NGAYONG WALA NANG VFA EDCA IBABASURA RIN NI DIGONG

MALAKI ang posibilidad na bawiin din ni Pangulong Rodrigo Roa Duterte ang Enhanced Defense Cooperation Agreement (EDCA) sa Estados Unidos.

“The way his body language says, mukhang ayaw niya na rin niyan. Kasi considering na sinasabi niya na it’s about time to stand on our own, strengthen our resources, our capabilities of defending our country,” ayon kay Presidential spokesperson Salvador Panelo.

Ang pahayag na ito ni Sec. Panelo ay matapos na pormal na ipaalam ng Pilipinas sa gobyerno ng Estados Unidos ang intensyon ni Pangulong Duterte na tapusin na ang Visiting Forces Agreement (VFA), na nagsisilbing gabay ng mga bumibisitang US personnel na makapagdaos ng military exercises sa Pilipinas.

“We can’t be relying forever. We cannot be a parasite to every country na gusto natin tumulong sa atin,” ayon kay Sec. Panelo.

Nilagdaan ang EDCA noong 2014 na naglalayong pahintulutan ang US “to build structures; store as well as preposition weapons, defense supplies and material; and station troops, civilian personnel and defense contractors, transit and station vehicles, vessels, and aircraft for a period of 10 years.”

Ang EDCA ay resulta ng strategic pivot sa Asia ni dating US President Barack Obama na nagbibigay pahintulot sa deployment o pagpapadala ng mayorya ng US warships sa world’s most dynamic economic region.

Para naman kay Justice Secretary Menardo Guevarra, kapag na-terminate ang VFA ay magiging “practically useless” ang EDCA at ang Mutual Defense Treaty ay magiging “hollow agreement.”

Samantala, wala namang balak si Pangulong Duterte na i-renegotiate ang VFA. “Hindi siya open. Hindi nga siya open na tayo ay pumasok sa mga military agreement sa ibang bansa eh,” ayon kay Sec. Panelo. CHRISTIAN DALE

Read More

Ibinunyag sa Senado ng inabusong Taiwanese EX-ADVISER NI DIGONG PROTEKTOR NG POGO?

PINANGALANAN sa Senado ng isang babaeng Taiwanese ang umano’y protektor ng Philippine Offshore Gaming Operators (POGO) sa bansa na isang Michael Yang.

Sinabi naman ni Senador Risa Hontiveros na inaalam pa nito kung ang tinukoy na Michael Yang ng nasabing Taiwanese woman ay ang dating economic adviser ni Pangulong Rodrigo Duterte na may pangalan ding Michael Yang.

“Right now, our main concern is the humanitarian aspect. We haven’t gone to the checking of identities,” sabi ng senador.

Lumutang sa Senado ang biktimang si Lai Yu Cian, 23-anyos, upang ireklamo ang sinapit umano niyang pang-aabuso sa kamay ng Chinese national na nag-recruit sa kanya para magtrabaho sa POGO.

Kasama si Hontiveros, umiiyak na isinalaysay ni Lai, ang masamang sinapit sa pinapasukang POGO kung saan matagal umano siyang ikinulong at hindi pinabalik sa Taiwan.

Dito na niya ibinunyag ang isang umano’y government official na nagpoprotekta sa illegal POGO na pinapasukan nito kaya’t wala siyang magawa kung hindi sumunod sa ipinagagawang kahalayan.

“They want me to work for 24 hours, treating me like a slave. I already told them that I wanna go home, I wanna go back to Taiwan but they forced me to work for them. They told me that they have a protector behind them, which are government people,” sinabi ni Lai.

Tinukoy nito ang “very powerful” protector at employer umano niya na isang Michael Yang.

“I heard about once or twice when my supervisor got mad at me, they mention Michael Yang. He didn’t explain to me. He just shouts that at me,” ayon pa kay Lai.

Si Lai na dumating sa bansa bilang turista noong Oktubre 1 ng nakaraang taon at inalok na magtrabaho bilang administration personnel sa POGO ay isa sa 30 East Asians na nasagip sa Mandaluyong City noong Pebrero 3.

“I did not know that it was an illegal business here. I know nothing. The only thing I know is I wanna have a job. Until now I cannot find my passport. I have to be strong to tell everything because they threatened me and my boss threatened me and abused me mentally and physically. I already told them that I want to go home but they forced me to work for them and always say they have a protector behind them who is government people,” pahayag ni Lai.

