GUMAPANG NA SA NCR ANG MARTIAL LAW

KAKAMPI MO ANG BAYAN TEDDY

Walang-awang pinatay si Reynaldo Malaborbor, coordinator ng Makabayang Koalisyon ng Mamamayan (MAKABAYAN) sa Southern Tagalog noong Nobyembre 4 sa harap ng kanyang bahay sa Cabuyao, Laguna.

Ang MAKABAYAN ay ang partido ng mga progresi­bong grupong party-list na Bayan Muna, Gabriela Wo­men’s Party, ACT Teachers, Kabataan, Anakpawis, at iba pa.

Gayundin, ni-raid ang tanggapan ng Bagong Alyansang Makabayan (BAYAN) – Manila sa Tondo, at inaresto sa gawa-gawang kaso ang tatlong aktibistang natutulog sa opisina.

Ito ay matapos ang ginawang Halloween raid sa opisina ng mga aktibista sa Bacolod, Negros Occidental na nagkulong sa 57 katao, kabilang ang ilang menor-de-edad. Tulad ng kinaso sa Negros 57, bogus na illegal possession of firearms and explosives din ang pinaratang sa mga aktibista.

Sa mga pangyayaring ito, tunay na lumaganap na sa Kamaynilaan ang lagim ng Martial Law na nananalasa sa Mindanao, Negros, Bicol, Eastern Visayas at iba pang probinsya. Sa loob ng administrasyong Duterte, samu’t saring mga paglabag sa karapatang pantao, kabilang ang pag-aresto at pagpatay, ang ginawa sa mga aktibista, magsasaka, katutubo, manggagawa, abogado, public officials, at iba pang kritiko ng pamahalaan.

Ang ginagawang pag-atake na ito ay nakadisenyo upang ibaling ang atensyon ng publiko mula sa mga problemang bumubuliglig sa mga Filipino. Ang pagkabigo ng drug war ni Presidente Duterte sa kabila ng madugong patayan, ang korapsyon at pagkabulok ng gobyerno at ng mga opisyales nito, at ang papalalim at papalawak na kahirapan ang nais ibaon ng pamahalaan. Ito rin ang mga isyung bitbit ng mga aktibista, kaya naman malaki ang galit ng pamahalaan sa kanila at tinatangka silang pilayin at durugin.

Ngunit, sa kabila ng pag-atake na ginagawa sa hanay ng mga aktibista at mga progresibong grupo, ay hindi ito aatras sa laban. Tuloy pa rin ang laban para sa interes ng mamamayan! (Kakampi Mo ang Bayan / TEDDY CASIÑO)

Read More

KASO LABAN SA 57 AKTIBISTA SA NEGROS, DAPAT IBASURA!

KAKAMPI MO ANG BAYAN TEDDY

Matinding katatakutan ang tumambad sa mga progresibong organisas­yon noong Oktubre 31 sa Isla ng Negros. Habang nakatirik ang mga kandila at naghahanda ang mga Filipino upang gunitain ang Undas, pinasok at hinalughog ang aming opisina, ang Bayan Muna, kasama ng iba pang prog­resibong organisasyon — Gabriela, Kilusang Mayo Uno, at ang National Fe­deration of Sugar Wor­kers, sa Bacolod at Escalante.

Sa bisa ng isang warrant of arrest na lumipad na parang aswang mula sa Que­zon City, nadakip ang 57 katao sa Bacolod at Escalante City, kabilang pa ang ilang mga menor-de-edad. Ikinagulat ng lahat ang mga paratang at pag-aresto dahil ang mga nadakip ay mga kilalang lider ng mga progresibong grupo sa isla na madalas nilang makita sa balita at sa mga rali. Ni hindi naman nila nakikitang may hawak na baril ang mga kabataan at ang mga mass leaders na ito. Wala rin namang nakikita ang mga kapitbahay na nagsasagawa ng military training ang mga aktibista sa kanilang opisina.

