OLIGARKIYA NOON AT NGAYON PUNA

PUNA

SILA-SILA ang namamayagpag noon at ngayon. Ang ibig kong sabihin o ang tinutukoy ko ay ang mga oligarko o ­mayayamang tao at negosyante sa Pilipinas na bagaman iilan-ilan ay nagagawang kontrolin ang halos karamihan ng mga negosyo at kapangyarihan sa bansa.

Ang sila-silang tinutukoy natin ay ang mga pamilyang Ayala, Lopez, Pangilinan, at mga katulad nila.

Ang mga negosyanteng ito ay namamayagpag sa kanya-kanyang panahon o sa madaling salita ay may oras na kinakampihan sila ng nakaupo sa adminsitrasyon.

Noon, hindi natinag ang mga Ayala ng ­administrasyon nina dating Pangulong Cory Aquino, Fidel Ramos, Joseph Estrada, Gloria Arroyo at Benigno Aquino III.

Sa panahon ng ­mag-inang Aquino, namayagpag at naging makapangyarihan ang mga Lopez. Noong simula pa lang nang panunungkulan ni Cory ay nabawi na ang mga kumpanyang dating sinequester ng pamahalaan.

Mula sa pagkabawi, hindi lang nakabangon ang mga Lopez subalit pinasok ng mga ito ang ilang mga kontratang hindi pumapabor sa pamahalaan subalit para lang sa kanilang mga kapakinabangan dahil batid nilang hindi sila tutumba sapagkat nasa likod nila ang mga namumuno sa pamahalaan lalo na ang noon na nasa Malacañang.

Subalit sa panahon ­ngayon ni Pangulong Rodrigo Duterte, madalas ay binabatikos ng pangulo ang isa sa mga pag-aaring ­kumpanya ng Lopez – ang ABS-CBN.

Noon pa man kahit panahon ni dating Pangulong Ferdinand Marcos, namamayagpag na ang pangalan ni Manny Pangilinan na may-ari ng Philippine Long Distance Telephone (PLDT). Ang mga Ayala ay kilalang-kilala rin bilang mahuhusay na negosyante kung kaya’t marami silang mga ari-arian lalo na lupa at gusali.

Ngayon, kabilang pa rin sila sa mga prominenteng tao at negosyante sa bansa subalit dahil nabatid ng pangulo ang ilan sa mga kontratang pinasok nila ay nilamangan masyado ang gobyerno, hindi na iyon ­pinalampas ni Presidente Duterte kung kaya’t hinahamon ng ­pangulo ang mga negosyanteng ito na sagutin nila ang mga akusasyon laban sa kanila.

Kailangang patunayan ng mga oligarkong ito na wala silang ginagawang masama at hindi nila nilalamangan ang kanilang kapwa.

Kaso, masyadong ­malinaw pa ang mata at isip ng pangulo kung kaya’t batid nitong may mga kalokohang ginawa ang mga oligarkong ito bukod pa sa masyadong ginulangan ang pamahalaan.

Kaya naman hindi niya pinalampas ang mga ginawa ng mga ito sa kontrata sa pamahalaan, ipinabusising mabuti at saka ibinuking ang kalokohan ng mga bugok na negosyante na nais rin ­yatang pahirapan na mabuti ang mga mamamayan.

Pero kung mahusay ang serbisyo ng mga kumpanyang binabanatan ni Pangulong Duterte malamang ang mamamayan ay kakampi sa mga kumpanyang ito.

Kaya lang, tulad ni Pangulong Duterte, ang mamamayan ay hindi nasisiyahan at hindi masaya sa mga serbisyong kanilang ipinagkakaloob sa bayan.

Lamang, parang ang nais namang paboran ni Presidente Duterte ay kaibigan din niya na tulad ng ilang kumpanyang kanyang binabanatan ay hindi rin naman maganda ang serbisyong ­ibinibigay sa lugar na kanilang napagtayuan ng negosyo.

Yun nga lang sa pinakahuling survey, nangunguna na sa pinakamayamang tao sa Pilipinas si dating ­Senador Manny Villar at pumangalawa na lamang ang may-ari ng SM na si Henry Sy.

At para sa kaalaman ng nakararami, nakalulua po ang kanilang mga yaman.

-oOo-

Para sa suhestiyon at reaksyon mag-email ­joel2amongo@yahoo.com at ­operarioj45@gmail.com.

