MGA AHENSYANG DEADMA SA PANAWAGAN NG OFWs, DAPAT NANG DISIPLINAHIN NG POEA

AKO OFW

Patuloy pa rin ang panawagan ng ating kabayani na itinago natin sa pangalan na “Em-em Pie” sa aking kolum nuong Oktubre 13. Sobrang takot sa bantang puputulan sIya ng daliri at pupunitin ang kanyang pasaporte kaya sIya ay humingi ng saklolo sa Ako OFW at sa kanyang ahensya.

Ngunit, makalipas ang isang lingo ay hindi pa rin binibigyan ng aksyon ng Dream Builders Manpower Corp. ang kanyang panawagan na siya ay bigyan ng tulong na makaalis na sa kanyang mapang-abusong employer bagama’t ito ay naiparating na sa kanilang kaalaman.

Ipinakiusap na rin po natin sa ating OWWA Welfare Officer sa Kuwait na si Atty. Lhyn Perez ang kasong ito ni Em-em Pie at nangako naman ito na ipapatawag ang Foreign Recruitment Agency sa Kuwait.

Gayundin, isang sumbong naman ang aking natanggap mula sa ating kabayani na nasa Jleeb, Kuwait na si Marivic Billones na deployed ng Gold Icon & Promotion. Ayon kay OFW Billones ay tapos na ang kanyang kontrata ngunit ayaw pa rin siyang pauwiin ng kanyang employer hangga’t walang nakukuhang kapalit niya.

Inirereklamo rin ni OFW Billones na tatlong buwan na rin siyang hindi tumatanggap ng kanyang sweldo. Tila nasa loob siya ng Pinoy Big Brother house dahil ultimo ang kanyang kuwarto ay nilagyan ng CCTV ng kanyang employer. Naiparating ko na rin ang sumbong na ito kay Welfare Officer Atty. Perez.

Samantala, nagsusumbong din si OFW Ruvilyn Pascua na isang OFW na nasa Kuwait na deployed ng Prince Global Manpower Services Inc. Ayon kay OFW Pascua, sa simula pa lamang ay kanya nang ipinarating sa kanyang ahensya ang hindi pagsunod ng employer sa kanyang kontrata.

Inirereklamo kasi ni OFW Pascua ang masyadong mahabang oras ng trabaho na regular na nagsisimula ng alas-6:00 ng umaga hanggang madaling araw. Isang beses sa isang araw lamang diumano siya pinapakain ng kanyang employer. Ayon kay OFW Pascua ay ipinarating na n’ya sa kanyang ahensya ang kanyang pinagdaraanan ngunit tila dini-deadma o hindi ito pinapansin ng kanyang ahensya.

Kung kaya, ang Ako OFW ay nanawagan sa POEA na bigyan ng kara­mpatang pagdisiplina ang mga ahensyang hindi nagbibigay pansin sa mga sumbong at reklamo ng mga OFW na kanilang dini-deployed. (Ako OFW /  DR. CHIE LEAGUE UMANDAP)

Please follow and like us:
Read More

OFW TINAKOT NA PUPUTULAN NG DALIRI; DREAM BUILDERS INT’L MANPOWER TINATAWAGAN NG PANSIN

AKO OFW

LABIS-LABIS na takot ang nadarama ngayon ng isang OFW na nasa Kuwait dahil sa banta ng kanyang employer na puputulin ang kanyang daliri at pupunitin ang kanyang passport sa oras na siya ay magreklamo at magsumbong.

Ito ang ang ipinarating sa Ako OFW ng kabayani natin na itago natin sa pangalan na “Em-em Pie” na kasalukuyang nasa bansang Kuwait. Siya ay nakarating sa Kuwait sa pamamagitan ng Dream Builders Int’l Manpower Corp.  noong Nobyembre 19, 2018.

Ang lahat ng gastusin kasama ang kanyang uniporme at pagkain ay sa kanyang suweldo rin diumano kinakaltas. Eto ang maikling kwento ni Kabayani Em-Em Pie.

“Ganito kasi noong time na nagduwal ako at nagdura ay may sumamang dugo, pero sinabi ko sa amo ko. Agad naman akong dinala sa doktor. May nakita sila sa X-ray ko na may kaun-ting tama ang baga ko at ito’y tinawag nila na bronchitis.