Dahil dito, nanawagan si Hontiveros sa pamahalaan na hanapin ang mga illegal at fly-by-night POGO sa bansa. NOEL ABUEL

 

Read More

SOLONS KINATIGAN ANG AKSYON NI DIGONG; PINOY WALANG PAKINABANG SA VFA

SA bihirang pagkakataon, pinuri ng militanteng mambabatas ang desisyon ni Pangulong Rodrigo Duterte na tuluyan nang ibasura ang Visiting Forces Agreement (VFA) dahil wala umanong naging pakinabang dito ang sambayanang Filipino.

Sa panayam ng Saksi Ngayon kay ACT party-list Rep. France Castro, kinatigan nito ang desisyon ni Duterte na ibasura ang VFA dahil tanging interes ng Amerika ang pinoproteksyunan nito at hindi ang mga Filipino gayung dito nagtatayo ng pasilidad at nagsasanay ang puwersa ng Amerika.

“Wala naman talaga tayong pakinabang sa VFA na iyan kaya tama si Presidente Duterte, dapat nang ibasura yan,” ani Castro dahil hindi umano naipagtanggol ng mga Kano ang Pilipinas nang agawin ng China ang mga Philippine coral reef sa West Philippine Sea.

“Bakit noong kinuha ng China ang West Philipine Sea wala silang kibo? Kung talagang may pakinabang tayo sa kanila at pinoproteksyunan nila ang ating interes, dapat hindi nila hinayaan ang China na agawin ang ating teritoryo,” ayon Castro.

Dahil din aniya sa nasabing kasunduan, harap-haparang binabalahura ng Amerika ang ating batas nang agawin ng Amerika ang kanilang sundalong si Lance Cpl. Daniel Smith na sinentensyahan ng Korte dahil sa pagpatay sa transgender na si Jenifer Laude noong 2005.

“Nagkaroon na ng resolusyon ang kaso ni Smith pero imbes na dito ikulong, kinuha nila nang harap-harapan sa ating mga pulis at dinala sa US Embassy dahil dito sa VFA agreement wala tayong jurisdiction sa kanilang mga sundalo pero kapag sundalo naman natin ang nagkasala sa kanila, may jurisdiction sila sa ating mga sundalo,” ani Casto.

Wala na rin aniyang balita kung napagsilbihan ni Smith ang kanyang sentensya sa Amerika matapos itong patagong iuwi sa Amerika kahit nasentensyahan na ito sa Pilipinas ng 40 taong pagkakakulong.

“Isa pa kung bakit tayo lugi, yung mga sundalo natin, kailangan ng visa kapag pumunta sila sa Amerika pero itong mga US soldier na ito, yung VFA na mismo ang kanilang visa,” dagdag pa ni Castro.

Sa hiwalay na panayam naman kay Bayan Muna chairman at dating Congressman Neri Colmenares sa Kamara nitong Miyerkoles, hindi ito nababahala sa seguridad ng Pilipinas kapag nawala ang VFA.

“Bakit ang ibang bansa na wala naman VFA, hindi sila inaatake ng ibang bansa? Ang national security ay responsibilidad ng bawat bansa at hindi iyan responsibilidad ng Amerika,” ani Colmenares.

Hindi rin umano nakatutulong sa national security ng Pilipinas ang mga military hardware na ibinibigay ng Amerika sa Pilipinas dahil pinaglumaan na nila ito at mukha lang tinatambakan nila ng basura ang Pilipinas.

Hindi rin nababahala ang dating mambabatas sa pangambang gagantihan ng Amerika ang mga Filipino dahil kailangan pa rin ng mga ito ang Pilipinas at posibleng muling buhayin ang nasabing kasunduan kapag nawala na si Duterte.

“Posible yan (bagong VFA pagkatapos ni Duterte). Kasi marami pa ring mga congressman at senador ang pro-Amerika. Di ba noong isinusulong ang VFA na ito, maraming congressmen ang nagsasabi na maganda yan para sa bansa natin. Pero nung magalit si Duterte sa Amerika, tahimik sila pero kapag siguro wala na si Duterte, susuportahan na naman nila yan,” ani Colmenares. BERNARD TAGUINOD

 

Read More

Atake sa ABS -CBN BAHAGI NG SHAKEDOWN VS OLIGARKO – PM

NANINIWALA ang Partido Manggagawa (PM) na ang pagpapasara sa ABS-CBN Corporation ay “bahagi ng political shakedown” ng administrasyon laban sa mga “orligarkong pinaniniwalaang kalaban ni Pangulong Rodrigo Duterte.”

Sabi ni Wilson Fortaleza, tagapagsalita ng PM, hindi solong kaso ng pag-atake ni Duterte sa mga oligarko ang nangyayari ngayon sa ABS-CBN.