 

 

Read More

P23-B SEWER FEES ‘RAKET’ NG AYALA, MVP BISTADO NG SOLON

Rep Lito Atienza

Buwis ng Maynilad at Manila Water ipinasa sa taumbayan

(BERNARD TAGUINOD)

HINDI pa kuntento sa pabor na nakuha ang Manila Water at Maynilad sa water concession agreement, iniisahan pa nila ang kanilang mga kostumer sa kinokolektang sewage fees.

Ito ang reklamo ni Buhay party-list Rep. Lito Atienza sa dalawang nabanggit na kumpanya ng tubig sa Metro Manila dahil kolekta nang kolekta aniya ang mga ito para sa waste water treatment facilities subalit hindi nila itinatayo ang mga proyektong ito.

Mistulang inihalintulad ng mambabatas sa ‘pangraraket’ ang patuloy na paniningil ng dalawang kumpanya sa nasabing bayarin.

Ayon sa dating mayor ng lungsod ng Maynila, buwan-buwan ay nangongolekta ng sewage fees ang Manila Water at Maynilad sa kanilang mga kostumer para sa nasabing proyekto.

“Water consumers over the years have been paying a so-called sewage fee, amounting to 20 percent of their monthly water bills, for a service that has never been rendered,” ani Atienza.

Layon ng nasabing pasilidad na matiyak na ang mga tubig mula sa mga kabayahan, gusali, negosyo at iba pang establisimyento ay malinis bago ito padaluyin sa ilog o dagat.

Gayunpaman, limitado umano ang treatment facilities ng dalawang nabanggit na water concessionaires subalit tuloy-tuloy pa rin sa pangongolekta ang mga ito sa sewage fees.

“Niloloko nila tayo, bayad tayo nang bayad, pero wala namang serbisyong nabibigay. Hindi nila tinutupad ang kanilang obligasyon kay Juan dela Cruz,” ayon pa sa mambabatas.

Dahil dito, kahit anong linis umano ng gobyerno partikular na sa Department of Environment and Natural Resources (DENR) sa Manila Bay ay walang mangyayari hangga’t hindi nakumpleto ang water treatment facilities ng Manila Water at Maynilad.

Ang Manila Water ay pag-aari ng mga Ayala habang kabilang naman ang Maynilad sa mga negosyo ni Manny V. Pangilinan.

Samantala, binayaran ng mga customer ng Manila Water at Maynilad ang kanilang income at corporate tax na umaabot sa P23 Billion mula noong 2008 hanggang 2012 kaya patuloy ang kanilang pagyaman.

Ito ang nakasaad sa House Resolution (HR) 571 na inakda ng mga militanteng mambabatas sa mababang kapulungan ng Kongreso na sumusuporta sa pagkalkal sa concession agreement sa pagitan ng gobyerno, Maynilad at Manila Water.

Ayon sa grupo, mula 2008 hanggang 2012 ay ipinapasa ng Manila Water at Maynilad sa mga consumer ang kanilang taunang income tax na umaabot sa P1.3 Billion kada taon.

Nangangahulugan na sa loob ng 5 taon ay nagbayad ang mga consumer ng P15.3 Billion sa income tax ng dalawang nabanggit na water concessionaires.

“Apart from the corporate taxes amounting to P8.07 Billion from 2013-2014, all enjoying a six year income tax holidays granted by the Board of Investments from 2009 -2015,” ayon pa sa resolution ng Makabayan bloc sa Kamara.

Ilan lamang ito sa kabig ng Manila Water at Maynilad simula nang makuha ng mga ito ang concession noong 1997 habang ang mamamayan anila ay patuloy namang nagdurusa sa pagbabayad dahil pataas ito nang pataas.

Maliban dito, hindi umano maayos ang serbisyo ng dalawang water concessionaires simula nang hawakan ng mga ito ang water distribution service at patunay rito ang water crisis na naranasan ng taga-Metro Manila noong nakaraang taon.

Dahil dito, sinabi ng grupo na kinabibilangan nina Reps. Carlos Zarate, Ferdinand Gaite, Eufemina Cullamat ng Bayan Muna; Rep. France Brosas ng Gabriela, Kabataan party-list Rep. Sarah Elago at ACT party-list Rep. France Castro, walang ginastos ang mga kumpanyang ito sa kanilang obligasyon sa gobyerno.

