ILEGAL NA SUGAL HAMON KAY GEN. DANAO

HAGUPIT NI BATUIGAS

Malaking hamon sa liderato ni Region 4-A director Brig. Gen. Vicente Danao ang naglipanang ilegal na sugal sa Cavite, Laguna, Batangas, Rizal at Quezon (CALABARZON).

Matatandaan na sa unang araw pa lamang ng kaniyang pagkakatalaga bilang kapalit ni Brig. Gen. Edward Carranza, hinika­yat niya ang hanay ng kapulisan sa CALABARZON na tumulong upang ipatupad ang mga programang kinabibilangan ng Anti-Criminality; Anti-Corruption at Anti-Illegal Drugs na siya ring prayoridad ni Pangulong Rodrigo Duterte.

Subalit sa kabila ng ‘No Take Policy’ na iniutos ni Danao, nabalitaan natin na pa­tuloy pa rin ang operasyon ng mga gambling operator ng bookies na nasa tawag lamang bilang mga alyas na sina Tony ng Alaminos; Efpie ng Cabuyao; Barreto at Ebora ng Sta. Rosa; Bogs ng San Pedro; Edwin ng Los Baños; Swerwin at Orlan ng San Pablo.

Maliban pa rito, namamayagpag din ang color game ni alyas Lotys sa loob ng sabungan ng Pila.

Hindi pa rin naaawat ang mga peryahan nina alyas Yolly at Evy sa buong lalawigan naman ng Laguna.

Nakilala natin si Danao sa Manila Police District (MPD) na tapat sa kaniyang tungkulin, hardworking, disciplinarian at may kamay na bakal. Umaasa ako na ang husay na ipinakita mo sir sa serbisyo sa MPD ay hindi magbabago at ipagpapatuloy mo sa CALABARZON.

Sana ay aksyunan ninyo ni Laguna PNP Provincial Director Eleazar Matta ang mga ilegal na pasugalan ng mga gambling operator na nabanggit ko upang hindi kayo magamit ng mga tiwaling opisyal na siyang hamon sa inyong liderato sa kasalukuyan.

Abangan, may karugtong! (Hagupit ni Batuigas / MARIO B.  BATUIGAS)

Please follow and like us:
Read More

LIBONG MGA BULAKENYO LUMAHOK SA ‘TAKBO PARA SA KALIKASAN 2’

HAGUPIT NI BATUIGAS

Libu-libong mga Bulakenyo ang nakibahagi para sa “Takbo Para Sa Kalikasan 2” upang ipakita ang kanilang suporta sa pag-rehabilitate ng Manila Bay.

Ang okasyon ay pinangunahan ni Gover­nor Daniel Fernando at iba pang matataas na opisyal ng pamahalaan na ginanap kamakalawa sa Bulacan Sports Complex.

Ang nasabing okas­yon ay dinaluhan din nina Senadora Cynthia Villar; bilang speaker, DENR Undersecretary Benny Antiporda; DILG Assistant Secretary for special concerns Marjorie N. Jalosjos; PCOO Assistant Secretary Ramon Cualo­ping, III; at National Youth Commission (NYC) chairperson Ryan Enriquez.

Ayon kay Jalosjos, ang nasabing programa ay inorganisa ng DILG sa pakikipagtulungan ng DENR at Bulacan government at iba pang ahensiya ng gobyerno. Ito ay para magkaroon ng awareness ang pu­bliko na kinakailangan na palakasin ang programa para makibahagi ang mga ito sa patuloy na rehabilitasyon ng Manila Bay.

“We encourage every­one to be serious and support the cleanup of Manila Bay for the next generation, including Bulacan, Bataan, Pampanga and all coastal areas contributing sewage to Manila Bay, not just the National Capital Region, but all of us. Let’s start with our community and our village,” pahayag nito.

Napakagandang programa para nga naman maisalba natin ang Manila Bay at maibalik ang dating ganda at linis ng tubig na dumadaloy dito kung saan bordered ito ng limang coastal cities sa NCR at coastal provinces tulad ng Bataan, Bulacan, Pampanga at Cavite.

Ang Manila Bay kasi ay bagsakan o daluyan ng tubig-baha na may tone-toneladang inaa­nod na basura kung kaya inutusan ni Pangulong Rodrigo Duterte ang lahat ng local government sa nasabing mga lalawigan at rehiyon na isalba ang Manila Bay.