Bukod sa mga Lopez na siyang may-ari ng ABS-CBN, binanatan din ng Pangulo ang mga Ayala dahil sa Manila Water Company Inc., si Manny V. Pangilinan para sa Maynilad Water Services Inc. at pamilya Prieto ng Philippine Daily Inquirer (PDI).

Ang mga Ayala, Pangilinan at Prieto ay itinuturing ni Duterte na kanyang mga kaaway dahil sila ay umabuso sa mga nakalipas na panahon.

Walang nagawa ang mga naturang oligarko, maging ang mga Prieto, laban kay Duterte.

Matatandaang ilang ulit na iwinawasiwas ni Duterte sa media na haharangin niya ang “renewal” ng prangkisa ng ABS-CBN.

Matatapos ang prangkisa ng kumpanya sa Marso 30 ng kasalukuyang taon.

Ang pahayag ni Duterte ang dahilan kung bakit hanggang ngayon ay hindi pa kumikilos ang dalawang kapulungan ng Kongreso upang ipasa ang mga inihaing panukalang batas para ma-renew ang prangkisa ng ABS-CBN.

Ang pinakabagong aksyon ng administrasyong Duterte ay ang paghahain ni Solicitor General Jose Calida ng quo warranto sa Korte Suprema na nagtatanggal ng prangkisa sa ABS-CBN dahil daw sa paglabag nito sa ilang batas ng bansa.

Binigyan ng mataas na korte ang ABS-CBN ng sampung araw para sagutin ang mga akusasyon ni Calida laban sa Kapamilya Network.

“Ang quo warranto ay mas threatening kaysa iasa sa mga kongresman ang kagustuhan ni Duterte [na magwakas na ang ABS – CBN],” pahayag ni Fortaleza.

Hinihintay ng mga kongresista ang basbas ni Speaker Alan Peter Cayetano upang simulan ng komite sa prangkisa ang talakayan sa mga inihaing panukalang batas para bigyan ng panibagong prangkisa ang ABS-CBN. NELSON S. BADILLA

Read More

TERMINATION NG VFA IPINARATING NA SA US

PORMAL nang naabisuhan ng Pilipinas ang Estados Unidos kaugnay sa desisyon ni Pangulong Rodrigo Roa Duterte na i-terminate  ang Visiting Forces Agreement (VFA) na nilagdaan noong 1998.

Kinumpirma ni  Presidential spokesperson Salvador Panelo na ipinag-utos ni Pangulong Duterte kay Executive Secretary Salvador Medialdea nitong Lunes, Pebrero 10, na sabihin kay Foreign Affairs Sec. Teddy Boy Locsin na ipadala na ang  notice of termination ng VFA sa gobyerno ng Estados Unidos.

Iniulat kahapon ni Sec. Locsin na “Deputy Chief of Mission of the Embassy of the United States has received the notice of termination.”

Ang terminasyon ng VFA, ani Sec. Panelo ay epektibong mawawalan ng bisa makalipas ang 180 araw matapos matanggap ng US government ang notice of termination.

Sinabi pa ni Sec. Panelo na hindi na kailangan pang hintayin ng gobyerno ng Pilipinas ang magiging tugon dito ng Amerika. CHRISTIAN DALE

Read More

UNANG KASO KINUMPIRMA NG DOH; PINAS NAPASOK NA NG 2019 N-COV

KINUMPIRMA ng Department of Health na positibong may kaso na ng 2019 novel coronavirus sa bansa.

Sa press conference, sinabi ni Health Secretary Francisco Duque III, isang 28- anyos na babaeng Chinese mula sa Wuhan, China ang kumpirmadong may dala ng virus sa bansa na dumating sa Maynila noong Enero 21 mula sa Hong Kong.

Ang pasyente, na nagpa-check up noong Enero 25 matapos makaranas ng pag-ubo, ay nilalapatan ng lunas sa isang pampublikong pagamutan.

Nakumpirma na positibong infected ng N-CoV ang babaeng Chinese matapos maisagawa ang laboratory test sa Australia.

Kasabay nang pagkumpirma na positibo ang nasabing kaso, sinabi naman ni Duque na patuloy ang pagkilos ng DOH upang garantiyahan ang publiko na ang lahat ng “necessary precautionary measures” ay kanilang isinasagawa upang mapigilan ang pagkalat ng virus.

Sinasabing ang nasabing virus ay naunang kumitil ng 170 katao sa bansang pnagnulan nito, at umaabot na sa 8,000 ang apektado mula sa iba’t ibang bansa sa Asian, Europe, North America at Middle East.

Ang mga sintomas ng nasbaing virus ay kinabibilangan ng lagnat, ubo, kakapusan at hirap sa paghinga.  RENE CRISOSTOMO

PATOTOO NG MGA PASAHERO, MAS MAHUSAY ANG SERBISYO SA LRT LINE-1

MALAKI na ang ipinagbago ng serbisyo ng LRT Line 1 sa nakalipas na taon.