Dahil dito, sinuportahan ng mga ito ang plano ni Pangulong Duterte na i-nationalize ang water service kapag hindi tinanggap ng Manila Water at Maynilad ang bagong kontrata sa tubig. BERNARD TAGUINOD

 

Read More

UP LUGI SA PAGPAPAUPA SA AYALA

panelo55

Imbestigasyon ididiga ni Sec. Panelo kay PDu30

IREREKOMENDA ni Presidential spokesperson Salvador Panelo kay Pangulong Rodrigo Roa Duterte na pag-aralan ang lease contract ng Ayala Group at University of the Philippines kaugnay ng UP Ayala Land Technohub sa Diliman.

Ito’y dahil positibong lugi ang UP at ang gobyerno sa pag-renta ng Ayala Group sa UP Ayala Land Technohub ng P20.00 less per square meter.

“Ay definitely lugi ang gobyerno dito. Can you imagine, 20 pesos less per square meter. I’ve been told by many businessmen, eh sila nga daw 500 pesos per square meter, yung iba 200 pesos. Can you imagine, P20.00 less per square meter. Kailangang pag-aralan natin ito. Kawawa naman ang gobyerno rito ,” ayon kay Sec. Panelo.

Nilinaw ni Sec. Panelo na ang rekomendasyon na rebisahin ang  lease contract ay hindi  policy direction ng pamahalaan.

“Hindi, I will recommend to the president if this is true, on the basis of a study and on the basis of their admission that only 10.4 billion will be taken by the government, by UP after 25 years. I will recommend to the president, aba pag-aralan natin ito mukhang kawawa na naman ang gobyerno dito. I have to probe it. I read it in the internet that ‘yun palang Technohub diyan sa UP run by the Ayalas, parang maraming, maraming ginawang computation ‘yung nag-research,”ani Sec. Panelo.

“Parang lumalabas na ‘yung buong lugar na ‘yun is being rented by the Ayalas at less than P20 per square meter for 25 years. Eh kung totoo ‘yun eh ‘di malaki na naman ang problema,” pahayag pa nito.

Kahit pa aniya maging P171.00 per square meter gaya ng sinasabi ng Ayala Land ay lugi pa rin ang pamahalaan.

Sa ulat, batay sa data mula sa Ayala Land ay nagpapakita ito na ang UP Ayala Technohub ay mayroong gross leasable area na 156,708.75 per square meter. CHRISTIAN DALE

Read More

AYALA, MVP CONTRACTS IIMBESTIGAHAN

Rep Eric Yap-4

Bayan ibinabaon sa utang – solon

(BERNARD TAGUINOD)

HINDI lang si Pangulong Rodrigo Duterte ang banas kina Fernando Zobel de Ayala at Manny V. Pangilinan kundi ang mababang kapulungan ng Kongreso dahil ibinabaon ng mga ito ang gobyerno at taumbayan sa utang.

Nitong Lunes ay inihain ni ACT-CIS party-list Rep. Eric Yap ang House Resolution (HR) 647 para imbestigahan ang concession agreement ng gobyerno at Light Rail Management Corporation (LMRC) na consortium ng mga Ayala at Pangilinan noong 2015.

Nabatid kay Yap na nagbayad umano ng concession fees sina Ayala at Pangilinan na aabot sa P9 Billion para pangasiwaan ang LRT sa loob ng 32 taon at sa loob lamang aniya ng apat na taon ay kumita ang mga ito ng P13 Billion.

Ngunit sa kabila umano na kumita na ang mga Ayala at Pangilinan ng P4 Billion ay hindi pa nabusog ang mga ito at naniningil pa ng P6 Billion matapos mabigo ang gobyerno na ayusin ang right of way para sa ekstensyon ng LRT 1.

“Dahil yung extention ng LRT1 ay hindi pa tapos dahil sa pag-acquire ng right of way, ang penalty na na-incur ng gobyerno dahil hindi pa nai-deliver ang right of way ay nasa P6 Billion na.

Nangangahulugan na nabaon sa utang ang gobyerno at mamamayan sa kabuuan kaya kailangan umanong imbestigahan ito dahil kumikita naman aniya ang mga ito ngunit hindi pa kuntento.

“So sa akin, kumita naman sila, dahil ngayon ay tumakbo eh, Hawak nila ang ticket, hawak nila ang endorsement. So kumita sila, bakit naman kung na-delay ideliver ang right of way, bakit naman mag-charge ng ganun kalaki,” ani Yap.