“Noong September 11 ng gabi nagpahinga ako kasi masakit ang mga namamaga sa akin. Hindi ako pumunta sa bahay niya, pinatawag ako ng isang katulong dito tapos pumunta ako. Noong nakarating na ako sa bahay niya ay nagalit at pinagsisigawan niya ako. Tapos tinulak-tulak n’ya ako at halos masubsob ako. Inaawat ng kapatid n’ya na ‘tama na’ sa salitang Arabic. Hindi siya tumigil na pinagsasalitaan ako nang masama sa Arabic. Noong tapos na ako maghugas ng plato at nalinis ko na ang kwarto ng anak n’ya ay sinabihan ako na ‘sige na tulog ka na’ tapos tinulak n’ya ako sa may pinto. Tapos ‘teka’ ang sabi, hinugot ang cp ko sa bulsa ko at tinanggal ang hikaw ko sa tainga ko. Tapos sinabi na ‘gising ka nang maaga, punta ka rito’, sabi ‘kapag hindi ka dumating dito ng 7:00 AM ay pupunitin ko ang passport mo.”

Makalipas ng halos isang buwan ay nagpasama sa ahensya si OFW Em-Em Pie sa Kuwait upang ipaalam ang kanyang karamdaman. Ngunit ayon kay OFW Em-Em Pie ay kinuha lamang ng ahensya ang resulta at sinabihan siya na normal lamang ang findings na nakasulat kahit siya ay nanghihina at sumasakit ang mga namamagang parte ng kanyang katawan.

Nakikiusap ang Ako OFW sa kanyang ahensya na Dream Builders Int’l Manpower CORP na alamin ang tunay na kalagayan ng ating kabayani at siguruhin na nasa mabuti itong kalagayan at baka naman may batayan ang kanyang sumbong at reklamo. (Ako OFW / DR. CHIE LEAGUE UMANDAP)

Please follow and like us:
Read More

TINUSOK SA TAINGA, DINURAAN SA MUKHA, IKINULONG NG AMO SA RIYADH

AKO OFW

Ang hindi na matagalang physical at verbal abuse ang nagtulak sa isang overseas Filipino worker (OFW)  na humingi ng tulong sa Ako OFW.

Sa sumbong ng ating kabayan na si Lady Lee Mangindel Bautista na noong nakaraang buwan ay pinisil ng kanyang among babae na kung tawagin niya ay madam ang kanyang panga dahil sa sobrang galit at saka siya sinuntok sa braso na hindi naman nagpasa kaya walang patunay na bakas.

Binantaan din umano siya nito na puputulin ang kanyang dila kapag nagsumbong o kapag kanyang kinausap ang amo niyang lalaki.

Minsan na rin umano nitong hiniling na mag-­usap-usap sila para masabi niya ang kanyang problema, pero ayaw pumayag ng kanyang among lalaki na si Sayal Ziad Sindih Al Harthy.

Ayon pa sa sumbong, mula noong si Lady Lee ay dumating sa tahanan ng kaniyang amo sa Tamer St. Almajma, Riyadh ay bigla na lang nagseselos ang kanyang among babae kahit walang dahilan. Pati driver at amo niyang lalaki ay pinagseselosan umano nito.

Sobrang pahirap din ang ginagawa sa kanya ng amo niyang babae gaya ng manu-manong paglalaba hanggang sa magsugat ang kanyang kamay.

May mga sandali ring hinahatak at pinipisil siya nito sa braso kapag may hindi siya naiintindihan na salita, at tinutusok ng daliri ang kanyang tainga.

Nitong Oktubre 6 ay pinagtulungan umano siya ng kanyang among lalaki at babae na kaladkarin dahil nakiusap lamang siya na hindi na niya kayang magtrabaho sa sobrang sakit ng kanyang kamay. Tumigil lamang ang kanyang mga amo nang inawat sila ng anak ng mga ito.

Pagkabitiw sa kanya ay ikinulong na umano siya ng isang araw at isang gabi at dinuraan sa mukha ng among babae at sinabihan siyang siya ay basura lang.

Nais ni Lady Lee na makaalis na sa bahay ng kanyang mga amo at makabalik na sa kanyang pamilya. Natatakot rin siyang baka malaman ang kanyang pagsusumbong at totohanin ng among babae ang bantang putulan siya ng dila.