Kung inyong matatandaan, sa tuwing bumabagyo at umuulan nang malakas, gabundok na basura ang kadalasan na nakukuha sa Manila Bay at maging sa baybayin ng ­Roxas Boulevard kaya pa­nahon na ng pagkakaisa.

Sa totoo lamang, palaging nakasuporta si Governor Fernando sa mga programa ng gob­yerno lalo na ang pag-rehabilitate sa mga ilog sa lalawigan ng Bulacan at maging sa Manila Bay.

May pag-asa pa tayong muling mapaganda at maibalik sa dating anyo ang Manila Bay basta magkaisa lamang ang mga Filipino na huwag magtapon ng basura sa mga ilog para hindi ito anurin patungo sa nasabing baybayin. (Hagupit ni Batuigas / MARIO B.  BATUIGAS)

Please follow and like us:
Read More

BALIKBAYAN BOXES MAAARI NANG MA-MONITOR GAMIT ANG BOC TRACKING SYSTEM

HAGUPIT NI BATUIGAS

Isang magandang balita para sa mga kababayan nating nasa ibang bansa  sa inihayag ng pamunuan ng Bureau of Customs (BOC) na kung saan maaari nang mamonitor ang mga ipinapadalang Balikbayan Boxes sa bansa.

Ang kanilang Bureau of Customs Parcel Tracking System ay madali na nilang mati-trace kung nasaan na ang kanilang mga ipinapadalang parcel sa bansa.

Ayon kay Customs Assistant Commissioner, Atty. Vincent Maronilla, inihahanda na rin nila ang kanilang system lalo’t malapit na ang Christmas season dahil siguradong dadagsain sila ng balikbayan boxes.

Kumpiyansa naman si Maronilla na magi­ging maayos ang kanilang system hindi katulad nang nangyari noong 2014 nang unang ini­lunsad ito na kung saan nagkaroon ng technical problem sa kanilang mga tracking system.

Well, talaga namang nabibilib si Atty. Maronilla dahil sa kanilang pagsisikap na maging maayos ang pag-manage ng kanilang mga tauhan sa balikbayan boxes ng ating mga mahal na kababayan sa iba’t ibang sulok ng bansa.

Sana lang talagang maging maayos at walang maging aberya sa systems, gayundin sana sa kanilang shipment and delivery. Ito’y lalo’t alam naman natin na kung minsan may ­ilang mga tauhan ng BOC ang mga nananamantala at pinag-iinteresan ang ­ilang balikbayan boxes na kung saan matapos itong buksan para check-apin ay may mga nawawalang gamit dito.

At kung sakaling ganu’n pa rin ang siste, ay kawawa naman ang ating mga kababayan at lalung-lalo na ang magigiting na overseas Filipino workers na nagpapakahirap na magtrabaho sa ibang bansa para lang may maipadala sa kanilang mga mahal sa buhay sa Pilipinas.

Kaya naman sa pamunuan ng BOC, tama lamang na mabigyan din ng pansin ang problema d’yan sa balikbayan boxes na matagal nang may isyu ng nakawan o delay ng shipment. Sa ganyang paraan, gamit ang ang inyong BOC tracking system, ay magiging maagap ang mga kababayan natin sa pag-claim sa kani-kanilang mga bagahe.

oOo

Ugaliing subaybayan ang aking araw-araw na programa sa aking (Facebook Live) sa Latigo News TV at YouTube channel Latigo online Nationwide news TV. (Hagupit ni Batuigas / MARIO B.  BATUIGAS)

Please follow and like us:
Read More

MGA OPISYAL NG DOTr, HANDANG IBIGAY ANG KANILANG 14TH MONTH PAY

HAGUPIT NI BATUIGAS

SALUDO tayo kay Department of Transportation Secretary Art Tugade at sa kanyang mga tauhan dahil nakahanda silang ibigay ang kanilang 14th month pay sa mga kababayan nating nasalanta ng lindol sa Mindanao.

Ayon kay Secretary Tugade, napagkasunduan nilang ibigay ang kanilang 14th month pay para sa mga nasalanta ng lindol. Kabilang pa sa mga magdu-donate ay ang kaniyang management team na binubuo ng lahat ng undersecreta­ries, assistant secreta­ries at mga pinuno ng attached agencies.

