DEPARTAMENTO PARA SA OFWs

FORWARD NOW

BUNSOD nang pagsiklab ng kaguluhan sa gitnang Silangan matapos paslangin ang top Iranian military ­leader na si Qasem Soleimani, naisip ng inyong lingkod na napa­panahon na upang maipasa sa lalong madaling panahon ang batas na magtatatag ng departamento na titiyak sa kaligtasan at seguridad ng Overseas Filipino workers.

Bilang isang serbisyo publiko, nais ng inyong lingkod na matiyak na ang Department of Filipinos Overseas and Foreign Employment bill ay sumasalamin sa reyalidad o totoong nangyayari sa ibang bansa kung saan naroroon ang ating mga makabagong bayani.

Sa pagbisita ko sa ilang lugar sa Middle East, nakipagdayalogo ako sa OFWs kung saan inalam ko ang kanilang saloobin hinggil sa panukalang kailangang masertipikahan ni Pangulong Rodrigo Duterte bilang urgent at priority ang Department of Filipino Overseas bill.

Nakipag-ugnayan ako sa OFWs sa Abu Dhabi at United Arab Emirates upang alamin ang kanilang kalagayan at mga suliranin upang mas matugunan ng ating tinututukang panukalang batas ang kanilang mga pangangailangan.

Nais ng inyong lingkod na maging mabilis ang paglutas sa mga kaso nang pag-aabuso ating mga kababayang naghahanap-buhay sa ibang bansa, maprotektahan sila sa mga batas para sa OFWs at masawata ang illegal recruitment na nagpapahirap sa ating mga kababayang nagtutungo sa abroad para sa kabuhayan.

Nasulit ang pagbisita  ng inyong mambatatas dahil naibahagi natin ang kaalaman tungkol sa ‘practical matters’ sa pamamagitan ng isang legal forum, lalo na sa usapin ng legal assistance fund para sa kanila.

Bilang isang mambabatas, nais ko ring magkaroon ng po­licy debate sa isang probisyon sa iminungkahing batas na maaaring humantong sa pag-phase out nang pagpapadala ng household service workers (HSWs) sa ibang bansa.

Ang naturang probisyon ay nagtatakda ng five-year timeline para sa gobyerno upang matiyak na tanging mga skilled at semi-skilled Filipino workers lang magde-deploy pagkatapos ng deadline. Ilang mga eksperto ang nagsabi na batay sa probisyon ay hindi na maaaring isama ang HSWs.

Kaya nga ang inyong lingkod ay nakipag-balitaktakan para tutulan ang pagsasama ng naturang probisyon, dahil maaari itong humantong sa maraming mga kaso ng pang-aabuso sa OFW.

Sa datos mula ng Philippine Overseas Employment Administration, makikita dito na sa 459,080 nai-deploy na mga bagong hire noong 2017, halos kalahati o nasa 251,349 sa mga ito ay HSWs.

Kaya naman para sa akin, kung pagbabatayan ang kasaysayan, ang HSWs ang pinakamahina sa lahat ng mga kabilang sa sector ng OFW. Sila ang nabibiktima ng human trafficking at pang-aabuso lalo na’t  hindi natin masisiguro na hindi na makikipagsapalaran ang mga kababayan natin sa kabila ng phase out sa HSW deployment.

Igigiit ko pa rin na magkaroon tayo ng probisyon na  titiyak na mabibigyan sila ng karampatang proteksyon.

Dalangin ko na pumasa sa Kongreso ang DFO-OF dahil magiging mandato nito ang pangangalaga at pagsusulong ng kapakanan, kagalingan at interes ng mga pamilya ng OFW. (FORWARD NOW / Rep. Fidel Nograles)

Read More

BIGYAN NATIN NG DANGAL AT SAYSAY ANG ALAALA NI RIZAL

FORWARD NOW

Ginugunita ng buong bansa ang pagkamatay ng martir nating bayani, ang Filipino na itinuturing natin hanggang sa ngayon bilang pinakada¬kilang tao na siyang nagsabuhay ng tunay na patriyotismo at pagmamahal sa bayan.

