Barangay Tapanayan na nasa bayan din ng Sirawai.

Agad namang rumesponde si Lt. Roy Malayo, deputy chief ng Sirawai police at ipinag-utos ang isang hot pursuit operation laban sa mga suspek. Inaalam pa ang pagkakakilanlan ng mga nasa likod ng panibagong kidnapping incident sa lalawigan. (JESSE KABEL)

37

Related posts

Leave a Comment