PAGLABAG SA DEMOKRATIKONG KARAPATAN ANG EPEKTO NG PAGPAPANUMBALIK NG ANTI-SUBVERSION LAW

KAKAMPI MO ANG BAYAN TEDDY

Parang throwback sa diktaduryang Marcos ang pinapanukalang panunumbalik ng Anti-Subversion Law.

Ang Anti-Subversion Law ay dating isinabatas upang tugisin ang Hukbalahap o ang Hukbong Laban sa Hapon, na pawang mga komunistang gerilya na lumaban sa mga mananakop. Habang ang layunin ng Hukbalahap ay palayain ang Pilipinas sa dayuhang pananakop at kolonya­lismo, tinugis sila ng pamahalaan.

Ito ang anti-demokratikong batas na nais ibalik ni DILG Secretary Eduardo Año upang pigilan umano ang pag-anib ng mga kabataan at mamamayan sa Communist Party of the Philippines at sa New People’s Army.

Una na itong tinanggal noong 1992 ni dating Presidente Fidel V. Ramos. Maraming senador at mambabatas din ang tutol dito dahil ito ay lumalabag sa demokratikong karapatan ng mamamayan na ginagarantiya ng Saligang Batas, kabilang na ang karapatan na sumapi sa mga organisasyon, magsagawa ng mga pagtitipon, bumuo ng mga organisas­yon at unyon, manawagan sa gobyerno ng mga hinaing, malayang pamamahayag, at iba pang karapatan.

Ano ang magiging epekto kung ibabalik ito? Mas malalang mga patayan, karahasan, pagsampa ng mga gawa-gawang kaso at mapupuno ang mga kulungan ng mga inosenteng mamamayan. Lalo na ngayon na nalalantad na ang kabulukan at kapalpakan ng administrasyong Duterte. Dahil namumulat na ang mga tao, gusto pa nilang patindihin ang pag-atake at patahimikin ang mga kritiko nito.

Dapat ay kagyat at mariing tutulan ito ng mamamayan kundi ay mahihirapan na tayong maibalik muli ang mga naipanalo nating mga demokratikong karapatan laban sa mananakop, at mapanupil na gobyerno.

Ang totoong tatapos sa pag-aaklas ay ang pagtugon sa mga hinaing ng mamamayan. Lupa para sa mga magsasaka, trabaho at nakabubuhay na sahod para sa mga manggagawa, industriyalisasyon ng bansa at mo­dernisasyon ng agrikultura, libreng edukasyon sa mga kabataan, makabayang kultura, at iba pang demokratikong kahingian ang tatapos sa digmaang sibil na nagaganap sa ating bayan. (Kakampi Mo ang Bayan /  TEDDY CASIÑO)

Please follow and like us:
Read More

KATUTUBO

KAKAMPI MO ANG BAYAN TEDDY

Agosto 8 ang International Day of the World’s Indigenous Peoples, kung saan ginugunita ang mga pakikibaka ng mga katutubo sa buong mundo.

Para sa lumad leader at Bayan Muna Party-list Rep. Eufemia Cullamat, ang pagtatapos ng Martial Law sa Mindanao, na nagpapahirap sa mga lumad sa buong Mindanao.

Ang mga lumad at mamamayang Moro ang mga direktang biktima ng militarisasyon at pang-aagaw sa lupang ninuno, ani Rep. Cullamat. Nakababahala ang napakaraming kaso ng paglabag sa karapatang pantao, na umabot na sa 800,000. Kabilang na rito ang 93 na ilegal na pag-aresto at pagpatay sa mga lider-lumad. Kasama rin dito ang pagpapasara ng Department of Education, sa udyok ng militar, sa 55 lumad schools ng Salugpungan.