Katunayan ng kanilang pagkakaisa ay umabot na umano sa P1.2 milyon ang kanilang nalikom dahil sa nasabing pledge.

Napakagandang initiative ang ginawa ni Secretary Tugade na ibigay ang kanilang 14th month pay sa mga kababayan nating nasalanta ng lindol sa Mindanao.

Sana lahat ng mga opisyal ng gobyerno ay gayahin ang ginawa ni Tugade dahil malaking tulong ito sa kanilang mga pangangailangan.

Maging ang tatlong airline companies na Cebu Pacific, Philippine Airlines at Air Asia ay nagpahayag ng kanilang kahandaan na ipagamit ang kanilang mga eroplano para sa paghahatid ng relief goods sa mga nasalanta ng lindol.

Sa totoo lamang, ma­raming NGOs ang nakibahagi sa pagtulong sa ating mga kababayan kung saan nag-donate rin ang mga ito ng relief goods, patunay lamang na ang mga Filipino ay may mga ginintuang puso. ‘Ika nga, likas sa mga Pinoy ang pagiging matulungin.

Tingnan mo naman si Senador Manny Pacquiao, tumutulong sa mga mahihirap, namimigay siya ng mga pabahay, bukod pa sa cash na kanyang ibinibigay sa mga mahihirap.

Ang sabi nga ng senador, mas mainam ang nakatutulong sa mga kap­wa Filipino, isini-share lamang niya ang kanyang blessings na ipinagkaloob ng Panginoong Diyos, dahil batid ni Pacquiao kung paano ang maging isang mahirap.

Kaya kayong mga mayayamang senador, tularan ninyo si Pacquiao, mamahagi rin kayo ng inyong mga kayamanan at mga kinita sa pork barrel. Period! (Hagupit ni Batuigas / MARIO B.  BATUIGAS)

Please follow and like us:
Read More

GOVERNOR DANIEL FERNANDO, HINDI MAAWAT SA PAGBIBIGAY-SERBISYO SA MGA BULAKENYO!

HAGUPIT NI BATUIGAS

GAYA ng kanyang ipinangako na ilalapit ang Kapitolyo sa mga mahihirap na Bulakenyo ay pinanindigan at tinupad ni Bulacan Governor Daniel R. Fernando ang kanyang pangako na hindi na mahihirapan pang pumila, pumunta sa kanyang bahay at sa kanyang tanggapan ang mga tao dahil siya na mismo ang lalapit sa mga ito para magbigay ng tulong medikal at pinansiyal sa kanyang mahal na kababayan.

Sunud-sunod ang isinasagawang medical mission ng Damayang Filipino Foundation Inc. sa pakikipag-ugnayan ng pamahalaang panlalawigan ng Bulacan upang masiguro na nabibigyan ng tulong-medikal at pinansiyal ang mga lumalapit sa tanggapan ng gobernador.

Mismong ang go­bernador ang bumababa sa mga barangay sa buong lalawigan ng Bulacan para makausap nang personal ang mga taong humihingi ng kanyang tulong kaya nalalaman ng punong lalawigan ang hinaing at pangangailangan ng kanyang mga kababa­yan.

Batid ng gobernador ang kahirapan at pangangailangan ng kanyang mga kalalawigan kaya siya na mismo ang bumababa para hindi na mahirapan ang mga tao na pumunta sa kanyang bahay at sa Kapitolyo dahil namamasahe pa ang mga ito.

Halos lahat ng mga taong nagmamahal sa gobernador ay bolunta­­ryong nagtatrabaho para lamang samahan ang gobernador sa kanyang pagserbiyo sa mga tao at katuwang din niya sina Atty. Jayric Amil, Chief of Staff,  Ma’am Millagros D. Dimaano, Executive Assistant IV, Carlos Salazar, Chairman of Governors Daniel Fernando Supporters, Willy Santiago, Chairman Damayang Filipino Movement Inc. at ang kanyang kapatid na si Ma’am Athenie F. Bautista.

Sana lahat ng mga lingkod-bayan lalo na ang mga halal ng taumbayan na magtrabaho at ibigay ang nararapat sa mga tao. Marami kasi riyang mga politiko na sa una lamang maga­ling makisama, pero kapag nakuha na nila ang gusto sa mga botante, dedma na sa kanila ang mga taong nagluklok sa kanila sa kapangyarihan.

