NABABAHALA SA NCOV SEX WORKERS IWAS MUNA SA CHINESE

0

TAGUM City – Iniwasan muna ng sex workers ang pakikipagtalik sa mga Chinese na kustomer dahil sa takot na mahawa sa kinatatakutang sakit na 2019 Novel Coronavirus acute respiratory disease (2019-nCoV ARD).

Sinabi ni alyas Jessa, 21, nagtratrabaho bilang GRO o kilala sa tawag na “Angel of the Night” sa mga bahay aliwan ng lungsod, ikinababahala niya na madapuan siya ng 2019 nCoV kaysa magkaroon ng Human Immunodeficiency Virus (HIV) o Acquired Immunodeficiency Syndrome (AIDS), dahil marunong na silang umiwas sa HIV sa pamamagitan ng paggamit ng condom  habang nakikipagtalik sa kanilang kostumer.

Ayon kay alyas “Gina” natatakot din siya na makapitan ng nCoV kaya umiwas na rin sa mga Tsinoy na dati niyang mga kustomer matapos malaman na mula sa Wuhan, China ang naturang virus.

Inamin niya na pinag-aagawan nila noon ang mga Chinese na kustomer upang maka-table sa pinagtratrabahuang club ngunit ngayon ay kailangan nilang alamin muna kung Tsinoy ang kanilang pinagsisilbihan.

Dagdag naman ni alyas “Sheila”, kailangan niyang maniguro dahil may dalawa siyang binubuhay na anak at kung sakaling madapuan ng NcoV ay wala na umanong ibang mag-aalaga sa kanila.

Iginiit din ng commercial sex worker sa lugar na ayaw nilang magsuot ng face mask dahil hindi umano makikita ang kanilang mukha na naka-make-up, at kagandahan na siyang kapital upang maakit ang mga kostumer.

Samantala, sinabi naman ng 26-anyos na si “Eva” na handa siyang ilabas ng isang Chinese basta kilala niya at makita sa hitsura na walang sakit, hindi payat at matanda na.

Sa ngayon, ay wala pang nadapuan ng Coronavirus o kaya’y person under investigation sa sakit na ito sa Davao de Oro at Davao del Norte.

Ngunit ayon sa mga GRO sa lugar, kailangan nilang maniguro dahil katawan nila ang kanilang puhunan sa nasabing hanapbuhay. (DONDON DINOY)

 

Read More

SINITA SA TRAFFIC VIOLATION; CHINESE TIMBOG SA DALANG DROGA

0

ARESTADO ang isang Chinese national dahil sa dalang ilegal na droga nang sitahin ng mga tauhan ng Manila Traffic and Parking Bureau dahil sa traffic violation sa Maynila nitong Huwebes ng umaga.

Kinilala ang suspek na si Pablo Misador Chu, nasa hustong gulang, naninirahan sa Nobel Place sa Binondo, Manila.

Bukod sa number coding, nahaharap din ang suspek sa kasong paglabag sa RA 9165 o Comprehensive Dangerous Drugs Act of 2002 dahil sa pagdadala ng shabu.

Posible ring makasuhan ang suspek ng attempted homicide dahil sa pagbangga niya sa dalawang tauhan ng MTPB na humarang sa Toyota Fortuner ng Chinese national.

Batay sa ulat ni P/ Insp. Rex Bartolome, chief investigator ng Manila District Traffic Enforcement Unit, bandang alas-8:45 ng umaga, habang abala ang ilang traffic enforcer sa tapat ng Lucky Chinatown sa Reina Regente St. sa Binondo nang mamataan nila ang puting kotse ng suspek may plakang NBT-7767.

Agad nila itong pinapara ngunit imbes na huminto ay biglang pinaharurot ang sasakyan.

Mabilis namang sumakay sa kani-kanilang motorsiklo ang dalawang tauhan ng MTPB hanggang sa umabot sa panulukan ng Jose Abad Santos Avenue at Tayuman St. sa Tondo at dito nila hinarang ang sasakyan ng dayuhan.

Inakala ng dalawa na bubuksan ng suspek ang bintana ng kotse ngunit ngunit bigla itong humarurot at binangga ang dalawang motorsiklo ng mga traffic enforcer.

Naispatan naman ng ilang mga tauhan ng MPD- Station 2 ang komosyon kaya tinutukan nila ng baril ang suspek.

Nang siyasatin ang loob ng sasakyan, tumambad ang ilang piraso ng hinihinalang shabu na nakalagay sa plastic sachet.

Kasama ng suspek ang isang Pinay na posibleng lover nito.

“Bangag na bangag sa droga ‘yung suspek, kaya sa takot na mahuli, nagawa nitong tumakas,” ayon kay P/Lt. Bartolome. (RENE CRISOSTOMO)

 

Read More

SOURCE NG P74.9-M DROGANG NASABAT SA CAVITE, METRO; DRUG LORD SA BILIBID TULOY ANG NEGOSYO

0

UMABOT sa P74.9 milyong halaga ng ilegal na droga ang nakumpiska ng mga awtoridad sa tatlong magkakahiwalay na operasyon sa Bacoor City sa Cavite, Valenzuela City, Quezon City at Caloocan City.