Ang tanong ni Bayan Muna Rep. Kaloi Zarate at ni Atty. Neri Colmenares, na pawang mga human rights lawyers, ay ang sumusunod: Ano ang basehan ng RTC sa pag-isyu ng search warrant? May witness ba na tinanong kung totoo ang paratang at may probable cause? Ano ang rason sa pulong na ginawa ni Executive Judge Cecilyn Burgos-Villavert of Quezon City Regional Trial Court Branch 89 at ni PNP NCRPO chief PBrigGen Debold Sinas isang araw bago maisyu ang seach warrant?

Hinihiling ni Atty. Colmenares na isapubliko ang “special docket book” na rekisito upang maglabas ng warrant, dahil lumalabas na walang basehan ang kaso at panggigipit lamang nito sa mga progresibong grupo sa Bacolod. Gayundin, pinapanawagan ng Bayan Muna sa Korte Suprema na repa­suhin ang ginawang ito ng QC RTC judge. Kailangang magkaroon ng mekanismo ang Korte Suprema upang hindi magamit ang legal na proseso upang sikilin ang karapatan ng mamamayan. Ibasura ang kaso sa Negros 57! (Kakampi Mo ang Bayan /  TEDDY CASIÑO)

Read More

KONTRATA SA MAYNILAD AT MANILA WATER, DAPAT REPASUHIN!

KAKAMPI MO ANG BAYAN TEDDY

Para kina Bayan Muna Representative at Deputy Minority Leader na si Carlos Isagani Zarate at Chairman ng Bayan Muna na si Atty. Neri Colmenares, dapat na ituring na public utility ang tubig dahil ito ay buhay para sa lahat. Kung gayon, ang operasyon, pagmamay-ari, pagtatatag at pagmantina sa waterworks systems ay dapat pinamumunuan at kontrolado ng pamahalaan. Hindi ba’t napakahalaga nitong larangan para lamang ipaubaya ng pamahalaan sa mga pribadong sektor na ang pangunahing hangarin ay kumita?

Gayundin, ang Metropolitan Waterworks and Sewerage System (MWSS) ay binigyan ng mandato na seguruhin na may sapat at walang putol na serbisyo ng tubig sa abot-kayang halaga. Ang lahat ng ito ay sinaad sa batas sa ilalim ng Republic Act 6234. Ngunit noong 1997 ang MWSS ay isinapribado sa loob ng 25-taong

Concession Agreement. Ang resposibilidad ng MWSS ay isinalin sa Manila Water, Company, Inc. para sa East Zone at Maynilad Water Services, Inc. para sa West Zone.

Ngunit, imbis na mababa at sapat na serbisyo sa tubig, ang 20 taong pribatisasyon ng MWSS ay nagresulta sa matataas na paglaki sa singil.

Mula sa Php2-Php4 noong 1997 ang basic na singil ay umakyat sa Php34-Php47 sa 2018. Ito ay pagtaas ng 970% para sa mga konsumer ng Manila Water at 596% para naman sa Maynilad. Bukod pa rito ay nagbabayad pa ang mga konsumer ng 12% value added tax (VAT), 20% environmental charge, at foreign currency exchange adjustment (FCDA.)

Hindi nakakagulat na kumita ng Php94.5 billion ang Maynilad at Manila Water noong 2000 -2015. Sa kabila nito ay napakarami namang naranasan na water interruptions ang naranasan ng mga konsumer. Kaya naman, kailangan talagang repasuhin ang Concession Agreements ng mga kumpanyang ito.

Kaya naman, hindi na tayo dapat na pumayag sa pagsasapribado ng mga public utilities at iba pang batayang serbisyo sa tao. Dahil ito ay hindi mangangahulugan na mababang presyo at maayos na serbisyo. Serbisyo sa tao, huwag gawing negosyo! (Kakampi Mo ang Bayan / TEDDY CASIÑO)

Read More

PENSION SYSTEM SA PILIPINAS, ISA SA PINAKA-ATRASADO SA MUNDO

KAKAMPI MO ANG BAYAN TEDDY

Ayon sa isang pag-aaral na isinagawa ng Australia, ang Pilipinas ay isa sa may pinakamalalang pension system sa daigdig.

