NAGPAKITA na naman ng aktibidad ang bulkang Taal makaraang makapagtala ng anim na volcanic earthquake sa paligid nito ngayong Sabado ng umaga.
Ayon sa Philippine Institute of Volcanology and Seismology (Phivolcs), bukod sa pagyanig, nakapagtala rin ng fumarolic activity sa paligid ng bulkan na may taas na 50 meters sa nakalipas na 24-oras.
Nabatid din na naitala ang paulit-ulit na mahinang pagputok at pagyanig sa paligid ng bulkan.
Naitala rin ang pagbuga ng mahinang ashfall sa paligid ng bulkan at expulsion ng volcanic gas.
Sinabi pa ng Phivolcs na mahigpit pa ring ipinagbabawal ang pagpasok malapit sa bunganga ng bulkan na nasa Permanent Danger Zone o PDZ.
Nananatili ring nakataas ang alert level 1 sa paligid ng bulkan na ang ibig sabihin ay patuloy ang abnormal na kondisyon nito. TJ DELOS REYES
222 