Sa Bacoor City, nasabat ang tinatayang P68 milyong halaga ng umano’y shabu na ibabagsak sana sa Metro Manila at sa lalawigang ito, makaraang madakip ng mga awtoridad ang dalawang hinihinalang tulak ng ilegal na droga sa Panapaan, Bacoor City.

Sina Reynaldo Moral Cordero at Irene Ilaya Biazon, kapwa residente ng Maricaban, Pasay City, ay natimbog bandang 6:30 ng gabi noong Enero 27 sa Panapaan 4 , Bacoor City.

Lulan ng isang Mitsubishi Lancer (WTY-942 ) ang dalawa nang kapwa madakip ng mga tauhan ng National Bureau of Investigation (NBI).

Ayon kay NBI Director Dante Gierran, isang impormante ang nagbigay ng tip hinggil sa transaksiyon ng mga suspek sa NBI-MIMAROPA.

Bunsod nito, nagkasa ng operasyon ang magkasanib na puwersa ng NBI-NCR at ng NBI-MIMAROPA at hinarang ang sasakyan ng mga suspek na nagresulta sa pagkakakumpiska sa 10 kilo ng hinihinalang shabu na tinatayang P68 milyon ang halaga.

Samantala, kumpiskado naman ang mahigit P5.9 milyon halaga ng umano’y shabu at marijuana sa dalawang umano’y drug pushers na nadakip sa magkahiwalay na buy-bust operation sa mga lungsod ng Caloocan at Valenzuela noong Miyerkoles ng gabi.

Ayon sa ulat, dakong alas-9:00 ng gabi nang madamba si Omair Sultan, 23, ng Phase 12, Brgy. 188, Tala sa Domato Avenue, Phase 12, matapos bentahan ng shabu ang isang undercover na pulis kapalit ng P20,000 marked money kabilang ang isang tunay na P1,000 at 19 piraso ng boodle money.

Bukod sa nasabing kontrabando, nakuha rin sa suspek ang medium size plastic ice bag na naglalaman ng 680 gramo ng shabu na tinatayang P4,624,000 ang street value.

Alas-8:30 naman ng gabi nang masakote ang habal-habal driver na si Dominic Aposaga, 26, sa buy-bust operation sa kanyang bahay sa 76 Gladiola St., Bahayang Pag-asa Subd. sa Maysan, Valenzuela matapos bentahan ng isang plastic bag ng pinatuyong dahon ng marijuana ang isang poseur buyer.

Nakumpiska kay Aposaga ang 14 piraso ng pinatuyong stems at dahon ng marijuana na nakabalot sa transparent plastic, apat na bloke ng ng marijuana, kalahating bloke ng marijuana at pitong plastic sachets ng marijuana na umaabot lahat sa 11 kilo at nasa P1,320,000 ang halaga, P5,000 buy-bust money, dalawang digital weighing scale at P300 cash.

Sa Quezon City, arestado ang suspek na si Dennis Pacanas y Ibañes, 38, anyos, sa isinagawang buy-bust operation sa #108 Lower Everlasting St., Brgy. Payatas A, Quezon City dakong alas-4:30 ng hapon noong Enero 29.

Ayon kay SDEU P/Major Sandie Caparroso, sa nasabing operasyon ay nakumpiska mula sa suspek ang P1 milyong halaga ng umano’y shabu.

Ang mga suspek ay nahaharap sa kasong paglabag sa RA 9165 o Comprehensive Dangerous Drugs Act of 2002. (RENE CRISOSTOMO/ALAIN AJERO)

2 BUMALIK SA ISLA NG TAAL, MISSING; NATABUNANG ASO, NASAGIP.

BATANGAS – Hindi pa rin natatagpuan ang dalawang lalaking bumalik sa isla ng Taal sa kasagsagan ng pag-aalburoto ng bulkan noong Enero 12.

Kinilala ang mga nawawala na sina Alexander Dando Jr. at Marlon Deteral, kapwa residente ng Barangay Alas-As sa isla ng Taal, sakop ng bayan ng San Nicolas.

Ayon sa mga kaanak ni Dando, bandang alas-4:30 ng hapon noong Linggo, Enero 12, nag-text ang biktima at sinabing bumalik siya sa isla dahil sa paniwalang humuhupa na ang pag-aalburoto ng bulkan.

Alas-11:00 ng umaga noon nang mag-alisan ang mga residente sa isla dahil sa aktibidad ng Taal.

Nakalikas na umano si Dando ngunit dahil nakainom ay naging makulit at nagpasyang bumalik. Mula noon ay hindi na siya makontak ng mga kaanak.

Sa kabilang dako, tumanggi naman umanong sumakay sa huling papaalis na bangka sa isla ang nawawala ring si Deteral.

Ayon sa kapatid, bumalik ang biktima sa kanilang bahay sa pag-aakalang naiwan ang kanilang ina  na napag-alamang nauna na palang nakalikas. Hindi na rin nakita si Deteral mula noon.