Ayon sa Melbourne Mercer Global Pension Index (MMGPI) 2019, ang a-ting retirement income protocol ay 43.7 mula sa 100. Ito ay naglagay sa ika-34 mula sa 37 na bansa na sinuri.

Para sa mga lider ng Bayan Muna na si Rep. Carlos Isagani Zarate at Chairperson Neri Colmenares, ito ay salamin sa kalunus-lunos na kalagayan ng ating senior citizens at mga retirado. Ito ay hudyat ng napakalaking pangangailangan upang itaas ang pension sa Pilipinas. Ang kasalukuyang pension sa Pilipinas—karaniwan ay social pension sa mahihirap na seniors at pension mula sa SSS—ay malayo sa tunay na pangangailangan ng seniors.

Sa kasalukuyan may dalawang panukalang batas na inihain ang Bayan Muna hinggil sa pension. Ito ang House Joint Resolution No 1 o ang Second Tranche of the SSS Pension Hike, napaggiit sa ating unang tagumpay na magdagdagan ng P2,000 ang pension ng mga seniors; at ang House Bill No. 241 na mag-aakyat ng social pension para sa lahat ng seniors sa halagang hindi bababa sa P1,000.

Mula 2010, wala pang ginawang pagsasaayos at pag-adjust sa karampot na P500 kada buwan na social pension na ibi-nibigay ng DSWD, kahit pa nagtaasan ang presyo ng bilihin at pamasahe dahil sa TRAIN Law. Dagdag pa rito ang mga delay bago matanggap ng mga nakatatanda ang pension, na talagang inirereklamo na ng seniors.

Ang pag-aaral na ito ay dapat nang gumising sa ating pamahalaan sa kalagayan ng ating mga nakatatanda at aksyunan ito sa lalong madaling panahon. Dapat na ito ang ma-certify as urgent ng gobyernong Duterte imbis na mga panukalang Cha-Cha at iba pang kontra-mamamayang panukalang batas na nais nilang iratsada sa Kamara. (Kakampi Mo ang Bayan /  TEDDY CASIÑO)

Read More

‘WHOLE-OF-NATION APPROACH’ MAPANGHATI, NAKAMAMATAY!

KAKAMPI MO ANG BAYAN TEDDY

Para sa Lumad-lider at kinatawan ng Bayan Muna na si Rep. Eufemia “Ka Femia” Cullamat, ang bagong pakana ng gobyerno na kontra-insurhensya ay mapanghati sa hanay ng mga Lumad at nagreresulta sa paglabag ng karapatang pantao hanggang sa mga pagpatay. Ito ang Executive Order 70 o ang Whole-of-Nation Approach in Attaining Inclusive and Sustainable Peace.

Sa isang pagbisita sa mga komunidad ng Lumad sa Lianga, Surigao del Sur nito lamang Oktubre 21, napatunayan ang ganitong epekto ng EO 70 sa mga Lumad. Una, muling binasehan ng 3rd Special Forces Battalion ng Armed Forces of the Philippines sa komunidad. Ilang buwan nang nakahimpil ang mga militar sa komunidad. Ayon kay Ka Femia, may mahabang kasaysayan ng karahasan at abuso ang militar sa mga komunidad ng Lumad. Ito ang iniiwasan kung kaya’t ayaw ng mga Lumad na magkampo ang militar sa loob mismo ng mga komunidad.

Sa kasalukuyan, ginagamit ng militar ang EO 70 upang okupahin ang mga Lumad na komunidad nang walang pahintulot.

Alam ng mga Lumad ang tunay na dahilan kung bakit may okupasyon ng militar sa kanilang mga lugar. Hindi ito para sa kapayapaan kundi para ihawan ang daan ng mga proyekto at negosyo na nais ipasok sa lupang ninuno ng mga katutubo.