Ito ang naging obserbasyon ng mga mananakay ng 20.7 kilometer LRT Line 1, ang kauna-unahang elevated commuter train na may 20 stations na bumabagtas mula Munoz sa Quezon City hanggang Baclaran at may regular daily passenger na 500,000.

Ayon kay Jinkee Evangelista, estudyante ng De La Salle University sa Taft Ave, kung dati ay mas ninanais niyang  magdala ng sasakyan dahil pahirapan ang pagsakay sa LRT, ngayon ay mas ‘manageable’  na kung magte-train siya  kaysa  mag-drive.

“Iiwasan mo lang talaga ‘yung peak hour kasi talagang ang daming pasahero, pero mas marami na ngayong skip train kaya higit na maginhawa na talagang mag-LRT,”pahayag ni Evangelista.

Natutuwa rin si Reynaldo Guevara na araw-araw sumasakay sa LRT patungo sa kanyang trabaho sa UN Ave. Ayon sa kanya, kung dati ay nale-late siya sa trabaho dahil 3 hanggang 4 na tren ang kanyang pinalalagpas bago makasakay, sa ngayon ay sa unang tren pa lamang ay nakakasakay na siya.

“Sa bilis at on time na pagdating ng mga tren ay hindi napupuno ng pasahero sa mga station platforms kaya nakakasakay agad,” aniya.

Partikular na nakita naman ni Aling Remedios Vasquez ang concern ng mga security guard na nagmamando sa mga istasyon.  Aniya, maayos ang sistema sa pagpapasakay sa senior citizens sa LRT kaysa nang minsan siyang sumakay sa MRT.

Hindi naman naiwasan ni Christine Suarez,24 anyos, empleyado sa Pasay City, na ihalimbawa ang karanasan niya sa pagsakay sa LRT at MRT. Aniya, naaaawa siya sa kanyang sarilli tuwing sasakay ng MRT.

“Awang- awa talaga ako sa aking sarili kapag sasakay na ako ng MRT, parang… ano ba ito, ang hopeless naman ng mga Filipino, parang lagi kang sasabak sa giyera, napakahaba ng pila, makikipagbalyahan ka makapasok lang ng tren, sa loob ay halos hindi ka na makagalaw, mababasa ka ng tumutulong aircon, malas mo pa ‘pag naabutan ka ng sira ng tren dahil pabababain ka sa gitna ng tracks o maghihintay ka sa loob na sobrang init.”

Aniya, mas malapit sa kanilang bahay sa Quezon Ave kung MRT ang kanyang sasakyan patungong Pasay ngunit kalbaryo naman ang kanyang mararanasan kaya mas pinipili niya na gumastos na lang ng dagdag pamasahe para magtungo sa LRT Roosevelt Station at doon na sumakay.

“Nagtataka ako kung bakit umayos na ang serbisyo sa LRT Line 1, saka ko nalaman sa mga katrabaho ko na privatized na pala ito, sana all,”  dagdag pa niya.

Taong 2015 nang i-turnovet ng Light Rail Transit Authority(LRTA) at Department of Trasportation(DoTr) sa Light Rail Manila Corporation(LRMC), ang venture company ng Ayala Corp., Macquarie Infrastructure Holdings at  Metro Pacific Investments Corp. ang operasyon at maintenance  ng LRT Line 1 sa ilalim ng Public-Private Partnership (PPP) program ng Aquino administration.

Mula nang i-takeover ng LRMC ang LRT Line 1 ay nakapagpatupad na ito ng ilang measures para sa ikaaayos ng serbisyo nito, mula 77 na tren ay mayroon nang 112 tren at mula 478 na biyahe kada araw ay naging 554 daily trips at ang headway o waiting time ay umaaabot na lamang sa 3.5 minuto  mula sa dating 6 hanggang 8 minuto, gayundin ay mas pinahaba ang operating hours.

Sinabi ni LRMC President Juan Alfonso na mula 2015 ay nasa P8.7-B na ang nailaan ng kompanya  para sa rehabilitasyon at pagpapaganda ng serbisyo ng LRT Line 1, kasama rito  ang maayos na tren, pagpapaganda ng mga station at pagpalit sa nasirang rail tracks kaya mas ligtas at mas maayos na ang takbo ng mga tren.

Ngayong Nobyembre 2020 ay target ng LRMC na matapos ang kanilang bagong signaling system kung saan makatitiyak ang mga pasahero na on time palagi ang dating ng mga tren at ang waiting time o headway ay aabutin na lamang ng 2.5 minuto.