Makalipas ang halos dalawang linggo, umaasa pa rin ang mga kaanak ng dalawa na nakaalis ang mga ito sa isla at napunta lamang sa malayong evacuation center.

Ayon naman sa mga awtoridad, hindi pa sila makapagsagawa ng search and rescue operation dahil sa naka-lock down pa rin ang buong isla.

Samantala, himalang nasagip ang isang aso na 15 araw na nabaon sa makapal na abo na galing sa Bulkang Taal.

Sa video post ng netizen na si Germie Balba, makikitang binalikan ng kanyang kapatid ang kanilang bahay sa Barangay Pulangbato, sa bayan ng San Nicolas noong Lunes, 15 araw makalipas ang pag-alburoto ng Taal.

Ang Pulangbato ay isa sa mga barangay na nasa mismong pulo ng Taal volcano sakop ng bayan ng San Nicolas.

Laking tuwa ng dalawa nang matapos nilang hukayin ang makapal na abo ay tumambad ang hawlang kahoy  na kinalalagyan ng aspin na si Idol.

Winasak nila ang hawla at sinikap na mailabas si Idol na halos ay namayat na sa uhaw at gutom.

Kahit naghihina, lumakad at tumayo ang aso at tinanaw ang kabuuan ng isla na tila naninibago sa kanyang kapaligiran.

Laking tuwa naman ng mga netizen sa pagkakaligtas kay Idol at sa pagmamalasakit ng magkapatid na hukayin ang kinaroroonan ng aso. (NILOU DEL CARMEN)

LALAKI PATAY SA TAGA NG PAMANGKIN DAHIL NANGHIRAM NG BATERYA NANG WALANG PAALAM

CAPIZ – Patay ang isang lalaki nang pagtatagain siya ng pamangkin matapos niyang ipahiram ang baterya ng sasakyan ng suspek, iniulat nitong Huwebes ng umaga sa lalawigang ito.

Kinilala ang biktimang si Esmundo Gapi, 62-anyos, residente ng Barangay San Nicholas, Tapaz, Capiz.

Kusa namang sumuko sa pulisya ang suspek at pamangkin ng biktima na kinilalang si Joey Melicado, 35-anyos, residente ng nasabing lugar.

Batay sa report ng Tapaz Municipal Police Station, nagtalo ang magtiyuhin nang malaman ng suspek na ipinahiram ng biktima ang baterya ng kanyang sasakyan na hindi ipinaalam sa kanya.

Sa tindi ng galit ng suspek, kumuha siya ng itak at pinagtataga sa ulo at tiyan ang kanyang tiyuhin.

Agad namang dinala sa ospital ang biktima ngunit idineklarang patay na. (ANNIE PINEDA)

MAGSASAKA, KALABAW NAKURYENTE SA PALAYAN

LEYTE – Patay ang isang magsasaka at alaga nitong kalabaw makaraang makuryente nang  masagi nila ang nakalaylay na live wire sa palayan, iniulat nitong Huwebes ng umaga sa lalawigang ito.

Kinilala ang namatay na si Romualdo Pace, 69, residente ng Brgy. Santiago, Alangalang, Leyte.

Batay sa repot ng Alangalang Municipal Police Station, nangyari ang insidente sa Brgy. Tombo, bayan ng Alangalang sa nasabing lalawigan.

Lumabas sa imbetigasyon, hila-hila ni Pace ang kanyang alagang kalabaw patungong bukid habang may kargang abono nang masagip nila ang naputol na live wire na umano’y naputol sa pananalasa ng bagyong Ursula ngunit hindi naayos ng Leyte III Electric Cooperative (LEYECO III).

Bunsod nito, nagkikisay si Pace at bumulagta sa gitna ng daan habang nasunog naman ang kalahating parte ng katawan ng kalabaw.

Patuloy ang imbestigasyon sa pulisya sa insidente at inaalam kung may pananagutan ang LEYECO dahil sa kapabayaan.

Hustisya naman ang sigaw ng pamilya ni Pace. (ANNIE PINEDA)

MAG-ASAWA NAGLAKO NG SHABU

CAVITE – Nabisto na hindi lamang gulay ang itinitinda ng isang mag-asawa makaraang madakip sa buy-bust operation sa bayan ng Tanza sa lalawigang ito.

Nahaharap sa kasong paglabag sa RA 9165 o Comprehensive Dangerous Drugs Act of 2002, ang mag-asawang sina Enrique Herrera, alyas “Rick”, 51, magsasaka, at Clarita, 50, vendor ng gulay, kapwa residente ng Brgy. Paradahan 1, Tanza, Cavite.

Ayon sa ulat  ni Pat. Ehdcel Manalo ng Tanza Municipal Police Station, dakong alas-7:30 kamakalawa ng gabi nang naaresto ang mag-asawa sa aktong nakikipagtransaksyon sa isang poseur buyer sa Brgy. Paradahan 1, Tanza.

Nauna rito,  nakatanggap ng impormasyon ang Tanza CPS na bukod sa pagbebenta ng gulay, ang mag-asawa ay dumidiskarte rin sa pagtutulak ng ilegal na droga kaya nagkasa ng buy-bust operation ang mga awtoridad na nagresulta sa pagkakadakip sa dalawa.