Resulta ang malawakang pangangamkam ng lupang ninuno sa buong Pilipinas mula sa Build, Build, Build Program na itinutulak ng administras­yong Duterte. Sa Luzon, nariyan ang P12.2 bilyon Kaliwa Dam project sa Rizal na lulunod sa mga lupang ninuno ng mga Dumagat, Agta, at Remontado. Sa Gitnang Luzon naman, ang Clark Green City ang wawasak at kakamkam sa 9,000 hectares na lupa ng mga katutubong Ayta.

Ang lahat ng mga proyektong ito ay ginagawa sa kabila ng kawalan ng totoong Free Prior and Informed Consent ng mga katutubo na nakasaad sa IPRA. Kaya naman, nananatiling inutil ang batas upang protektahan ang karapatan ng mga katutubo sa lupang ninuno at sa sari­ling pagpapasya.

Ang pinakahuling atake sa hanay ng mga katutubo at tagapagtanggol sa mga karapatan nila ay ang pamamaril kay Brandon Lee, isang human rights worker sa Ifugao. Binaril siya noong August 6 sa harapan ng kanilang bahay. Hanggang sa kasalukuyan ay lumalaban pa para sa kanyang buhay si Brandon, habang ang mga katutubo at mamamayan ay nananawagan ng hustisya para sa kanya. (Kakampi Mo ang Bayan /  TEDDY CASIÑO)

Please follow and like us:
Read More

MULING NAGHAIN ANG MAKABAYAN NG TUNAY NA ANTI-ENDO BILL

KAKAMPI MO ANG BAYAN TEDDY

Sa kabila ng pag-veto ni Pangulong Rodrigo Duterte sa Anti-Endo Bill kamakailan, hindi nagpapagapi ang mga manggagawa at ang kanilang mga kinatawan sa Makabayang Koali­syon ng Mamamayan na maghangad ng tunay na batas na magtitiyak ng kaseguruhan sa paggawa.

Sa pangunguna ni Bayan Muna Party-list Representative Ferdie Gaite, inihain ang House Bill 3381 noong Lunes, ika-5 ng Agosto. Aniya, habang pinoprotektahan ni Pangulong Duterte ang kaseguruhan ng kapital, lumalaban ang Bayan Muna at ang Makabayan para sa kaseguruhan ng mga manggagawa sa paggawa. Laman ng panukalang batas ang pagbabawal sa labor-only contracting na hanggang sa kasalukuyan ay gawi ng mga kapita­lista upang makakamal ng pinakamalaking tubo sa pamamagitan ng pambabarat sa mga manggagawa.

Ayon sa datos na inilabas ng think-tank na Ibon Foundation, may 8.5 mil­yong manggagawang hindi regular sa mga pribadong kompanya, at 800,000 naman sa mga ahensya ng gobyerno. Ang construction, real estate, at manufactu­ring ang mga sektor na may pinakamalalaking bilang ng mga manggagawang kontraktwal.

Sabi ni Pangulong Duterte sa kanyang veto message, naghahanap umano siya ng “healthy balance” sa pagitan ng interes ng mga manggagawa at sa mga kapitalista. Tila manhid na siya sa mga hinaing ng mga manggagawa. Ang mga kontraktwal na manggagawa ay wala o katiting ang mga benepisyo, walang SSS o insu­rance, walang karapatan sa pag-uunyon, walang tsansa na ma-promote, may mas mataas na buwis, at target sa diskriminasyon dahil sa mas mababang status sa lugar ng paggawa.

Napakalaking disbalanse nito laban sa mga manggagawa, na dapat lamang na tugunan ng administrasyon Duterte, tulad ng kanyang pangako na tatapusin niya ang kontrak­twalisasyon sa loob ng isang linggo.

Hamon para sa kilusang paggawa at sa kanilang mga kinatawan sa loob ng Kongreso na ipagpatuloy ang laban upang wakasan ang Endo, lalo sa loob ng gobyernong taksil at mapanlinlang sa mga manggagawa. (Kakampi Mo ang Bayan / TEDDY CASIÑO)

Please follow and like us:
Read More

STATE SPONSORED ANG MGA PATAYAN SA NEGROS

KAKAMPI MO ANG BAYAN TEDDY

Pinaparatangan ang mga taong nagsasabing ang gobyerno at ang militar ang salarin sa patayan sa Negros na mga supporter ng mga rebolusyonaryong grupo. Ngunit, pulis at militar ang tinuturong salarin ng mismong mga saksi at pamilya ng mga biktima.