Asahan mo Lady Lee na makararating ang sumbong mo na ito sa OWWA Welfare upang maipatawag ang iyong employer at ahensya na M&P EMPLOYMENT INC.

Tiyak naman na magiging mabilis ang pagtulong sa iyo dahil kilala  naman ang ating mga labor attache na mabilis sa pag-aksyon sa sumbong. (Ako OFW / DR. CHIE LEAGUE UMANDAP)

Please follow and like us:
Read More

TANGKANG RAPE AT BAWAS-SWELDO, INIREREKLAMO SA LMB WORLDWIDE SERVICES

AKO OFW

Matinding takot na tuluyang magahasa ang naging dahilan kung bakit humingi ng tulong sa Ako OFW ang ating kabayani na si Genelyn Domingo.

Ayon sa sumbong na ipinarating sa akin sa pamamagitan ni Ako OFW Social Service Officer Aiysha Consuelo, si OFW Domingo ay dumating sa Saudi Arabia noong Enero 24 lamang. Siya ay dumaan sa tamang proseso sa POEA sa pamamagitan ng LMB Worldwide Services na may tanggapan sa M. Orosa, Malate, Maynila.

Ayon sa salaysay ni OFW Domingo: “Noong March 2019 ay hinipo ng kapatid ni madam na lalaki ang puwet ko tapos binigyan niya ako ng pera para raw hindi ako magsumbong sa tatay n’ya. Hindi ko po tinanggap ang pera.”

“Noong July, pinakita niya sa akin ang ari niya kasi gusto raw niya makipagtalik sa akin. Hindi po ako pumayag.”

“Noong Sept 27, muntik na po akong gahasain habang naglilinis po ko sa kusina. Bigla niya akong hinawakan at dinakma po n’ya ang baba ko. Nagpumilit po akong kumawala at sumigaw ng HARAM kaya pinakawalan po niya ako, tumakbo po ako sa kwarto ng nanay nila. Humingi po ako ng tulong. Mabuti na lang po na gising sila at ang kapatid ni madam na lalaki ay tumakbo po papunta sa kwarto niya.”

“‘Yong nanay ni madam umiyak habang nag-usap kami. Gusto niya raw paalisin anak niya na lalaki basta hindi raw ako aalis dahil mabait daw akong Filipina.”

“Nagsabi po ako na uuwi na po ako sa ‘Pinas pero hindi po pumayag si madam tapusin ko raw po ang contract ko.”

Inirereklamo rin ni OFW Domingo, na sa bawat pagkakamali o bagay na hindi magustuhan ng kanyang employer sa kanyang ginagawa ay agad siyang binabawasan ng kanyang sweldo.

Matapos na matanggap ko ang sumbong na ito, ay agad ko itong ipinadala sa masipag na si OWWA Welfare Officer Yolanda Penaranda na nangako agad na ipatatawag ang employer at ang kanyang ahensya. Umaasa ako na magiging mabilis ang pagtulong dahil kilala sina Labor Attache Nasser Munder at ConGen Ed Badajos sa kanilang mabilis na pag-aksyon at suporta sa OWWA. (Ako OFW / DR. CHIE LEAGUE UMANDAP)

Please follow and like us:
Read More

OFW TINANGKANG GAHASAIN; ORTIZ AGENCY TINATAWAGAN NG PANSIN

AKO OFW

Sa muling pagbubukas ng ating Bantay OFW Help Center na isang proyekto ng AkoOFW ay muli kong sisimulan ang paglathala ng mga sumbong o paghingi ng tulong ng ating mga kabayani na nasa ibang bansa.

Unang kaso na ating ilalathala ay ang hinihi­nging tulong ng isang OFW na nasa Jeddah na itatago natin sa pangalan na JB Lidem. Siya ay dumating sa bansang Saudi Arabia noong May 23, 2019 sa pag-aasikaso ng kanyang ahensyang Ortiz Agency & Employment Services Inc.

Ayon kay Lidem ay pinagtangkaan siyang gahasain ng kanyang employer. Araw-araw ay naiiwan siyang mag-isa sa bahay ng kanyang employer dahil lahat ay may hanapbuhay. Ngunit, isang araw ay nagulat na lamang siya na ang kanyang employer na lalaki ay hindi umalis ng bahay.