Nakuha sa mag-asawa ang isang sachet ng shabu o 1 gramo na P2,000 ang street value.

Ang mag-asawa na kabilang sa listahan ng  Street Level Target  (SLT) watchlist, ay kapwa nakakulong na sa Tanza Custodial Center. (SIGFRED ADSUARA) 

GURO KINATAY NG KATAGAY

PANGASINAN – Patay ang isang guro makaaang pagsasaksakin at gilitan sa leeg ng dalawang kainuman, iniulat nitong Huwebes ng umaga sa lalawigang ito.

Kinilala ang biktimang si Arnaldo Tabucol, 29-anyos, English teacher at residente ng Tayug, Pangasinan.

Batay sa report ng Tayug Police Station, noong Martes nang matagpuan ang bangkay ng biktima sa bukid sa Brgy. Libertad, ng nasabing bayan.

Lumabas sa imbestigasyon, bago ang insidente, nakita ang biktima habang nakikipag-inuman sa mgA suspek ngunit hindi na nakauwi sa kanilang bahay.

Sa follow-up operation ng pulisya, nadakip ang 17-anyos na suspek nang makorner sa isang checkpoint gamit ang motorsiklo ng biktima.

Samantala, patuloy ang mga awtoridad sa pagtugis sa isa pang suspek.

Nagpapatuloy ang imbestigasyon ng pulisya para alamin ang posibleng motibo sa pagpaslang sa biktima. (ANNIE PINEDA)

PULIS PATAY SA TANDEM

NEGROS Oriental – Patay ang isang pulis makaraang pagbabarilin ng riding in tandem, iniulat ng mga awtoridad nitong Huwebes ng umaga sa lalawigang ito.

Kinilala ang biktimang si Executive Master Sergeant Roldan Esmajer, nakadestino sa San Jose Municipal Police Station, at residente ng Barangay Tampi ng nasabing bayan.

Batay sa report ng San Jose Municipal Police Station, nangyari ang insidente sa Barangay Tapon Norte B ng naturang bayan.

Lumabas sa paunang imbestigasyon, sakay ang biktima ng motorsiklo nang walang habas siyang pagbabarilin ng riding in tandem.

Agad namang dinala sa Siliman University Medical Center ang biktima ngunit nalagutan ng hininga sanhi ng mga tama na bala sa iba’t ibang parte ng katawan.

Nagpapatuloy ang imbestigasyon ng pulisya para alamin ang posibleng na motibo sa krimen. (ANNIE PINEDA)

LALAKI NAHULOG  SA BANGIN, PATAY

CAMARINES Sur – Walang buhay na natagpuan ang isang lalaki na hinihinalang nahulog sa bangin, iniulat ng pulisya nitong Huwebes ng umaga sa lalawigang ito.

Kinilala ang biktimang si Ruel Llanita, 30-anyos at residente ng Sitio Bulalahin, Brgy. Tible, Sipocot, Camarines Sur.

Batay sa report ng Sipocot-PNP, nakita na lamang ang bangkay ng biktima sa bangin na may lalim na 25-talampakan, ilang metro ang layo mula sa kanilang tahanan.

Ayon sa kaanak, umaga ng umalis sa kanilang bahay si Llanita para pumunta sa kanyang sakahan ngunit gabi na ay hindi pa rin ito nakauuwi.

Agad namang hinanap ng kanyang pamilya ang biktima at natagpuan ito sa bangin ngunit wala nang buhay sanhi ng sugat sa ulo at katawan.

Nagpapatuloy ang imbestigasyon ng pulisya para alamin kung may nangyaring foul play sa nasabing insidente. (ANNIE PINEDA)

3 KONSEHAL NAGSUNTUKAN SA LAOAG CITY HALL

ILOCOS Norte – Nauwi sa suntukan ang mainitang diskusyon sa kanilang sesyon ng tatlong city councilor sa Laoag City sa lalawigang ito, noong Miyerkoles bago maghatinggabi.

Nangyari ang rambulan sa harap ng Laoag City Hall na sakop ng Brgy. 10, bandang alas-11:24 sa pagitan umano nina City Councilors  Justine Clarence Gomez Chua, 26;  Edison Uy Chua, 56, kapwa residente ng Brgy. 16, at ang suspek na si City Councilor Edison Hernando Bonoan, kasama ang kanyang pamangkin na si Mark Christian Bonoan Dumbriguez, parehong nasa hustong gulang at residente ng Brgy. 50, Buttong,  pawang ng nasabing lunsod.

Batay sa imbestigasyon ng Laoag City Police Station, bago ang kaguluhan, paalis na umano si Councilor Justine Chua sa City Hall at ang kanyang mga kasamahan dakong alas-7:30 ng gabi, kung saan naroon din si Councilor Edison Bonoan at pamangkin nito.

Nasa loob na umano si Justine Chua ng sasakyan ng isa pang City Councilor na si Jaybee Baquiran, nang lapitan ito ni Edison Bonoan  at sinigawan ng  masasakit na salita at saka pinagsusuntok nang makailang beses sa mukha kaya napilitang gumanti ang biktima.