Matagal nang tinutuligsa ng human rights defenders sa isla ng Negros ang red-tagging sa kanilang hanay. Bago sila patayin, marami sa mga pinaslang ay pinagbintangan na mi­yembro o lider ng Communist Party of the Philippines, National Democratic Front of the Philippines at ng New People’s Army (CPP-NDF-NPA). May posters na kumalat na may mga mukha nila, may mga direktang pagbabanta sa kanilang buhay, at isinailalim sa surveillance.

Ginawa ang mga pagpatay sa diumano’y police operations, kung saan pinapasok ang bahay ng mga biktima, papatayin, at sinabing ‘nanlaban’. Ganito ang ginawa sa 14 magsasaka sa Canlaon, Negros Occidental, tulad na tulad ng ginagawa sa libu-libong pinaslang na drug suspects.

Ang isa sa pinakahu­ling pinaslang ay si Atty. Anthony Trinidad. Matapos siyang paratangan na supporter ng CPP-NPA, tinambangan si Atty. Trinidad habang siya ang nagmamaneho. Kilala siya bilang matulungin na abogado na nagbibigay ng libreng serbisyong legal sa mga mahihirap. Ito ba ang tipong mga tao na tinutu­ring na kaaway ng go­byerno?

Walang malinaw at kapani-paniwalang imbestigasyon ang ginawa ng PNP sa mga madugong patayan sa Negros, na umabot na sa higit 66. Imbes na magkaroon ng operas­yon upang mahuli ang mga gumagawa nito, madali lang nilang sabihin na NPA ang gumawa ng mga pagpatay. Hindi katanggap-tanggap para sa pamilya at mga kaibigan ng mga biktima ang kawalan ng masusing imbestigasyon at hustisya sa pagpaslang.

Mariin ding tinutuligsa ng Bayan Muna ang posibilidad ng pagpataw ng Martial Law sa isla ng Negros. Lalo lang nitong palalalain ang sitwasyon ng karapatang pantao sa isla kung bibigyan pa ng mas malaking kapangyarihan ang mga pulis at militar, tulad ng ginagawa nila sa Mindanao. (Kakampi Mo ang Bayan / TEDDY CASIÑO)

Please follow and like us:
Read More

ILEGAL AT ‘DI MAKATARUNGAN ANG PAGSASARA SA PCSO

KAKAMPI MO ANG BAYAN TEDDY

Korapsyon ng appointees ni Presidente Rodrigo Duterte ang dahilan kung bakit biglang inutos niya ang pagpapasara ng operasyon ng Philippine Cha­rity Sweepstakes Office. Imbes na parusahan ang mga tinalaga niyang opisyal ay naapektuhan pa ang maraming mamamayan, kabilang ang mga pasyenteng umaasa sa mga medikal na tulong na ibinibigay ng PCSO. Hindi ba’t hindi ito makatarungan?

Ang malaking tanong ay kung anu-anong mga ano­malya ang tinutukoy ni Pangulong Duterte na dahilan sa kanyang pag-uutos na ipasara ito. Mula pa 2011 ay itinutulak na ng Bayan Muna ang mga imbestigasyon hinggil sa mga iregularidad sa ahensya, ngunit hanggang sa kasalukuyan ay hindi pa rin ito binibigyan ng sapat na pansin ng Kamara de Representante.