Minsan na itong napag-usapan ng mga eksperto sa kasaysayan, maging mga itinuturing na pantas sa buhay at pagkatao ng Pambansang Bayani: kung si Gat. Jose Rizal ay buhay at nakakasalamuha natin ngayon, papaano kaya niya isinasabuhay ang kanyang mga turo sa gitna ng mga katotohanan ng kasalukuyang panahon?

Batay sa aking pagkakaalala sa aking mga napag-aralan at pagbabasa, ang bayani na kilala sa kanyang maraming abilidad at pagkadalubhasa sa kasaysayan, medisina, literatura at mga sining, kanya pa ring isusulong ang kritikal na pag-iisip sa mga bagay na bumabagabag sa pambansang kamalayan.

Kanya pa ring isusulong ang edukasyon at pagmamahal sa wika bilang pambansang prayoridad, kaiba sa pokus ng edukasyon sa kasalukuyan na nakatuon sa pagkakakitaan pagkatapos ng mahabang panahon sa elementarya, hayskul at pamantasan.

Bagama’t hindi nito kakaligtaan ang mga math, mga siyensya at ang mga sining, itutulak nito ang pagpapakadalubhasa at pagpapalaganap sa mga larangang ito gamit at tangan ang Filipino at ang wikang tinubuan.

Dahil sa kanyang mahabang karanasan sa pagpalag laban sa imperialismo ng mga naghaharing uri, itataguyod nito ang paglaganap ng kasarinlan ng mga lalawigan at nayon sa labas ng Kalakhang Maynila kung saan naroon ang sentro ng kapangyarihan.

Sa harap ng lumalawak na banta at usapin ng pananakop at neokolonyalismo, magtuturo pa rin sa kabataan si Jose Rizal at isisiksik sa kamalayan ng nakababatang Filipino na nasa kanila ang kapangyarihang itakda ang direksyon ng bansa.

Sa usapin ng makabagong teknolohiya at social media, mangunguna ito sa pagpapalaganap ng disiplina at pananaliksik upang tuklasin at gawing buhay ang katotohanan sa harap ng malawakang banta ng kapalaluan, maling balita at kasinungalingan.

At hindi ito mangingiming tumuklas ng naiiba at makabagong kaparaanan, sa polisiya at mga batas, upang tugunan ang pamamayagpag ng kamangmangan, pagsuko at pagbabagong dikta ng mga impluwensyang Kanluranin at dayuhan.

Sa mga kabataan ng Rizal at Pilipinas, huwag tayong tumigil sa pag-aaral at mga  kaalamang ito. Isabuhay natin ang mga leksyon halaw sa buhay ng ating pambansang bayani. Sa pamamagitan ng ating indibidwal na buhay, bigyan natin ng dangal at saysay ang kasaysayan. (Forward Now / Rep. Fidel Nograles)

Read More

PANUKALANG LAGUNA LAKE FERRY NETWORK INILAPIT NATIN SA DOTR

FORWARD NOW

Nakipag-ugnayan tayo kamakailan kay Transport Secretary Arthur Tugade upang talakayin ang ating panukalang magkaroon ng Laguna Lake Ferry Network mula Jala-Jala at Cardona papuntang Guadalupe Station sa Makati.

Isa ito sa mga naisip natin na solusyon upang mabawasan ang matinding trapiko sa Maynila at gamitin ang lawa ng Laguna upang mas mapabilis ang biyahe papunta sa Maynila at pabalik sa Rizal.

Maraming benepisyo at pabor ito sa ating mga kababayan sa lalawigan ng Rizal upang mapabilis ang kanilang pagluwas sa Kamaynilaan gayundin ang kanilang pag-uwi dahil hindi na nila daranasin ang mahabang oras ng traffic.