Sa taong 2021 ay inaasahang 700,000 hanggang 800,000 pasahero na ang maseserbisyuhan ng LRT Line 1 sa oras na matapos ng LRMC ang LRT 1 Extension patungong Cavite kung saan walong bagong stations ang madaragdag, kabilang ang Redemptorist, NAIA Avenue, Asia World, Ninoy Aquino, Dr. Santos, Las Pinas, Zapote at Niog sa Cavite.

Mula isa at kalahating oras ay 30 minuto na lamang ang magiging biyahe patungong Cavite.

FOUNDATION GAMIT SA HUMAN TRAFFICKING, $20-M ‘ILLEGAL FUNDS’; QUIBOLOY CHURCH NI-RAID

KASASAMPA pa lamang ng tatlong kasong kriminal laban kay Pastor Apollo Quiboloy, ngunit kakaharapin ng tinaguriang “appointed son of God” ang mga kasong “human trafficking,” “illegal fund raising” at pekeng kasal ng 82 mag-asawa sa Estados Unidos.

Ilang linggo na ang nakalipas, inilabas ng Saksi Ngayon ang mga kasong “rape,” “human trafficking” at “child abuse” na isinampa laban kay Quiboloy sa National Prosecution Service Office sa Davao City.

Kamakalawa, lumabas sa mga balita na sinalakay ng Federal Bureau of Investigation (FBI) ang Kingdom of Jesus Christ sa Los Angeles, California, USA, at inaresto ang tatlong opisyales na namamahala ng nasabing simbahan.

Nabatid na patuloy pa rin ang isinasagawang imbestigasyon ng FBI upang makapangalap ng malakas at matibay na ebidensiya kaugnay sa reklamong human trafficking laban sa nasabing sekta.

Idineklara ni Quiboloy  na siya ang “appointed son of God” na kanyang idiniin sa kanyang mga opisyal at kasapi sa kanyang Kingdom of Jesus Christ na nakabase sa Davao subalit may tanggapan sa Metro Manila na nangangasiwa ng mga negosyo ni Quiboloy, kabilang na ang Sonshine Media Network International o Swara Sug Media Corporation.

Ibinunyag nga mga biktima sa FBI na hindi raw sila makaalis sa Kingdom of Church sa LA dahil hawak ng mga opisyales nito ang kanilang pasaporte.

Sinabi pa ng mga biktima, , inuutusan sila ng pamunuan ng nasabing simbahan na magtungo sa iba’t ibang bahagi ng Amerika upang manghingi o mamalimos upang makakuha ng maraming pera na ilalaan sa The Children’s Joy Foundation, non-governmental-organization ng simbahan ni Quiboloy.

Ayon pa sa mga biktima, kapag hindi nila nabubuo ang perang dapat makolekta ay pinapaparusahan sila kabilang na ang pang-aabuso sa kanilang katawan.

Ang isa pang matinding nadiskubre ng FBI ay ang  “fundraising” ng simbahan ni Quiboloy na umabot na sa 20 million US dollar mula 2014 hanggang sa kalagitnaan ng 2019 gamit ang “street level solicitation” ng mga kasapi nito.

Labag sa batas ng Amerika na mangulekta ng pera sa ilegal na paraan o gumagamit ng pekeng layunin.

Nabatid pa ng FBI na umabot sa 82 pekeng kasal ang naisagawa ng kontrobersyal na simbahan sa loob ng 20 taon kung saan kabilang ang aktibidad sa pinagkukunan nila ng salapi. NELSON BADILLA

MALAKANYANG BINALAAN NG SOLON SA WATER CONCESSION; TAUMBAYAN MAMUMULUBI SA VILLAR TAKEOVER

NAGBABALA ang grupong Gabriela sa Malacanang na huwag tangkaing ibigay sa kumpanya ni dating Senate President Manny Villar ang pangangasiwa sa water distribution service sa Metro Manila kung nais ng mga ito na hindi magmahal ang presyo ng tubig at umayos ang serbisyo.

Ginawa ni Rep. Arlene Brosas ang nasabing babala dahil hindi pa rin maaalis sa mga  pangamba ng mga ito na ipasa ni Pangulong Rodrigo Duterte kay Villar ang water concession agreement dahil pumasok na ito sa water industry.