Sa simula ay tinanong lamang siya kung siya ay may internet at inutusan na linisin ang kanilang kwarto. At habang siya ay naglilinis ng kwarto ng kanyang amo ay bigla siyang sinunggaban at niyakap at pilit na tinumba sa kama.

Nagmakaawa si kabayani Lidem at nagpumiglas kung kaya siya ay nakaalpas sa mahigpit na pagkakayakap ng kanyang amo. Nagtatakbo siya sa loob ng sarili niyang kwarto upang masiguro na hindi na maitutuloy na magagawa ng kanyang employer ang tangkang panggagahasa sa kanya.

Agad siyang tumawag sa Philippine Overseas Labor Office sa Jeddah at nangako na agad na tatawagan ang kanyang ahensya upang siya ay mabawi. Agad ko ring ipinarating sa ating OWWA Welfare Officer na si Yolanda Peñaranda ang sitwasyon ni JB Lidem upang matutukan ang kanyang sitwasyon.

Samantala, ako ay nanawagan sa Ortiz Agency & Employment Services, Inc. na sikapin ang agarang pagtulong sa ating kabayani na si Lidem at siguruhin na agad itong mailayo sa kanyang employer, bago ba muling gawin at maisakatuparan ang pagtatangkang panggagahasa sa kanya.

oOo

Samantala, inaanyayahan natin ang lahat na subaybayan ang ating programa na BantayOFW sa AKOOFW Teleradyo na sabayang mapapanood sa FB Live stream sa Ako OFW Inc. page at sa AkoOFW Teleradyo sa Youtube channel tuwing Lunes, Miyerkules at Biyerenes ng ika-7:00 ng gabi. (Ako OFW / DR. CHIE LEAGUE UMANDAP)

Please follow and like us:
Read More

AKOOFW TELERADYO, INILUNSAD PARA SA MGA OFW

AKO OFW

Pormal nang inilunsad ang AKOOFW Teleradyo na mapapanood at maririnig sa pamamagitan ng livestream sa Facebook page na AkoOFW Inc. at pati na rin sa YouTube channel na AKOOFW Teleradyo.

Araw-araw na itong mapapanood simula ika-6 ng gabi upang magkaroon ng pagkakataon ang mga OFW na makasali sa mga programang inihahatid ng mga batikan sa online broadcasting.

Layunin ng AKOOFW Teleradyo na mas lalong makinig sa himpapawid ang lahat ng mga OFW at maging ang mga pamilya nito saan mang sulpok ng mundo. Sa unang sultada ng programa ay mapapanood ang programang “Barangay OFW” kung saan ang mga opisyal ng Department of the Interior and Local Government at ng mga barangay ay maiimbitahan upang talakayin ang mga programang makakapagsulong ng kapakanan ng mga pamilyang OFW.

Samantala ang programang “Bantay OFW” ni Ekim Canlas ang tatalakay naman sa mga suliranin ng mga OFW na nasa ibang bansa. Sa programang ito ay maaaring magsumbong o humingi ng tulong ang mga OFW na pilit na bibigyan ng lunas o solusyon ng ating himpilan.

Sa programang “Usapang OFW” ay tatalakayin ang bawat isyu na may kinalaman sa mga OFW, dating OFW at pati na rin ang mga mungkahi at saloobin ng bawat OFW at ng ahensyang may kinalaman sa kapakanan ng mga OFW at pamilya ng OFW.

Habang ang programang “Trabaho Muna” ni Marcia Gonzalez-Sadicon at ni Jed Lagman na mula sa PESO-Sta. Rosa City ay magbibigay naman ng mga oportunidad sa mga gustong makahanap ng trabaho sa Pilipinas maging sa ibayong dagat. Samantala ang “Ibida mo Kabayani” ay magbibigay ng pagkakataon sa mga OFW na naging matagumpay sa ibang bansa na maibahagi ang kanilang karanasan at mga pinagdaanan upang kanilang makamit ang tagumpay.