Nang mapansin naman ni Councilor Edison Chua na katabi sa upuan ni Justine, ang kaguluhan, agad itong bumaba ng sasakyan at sinuntok naman si Bonoan, sa puntong ito ay nakialam na si Mark Christian Dumbriquez at kanyang sinuntok si Councilor Edison Chua, dahilan para lumala ang kaguluhan.

Natigil lamang ang rambulan nang magresponde ang mga miyembro ng Civil Security Unit ng Loag City.

Nabatid na nagkaroon nang mainitang diskusyon ang mga councilor habang nagsasagawa ng sesyon bago nangyari ang suntukan. (NICK ECHEVARRIA) 

MISSING TAXI DRIVER, NATAGPUANG PATAY SA LOOB NG ISANG DRUM

NABUBULOK na ang bangkay ng isang nawawalang taxi driver nang matagpuan sa loob ng drum sa isang abandonadong comfort room sa Port Area, Manila, iniulat ng pulisya kahapon.

Ang biktimang si Jamal Tagsayan y Arurao, residente ng Barangay 647, Zone 67, San Miguel, Quiapo, Manila ay kinilala ng kanyang ina at tiyahin.

Batay sa imbestigasyon ni Det. Donald Panaligan ng Manila Police District-Homicide Section, bandang 1:10 ng hapon nitong Enero 29 nang madiskubre ang bangkay ng biktima sa loob ng isang CR sa Barangay 650, Zone 68, sa Port Area.

Natunton ang bangkay ng biktima dahil sa masangsang na amoy makaraan ang ilang araw na pagkawala.

Unang nakita ang nakalabas na mga paa ng biktima sa nasabing drum  at nakabalot sa plastic ang ulo.

Hindi pa matiyak kung may tama ng saksak o bala ng baril ng ang biktima.

Napag-alaman sa mga kaanak, tatlong araw nang nawawala ang biktima at ang minamanehong taxi nito ay natagpuan sa Cavite St. sa Sta Cruz, Manila.

Makaraang matagpuan ang taxi ay agad tumawag ang operator nito sa asawa ng biktima sa Surigao.

Napag-alaman, tatlong araw na ang nakalilipas nang tumawag umano ang biktima sa kanyang misis at humihingi ng tulong.

“Ma.. tulungan mo ako, nandito ako sa Pier..” ito umano ang pahayag ng biktima nang huling tumawag sa kanyang misis.

Huling nakita ng ina na buhay ang biktima sa kanilang bahay sa San Agustin St., San Miguel, Manila.

Inaalam ng pulisya kung hinoldap o may kinalaman sa ilegal na droga ang pagpaslang sa biktima. (RENE CRISOSTOMO)

3 CHINESE ARESTADO SA SEX DEN SA MAKATI

ARESTADO ang tatlong Chinese national makaraang salakayin ng mga tauhan ng Makati City Police ang isang establisimiyento na hinihinalang sex den, habang nasagip ang 13 kababaihan at limang empleyado sa lungsod na ito, noong Miyerkoles ng gabi.

Kinilala ni Police Col. Rogelio Simon, hepe ng Makati City Police ang mga arestado na sina Kevin Sy, 25, at Xiao Lao, 23, kapwa maintainer umano ng sex den, at ang kustomer na si Tong Po, 25-anyos.

Habang 13 kababaihan ang nasagip, kabilang ang siyam na Chinese nationals, dalawang Russian at dalawang Vietnamese, habang limang empleyadong Filipino ang inimbitahan ng pulisya para sa imbestigasyon.

Base sa isinumiteng report ni Simon, nakumpirma ang ilegal na operasyon sa Golden Dragon Spa sa #1847 K&K Building sa Evangelista St., Barangay Pio del Pilar ng naturang lungsod.

Ayon sa ulat, isang police asset ang nagpanggap na kustomer at nagbayad ng halagang P22,000 para sa sex service sa mga dayuhang babae.

Dakong alas-10:35 ng gabi nang salakayin ng mga tauhan ng Station Investigation and Detective Management Section, sa pangunguna ni Police Major Gideon Ines, ang naturang establisimiyento.

Pagkaraan ay tumambad sa kanila ang mga babaeng dayuhan sa mga kuwarto at may nakitang condoms at sex toys.

Agad namang dinala ang mga dayuhan sa nasabing himpilan ng pulisya at ang mga babaeng nasagip ay dinala sa tanggapan ng Women and Children’s Protection Desk.

Nahaharap ang tatlong naarestong dayuhan sa kasong human trafficking habang inaalam ng pulisya kung may kaukulang business permit ang establisimiyento para tuluyan itong maipasara.

Sinabi ni Simon, pang-anim na establisimiyento na ginagawang sex den ang kanila nang sinalakay sa nasabing lungsod.

FIL-AM, 2 PA TIKLO SA DROGA

ARESTADO ang tatlong kalalakihan, kabilang ang isang Filipino-American national, nang mahulihan ng P.6 milyong halaga ng high grade marijuana at ecstacy sa ikinasang buy-bust operation ng mga pulis kahapon ng madaling araw sa Taguig City.