Makakahikayat din tayo ng investors upang maglagak ng kanilang negosyo sa Rizal kapag may maganda na tayong mode of transportation. Aangat din ang industriya ng turismo sa Rizal at tiyak na maraming trabaho rin ang malilikha nito para sa ating mga nasasakupan.

Bukod sa mas mapapabilis ang biyahe at maiiwasan ang mabigat na daloy ng trapiko, makatutulong din ito para mabawasan ang paglikha ng polusyon ng mga sasakyang nagbubuga ng maruruming usok sa kalsada.

Matagal na natin itong pinagpaplanuhan subalit kailangan munang pag-aralan mabuti ng ating pamahalaan upang matiyak ang kaligtasan ng mga pasahero o commuters at mapangalagaan natin ang kalinisan ng lawa na dadaanan ng ferry.

Kaya hiniling ko sa lahat na suportahan ang ipinapanukala natin na layong maproteksyunan ang kapakanan ng commuters na nagtitiis sa buhul-buhol na trapik para pumasok sa trabaho at mapangalagaan din ang kanilang kalusugan laban sa polusyon na kanilang araw-araw na sinusuong.

Kapag nagkaroon ng katuparan ang proyektong ito, tiyak na libu-libong mamamayan sa loob at labas ng Rizal ang makikinabang dahil hangad nating mabigyan ng ligtas, malinis at kumportableng uri ng sasakyan ang ating mga kababayan sa Rizal. (Forward Now / Rep. Fidel Nograles)

Read More

KATARUNGANG PAMBARANGAY DAPAT AMYENDAHAN

FORWARD NOW

KAILANGAN nang am­yendahan ang probisyong nakapaloob sa Republic Act 7160 o Local Government Code of 1991 upang palawakin at baguhin ang sistema sa Katarungang Pambarangay.

Inihain natin sa Kamara ang panukalang Barangay Justice System na layong amyendahan ang ilang probisyong nakapaloob sa R.A. 7160 at palakasin ang suporta sa Barangay Justice System gayundin sa mga nagtatrabaho rito.

Ang Katarungang Pambarangay ay halos tatlong dekada nang binuo alinsunod sa R.A. kung saan nakasaad dito ang mga tungkulin at kapangyarihang iniatang sa Lupon Tagapamayapa upang ayusin at pagkasunduin ang magkabilang panig na sangkot sa mga mabababa o mahihinang kaso na idinudulog sa Barangay.

Gusto nating ganap na makamit ang obhektibo para sa patas at mabilis na pangangasiwa ng hustisya sa lebel ng barangay, pa­nahon na para muling bisitahin o busisiin ang ilang mga probisyon sa Kataru­ngang Pambarangay na nakapaloob sa R.A. 7160.

Sa bagong Katarungang Pambarangay ay bubuo ng malakas at modernong serbisyo ang gobyerno na layong mapabilis ang pag­hahatid ng hustisya sa barangay level para sa mga Filipino. Ang bawat barangay ay magkakaroon ng mga Barangay Justice Worker na hihirangin o may akreditasyon mula sa Department of Justice, magtatayo ng Barangay Justice Advisory Center para magbigay ng payo o dinggin ang paunang pagsisiyasat sa anumang idudulog na kaso ng nagrereklamo at inirereklamo, lilikha ng Barangay Conciliation Board na mangangasiwa sa pagpili ng miyembrong didinig sa isinampang kaso sa barangay, at Barangay Conci­liation Panel na mamamagitan sa magkabilang partido upang sikapin na pagkasunduin ang mga ito.

Dapat ay magsagawa rin ng Mandatory Continuing Barangay Justice Education para sa lahat ng Barangay Justice Workers upang magkaroon sila ng sapat na kaalaman sa mga batas para maging epektibo ang paghawak o pagdinig nila sa mga kasong isinasampa sa barangay level.

Ang lahat ng Barangay Justice Worker ay marapat lamang na bigyan ng sahod dahil sa kanilang pagtupad sa tungkulin, dapat ay mayroon din silang hazard allowance sapagkat minsan ay nalalagay sa peligro ang kanilang buhay, sumailalim sa libreng pagsasanay, dagdag na edukasyon at pagyamanin ang kaalaman sa pagpapairal ng katarungan sa barangay.