Ang AKOOFW Teleradyo ay isa lamang sa maraming programa ng AKOOFW Inc. upang maging daan ng bawat OFW at pamilya ng mga ito na maiparating ang kanilang saloobin maging ito ay saya o pighati. Simple lamang naman ang patakaran ng AKOOFW at ito ay ang paniniwalang “walang higit na magmamalasakit sa OFW kundi ang mga OFW at pamilya ng OFW.” (Ako OFW / DR. CHIE LEAGUE UMANDAP)

Please follow and like us:
Read More

REP. ALEXIE TUTOR, BAGONG SANDALAN NG OFWs

AKO OFW

Hulog ng langit na maituturing ang pagkakataon na personal kong makilala ang representante ng 3rd District ng Bohol na si Congresswoman Kristine Alexie B. Tutor.

Setyembre 18, 2019 noong una ko s’yang makilala sa kalagitnaan ng Joint Congress Hearing para balangkasin ang mga panukala sa pagbubuo ng Department of OFW. Personal n’ya akong kinausap upang isangguni ang problema ng isa niyang kababayan na biktima ng sexual harassment na nasa bansang Jordan.

Dahil sa kanyang pakiusap, ay agad ko itong pinatulungan kay Admin Hans Cacdac na sa loob lamang ng ilang oras ay agad na narescue ang nasabing OFW na agad na nadala sa opisina ng OWWA sa Jordan. Sa loob lamang halos ng apat na araw na pakikipag-ugnayan sa ahensya, ay napauwi na agad ang nasabing kabayani mula sa Bohol.

Dahil sa ugnayan na ito, ay naidulog ko kay Cong. Tutor ang kahilingan ng mga OFW na maipasa sa Kongreso ang mga panukala na mismong ang mga OFW at mga kinatawan ng iba’t ibang grupo ang siyang nagbalangkas ayon na rin sa kahilingan ng mga OFW.

Mabilis na sumang-ayon si Cong. Tutor na siya ang maging author ng OFW version ng panukalang batas na ngayon ay House Bill 4814 na naglalaman ng mga probisyon na ayon sa kagustuhan at kahilingan ng mga OFW.

Sakop ng bersyon ni Cong. Tutor ang pagtatayo ng Anti-Illegal Recruitment Authority (AIRA), Overseas Land-Based Tripartite Consultative Council (OLTCC), Inter-Agency Coordinating Council on Migration and Development, pagtatayo ng Global Migration Institute at Barangay OFW Councils sa buong bansa.

Ang pagtatayo ng Anti-Illegal Recruitment Authority at ng Barangay OFW Councils ang wala sa naunang house versions ng panukala na tatanggap ng mga reklamo at sumbong ng OFWs sa barangay level at pati na rin sa pangangalaga sa mga pamilya ng OFW.

Ang Barangay OFW Council ay magsisilbing advisory council na siyang direktang makikipag-ugnayan sa Barangay Council upang maisulong ang mga ordinansa at resolusyon na may kaugnayan para sa kapakanan ng mga OFW at ng mga pamilya nila. Ang Barangay OFW Council ay pamumunuan ng Barangay Chairman, at ang 6 na miyembro na mula sa hanay ng pamilya ng OFW o mga dating OFW.

Si Cong. Alexie Tutor ay anak ng isang OFW. Ang kanyang ama ay nagtrabaho bilang piyanista sa Japan, kung kaya siya mismo ay makakapag-patunay sa karanasa at damdamin ng isang anak na matagal na nawalay sa kanyang mahal na ama na OFW. (Ako OFW / DR. CHIE LEAGUE UMANDAP)

Please follow and like us:
Read More

BANTAY OFW MOBILE APP, IMPORTANTE PARA SA MONITORING NG MGA OFW

AKO OFW

Hunyo 2018 nang unang inilunsad  ng Advocates and Keepers Organization of OFW (AKOOFW) Inc. ang Bantay OFW mobile application na libreng maida-download mula sa Android Playstore ng mga OFW o ng mga papaalis pa lamang ng bansa.

Layunin ng Bantay OFW Mobile application na makumusta ang lahat ng mga OFW na nakapag-download nito kada-linggo upang maiparating ng mga OFW ang kanilang kalagayan o sitwasyon sa ibang bansa.

Tuwing araw ng Biyernes, ay may matatanggap na mensaheng “Kumusta Kabayan?” ang sinumang mayroong Bantay OFW Mobile app na maaaring sagutin ng “Mabuti” o “Hindi Mabuti”. Ang mga tumugon ng “Hindi Mabuti” ay agad na ipinapadala sa kani-kanilang ahensya upang sa gayoon ay kanilang personal na kumustahin ang kalagayan ng OFW na kanilang na-deploy sa ibang bansa.