Kinilala ni Police Col. Celso Rodriquez, hepe ng Taguig City Police, ang mga nadakip na sina Reggie Raphael Galang, 28, ng Room 8003, Tower 2, Ridgewood Tower, Condo Corp, C5, Barangay Ususan, Taguig City; Joshua Cuanzon, 31, tubong Alaska, USA, nakatira sa  #2025 Cityland Vito Cruz Towers,  at Yuan Marc Mendoza, 19, ng #909 University Pad, kapwa taga  Malate, Maynila.

Batay sa isinumiteng report ni Police Col. Rodriquez, dakong ala-1:45 ng madaling araw nang isagawa ang buy-bust operation ng mga tauhan ng Station Drugs Enforcement Unit (SDRU) laban sa mga suspek malapit sa gasoline station sa C5 Road, Barangay Ususan, Taguig City.

Isang pulis ang nagpanggap na bibili ng droga at nang magpositibo ay inaresto ang mga suspek.

Nakumpiska sa mga suspek ang limang pirasong malalaking ziplock ng high grade marijuana, 3 maliliit na ziplock ng nasabi ring droga, tatlong malalaking ziplock ng ecstacy powder at isang malaking ziplock na may lamang kapsula.

Sinabi ng opisyal, ang high grade marijuana ay nasa 177 gramo na may halagang P212,000 at ang powder ecstasy ay nasa 89.85 gramo, na may halagang P476,205.

Ang mga suspek ay nakakulong na sa nasabing himpilan ng pulisya at sasampahan ng kasong paglabag sa Section 5 and 11 Article II ng Republic Act  9165 0 Comprehensive Dangerous Drugs Act of 2002.

MAG-ASAWANG SENIOR SA QC PINATAY

PATAY na nang matagpuan ang mag-asawang senior citizen sa kanilang bahay sa Barangay Commonwealth, Quezon City.

Tinukoy ng pulisya ang pagkakakilanlan ng mga biktimang sina Leonardo Ollano, 69, at Nida Ollano, 63-anyos.

Batay sa pagsisiyasat ng Quezon City Police District (QCPD), nangyari ang krimen dakong alas-8:45 noong Huwebes ng gabi sa bahay ng mga biktima sa Maya Street ng nabanggit na barangay.

Sa salaysay sa pulisya ng kaanak ng mag-asawa na si Hermogenes Timola, walang ilaw at nakakandado ang pintuan ng kanilang bahay nang siya ay dumating.

Bunsod nito, napilitan umano siyang dumaan sa ikalawang palapag ng bahay at tumambad sa kanya ang magulong mga gamit.

Pagbaba ni Timola sa sala ay nadiskubre niya ang mga biktima na nakahandusay at tadtad ng saksak sa katawan.

Hindi natagpuan ng pulisya sa lugar ang kutsilyo na ginamit sa krimen maliban sa isang pares ng tsinelas na posibleng naiwan ng suspek.

Pagnanakaw ang isa sa tinitingnang motibo ng pulisya sa krimen. (JG TUMBADO)

 

Read More

PINAS ‘LULUSUBIN’ NG CHINESE FISHERMEN

CHINESE FISHERMEN
0

PINANGANGAMBAHAN na lalo pang dadami ang mga mangingisdang Chinese sa teritoryo ng Pilipinas sa West Philippine Sea matapos silang mapalayas sa kanilang fishing ground sa Vietnam at Indonesia.

Ayon kina dating Anakpawis party-list Reps, Ariel Casilao at Fernando Hicap, walang ibang pupuntahan ang mga dayuhang mangingisdang ito kundi sa WPS kaya lalo silang kinakabahan na mabilis mauubos ang isda sa ating territorial water.

Sinabi ni Casilao na nagkakaisa na ang Vietnam, Indonesia at Malaysia laban sa Chinese fishermen na ilegal na nangingisda sa kanilang territorial water habang ang Pilipinas ay patuloy ang pananahimik.

Sa katunayan, nagpadala si Indonesian President Joko Widodo ng fighter jet at barkong pandigma sa Natuna Island na bahagi ng kanilang territorial water kaya napilitan ang mga Chinese national na ilegal na nangingisda na lisanin ang lugar.

Wala umanong ibang pupuntahan ang mga naitaboy ng Indonesia, Malaysia at Vietnam na Chinese fishermen kundi sa WPS.

Gayunman, dismayado si Casilao dahil hindi kumikibo ang Malacañang at hindi nag-uutos na protektahan ang ating teritoryo laban sa mga dayuhang mangingisda na nang-aagaw ng kabuhayan ng mga Filipino.

Sinabi naman ni Hicap na nakararating na ang mga Tsino sa municipal water sa Palawan gayung ipinagbawal ng gobyerno ang mga lokal na mangingisda sa mga ganitong lugar.

