HINDI lang mga MPBL player ang masasaksihan sa the Chooks-to-Go MPBL Lakan Season All-Stars extravaganza ngayong gabi sa MOA Arena.
Inaasahang magdadagdag ng kinang ang celebrity-laden clash sa pagitan ng Team Pacquiao at Team Kobe para sa 3×3 game.
Pangungunahan ni MPBL CEO Sen. Manny Pacquiao ang Team Pacquiao, habang si Kobe Paras naman sa Team Kobe sa 10-minute, race-to-21 competition, na magsisilbing palabok ng All-Star game sa pagitan ng North at South divisions.
Kasama sa Team Pacquiao si Thirdy Ravena, UAAP Finals MVP at kabilang sa three-peat Ateneo, Alvin Pasaol ng Zamboanga na batikan sa larong 3×3 at Fil-Am Troy Rike.
Habang kasama ni Paras sa team sina actor Gerald Anderson ng Imus Bandera at Fil-Am Joshua Munzon, gayundin si Andre, kapatid ni Kobe.
Bukod sa Team Pacquiao vs Team Kobe, maglalaban din sa 3×3 ang North’s team nina JP Belencion (Pasay Voyagers), JR Alabanza (Bulacan Kuyas), Aris Dionisio (Manila Stars) at Paolo Hubalde (Valenzuela Classic) at ang South na binubuo nina Rodel Vaygan (Mindoro Tamaraws), Leo de Vera (Zamboanga), Nick Demusis (Bacoor Strikers) at Jayjay Helterbrand (Imus).
Mayroon ding slam dunk contest at 3-point shootout. (VT ROMANO)
144 
