Nanggoyo ng security agencies WANTED PERSON NALAMBAT SA LAGUNA

LAGUNA – Isang wanted person na umano’y nambibiktima ng mga security agency, ang naaresto sa San Pedro City sa lalawigang ito, noong Biyernes ng umaga.

Ang suspek na si Ronald Candido, marketing manager ng Pacman Legendary Security Agency Inc., ay hindi lumaban nang arestuhin ng magkasanib na puwersa ng Laguna Provincial Intelligence Unit at lokal na pulisya sa kanyang tirahan sa Barangay Sampaguita, San Pedro City, Laguna.

Inaresto ng mga operatiba ang suspek sa bisa ng warrant of arrest na inisyu ng Municipal Trial Court, Branch 83 at 84, Caloocan City, na may petsang Nobyembre 23 para sa bouncing check at estafa o paglabag sa BP 22, ayon kay Lt. Col. Jesus Lintag, hepe ng pulisya ng lungsod.

Inirekomenda ng korte ang piyansa para sa pansamantalang kalayaan ni Candido.

Samantala, hinimok ng pulisya ang mga biktima, lalo na ang mga tauhan ng mga security agency na magpunta sa istasyon para sa pagsampa ng naaangkop na kaso laban kay Candido na kasalukuyang nasa kustodiya ng pulisya.

Ayon sa ulat, nakumbinsi ng suspek ang mga security agency na makuha nang advance ang kanyang kita kapalit ng isang kontrata.

Gayunpaman, natuklasan ng mga ahensiya na labag sa batas ang nasabing kontrata.

93

Related posts

Leave a Comment