Pinatutunayan umano ng maraming mangingisda sa Palawan na malalaking fishing vessels ng China ang nangingisda sa kanilang municipal water. BERNARD TAGUINOD

Read More

CHINESE GOV’T PINAKIKILOS SA CHINESE KFR SYNDICATE SA PHL

dela rosa12
0

(NI NOEL ABUEL)

DAPAT na kumilos ang Chinese government at makipagtulungan sa mga ahensya ng pamahalaan para masolusyunan ang nangyayaring pagdukot sa mga kababayan nito sa bansa.

Ito ang payo ni Senador Ronald ‘Bato’ Dela Rosa kaugnay ng nadadalas na ulat na pagdukot sa mga Chinese nationals ng mga kababayan ng mga ito sa iba’t ibang bahagi ng bansa.

“Dapat, more coordination dapat. Lalo na police attache ng China dito, mabilis naman ‘yan makipag-coordinate sa amin, ‘pag may national silang nakidnap,” paliwanag pa ng dating pinuno ng Philippine National Police (PNP).

Ngunit kung tutuusin aniya ay hindi dapat na ikinabahala ng mga awtoridad kung ang kidnapping ay sa pagitan ng mga Chinese nationals.

“Hindi talaga gaano ‘yan concern dahil kung ‘yan ay KFR victimizing wealthy Filipino businessmen, cause of concern ‘yan sa lahat ng Filipino pero kung sila-sila Intsik nagkikidnapan petty crime lang,” aniya pa.

Bagama’t nangyayari umano ang KFR sa teritoryo ng bansa ay madalas ay dahil sa utang lamang kung saan nangyayari ang pagdukot.

“Oo nasa teritoryo, pero ito kasing nangyayari petty crimes sa kanila among Chinese, ikaw ‘di ka makabayad ng utang sa akin kikidnapin kita, ikukulong kita hangga’t ‘di ka nagbabayad,” saad pa ni Dela Rosa.

 

Read More

P12-B INCOME TAX ‘DI BINABAYARAN NG POGO WORKERS

chinese123
0

(NI BERNARD TAGUINOD)

TUMATAGINTING na P12 Billion ang hindi binabayarang buwis ng mga Chinese nationals na nagtatrabaho sa Philippine Offshore Gaming Corporation (POGO) kada buwan.

Ito ang nabatid kay House and means committee chairman Joey Salceda matapos aprubahan ang panukalang batas na patawan ng 5% na buwis ang POGO operation sa bansa at 25% sa sahod ng mga Chinese workers.

“Easily P12 Billion (ang makokolektang buwis sa Chinese workers),” ani Salceda kaya dapat aniyang obligahin ang lahat mga Chinese nationals na nabigyan ng Alien Working Permit at Especial Working Permit na magkaroon ng Tax Identification Number (TIN).

Sa hiwalay na pagdinig ng House committee on games ang amusement na pinamumunuan ni ACT-CIS party-list Rep. Eric Yap, inatasan nito ang Bureau of Immigration (BI) at Department of Labor and Employment (DOLE) na isumite sa Kongreso ang listahan ng mga Chinese national na nagbigyan ng permit para magkapatrabaho dito sa bansa.

“Iche-check natin sa BIR (Bureau of Internal Revenue)  kung sino ba dyan ang mga may TIN kaya bigyan nyo kami ng listahan nyo,” ani Yap sa BI at DOLE dahil lumalabas sa pagdinig ng kanyang komite na umaabot sa 160,000 ang Chinese POGO workers ang nasa bansa ngayon.

Sinabi ni 1PACMAN party-list Rep. Eric Pineda sa nasabing bilang ng mga Chinese workers, 10,000 lamang umano sa mga ito ang may TIN kaya kinastigo nito ang BI at DOLE dahil nagbibigay ang mga ito ng permit to work sa mga dayuhang ito na walang TIN.

“Luging lugi naman tayo diyan,” ani Pineda dahil ang mga Filipino aniya ay nagbabayad ng kanilang income tax samantalang ang mga dayuhang ito ay nakakaiwas sa responsibilidad sa gobyerno.

 

 

 

Read More

HIGIT 300 CHINESE NATIONALS SISIPAIN PALABAS NG PHL

immigration 12
0

(NI FROILAN MORALLOS)

IPATATAPON ng Bureau of Immigration (BI) palabas ng bansa ang tinatayang aabot sa 312 Chinese national , at 21 minor de edad , dahil sa illegal na paninirahan sa bansa ayon sa pamunuan ng ahensiyang ito.

Ayon sa pahayag ni Bureau of Immigration (BI) Commissioner Jaime Morente, ang naturang bilang  ng  mga illegal alien na ipade-deport ay kabilang sa 512 na naaresto ng immigration intelligence agent sa raid noong Oct. 9, 2019 sa Millennium building sa Pasay City.

Kabilang sa mga nahuli ay kinabibilangan ng Chinese, Burmese, Malaysians, Vietnamese, Taiwanese, at Indonesians.

Sinabi ni Dana Sandoval, ang 312 Chinese national ay hahati-hatiin sa tatlong flight ng China Eastern Airlines na magsisimula bukas ng alas 3:00 ng madaling araw at susundan ng alas 8:00 ng umaga at ang huling batch ay makaaalis sa alas 9:00 ng Biyernes ng gabi.