Nakapaloob din sa panukalang batas ang pagbibigay ng mga Barangay Justice Worker na nakapagsilbi ng limang (5) taon ay may karapatang tumanggap ng second grade eligibility mula sa Civil Service Commission at mabigyan ng Free Legal Services mula sa Public Attorney’s Office kapag sila’y nasampahan ng kasong may kaugnayan sa pagtupad sa kanilang tungkulin. (Forward Now / Rep. Fidel Nograles)

Read More

PAGTATAG NG HEALTH PROMOTION COMMISSION DAPAT MAISABATAS

FORWARD NOW

ISINUSULONG natin sa Kongreso ang paglikha ng Health Promotion Commission na popondohan mula sa 20% ng natitirang incremental revenues na nakalaan para sa kalusugan alinsunod sa Republic Act 10351 o ang Excise Tax Reform Law.

Ang House Bill 5515 (An Act Establishing a Health Promotion Fund and Health Promotion Commission to Oversee the Implementation of Health Promotion in the Philippines and for other Purposes) ang titiyak ng pangmatagalang pangangalaga sa kalusugan ng bawat Filipino sa pamamagitan ng pagbibigay ng wastong kaalaman ukol sa programa.

Ang pangunahing tungkulin ng komisyon ay upang mabuo ang National Health Promotion Policy Framework and Action Plan para masiguro na kalusugan ang mangunguna sa lahat ng mga polisiyang gagawin, pati na rin ang pagpapakilos ng mga mekanismong panlipunan at ma-monitor ang pagpapatupad ng programa.

Gagawa rin ito ng rekomendasyon na makatutulong sa pagsulong ng kalusugan upang ating makamtan ang mga layunin sa kalusugan ng buong bansa, kabilang din dito ang paghahatid ng wastong impormasyon sa mamamayan patungkol sa kalusugan, pag-aaral sa mga polisiya, pagsusuri sa kasalukuyang batas para matiyak ang proteksyon sa kalusugan at pagpapatupad ng pilot health promotion projects na magiging basehan sa paggawa ng mga polisiya at mga irerekomendang programa.

Ang pagtaas ng kaso ngayon ng mga nakahahawang sakit na kayang pagalingin ng mga vaccine ay nagpapahiwatig sa amin na baka mali ang ating diskarte. Ang nakaaalarmang pagdami ng degenerative and lifestyle diseases gaya ng hypertension, cancer, diabetes at mga aksidente, na ayon sa mambabatas ay nangangailangan ng long term investments para ito ay maiwasan.

Ito ang rason kung bakit kailangan natin ang Health Promotion Commission na multi-sectoral and inclusive. Hindi natin matatapos ang isyu sa kalusugan ng publiko sa pabagu-bagong paraan. Kailangan itong maging sistematiko, na may positibong pananaw para sa pangmatagalang tagumpay.

Sakop ng panukalang batas na ito ang mas malawak na panlipunan at mga interbensyon sa kapaligiran upang mapakinabangan at maprotektahan ang kalusugan ng mamamayan at magkaroon ng de-kalidad na buhay sa pamamagitan ng pagsupil sa ugat o pinagmumulan ng malalang sakit, hindi lamang sa pagtutok ng paggamot at pagpapagaling.

Ang pangangailangan ng mga kabataan, kababaihan, mahihirap, matatanda, may kapansanan, at marginalized sectors ay dapat unahin upang matugunan ang umiiral na kakulangan sa mga programang pangkalusugan.  (Forward Now  / Rep. Fidel Nograles)

Read More

BATAS VS TEENAGE PREGNANCY INIHAIN SA KONGRESO

FORWARD NOW

Inihain na natin ang House Bill 5516 o Prevention of Adolescent Pregnancy Act sa pagbubukas ng 18th Congress na may layu­ning mapigilan ang maagang pagbubuntis ng mga menor de edad.