Noong nakaraang taon ay naghain ang Bayan Muna ng House Resolution 1599 upang imbestigahan ang mga sumusunod:

  1. Ang P9.8 milyon pondo ng ahensya na ginastos para sa Christmas Party ng PCSO sa EDSA Shangri-la Hotel noong Disyembre 19, 2017. Napakamagarbong selebras­yon ang ginawa nila sa kabila ng kanilang mandato na tumulong sa mahihirap.
  2. Binigyan lamang ng P2 bilyon ang charity fund ng PCSO mula sa Small Town Lottery o STL, sa kabila ng P18 bilyon na kinita nito.
  3. Nasa 15-20% lamang ng kinikita ng STL operators ang kanilang idinideklara, at ang 80% pa nito ay ibinaba­yad sa mga matataas na opisyal ng PCSO.
  4. Ang mga empleyado ng ahensya ay mga anak ng mga opisyales.

Inatras na ng Malacañang ang kanilang pagpapasara sa PCSO, ngunit hindi pa nila nareresolba ang mga u­saping ito. Ang pinakamahirap na ating mga kababayan pa rin ang pinakaapektado sa pagpapatigil ng operasyon ng ahensya. Kaya naman naghain muli ng panukalang resolusyon ang Bayan Muna, ang House Resolution 153 upang imbestigahan ang isyung ito.

Sana ay totoong pagtigil ng korapsyon ang dahilan ng pahayag ng pangulo, at hindi lamang ito pabalat-bunga upang papasukin ang interes ng pasugalan ng China. (Kakampi Mo ang Bayan / TEDDY CASIÑO)

Please follow and like us:
Read More

TINALIKURAN NA NI DUTERTE ANG PANGAKONG WAWAKASAN ANG ENDO

KAKAMPI MO ANG BAYAN TEDDY

Tuluyan nang binigo ni Pangulong Rodrigo Duterte ang manggagawang Filipino sa pag-veto niya ng Security of Tenure Bill, isa sa mga malaking pangako niya nang siya ay tumakbong pangulo noong 2016.

Malubhang pinalabnaw na nga ang bersyon na umabot sa kanyang mesa. Sa orihinal na panukalang batas na inihain ng Makabayan bloc, isinulat natin ang pagnanais ng mga manggagawa na tuluyang pagtanggal ng kontraktwalisasyon. Sa mga pagdinig na ginawa sa loob ng Kongreso at Senado, unti-unti nang tinanggal ang mga probisyon na hindi kanais-nais sa mga kapitalista. Sa kabila nito, hindi pa rin pinirmahan ni Duterte ang Security of Tenure Bill o SOT.

Bumaligtad na ang dating matigas na posisyon ni Pangulong Duterte noong kampanya niya na tatapusin niya ang Endo. Sa sulat na pinadala ni Pangulong Duterte na nagpapaliwanag sa kanyang posisyon sa Security of Tenure, sinabi niya na “necessary” o kinakailangan ang labor o job contracting. Sabi pa niya, kailangan na ang mga negosyo ay makapagsasabi kung nais nilang gawing kontraktwal ang kanilang mga manggagawa.

Ito ang pinakabuod ng kontraktwalisasyon sa Pilipinas, na ang mga negosyante mismo ang nakakapagdikta ng mga relasyon sa produksyon. Natural na pipiliin nila ang iskemang lubhang pagkakakitaan nila habang patuloy na pinagsasamantalahan at binabarat ang lakas paggawa ng mga manggagawa.

Kahit sa bersyon ng SOT na inihain sa pangulo ay hindi na nito niresolba ang isyu ng kontraktwalisasyon. Ngunit, kahit ang huwad na pakinabang ng manggagawa sa pinalabnaw na panukalang batas ay hindi pa kinayang igawad ng pangulo. Ang malinaw sa ginawa niyang ito ay ang tunay niyang pinagsisilbihan ay ang mga kapitalista at hindi ang mga manggagawa at iba pang naghihirap nang mamamayan. Kaya naman, tuloy ang ating pakikibaka sa sapat na sahod, ligtas na lugar paggawa, regularisasyon, at iba pang karapatan ng manggagawa. (Kakampi Mo ang Bayan / TEDDY CASIÑO)

Please follow and like us:
Read More

PURO PALUSOT, WALANG SOLUSYON ANG SONA 2019

KAKAMPI MO ANG BAYAN TEDDY

Nagdaan na naman ang State of the Nation Address ni Pangulong Duterte nito lamang Lunes, July 22. Ngunit, nasagot ba ng mahabang paha­yag ng pangulo ang mga isyu na bumubulabog sa taumbayan?