Kung ang Bantay OFW Monitoring Center ay nakatanggap ng limang beses na  tugon na “Hindi Mabuti” ay awtomatikong ipinapadala na ito sa Philippine Overseas Employment Administration (POEA) upang mabigyan ng karampatang aksyon ng POEA ang ahensya na hindi tumutugon sa panawagan ng OFW na nagsasabing hindi mabuti ang kanyang kalagayan.

Naging kapaki-pakinabang ang Bantay OFW Mobile app sa isang Filipina na nagturista sa China at nabiktima ng illegal recruiter. Noong una siyang humingi ng saklolo sa akin, ay nahirapan ang DFA Consulate officers na matukoy ang kanyang kinaroroonan. Ngunit dahil sa pag-download agad ng Bantay OFW Mobile app at agad na pagpapadala ng “Help” o “Saklolo” ay agad na natukoy ang kanyang kinaroroonan.

Ilang araw na ang nakalipas, may isa namang OFW sa Saudi Arabia ang naghulog ng papel na napulot ng isa ring OFW na may mensahe na paghingi ng tulong. Ngunit hindi malinaw ang address na kanyang isinulat. Sa pagsisiyasat ng Overseas Workers Welfare Administration (OWWA) at Department of Foreign Affairs (DFA) ay wala rin itong record sa data base, kung kaya ako ay nakiusap kay Gov. Reynaldo Tamayo Jr. na kung maaari ay hanapin ang pamilya nito sa South Cotabato na kanyang naisulat din sa papel.

Kung ang nasabing kababayan natin na nag­hulog ng mensahe sa papel ay mayroon lamang sanang Bantay OFW Mobile app, ay madali itong mahahanap. Isang simpleng mekanismo na gamit ang teknolohiya na kung ang lahat ng mga OFW ay magkakaroon nito, ay hindi na mahihirapan ang DFA at OWWA para sa pagbibigay ng saklolo. (Ako OFW / DR. CHIE LEAGUE UMANDAP)

Please follow and like us:
Read More

DEPARTMENT OF OFW, MATUTUPAD NA SA DISYEMBRE

AKO OFW

Kahapon ay isa ako sa naimbitahan para dumalo sa Congress Meeting ng Committee Secretary ng Committee on Go­vernment Reorganization at Committee on Overseas Workers Affairs.

Kasama sa mga naimbitahan ay ang mga kinatawan ng Department of Labor and Employment (DOLE) sa pamumuno ni Secretary Silvestre Bello, POEA, OWWA, CFO at ang DFA-OUMWA at ang ilang piling mga non-government organizations (NGOs) na kung saan nabibilang ang AKO OFW Inc.

Sa takbo ng pag-uusap ay malinaw na ang lahat ng dumalo ay nagpahiwatig ng kanilang pagsuporta upang maisabatas ang pagkakaroon ng DOFW.

Maraming mga mungkahi ang iprinesenta ng mga dumalo at isa na rito ay ang mungkahi ng AKO OFW sa pagkakaroon ng Global Migration Institute na kung saan ito ay magiging daan o paraan upang ang mga OFW at da­ting mga OFW ay magkaroon ng pagkakataon na makapasok o maging parte ng DOFW.

Sa pamamagitan ng pagkakaroon ng Global Migration Institute na papangasiwaan ng bagong itatatag na DOFW, ay sasanayin ang mga Labor Attache, Welfare officers at iba pang mga opisyal na matatalaga sa ibang bansa pati na rin ang mga OFW na gustong maging bahagi ng DOFW.

Napakahalaga ng kasanayan ng bawat opisyal o tauhan na dahil ang kanilang papangalagaan ay mga OFW na nagbibigay yaman para sa a­ting bansa.

Bago magtapos ang pulong ay nabanggit ng Committee Chairman Cong. Marvey Mariño na ang tagabulin ng pangulo ay matapos ang paggawa ng batas sa Nobyembre upang maisabatas at pirmahan ng pangulo Rodrigo Duterte sa Disyembre. (Ako OFW / DR. CHIE LEAGUE UMANDAP)

Please follow and like us:
Read More