Nilalayon din nito na magkaroon ng komprehensibo at naaangkop sa edad na pagtuturo ng sex education para sa mga kabataang Filipino upang maiwasan pa rin ang maagang pagdadalantao.

Mayroong 9.7 milyong kababaihan na may edad 10 hanggang 19 kung saan pagsapit ng 19 anyos, isa sa lima sa kanila ay nagiging ina. Ito ay base mismo sa pag-aaral ng United Nations Population Fund.

Dahil sa kawalan at kakulangan sa edukasyon, impormasyon at pangangalaga sa kalusugan, nangyayari ang maagang pagbubuntis at laganap ito sa lipunan.

Naniniwala tayo na mahalagang maibalik ang pagtuturo ng sex education sa mga mag-aaral sa sekondarya para magabayan sila sa bawat hakbang na kanilang tinatahak. Gayundin, sa paggawa ng mga desisyon sa kani-kanilang buhay. Hangad natin na mabigyan ng sapat na kaa­laman ang mga estudyante na nasa hustong gulang kung ano ang tama at mali, kumilos nang naaayon at kung paano tumanggi sa posibleng pang-aabuso ng mga taong mapagsamantala.

Ang impormasyon tungkol dito ay dapat magsimula sa loob ng bawat tahanan bago ipagpatuloy sa mga paaralan para sa mga mag-aaral na karaniwang nalalantad sa maseselan at sensitibong karanasan tungkol sa pagtatalik.

Ito ay dahil ang ating mga magulang ang dapat na unang nakaaalam kung kaya nang maintindihan ng kanilang mga anak ang usapin tungkol sa isyung ito. Dapat ding matiyak ng mga magulang na tama ang mga ibinabahagi nilang mga kaalaman sa mga bata.

Ang sex education ay tumatalakay tungkol sa sekswalidad ng tao kabilang ang kalusugan, relasyon, pakiramdam, responsibilidad, bahagi ng katawan, sexual reproduction, sexual activity, age of consent, reproductive rights, birth control at pagpipigil sa pagtatalik.

Bukod sa maagang pagbubuntis, mahalaga ring maituro sa mga kabataan ngayon kung paano makaiiwas sa mga nakahahawang sakit dala ng pagtatalik na hindi ligtas. Ito ay ang mga sakit tulad ng AIDS (Acquired Immuno­deficiency Syndrome) na dala ng HIV (Human Immunodeficiency Virus) na nakukuha sa pakikipagtalik.

Nakapaloob ang lahat ng usaping ito sa isinusulong nating batas para maiwasan ang anumang problema o kapahamakan sa mga kabataan dahil sa kakulangan at kawalan ng kaalaman tungkol sa sex education.

Kailangang magabayan nang maayos ang mga kabataan natin sa tamang landas para sa katuparan ng kanilang mga pangarap.  (Forward Now / Rep. Fidel Nograles)

Read More

HANDOG NA PALUPA SA RIZALEÑONG MAGSASAKA

FORWARD NOW

Kaisa tayo ng Department of Agrarian Reform sa pamamahagi ng lupang sakahan para sa mga magsasakang walang sariling lupa na unang hakbang ng gobyerno upang mabago ang buhay ng mga benepisyaryo.

Sa kabuuan, 807 agra­rian reform beneficiaries (ARBs) mula sa Rodriguez, San Mateo, Teresa, Morong, Baras, Pililia, Jalajala, Tanay, at Pinugay – mga lugar na sakop ng Ikalawang Distrito ng Rizal, ang tumanggap ng kanilang Certificate of Land Ownership Awards para sa 737.0017 ektarya na lupang sakahan na ipinamahagi noong Setyembre at Oktubre.

Tiniyak din natin sa ARBs na ang suporta ng gobyerno ay hindi nagtatapos lamang sa pamamahagi ng lupa bilang pagtalima sa Comprehensive Agrarian Reform Program.