Marami nga riyan, kakilala mo na at kaibigan pero kapag naupo na sa puwesto, umiiwas na sa mga taong dati nilang nakasama, iyun bang parang may ketong na ayaw mahawahan ng kanyang mga dating kasama at kaibigan.

Sa mga Bulakenyo… Salamat sa inyong pagtitiwala sa inyong gobernador dahil talagang hindi kayo pababayaan at patuloy siyang magbibigay serbisyo sa kanyang mga minamahal na kababayang Bula­kenyo. Mabuhay ang lalawigan ng Bulacan! (Hagupit ni Batuigas /  MARIO B.  BATUIGAS)

Please follow and like us:
Read More

OBESE NA MGA PULIS DAPAT MAG-DIET!

HAGUPIT NI BATUIGAS

Noong panahon ni dating PNP chief Director General at ngayon ay Senador Panfilo “Ping” Lacson ipinag-utos nito sa lahat ng mga tauhan ng pulisya na sumailalim sa training para maging maliksi, malusog at epektibo sa pagpapatupad ng batas.

Napag-aralan nang husto noon ni Lacson na marami sa mga pulis ang hindi na halos makapagtrabaho dahil sa sobrang katabaan at hindi makahabol sa mga kriminal sa oras ng may responde kaya ni-require nito ang 40 inches waistline sa lahat ng mga pulis.

Maraming mga pulis na matataba noon ang nahirapan na mag-diet dahil sadyang obese sila kaya may isang dating QCPD district director noon ang inatake sa kasagsagan ng training hanggang sa bawian ito ng buhay.

Sa panahon nina dating PNP chief Oscar Albayalde, OIC Lt. Gen. Archie Gamboa, maraming mga miyembro ng pulisya kabilang ang mga opisyal ang matataba gaya na lamang ni bagong talagang National Capital Region Police Office (NCRPO) chief PBrigGen Debold Sinas na mataba kaya kailangan niyang mag-diet.

Palaging pinaaalala ng PNP health service na kailangang sumailalim sa walong linggong weight loss program ang lahat ng 190,000 miyembro ng pulisya.

Marami nga ang nagsasabi na dapat din siyang magbawas ng timbang para na rin magampanan nang husto ang tungkulin. Baka kung tuluyang tumaba ka nang husto, sir, ay hindi mo magampanan ang iyong trabaho bilang regional director ng NCRPO?

Sa ibang talakayan, ang opisina ng NCRPO Press Corps ay matagal nang ginagamit ng mga media at nagagamit naman ng kapulisan ang media para maipabatid sa taumbayan ang kaganapan sa Metro Manila. Pero simula nang maging OIC ka ng NCRPO, sir, ay naiba na. Totoo ba na pinaalis mo ang mga media dahil gagamitin mo raw ito bilang extension office mo?

Napakahalaga ng media sa mga trabaho ng PNP. Ang mga mamamahayag ang palaging nagbibigay ng balita sa taumbayan para malaman ang mga accomplishment ng mga pulis. Pero sa sitwasyon ngayon General Sinas, sir, ayaw mo bang may media sa iyong paligid? Sana naman ay mapag-isipan mong maigi na mali ang naging desisyon mo na bawiin ang press office ng media na nakabase sa Camp Karingal. Abangan! (Hagupit ni Batuigas /  MARIO B.  BATUIGAS)

Please follow and like us:
Read More

‘ROSEBEE’ NAGLATAG NG GAMBLING EMPIRE SA KAHARIAN NI MAYOR CARMELO LAZATIN, JR.?

HAGUPIT NI BATUIGAS

MATINDI ang direktiba nina Officer-In-Charge Philippine National Police Chief Lt. General Archie Gamboa at National Capital Region Police Office director Brig. Gen.  Director Debold Sinas sa lahat ng mga tauhan ng pulisya na paigtingin ang kampanya laban sa illegal gambling operation sa buong bansa.

Sa direktiba ni General Sinas, kanyang sisibakin sa puwesto ang sinumang pulis na mahuhuling nagtutungo sa mga night club at nagbibigay ng proteksiyon sa mga ilegal na pasugalan.