Si Villar ang may-ari sa Prime Water at hawak na ang water distribution service  sa iba’t ibang panig ng bansa tulad sa Marilao, Bulacan; Tayabas, Quezon;  Bacolod City, Negros Occidental at Zamboanga City.
“We warn Malacanang against using the public’s dissatisfaction under the privatized water services courtesy of Maynilad and Manila Water to comfortably sneak in Villar’s PrimeWater as the new water concessionaire,”  ayon kay  Brosas.
“Instead, the government should restore the water services across the country to full public control.”
Hanggang ngayon ay hindi pa inilalabas ng Palasyo ang bagong water concession agreement na nais ni Pangulong Rodrigo Duterte na tanggapin sa ayaw at sa gusto ng Manila Water nap ag-aari ni Manny V. Pangilinan at Maynilad, nap ag-aari naman ng mga Ayala, dahil kung hindi ay babawiin na sa mga ito ang kontrata.

Dahil dito, hindi inaalis ni Brosas ang posibilidad na kapag tuluyang umatras ang Maynilad at Manila Water ay ipapasalo kay Villar ang water service distribution dahil kabilang ito sa mga malalapit kay Duterte.
Idinagdag ni Brosas, dapat matuto ang gobyerno sa karanasan ng mga taga-Bulacan, Quezon province, Balocod City at sa Zamboanga at iba pang lugar na hawak ng Prime Water na lalong lumala  ang pangit na serbisyo at tumaas pa ang singil sa tubig. BERNARD TAGUINOD

10-B US EXPORT MADIDISKARIL

POSIBLENG madiskaril ang  $10 bilyong halaga ng export ng Pilipinas sa Amerika kung magpapatuloy ang pagbanat ni Pangulong Rodrigo Duterte sa US government, ayon kay Senador Panfilo Lacson.

Sinabi ni Lacson na magkakaroon ng “adverse consequences” sa ekonomiya ng bansa ang ipinataw na indefinite travel ban sa lahat ng miyembro ng Gabinete ni Duterte.

“An indefinite travel ban to the United States imposed on all members of the Cabinet could have adverse consequences on our country’s economy and security, not to mention the many employed Filipino immigrants there, especially if the US retaliates to the recent tirades of President Duterte,” paliwanag ni Lacson.

Aniya, umaabot  sa halagang $10 bilyon ang inaangkat ng Amerika sa Pilipinas bukod pa sa naibibigay ng tulong ng Washington  bilang suporta sa militar at ayuda sa buong Asia-Pacific region.

Kamakailan, nagbanta si Pangulong Duterte na kanyang kakanselahin ang Visiting Forces Agreement (VFA) sa pagitan ng US at Pilipinas kapag hindi binigyan ng US visa si Senador Ronald “Bato” Dela Rosa.

Nakatakdang magpulong naman ang Senado sa pangunguna ni Senate President Vicente Sotto III upang pag-usapan ang magiging posisyon ng mataas ng kapulungan hinggil sa pagbawi sa VFA at iba pang isyu sa US. ESTONG REYES

 

Read More

PINOY TIWALA PA RIN KAY PDU30

duterte33

SA kabila ng mga naglipanang kritiko ay mayorya pa rin ng mga Filipino ang tiwala at nagmamahal kay Pangulong Rodrigo Roa Duterte dahil sa pag-aalala sa kalusugan nito.

Ayon kay Presidential spokesperson Salvador Panelo, ang pag-aalala ng nakararaming Pinoy sa Pangulo ay patunay lamang na mahal nila ang Presidente.

Lumabas kasi sa 2019 fourth quarter survey ng Social Weather Stations (SWS) na 72 porsiyento ng mga Filipino ang “worried” sa kalusugan ni Pangulong Duterte.

Ani Sec. Panelo, hindi man aniya kasing-lakas ng kalabaw si Pangulong Duterte, o kasing-bata ng iba, pero makaaasa ang mga Pinoy na nagagampanan pa rin nito nang maayos ang kanyang trabaho.

“We’re glad that people are worried because it only means that they love the President. He may not be as strong as a bull like you, much, much younger, but certainly he can still function effectively as President,” aniya pa rin.

Kung ihahalintulad aniya ang Chief Executive sa ibang naging Pangulo ay mas malayong maliksi ito sa kanyang mga ginagawa dahil sunod-sunod ang mga akibidad mula pagbiyahe sa labas ng bansa, pagbisita sa mga kampo ng sundalo, pagbisita sa mga sinalantang lugar, pagdalaw sa mga burol at pagbisita sa mga sugatang kawal.

Sa kabilang dako, itinatwa naman ni Sec. Panelo na may kinalaman ang kalusugan ng Pangulo sa pagtanggi nito na bumiyahe sa Amerika.

Aniya, noon pa man ay talagang ayaw ng Pangulo na bumiyahe sa Amerika dahil sa malamig na klima. (CHRISTIAN DALE)

Read More

MENSAHE NI PDU30 SA CHINESE NEW YEAR: MAS MATIBAY NA RELASYON SA CHINA

DUTERTE-53

IPINAABOT ni Pangulong Rodrigo Roa Duterte ang kanyang ‘warmest greetings and best wishes’ para sa mga Tsinoy na nagdiriwang ngayon ng kanilang Chinese New Year.