Unang-una na usapin pa rin ang laganap na kahirapan. Malaki ang bilang ng walang trabahong regular. Kung may trabaho man, kulang ang sahod ng manggagawa para makaagapay sa nagtataasang bayarin at presyo ng bilihin.

Wala ring sinabi ang pangulo sa lumalalang mga paglabag sa karapatang pantao, tulad ng mga pagpatay kaugnay ng madugong kampanya laban sa droga, na umani ng batikos hindi lamang sa Pilipinas kundi sa buong mundo. Wala rin itong binanggit sa mga pagpatay sa mga magsasaka, manggagawa, katutubo, mga abogado, at iba pang mamamayan sa ngalan ng kanilang prog­rama laban sa kanyang mga kritiko.

Wala ring binanggit kung paano igigiit ng mamamayang Filipino ang soberanya nito laban sa mapanghimasok at mapanirang galaw ng China sa ating mga katubigan, gayundin sa mga pinasok nitong mga kasunduan at kontrata sa China. Hindi naibsan ang pangamba ng mamamayan na unti-unting pagsakop ng China sa a­ting mga teritoryo, likas na yaman, at ekonomiya.

Tuluy-tuloy lang sa pagpapaikot sa mamamayan ang mahabang talumpati ng pangulo. Ngunit ang malinaw, papalala ang lagay ng mamamayang Filipino. Sa labas ng Batasang Pambansa ay nasa 50,000 mamamayan ang nagmartsa upang ipakita ang kanilang diskontento at galit sa walang tigil na patayan, papalalang kahirapan, at ang matinding galit ng mamamayan sa pagpapakatuta ni Presidente Duterte sa China.

Galit ang mamamayan na sa kabila ng pambubu­sabos sa 22 mangingisda na binangga ng bangkang Tsino sa Recto Bank, ay walang ginawang aksyon ang gobyerno upang singilin ang mga may-sala.

Sa halip, tinatakot ni Pangulong Duterte ang mga Filipino na mauuwi sa giyera ang anumang paggiit natin sa ating teritoryo at karapatan. Ngunit ang totoo, duwag at tali lang ang kamay ng gobyernong Duterte laban sa China. (Kakampi Mo ang Bayan / TEDDY CASIÑO)

Please follow and like us:
Read More

SA SONA, MAKINIG TAYO SA MAMAMAYAN!

KAKAMPI MO ANG BAYAN TEDDY

Sumapit na naman ang araw ng State of the Nation Address o SONA ng pangulo, kung saan siya ay mag-uulat ng kalagayan ng sambayanan at kung anu-ano ang mga nagawa ng kanyang administrasyon.

Ngunit, para sa Bayan Muna, dapat makinig ang pangulo sa mamamayan para malaman ang tunay na SONA.

Una, ang pangako niyang pagtatapos sa Endo o sa kontraktwalisasyon, na hanggang sa kasalukuyan ay pahirap pa rin sa mga manggagawa. Buhay na buhay pa rin ang kawalan ng kaseguruhan sa paggawa sa pribado man na kompanya o sa loob mismo ng mga opisina ng gobyerno. Pangakong napako pa rin ang pagpapataas ng sahod sa mga ordinaryong manggagawa at kawani ng pamahalaan. Tanging ang mga paboritong pulis at militar lamang ang nakatamasa ng malalaking pagtaas ng sahod at benepisyo.