Layon ng imbestigasyon na malaman kung talagang ‘disadvantegous” ang nasabing kontrata para bawiin ang concession agreement na pinasok ng nakaraang administrasyon sa Ayala at Pangilinan group.

Read More

SOLON KINA AYALA AT PANGILINAN: MAY KONSENSYA PA BA KAYO?

Rep Eric Yap-3

(BERNARD TAGUINOD)

HINDI mawari ng isang mambabatas kung mayroon pa bang konsensya ang mga Ayala at si Manny V. Pangilinan dahil sa panlalamang umano ng mga ito, hindi sa gobyerno kundi sa taumbayan.

Ginawa ni ACT-CIS party-list Rep. Eric Yap ang nasabing pahayag kasunod ng natuklasang paghahakot ng pera ng mga Ayala at Pangilinan sa kontratang pinasok ng mga ito sa Light Rail Transit (LRT).

“Mr. Ayala at Mr. Pangilinan, hindi ko alam kung anong puso at konsensya ang meron kayo para lamangan nang husto ang gobyerno dito,” ani Yap, kaugnay ng kontratang pinasok ng LRMC Consortium na pag-aari ng Ayala at Pangilinan sa gobyerno para patakbuhin ang LRT.

Ayon sa mambabatas, tulad ng water concession agreement na pinasok nina Pangilinan at Ayala, “onerous” umano ang kontrata sa pagitan ng gobyerno at LRMC Consortium dahil pinagkakitaan lamang ito ng dalawang nabanggit na negosyante.

Ito ay dahil kumita na ang mga ito sa loob lamang ng apat na taon o mas malaki na ang naipon ng mga nito kumpara sa binayaran nilang concession fee sa gobyerno base sa idineklara umano nilang gross revenue.

Hindi binanggit ni Yap kung magkano ang idineklarang gross revenue ng LRMC subalit lalong kikita ang mga ito sa nasabing kontrata dahil 32 taon ang ibinigay ng gobyerno sa kanila at maaari pa nilang palawigin ng 50 taon.

“Apat na taon pa lang yan and this agreement will cover a 32-year period. They have exclusive rights for 32 years and it can extend to 50 years. Imagine that. Nakakagalit at paulit-ulit kong iniisip kung bakit tayo pumasok sa ganitong kontrata,” ani Yap.

Isa ito sa ikinagalit ni Pangulong Rodrigo Duterte kina Ayala at Pangilinan na siyang nagpapatakbo naman sa water distribution service ng Metropolitan Waterworks and Sewerage System (MWSS).

Ang nasabing kontrata ay pinirmahan noong administrasyon ni dating Pangulong Benigno “Noynoy” Aquino III kaya maghahain umano ng resolusyon si Yap upang imbestigahan ito at mapanagot ang mga dapat managot.

“Dapat ay mapanagot din ang mga government official na gumawa, nag-review at nag-approve nito dahil hinayaan ninyo na ang mga kababayan natin ang dehado sa agreement na ito,” ani Yap.

Read More

AYALA AT MVP SWAK SA PLUNDER — DUTERTE

Kapag napatunayan, Drilon kakasuhan din

(Ni: NELSON S. BADILLA)

KAHIT mayroong bagong kontrata na iaalok ang pamahalaan sa Manila Water Company Inc. at Maynilad Water Services Inc., hindi inaatras ni Pangulong Rodrigo Duterte ang kanyang plano na sampahan ng kasong “plunder” o “syndicated estafa” ang mga may-ari at namamahala ng dalawang kumpanya.

Kumbinsido si Duterte na “swak” ang magkapatid na sina Fernando Zobel de Ayala at Jaime Augusto Zobel de Ayala II, ang mga may kontrol ng Ayala Corporation na siyang may-ari at namamahala ng Manila Water at si Manny V. Pangilinan o “MVP” na namamahala ng Maynilad, sa dalawang nabanggit na kaso.

Kamakailan, idiniin uli ng pangulo sa magkapatid na Ayala at MVP na kahit pumayag at nilagdaan nila ang bagong kontratang inihanda ng pamahalaan ay hindi nakatitiyak ang mga ito na hindi sila makakasuhan. “I do not give you a guarantee that no charges will be filed. For all that I can really say about this, I am not the only Filipino who is interested in the prosecution of crimes,” pahayag ng pangulo.