Sa kalatas na ipinalabas ng Malakanyang,  sinabi ni Pangulong Duterte na ang katotohanan na niyakap na rin ng mga Filipino ang Chinese New Year celebration at taunang nagdiriwang na rin nito ay nagpapakita lamang ng malakas at hindi mapaghiwalay na magandang pagkakaibigan at beneficial relations ng Pilipinas at China.

Umaasa rin ang Chief Executive na sa pagbubukas ng bagong pahina ng mga Filipino at Chinese ng ibinahaging kasaysayan ay mas lalong uusbong ang matibay na pagkakaibigan ng dalawang bansa sa pamamagitan ng kooperasyon, investments, cultural exchanges, at people-to-people ties.

Samantala, tinawagan ng pansin ng Malakanyang ang publiko na manatiling mapagkumbaba at matalino ngayong taon ng ‘Metal Rat’.

Ang Year of the Metal Rat ay sinasabing magdadala ng tagumpay at bagong simula.

Ayon kay Presidential Communications Operations Office (PCOO) Secretary Martin Andanar, “We are one with the Filipino-Chinese community and everyone, in celebrating the Lunar New Year 2020. This Year of the Metal Rat means the beginning of a new cycle.”

Para sa mga Tsinoy, ang 2020 ay taon ng daga, unang hayop sa Chinese zodiac na sumisimbolo sa bagong simula at kayamanan.

Ang daga rin aniya ay simbolo ng “prosperity” base sa Chinese zodiac.

Umaasa naman si Sec. Andanar na mai-enjoy ng lahat ang “prosperous, safe, and healthy 2020.”

“The animal zodiac (rat) is seen as having the cleverness, successes, and contentment with living a quiet and peaceful life,” ani Sec. Andanar sabay sabing “Let this belief prompt us to live and act humbly and wisely, and motivate us to help each other in the face of unfortunate calamities, epidemics, and other challenges that may lie ahead.”

Ang Chinese New Year ay ipinagdiriwang sa ilang bahagi ng bansa kabilang na ang Binondo sa lungsod ng Maynila, na itinuturing na oldest Chinatown sa buong mundo. CHRISTIAN  DALE

Read More

AYALA AT MVP SWAK SA PLUNDER — DUTERTE

Kapag napatunayan, Drilon kakasuhan din

(Ni: NELSON S. BADILLA)

KAHIT mayroong bagong kontrata na iaalok ang pamahalaan sa Manila Water Company Inc. at Maynilad Water Services Inc., hindi inaatras ni Pangulong Rodrigo Duterte ang kanyang plano na sampahan ng kasong “plunder” o “syndicated estafa” ang mga may-ari at namamahala ng dalawang kumpanya.

Kumbinsido si Duterte na “swak” ang magkapatid na sina Fernando Zobel de Ayala at Jaime Augusto Zobel de Ayala II, ang mga may kontrol ng Ayala Corporation na siyang may-ari at namamahala ng Manila Water at si Manny V. Pangilinan o “MVP” na namamahala ng Maynilad, sa dalawang nabanggit na kaso.

Kamakailan, idiniin uli ng pangulo sa magkapatid na Ayala at MVP na kahit pumayag at nilagdaan nila ang bagong kontratang inihanda ng pamahalaan ay hindi nakatitiyak ang mga ito na hindi sila makakasuhan. “I do not give you a guarantee that no charges will be filed. For all that I can really say about this, I am not the only Filipino who is interested in the prosecution of crimes,” pahayag ng pangulo.

“As a lawyer, when I looked at the contract, it was full of shit, because… in that document is the exact copy of the Anti-Graft and Corrupt Practices [Act]. Your crime, it could be plunder or it could be a syndicated or estafa on a large scale. In which case, it is non-bailable. If you want to go out? Go ahead. But you will be a fugitive for all time. And I guarantee you, you will never come back as a whole person,” birada ni Duterte sa kanyang talumpati kamakailan.

Ang Department of Justice (DOJ) at Office of the Solicitor General (OSG) ang gumawa ng panibagong kontrata kung saan tinanggal ang mga kontra-mamamayan at kontra-pamahalaang probisyon tulad ng pagpapabayad sa mga kostumer ng corporate income tax, water treatment facility at environment enhancement.

Binanggit uli ni Duterte na matagal nang “ginagatasan” ng Manila Water at Maynilad ang mga negosyante at residente sa Metro Manila.