Hindi rin umakyat ang kalagayan ng pamumuhay. Katunayan, ayon sa ulat ng Pulse Asia, ang sahod, presyo ng bilihin, at ang trabaho ang inaabangan ng mga tao na iulat ng pangulo sa SONA. Ibig sabihin, ito ang mga tunay na suliranin ng taumbayan na kailangang solusyonan ng gobyerno.

Malinaw na ang mga isyung malapit sa sikmura ang gustong marinig at masolusyunan ng mamamayan sa SONA at hindi ang ChaCha o ang mga negosyong nagpapakita ng pagpapakatuta sa China.

Malinaw din na ang pagtaas ng minimum wage, pagwawakas sa Endo o kontraktwalisasyon, at pagpapababa sa presyo ng bilihin ang gustong marinig ng karamihan dahil naghihirap ang sambayanan at ‘di pa rin tinutupad ni Pangulong Duterte ang kanyang mga pangako.

Nagpakita ng sama-samang lakas ang mamamayang Filipino sa protesta sa SONA. Ito ay simbolo ng kawalan ng tunay na solusyon sa mga suliranin ng bayan at ang papalalang sitwasyon ng mamamayan. Ayaw ng mamamayan ang patayan, Martial Law, dagdag buwis, dagdag presyo, at iba pang pahirap na patakaran. Ayaw ng mamamayan sa pagbenta ng soberanya sa China at iba pang malalaking bansa. Ito ang dapat marinig sa SONA! (Kakampi Mo ang Bayan / TEDDY CASIÑO)

Please follow and like us:
Read More

SALUDO KAMI SA SUPORTA NI MAYOR VICO SA ZAGU WORKERS

KAKAMPI MO ANG BAYAN TEDDY

Nakatutuwang balita na ang bagong mayor ng Pasig City na si Vico Sotto ay nagpakita ng kanyang pagsuporta sa mga naka-strike na manggagawa ng Zagu. Ang mga manggagawang nabanggit ay nakapiket dahil sa kontraktwa­lisasyon na isinasagawa ng kompanyang ito.

Saludo ang mga kinatawan ng Bayan Muna, kabilang sina Rep. Ferdie Gaite at Eufemia Cullamant sa pagkilala ni Mayor Vico sa karapatan ng manggagawa. Bihira ang mga lokal na opisyal na magpakita ng pagkilala at pagsuporta sa mga nakikibakang manggagawa para sa kanilang karapatan. Saludo kami sa iyo!

Dapat tularan ng iba pang mga opisyal ng gobyerno ang ginawa na ito ni Mayor Vico. Lalo pa ang mga nasa ahensya ng gobyerno na dapat nangangalaga sa manggagawa, tulad ng Department of Labor and Employment o DOLE. Dapat nilang panindigan ang kanilang pangako na tatapusin nila ang endo, at tunay na pumanig sa mga manggagawang Filipino. May matututunan din ang Philippine National Police o PNP kay Mayor Vico. Na imbes iutos na buwagin ang piket, ay kilalanin ang karapatan ng manggagawa na mag-unyon at gumawa ng mga aksyon upang ipagtanggol ang kanilang karapatan sa paggawa.

Hamon sa ating mga lokal na opisyal na tularan ang makamanggagawa at makamamamayan na mga tindig at gawain ni Mayor Vico. Ipakita nila ang tunay na malasakit sa kanilang nasasakupan sa pagsuporta sa mga laban at dinggin ang mga hinaing nila.

Gayundin, ipinapakita ng isyu na ito na buhay na buhay pa ang kontraktwa­lisasyon sa ating bansa, bagama’t maraming sinabi ang gobyerno sa pagpapabasura sa di-makataru­ngang iskemang ito. Kaya naman dapat ay tuluy-tuloy ang a­ting panawagan na ibasura ang kontraktwa­lisasyon, at sa mga manggagawa na igiit ang kanilang karapatan sa paggawa, kasama na ang regularisasyon at mga benepisyo. (Kakampi Mo ang Bayan / TEDDY CASIÑO)

Please follow and like us:
Read More