“As a lawyer, when I looked at the contract, it was full of shit, because… in that document is the exact copy of the Anti-Graft and Corrupt Practices [Act]. Your crime, it could be plunder or it could be a syndicated or estafa on a large scale. In which case, it is non-bailable. If you want to go out? Go ahead. But you will be a fugitive for all time. And I guarantee you, you will never come back as a whole person,” birada ni Duterte sa kanyang talumpati kamakailan.

Ang Department of Justice (DOJ) at Office of the Solicitor General (OSG) ang gumawa ng panibagong kontrata kung saan tinanggal ang mga kontra-mamamayan at kontra-pamahalaang probisyon tulad ng pagpapabayad sa mga kostumer ng corporate income tax, water treatment facility at environment enhancement.

Binanggit uli ni Duterte na matagal nang “ginagatasan” ng Manila Water at Maynilad ang mga negosyante at residente sa Metro Manila.

Ang kontrata ng Manila Water at Maynilad sa Metropolitan Waterworks and Sewerage System (MWSS) ay nagsimula noong 1997 (panahon ni Fidel Ramos) at matatapos sa Hunyo 30, 2022 matapos ipatigil ni Duterte ang pagpapalawig ng kasunduan ng hanggang 2037 noong 2009 (termino ni Gloria Macapagal Arroyo).

Bukod sa magkapatid na Ayala at kay MVP, hinahabol din ni Duterte ang mga nagbalangkas sa kontrata ng tubig.

Isa sa pinaniniwalaan ni Duterte na may kinalaman sa kontratang magtitiyak na hindi malulugi ang Manila Water at Maynilad ay si Senador Franklin Drilon.

Kapag nakakuha ng ebidensiyang magsasabing isa si Drilon sa mga salarin na gumawa ng kontrata ng Manila Water at Maynilad sa MWSS ay siguradong pakakasuhan ng pamahalaan si Drilon, ratsada ni Duterte.

Ang orihinal na may kontrol ng Maynilad ay ang pamilya Lopez, sa pamamagitan ng Benpres Corporation.

Noong 2007, nabili ng DMCI-MPIC Water Company, kumpanyang itinayo ng pamilya ni David Consunji at ng Metro Pacific Investments Corporation (MPIC) na pinamamahalaan ni Pangilinan.

Umabot sa 84 porsiyento ang nabili ng pangkat ni Pangilinan at ng pamilya Consunji sa share of stocks ng Benpres Corporation sa Maynilad.

762% ANG ITINAAS

Ipinaalala ni Rodolfo “RJ” Javellana, pangulo ng United Filipino Consumers and Commuters (UFFC), na bago mapunta sa Manila Water at Maynilad ang negosyo ng distribusyon ng tubig sa Metro Manila at mga karatig lalawigan, wala pang P2.50 kada kubiko metro ang singil sa tubig ng Metropolitan Waterworks and Sewerage System (MWSS).

Ngayon 2020, umaabot na halos sa P35 bawat kubiko metro ang singil ng Manila water at Maynilad, wika ni Javellana.

Nabatid ng Saksi Ngayon na umabot sa P54.9 bilyon ang tubo ng Manila Water mula 2009 hanggang 2018, samantalang P64.6 bilyon naman ang tubo ng Maynilad sa parehong haba ng taon.

Ganito rin ang pananaw ng ilang mambabatas sa mababang kapulungan ng Kongreso.

Imbes na bumaba ang presyo ng tubig sa kamay ng mga dambuhalang negosyante, tumaas pa ito ng hanggang 762% mula nang hawakan ng mga ito ang water distribution service sa nakaraang 25 taon.

Ito ang pahiwatig ng Makabayan bloc na isang patunay na pinagkakitaan lamang umano ng mga Ayala at Pangilinan ang water service.

Ayon sa nasabing grupo na kinabibilangan nina Reps. Carlos Zarate, Ferdinand Gaite at Eufemia Cullamat ng Bayan Muna; Rep. Arlene Brosas ng Gabriela, ACT party-list Rep. France Castro at Kabataan party-list Rep. Sarah Elago sa kanilang inihaing House Resolution (HR) 19, malinaw na lalong nagmahal ang serbisyo sa tubig mula nang hawakan ng Maynilad at Manila Water ang water service distribution.

