CEBU – Inihayag ng Bureau of Immigration (BI) ang pagkakaaresto sa umano’y American pedophile na wanted sa sex crime sa Estados Unidos.
Kinilala ni BI Commissioner Jaime Morente ang suspek na si Donald Robert Tyler, 57, nadakip noong Huwebes sa Brgy. San Roque, Ginatilan, Cebu ng pinagsanib na mga operatiba ng bureau’s Fugitive Search Unit (FSU) at National Bureau of Investigation (NBI).
Inaresto ang suspek sa bisa ng mission order na inisyu ni Morente base sa kahilingan ng American authorities sa Manila.
Nabatid sa ulat mula kay BI FSU chief Bobby Raquepo, si Tyler ay may arrest warrant mula sa circuit court ng Josephine Country, Oregon na may petsang Nobyembre 4, 2019, dahil sa kasong ‘sodomy on the first degree’.
Ayon pa sa BI, si Tyler ay pensiyonado sa Pilipinas ngunit ikinokonsiderang undocumented alien makaraang kanselahin ng State Department ang kanyang passport.
Pansamantalang nakakulong ang suspek sa BI warden facility sa Camp Bagong Diwa, Taguig City habang nakabinbin ang kanyang deportasyon.
“He will be placed in our blacklist and banned from re-entering the Philippines for being an undesirable alien,” dagdag pa ni Morente. (JOEL O. AMONGO)
197 