Babalangkas kami ng mga pamamaraan upang siguruhin na mapapakinabangan nang husto ng mga benepisyaryo ang lupa na kanilang natanggap. Magtutulungan kami hindi lang para maiangat ang buhay nila, kundi para na rin umusbong ang agrikultura sa ­aming distrito.

Inatasan na natin ang ating mga tauhan na makipag-ugnayan sa mga ahensiyang may kinalaman sa pagpapatupad ng Comprehensive Agrarian Reform Program kung ano pa ang karagdagang suporta na maaari nating ibigay sa farmer-beneficiaries.

Layunin natin na direktang ilapit ang serbisyo ng gobyerno sa mga benepisyaryo sa halip na dumulog ang mga ito kung saan-saan. Madalas kasi hindi na prayoridad ng magsasaka ang magtanong at lumapit sa pamahalaan para humi­ngi ng tulong. Nangangahulugan ito na hindi nila alam kung anong mga serbisyo ang pwede nilang makuha sa ating gobyerno.

Tutulungan natin ang farmer-beneficiaries na madaling makalapit sa credit facilities para magkaroon ng pondong magagamit sa pagpapaunlad ng ani at makabili ng kagamitan sa pagsasaka. Handa rin tayong magbigay ng technical assistance at magturo ng wastong pagpapatakbo sa pananalapi upang matiyak na ang kabuhayan ng mga magsasaka ay umasenso.

Ang pagbibigay ng mabilis na access sa pananalapi ay isang paraan upang hindi lumapit ang mga benepisyaryo sa mapagsamantalang nagpapautang o tuluyang mauwi sa pagbenta ng kanilang lupa.

Ang pagbubuklod ng mga ahensiya upang makabuo ng malakas, masigla at mapagkakatiwalaang mga organisasyon at pagpapakilala ng mga makabagong paraan upang mapataas ang kita ng mga magsasaka sa pamamagitan ng iba’t ibang proyekto ang siyang magdudulot ng malaking pagbabago o paglago.

Sa aking mga kalalawigang magsasaka, pag­yamanin natin ang handog na palupa.  (Forward Now / Rep. Fidel Nograles)

Read More

PAGTUGON SA WATER CRISIS DAPAT NAAAYON SA BATAS

FORWARD NOW

Ang Pilipinas, partikular ang Metro Manila, ay nakararanas ng krisis sa tubig na kailangang mabilis na maaksiyunan; ito ay hindi pinag-uusapan. Subalit ang anumang solusyon na gagawin ng gobyerno ukol dito ay dapat naaayon sa batas.

Naging mainit na usapin ito matapos na maglabas ng advisory ang water concessionaires na Manila Water Company Inc. at Maynilad Water Services, Inc. na re­gular silang magpapatupad ng rotational water service interruptions sa kalakhang Maynila.

Hindi natin itinatanggi na wala tayong krisis sa tubig. Pero kung anuman ang hakbang na gagawin dito ay kailangang alinsunod sa kung ano ang itinatakda ng batas. Dapat masiguro na­ting hindi maaagrabyado ang kalikasan, pati na ang mga indigenous people at iba pang kababayan natin.

Duda tayo na mayroong anomalya sa paggawad ng Kaliwa Dam Project sa Chinese firm sa kabila ng kakulangan sa pre-qualification requirements kaya bilang kinatawan ng Ikalawang Distrito ng Rizal, inihain natin sa Kamara ang House Resolution No. 309.

Nais nating magkaroon ng imbestigasyon sa dam project kahit pa tiniyak ng DENR sa pamamagitan ng Environmental Management Bureau, na naglagay sila ng mga panuntunan sa Environmental Clearance Certificate (ECC) na kanilang ipinagkaloob sa MWSS.