Sinabi ng grupo na bago isinapribado ni dating Pangulong Fidel Ramos ang water distribution noong 1997 ay P.4.02  per cubic meter lang ang singil ng MWSS sa East Zone na hawak ngayon ng Manila Water.

Ngunit mula nang hawakan ng Manila Water  ang water service, umabot na anila sa P34.65 per cubic meter ang presyo ng tubig o katumbas ng 762% na pagtaas sa nakaraang 20 taon o mula 1997 hanggang 2017.

Ganito rin ang nangyari sa mga customer ng Maynilad sa West Zone dahil mula sa dating P7.21 per cubic meter bago naisapribado ang water service noong 1997 ay umaabot na ngayon sa P46.75 ang presyo nito noong 2017 o 548% na pagtaas.

Dahil dito, umapela ang nasabing grupo na huwag nang ibalik sa pribadong sektor ang water service distribution dahil pagkakakitaan lamang ng mga negosyante ang serbisyong ito.

“Constitutional rights ng mga tao na magkaroon ng malinis at sapat na supply ng tubig,” ayon sa grupo, kaya dapat ang gobyerno ang magpapatakbo nito at hindi ang mga pribadong negosyante na wala umanong hangad kundi kumita lamang imbes na magserbisyo. (May dagdag na ulat si BERNARD TAGUINOD)

Read More

AYALA, PANGILINAN GANID — PDU30

DUTERTE-AYALA-PANGILINAN-2

Muling inupakan dahil mistulang walang kabusugan

MULING nakatikim ng birada mula kay Pangulong Rodrigo Roa Duterte ang mga negosyanteng sina Fernando Zobel de Ayala at Manny Pangilinan.

Sa briefing ng Pangulo kaugnay ng sitwasyon sa Taal, Batangas, muli nitong ibinulalas sa publiko ang ngitngit sa Manila Water at Maynilad na aniya’y tila walang kabusugan dahil patuloy na pinagkakakitaan ang kanilang negosyong tubig.

Gaya nang ipinangako sa publiko, inihatag ng Pangulo ang aniya’y mga big fish na nasa likod ng naranasang kawalan ng suplay ng tubig sa nagdaang mga buwan dahil sa pagmamatigas ng pamahalaan na bayaran ang P7.4 billion sa Manila Water ni pag-aari ng Ayala at P3.4 billion sa Maynilad ni Pangilinan.

“I may not able to arrive at the finish line. Baka hindi ko na maabutan ‘yan. But huwag ninyong …’yan. Sabi ninyo naghihingi kayo noon ng “where’s the big fish?” Ito. Ito na ang hinihingi ninyong big fish: Ayala pati Pangilinan,” ani Pangulong Duterte.

Nag-ugat ang ngitngit ng Pangulo sa dalawang water concessionaires nang mapansin niyang palagi na lamang nawawalan ng suplay ng tubig sa iba’t ibang lugar sa bansa.

Nag-usisa umano siya at napagtanto na ang dahilan ng kawalan ng suplay ng tubig sa ilang lugar sa bansa ay dahil sa tila panggigipit ng mga water concessionaire para bayaran ng pamahalaan ang ang P7.4 billion sa kanila.

Napanalunan kasi ng Manila Water at Maynilad ang isinampa nilang kaso sa Permanent Court of Arbitration (PCA) sa Singapore laban sa pamahalaan na may kaugnayan di umano sa pagkalugi ng kanilang negosyong tubig sa bansa.

So hindi nila alam maging Presidente ako. Akala nila that I will just also, you know, p***** i**, they’re reaping. They have been f****** the people for — since 1957. Billions, trillions. ‘Yang tubig? Water treatment. Iilan ang p***** i** nag… Sa bill ninyo bayad ka water treatment facility. It was a 1957 contract until now there is no — ni walang isang makina. Walanghiya talaga itong mayayaman sa totoo lang,” ayon kay Pangulong Duterte.

Aniya pa, maraming nagsasabi na maaaring bumaba ang ekonomiya ng bansa kapag hindi nabigyang solusyon ang  usaping ito lalo pa’t klaro na may paglabag sa Saligang Batas.

” As a matter of fact, that contract right at the beginning was null and void. Isang tingin ko lang. Hindi naman ako bright pero I was a prosecutor all my life. As a trial — that was my job. That the corporate tax will be passed on to the consumers. Eh ‘di huwag mo na lang i-tax. Tatamaan din pala ang tao. And yet that contract was approved by lawyers now in government. I hope Drilon is not one of them. Kasi when I decide to — idedemanda ko talaga. I will file the charges of — it’s either plunder or syndicated estafa,” aniya pa rin.