Ibig ni Sinas na malinis ang imahe ng mga pulis sa Metro Manila kaya parurusahan niya ang mga pulis na lalabag sa kanyang kautusan. Ang sinumang alagad ng batas na susuway sa kanyang kautusan ay tatanggalin sa puwesto.

Kasabay nito, may pagpapatigil din sa lahat ng uri ng ilegal na pasugalan sa buong bansa at paiigtingin ang kampanya laban sa illegal drugs. Para hindi na maulit pa ang isyu sa ninja cops. Pero teka, mukhang hindi pinakikinggan si Gamboa ng kanyang mga tauhan dahil patuloy pa rin ang illegal gambling sa lalawigan ng Pampanga, Bataan, Tarlac, Pangasinan at La Union kung saan sa lungsod ng Angeles City ay may isang alyas Rosebee na naglatag ng kanyang gambling empire sa teritoryo ni Mayor Carmelo Lazatin, Jr.

Matatagpuan ang peryahan o carnaval ni Rosebee sa Barangay Balibago, Barangay Cutod at Marque Mall malapit sa City Hall.

Hindi masama ang peryahan dahil nagbibigay ito ng kasiyahan sa mga tao, subali’t kapag hinaluan mo ng ilegal na pasugalan ay hindi na maganda. Mantakin mo, pagpasok mo sa loob ng peryahan na pawang carnaval, tatambad sa iyo ang halos 20 lamesa na pawang may mga color game, drop ball at pula-puti na pawang mga menor de edad ang mga tumataya sa naturang ile­gal na pasugalan.

Ang siste, bakit tila hinahayaan ng awtoridad na mamayagpag ang ilegal na pasugalan sa loob ng mga peryahan na malinaw na labag sa batas?

Hindi na nga tuloy nakapagsasagawa ng mga drug operation ang mga pulis sa Angeles City dahil nakatuon ang kanilang atensiyon sa pagbabantay sa peryahan na sinasabing milyones.

Sintido kumon, kung talagang walang basbas ng mga nakaupo, ang mga peryahan o carnaval na may pasugalan ay hindi makakapag-opereyt, hindi ba?

Sa mga nakaupo, sana naman ipasara na ninyo ang mga pasugalan sa Angeles City at huwag na ninyong hintayin na sibakin kayo ni General Archie Gamboa.

Bukas ang kolum na ito para sa inyong mga panig. Abangan, may karugtong! (Hagupit ni Batuigas / MARIO B.  BATUIGAS)

Please follow and like us:
Read More

TAMBALANG GOB. DANIEL FERNANDO AT VG WILHELMINO SY-ALVARADO, HINDI MATITINAG!

HAGUPIT NI BATUIGAS

Marami ang nag-iintriga sa magkapartner at magkasanggang-dikit na sina Bulacan Governor Daniel Fernando at Vice Governor Wilhelmino Sy-Alvarado na maghihiwalay daw ang dalawa, kesyo maglalaban daw ang mga ito sa mga hinaharap na panahon.

Makailang beses nang ipinaliwanag ni Fernando na maganda ang kanilang samahan ng kanyang partner na si Alvarado at wala sa kanilang bukabularyo na sila ay mag-aaway at maghihiwalay.

Pinabulaanan din ni Fernando ang mga intriga na si Alvarado umano ang nagpapatakbo ng Kapitolyo. “Uulitin ko, maayos ang aming pag-uusap ni Willy, nagkakasundo kami at nag-uusap kami para sa ikagaganda ng pamahalaang panlalawigan ng Bulacan. Ako ang nagpapatakbo ng kapitolyo” pahayag ni Fernando.

Sa kasalukuyan ay parehong abala sina Fernando at Alvarado sa kanilang mga trabaho lalo na ang pagtutok sa African Swine Fever na nanalasa sa lalawigan ng Bulacan. Kamakailan lamang ay galing si Fernando sa China para makipag Sister City sa isang lalawigan  dito na siyang magpo-produce ng P50 bilyon Mega Project sa lalawigan ng Bulacan.

oOo

P74-M SPORTS COMPLEX ITATAYO SA MECAUAYAN CITY

Nagkaroon ng ground breaking ceremony at capsule laying ang pamahalaang lungsod ng Meycauayan para bigyan daan ang matagal nang pangarap ng mga taga lungsod dahil itatayo na rin ang Meycauayan Sports Complex.