Ang kontrata ng Manila Water at Maynilad sa Metropolitan Waterworks and Sewerage System (MWSS) ay nagsimula noong 1997 (panahon ni Fidel Ramos) at matatapos sa Hunyo 30, 2022 matapos ipatigil ni Duterte ang pagpapalawig ng kasunduan ng hanggang 2037 noong 2009 (termino ni Gloria Macapagal Arroyo).

Bukod sa magkapatid na Ayala at kay MVP, hinahabol din ni Duterte ang mga nagbalangkas sa kontrata ng tubig.

Isa sa pinaniniwalaan ni Duterte na may kinalaman sa kontratang magtitiyak na hindi malulugi ang Manila Water at Maynilad ay si Senador Franklin Drilon.

Kapag nakakuha ng ebidensiyang magsasabing isa si Drilon sa mga salarin na gumawa ng kontrata ng Manila Water at Maynilad sa MWSS ay siguradong pakakasuhan ng pamahalaan si Drilon, ratsada ni Duterte.

Ang orihinal na may kontrol ng Maynilad ay ang pamilya Lopez, sa pamamagitan ng Benpres Corporation.

Noong 2007, nabili ng DMCI-MPIC Water Company, kumpanyang itinayo ng pamilya ni David Consunji at ng Metro Pacific Investments Corporation (MPIC) na pinamamahalaan ni Pangilinan.

Umabot sa 84 porsiyento ang nabili ng pangkat ni Pangilinan at ng pamilya Consunji sa share of stocks ng Benpres Corporation sa Maynilad.

762% ANG ITINAAS

Ipinaalala ni Rodolfo “RJ” Javellana, pangulo ng United Filipino Consumers and Commuters (UFFC), na bago mapunta sa Manila Water at Maynilad ang negosyo ng distribusyon ng tubig sa Metro Manila at mga karatig lalawigan, wala pang P2.50 kada kubiko metro ang singil sa tubig ng Metropolitan Waterworks and Sewerage System (MWSS).

Ngayon 2020, umaabot na halos sa P35 bawat kubiko metro ang singil ng Manila water at Maynilad, wika ni Javellana.

Nabatid ng Saksi Ngayon na umabot sa P54.9 bilyon ang tubo ng Manila Water mula 2009 hanggang 2018, samantalang P64.6 bilyon naman ang tubo ng Maynilad sa parehong haba ng taon.

Ganito rin ang pananaw ng ilang mambabatas sa mababang kapulungan ng Kongreso.

Imbes na bumaba ang presyo ng tubig sa kamay ng mga dambuhalang negosyante, tumaas pa ito ng hanggang 762% mula nang hawakan ng mga ito ang water distribution service sa nakaraang 25 taon.

Ito ang pahiwatig ng Makabayan bloc na isang patunay na pinagkakitaan lamang umano ng mga Ayala at Pangilinan ang water service.

Ayon sa nasabing grupo na kinabibilangan nina Reps. Carlos Zarate, Ferdinand Gaite at Eufemia Cullamat ng Bayan Muna; Rep. Arlene Brosas ng Gabriela, ACT party-list Rep. France Castro at Kabataan party-list Rep. Sarah Elago sa kanilang inihaing House Resolution (HR) 19, malinaw na lalong nagmahal ang serbisyo sa tubig mula nang hawakan ng Maynilad at Manila Water ang water service distribution.

Sinabi ng grupo na bago isinapribado ni dating Pangulong Fidel Ramos ang water distribution noong 1997 ay P.4.02  per cubic meter lang ang singil ng MWSS sa East Zone na hawak ngayon ng Manila Water.

Ngunit mula nang hawakan ng Manila Water  ang water service, umabot na anila sa P34.65 per cubic meter ang presyo ng tubig o katumbas ng 762% na pagtaas sa nakaraang 20 taon o mula 1997 hanggang 2017.

Ganito rin ang nangyari sa mga customer ng Maynilad sa West Zone dahil mula sa dating P7.21 per cubic meter bago naisapribado ang water service noong 1997 ay umaabot na ngayon sa P46.75 ang presyo nito noong 2017 o 548% na pagtaas.

Dahil dito, umapela ang nasabing grupo na huwag nang ibalik sa pribadong sektor ang water service distribution dahil pagkakakitaan lamang ng mga negosyante ang serbisyong ito.

“Constitutional rights ng mga tao na magkaroon ng malinis at sapat na supply ng tubig,” ayon sa grupo, kaya dapat ang gobyerno ang magpapatakbo nito at hindi ang mga pribadong negosyante na wala umanong hangad kundi kumita lamang imbes na magserbisyo. (May dagdag na ulat si BERNARD TAGUINOD)

Read More