Ayon pa kay Sandoval, ang naiwan ay pansamantalang nakakulong sa BI facilities sa Camp Bagong Diwa, sa Taguig City.

Dagdag pa nito na ang 312 deportee at 21 minors ay direktang dadalhin sa Shijiaxuang, Hebei Province at Changchun, Jilin Province, kasama ang kanilang escort na BI Intelligence personnel at Chinese police officers.

 

Read More

PAGDAGSA PA NG CHINESE POGO WORKERS INAASAHAN

poker
0

(NI BERNARD TAGUINOD)

LALO pang daragsa ang Chinese nationals na nagtatrabaho sa Philippine Offshore Gambling Operations (POGO) matapos i-ban na ng Cambodia ang offshore on-line gaming activities sa kanilang bansa.

Ito ang pinangangambahan ni TUCP party-list Rep. Raymond  Mendoza, kaya iminungkahi nito na magkaroon ng POGO coordinating body kung hindi iba-ban ng gobyerno ang POGO na pinatatakbo ng Chinese nationals.

Ayon kay Mendoza, nagpasya si Cambodia Prime Minister Hun Sen na tuluyang ipagbawal ang online gambling operations ng Chinese nationals sa kanilang bansa.

Kasunod ito aniya ng paglala ng kriminalidad sa kanilang bansa na may kaugnayan sa ilegal na droga, prostitusyon at kidnapping at sa  casino hubs sa bayan ng Sihanoukville, Bavet at  Poipet sa Cambodia.

Nabatid sa mambabatas na umaabot na sa 6,000 Chinese nationals ang napilitang umalis sa Cambodia simula nang ipagbawal ni Hun ang offshore online gaming activities sa kanyang bansa.

Sinabi ni Mendoza na posibleng lumipat ang Chinese nationals sa Pilipinas para ipagpatuloy ang kanilang aktibidad kaya kailangang umaksyon na ang gobyerno.

“While we are assessing the POGO overall social implications and weigh the comprehensive benefits of this online gambling industry in our economy by putting on hold issuance of new operating licenses, we would like to propose the creation of a POGO coordinating body that has supervision and control of the industry for the benefit of the country,” ani Mendoza.

Sa ngayon iba-iba ang tungkulin ng mga ahensya ng gobyerno na kinabibilangan ng Philippine Amusement and Gaming Corporation (PAGCOR), Department of Trade and Industry (DTI), Bureau of Internal Revenue (BIR),  Bureau of Immigration (BI),  DePpartment of Labor and Employment (DOLE) at Philippine National Police (PNP) sa POGO industry.

Read More

YATE INAKALANG CHINESE MILITIA VESSEL HINARANG SA SBMA

0

(NI JG TUMBADO)

NABULABOG ang pamunuan ng Subic Bay Metropolitan Authority (SBMA) sa isang foreign vessel na umanoy bigla na lamang nakapasok sa karagatang sakop ng Freeport Zone sa pag aakalang barko ito ng pandigma ng China nitong Linggo.

Agad rumesponde ang mga tauhan ng Harbor Patrol Group ng Law Enforcement Department (LED) ng Subic Bay Metropolitan Authority at PNP Maritime Police kung saan hinarang ng mga ito ang barko habang nag-aangkla sa bahagi ng Camayan Cove.

Subalit matapos ang isinagawang pagbusisi nang husto ng mga awtoridad sa foreign vessel ay dito napag-alamang isa palang pleasure yacht o tourist ship ang barko at hindi Chinese militia vessel  gaya ng unang inakala.

Ayon kay SBMA Chair at Administrator Atty. Wilma T. Eisma, natukoy ang barko bilang MV Balena II, na nakarehistro sa isang Belgian national na si Didier Ladriere, isang locator sa SBMA at nag mamay ari ng Urban Deli restaurant sa Subic Freeport.

“It really caused some alarm among those monitoring the incident on social media, especially when it was falsely identified as having entered Subic without informing authorities. But thank God it soon checked out,” pahayag ni Eisma.

Tinawagan pa umano ni Eisma sina National Security Advisor Sec. Hermogenes Esperon Jr at Defense Chief Sec. Delfin Lorenzana para sa koordinasyon kaugnay ng pangyayari.

Sa investigation report ng Seaport Department, lumalabas na isang yate ang napagkalamang war ship ng China, na may habang 40 metro at lumalayag sa karagatang sakop ng SBMA.

Nasa walong Chinese nationals ang sakay sa yate na umanoy pawang mga bisita ng may-ari na si Ladriere.

Nag-ugat ang pagkabahala ng SBMA ng walang anumang sagot ang MV Balena II sa mga tawag ng port authorities kaya’t pinalalagay na ito ay isang Chinese militia vessel na basta na lamang pumasok nang walang abiso.

Ipinaliwanag naman ni Ladiere na kaya’t hindi makasagot ito sa radio ay dahil naiwanan palang nakapatay ang kanilang VHF radio communication sa buong araw nilang paglalayag.

 

Read More