Alam natin na nabigyan na ng “go-signal” ng Me­tropolitan Waterworks and Sewerage System at China Energy Engineering Corp. na simulan na ang pagpapatayo ng P18.7-billion Kaliwa Dam project kung saan nangako ang Department of Environment and Natural Resources na babantayan ang implementasyon ng Kaliwa Dam kasunod ng paggawad dito ng ECC. Tiniyak din nito na kanilang kakanselahin ang ECC kapag may nakitang paglabag at hindi pagsunod sa inilatag na kondisyon ng gobyerno.

Nakikita natin na ang probisyong nakapaloob sa ECC ay “tapik lang sa kamay” kaya dapat mas mabigat na parusa ang ipataw sa mga hindi tumatalima sa batas dahil sa malubhang epekto nito sa kapaligiran at komunidad. Ang proyektong ito ay pautang ng China sa ating bansa at sana’y huwag itong magsilbing patibong sa Pilipinas na kapag hindi nabayaran ng gobyerno ang pagkakautang ay hihi­ling ng kapalit.

Makakaasa ang ating mga kababayan na patuloy naming babantayan ang bawat kilos ng contractor ng Kaliwa Dam Project para siguruhin na sinusunod nila ang batas. Hindi natin papayagan ang sinuman na makapanlamang o labagin ang ating batas dahil kapag sila’y nagkasala, papanagutin natin sa batas. (Forward Now / Rep. Fidel Nograles)

Read More

KALIWA DAM, SAGOT NGA BA SA PROBLEMA NATIN SA TUBIG?

FORWARD NOW

“Nais nating malaman kung ang Kaliwa Dam nga ba talaga ang sagot o magbibigay ng solusyon sa problema natin sa tubig sa Kalakhang Maynila.”

Ito ang ating maikling pahayag o naging reaksyon sa panayam ng ilang mamamahayag kaugnay sa naturang proyekto.

Mahigpit na tinutulan ng mga residente at lokal na opisyal ng ilang bayan sa Quezon maging ng karatig-lalawigan nito ang balak na pagtatayo ng Kaliwa Dam sa bayan ng Infanta.

Hindi rin kaila sa atin ang mariing pagtutol ng simbahan sa proyekto gayundin ang mga katutubong Dinagat na naninirahan sa bundok ng Sierra Madre kung saan ang lalawigan ng Rizal ay nasa paanan din ng nasabing kabundukan.

Ang dambuhalang dam na tinatayang aabot sa P18.7 bilyon proyekto na pangangasiwaan ng Official Development Assistance (ODA) mula sa China na inaasahang matatapos sa taong 2023 ay planong itayo sa tuktok ng bundok ng Infanta, Quezon upang makapagdagdag ng supply ng tubig sa Metro Manila.

Magugunitang nagbabala ang Metropolitan Waterworks and Sewerage System (MWSS) na posibleng mauwi sa matinding krisis sa tubig ang Metro Manila kung hindi maitatayo ang Kaliwa Dam.

Hindi naman tayo direktang tumututol sa naturang proyekto kung ang taumbayan ang direktang makikinabang dito, subalit kailangan na busisiing mabuti kung tanging Kaliwa Dam nga lang ba ang solusyon sa kakulangan ng tubig sa Metro Manila.

Sa kabila ba ng sinasabing benepisyong makukuha mula rito ay may mga kaakibat ding agam-agam sa mga residenteng nakatira sa paligid ng pagtatayuan ng dam site.

Ang karaniwang tanong nila ay ganito: hindi ba sila malalagay sa peligro, hindi ba ito magdudulot ng matinding sakuna sa kanilang buhay at ari-arian kung sakaling lumindol ng malakas? Ito ang pinangangambahan ng lokal na opisyal ng pamahalaan at mga residenteng naninirahan sa paligid na pagtatayuan ng Kaliwa Dam.

Nais nating linawin, hindi tayo tutol sa pag-unlad at pagkakaroon ng sapat na suplay ng tubig sa Metro Manila subalit kung malalagay naman sa panganib ang mamamayan sa naturang lugar ay dapat na suriing mabuti bago ito simulan. (Forward Now / Rep. Fidel Nograles)

Read More