Ang planong pagpapatayo nito na nagkakahalaga ng P74 milyon ay ipinangako noon ni dating Mayor at ngayon ay 4th District Cong-ressman Atty. Henry Villa-rica para may magamit ang kanilang mga kababayan.

Sinabi ni Mayora Linnabell Ruth R. Villarica, na ito na ang katuparan sa ipinangako ng kanyang asawang si Villarica ang maitayo ang sports complex na may lawak na land area na 7,000 square meters na kauna-unahan sa lalawigan ng Bulacan.  Ito ay may world-class standard amenities tulad ng track and field oval, with sports rubber flooring, basketball, badminton, and tennis court, eco-tourism parks, evacuation center at mga opisina na may tulay na tatawid sa lagoon at inaasahang matatapos sa 2021.

Ang nasabing ground-breaking ay sinaksihan ng mga iba pang opisyal ng lungsod na kinabibilangan nina Vice Mayor Josefina Violago, Councilor Catherine Abacan, Jeremico Dulala, Mario Aguirre, Mary Christine Paguio, Arnaldo Velesco, Mario Berboso, Dhon M. Banes, Atty. Larrisa Abracero, Wilfredo Macatulad, Anna Kathrina Hernandez, barangay officials at department heads. (Hagupit ni Batuigas / MARIO B.  BATUIGAS)

Please follow and like us:
Read More

PANDI HOG RAISERS, UMAPELA NG TULONG; MAYOR RICO ROQUE, NAMUMULITIKA?

HAGUPIT NI BATUIGAS

Lubhang apektado na umano ang mga nego­syante ng baboy sa ilang bayan sa lalawigan ng Bulacan dahil sa pagkalat ng African Swine Fever (ASF) partikular sa bayan ng Pandi kung saan nanawagan ang mga ito ng suporta sa pamahalaang lokal subalit tila hindi sila pinapansin ng kanilang alkalde.

Ayon sa grupo ng Livestock Raisers of Pandi, tulungan silang makabangon dahil lubha na silang naapektuhan ng ASF makaraang sunud-sunod na tamaaan ng virus ang mga alagang baboy.

Kinumpirma naman ni Mayor Rico Roque na may isang farm sa Brgy. Baka-Bakahan ang tinamaan ng ASF at sinasabing maliit lamang umano ang bilang ng mga alagang baboy ang tinamaan ng virus.

Sa reklamo naman ng may-ari ng Corpuz Farm na si Mae Gonzales, mahigit umano sa isang libong baboy ang pinatay sa kanyang farm ng pamahalaang bayan ng Pandi kaya malaking dagok ito sa kanyang negosyo.

Sinabi ng negosyante na “pinag-iinitan umano siya ng alkalde dahil magkalaban ang mga ito sa politika kaya maging ang kanyang negosyo ay nadadamay sa galit ng alkalde”. Samantala, pinabulaanan naman ito ng alkalde.

Sinabi ng mga hog raiser, na umaapela sila sa alkalde na sana ay maibalik ang “Free trading” sa mga selected slaughterhouse sa lalawigan at maging sa iba pang lugar.

Sa larangan ng politika, dapat kapag natapos na ang halalan ay kalimutan na ang hidwaan at alisin ang pamumulitika o’ paghihiganti. Ika nga, move on na tayo.

Dapat ipakita ng alkalde ang kanyang katapatan sa tungkulin at asikasuhin ang kanyang bayan na matagal nang napag-iiwanan.

Sinikap din natin na makuha ang panig ng alkalde patungkol sa reklamo ni Mrs. Gonzales, subalit hindi tayo mapagbigyan na mainterbyu at hindi rin sinasagot ang aking mga text message.

Paano nga naman natin maririnig ang side ng alkalde kung nagtatago ito o namimili ng kanyang mga dapat kausapin?

oOo

Ugaliing panoorin at subaybayan araw-araw sa Facebook Live ang programang Latigo ni Batuigas sa Latigo News TV at paki-subscribe ang aming Youtube channel na Latigo Online Nationwide News TV. (Hagupit ni Batuigas / MARIO B.  BATUIGAS)

Please follow and like us:
Read More