Samantala, sinabihan ng Pangulo ang publiko na huwag matakot na maputulan ng tubig  dahil kapag nagkataon ay mapipilitan ang gobyerno na i-nationalize ang tubig.

Magiging mura kung gobyerno

Samantala, maaari umanong bumaba ang singil sa tubig kapag ibinalik sa kontrol ng gobyerno ang water distribution service imbes na ipaubaya ito sa mga pribadong kumpanya na walang ibang habol kundi kita at hindi serbisyo.

Ito ang pangangalampag sa Malacanang ng Makabayan bloc sa Kamara kaugnay ng bagong kontrata sa tubig na isinusubo ng gobyerno sa Manila Water at Maynilad upang magpatuloy ang dalawang kumpanyang ito sa kanilang negosyo.

Ayon kay Gabriela party-list Rep. Arlene Brosas, kumita ang Manila Water ng P6.5 Billion noong 2018 habang P7.3 Billion naman sa Maynilad na galing sa bulsa ng mga consumer.

“Yung pera na kinita ng mga water concessionaire, napakalaki, kalahati lang dyan ang mabawas sa bill ng consumers malaking bagay na,” anang mambabatas kaya dapat umanong ganap na itong kontrolin ng pamahalaan.

Maaari umanong gamitin mismo ng gobyerno ang ibang income sa pagsasaayos sa serbisyo tulad  ng mga butas na tubo ng tubig na hanggang ngayon ay hindi naayos ng Manila Water at Maynilad gayung 1997 pa sila nagsimulang magnegosyo.

Magugunita na isinapribado ni dating Pangulong Fidel Ramos ang water distribution noong 1997 subalit ayon kay Brosas, ay walang pagbabago sa serbisyo kahit bilyones ang kinita na ng Manila Water at Maynilad. (CHRISTIAN DALE, BERNARD TAGUINOD)

Read More

‘SPIDERMAN’ UMAKYAT SA BUILDING, INARESTO

french

(NI DAVE MEDINA)

BINALOT ng tensyon ang paligid ng Ayala Avenue sa Makati City Martes ng magtatanghali dahil sa pag-akyat sa gilid ng isang 45 palapag na gusali ng isang tao na inakalang magpapakamatay.

Kinabahan, natakot, at naawa ang maraming taong nasa paligid lamang ng 45-storey GT Tower sa pag-akyat  ng lalaki sa naturang gusali.   Inakala ng mga nagtatrabaho sa lugar na isa iyong insidente ng suicide o magtatangkang tumalon sa gusali ang lalaki.

Gayunman, nang lumabas sa social media ang video footage na kuha ng mga nagtatrabaho malapit sa GT Tower sa Makati City, nakitang isang publicity stunt ang ginagawa ng tao na napag-alamang ang tinaguriang French Spiderman na si Alain Robert.

Sa pagtaya ng mga nagtatrabaho malapit sa GT Tower na nag-video ng pag-akyat ni Alain, umabot ng 30-minuto ang kaniyang pag-akyat mula sa ibaba hanggang sa tuktok ng gusali.

Si Robert ay inimbitahan ng mga pulis at posible umanong kasuhan ng trespassing o public disturbance.

Si Alain Robert ay isang rock at urban climber mula sa Digoin, Saone-et-Loire, Burgundy, France na sumikat dahil sa kanyang solong pag-aakyat sa mga batuhan at matataas na gusali na walang ginagamit na climbing equipment maliban sa isang maliit na bag ng chalk at isang pares ng climbing shoes.

Ipinanganak siya noong Agosto 7, 1962 sa Digoin, France at  may taas na 1.65 centimeter, at tinaguriang French Spiderman

Sa mga video na ibinahagi sa social media makikita si Alain na nakasuot ng itim na pang-itaas at dilaw na pants na mabilis na inaakyat ang 45 palapag na GT Tower.

Maraming gusali na rin sa iba’t ibang lugar sa mundo ang inakyat ni Alain; kabilang dito ang Heron Tower ng London, Empire State Building sa New York at ang pinakamataas na gusali sa buong mundo na Burj Khalifa sa Dubai.

 

 

Read More