Malala pa, ginagamit ang EO 70 upang pahinain ang pagkakaisa ng mga Lumad. Ang mga Indigenous People Mandatory Representatives na itinalaga ng National Commission on Indigenous People ay ang mismo pang nagiging tagapagsalita ng mga militar, imbes na katawanin ang interes at tinig ng mga katutubo. Habang dapat sila ang tumitindig upang tiyakin ang karapatan ng mga Lumad, sila pa ang nagtutulak sa mga proyekto, nagpapapasok ng militar, at walang imik sa mga kaso ng paglabag sa karapatang pantao ng mga katutubo.

Hindi matatapos ng EO 70 ang limang dekadang sigalot sa ating bayan dahil hindi nito tinutugunan ang ugat ng armadong pag-aaklas ng mga Filipino. (Kakampi Mo ang Bayan / TEDDY CASIÑO)

Read More

SA LIBU-LIBONG PATAYAN SA WAR ON DRUGS PULIS NA IN-INQUEST, IILAN LANG

KAKAMPI MO ANG BAYAN TEDDY

Habang pinuputakte ng samu’t saring isyu ng anomalya ang Philippine National Police tulad ng raket sa Good Conduct Time Allowance o GCTA at sa recycling ng droga ng ninja cops ay sumulpot naman ang isyu ng kawalan ng inquest proceedings sa mga pulis na nakapatay sa madugong giyera laban sa droga ng rehimeng Duterte.

Mahalaga ang inquest proceedings sa mga kaso ng pagpatay sa tokhang, dahil dito malalaman kung ang pagpatay ay makatarungan at hindi lamang simpleng pagpatay o brutalidad ng pulisya.

Nalaman ng Bayan Muna na sa inaming 5,793 kaso ng pagpatay ng pulis sa drug suspects ay nasa 253 lamang pulis ang sumailalim sa inquest proceedings. Napakaliit na nga ng bilang na inamin ng PNP sa tokhang, na sa taya ng ilang grupo na nasa lampas 25,000 katao na, ay lalong mas maliit ang mga pulis na nakasuhan sa mga pagpatay na ito. Napakalaking kawalan ng katarungan ito, lalo na sa mga pamilya ng mga pinaslang sa ilalim ng war on drugs.

Ito ay labag mismo sa manual of operations ng PNP na nagsasabing dapat nagkakaroon ng inquest at imbestigasyon kapag nakakapatay ang isang pulis sa pagsasagawa ng operasyon. Malaking kuwestyon ito sa regularidad ng anti-drug operations ng PNP.

Para sa Bayan Muna, kailangan na sa pag-iimbestiga nito ay dapat ding ipatawag si Sen. Bato dela Rosa na siyang u¬nang nagpatupad ng Oplan Tokhang. Mapapansin din ang biglang pananahimik ni Sen. Bato nang maungkat na ang kalokohan sa GCTA at lalo na ang ninja cops. Hindi siya dapat makaligtas sa usaping ito.

Dinoble na nga ang sahod ng mga pulis ay hindi man lang nila ginagawa nang tama at maayos ang kanilang trabaho. Para sa sambayanang Filipino, lalo na sa mahihirap at ordinaryong mamamayan, ang kapulisan ay berdugo lamang na mismong lumalabag sa batas. (KAKAMPI MO ANG BAYAN / TEDDY CASIÑO)

Read More

DAGDAG BAYARIN SA PHILHEALTH, TINUTULAN NG OFWs

KAKAMPI MO ANG BAYAN TEDDY

Dagdag-pahirap na naman sa OFWs ang dagdag singil sa PhilHealth na inanunsyo kamakailan.

Ayon sa komputasyon ng mga grupo ng mga migranteng Filipino, ang bagong dagdag singil sa PhilHealth ay mangangahulugang dagdag P50,000 sa mga bayarin bago pa man sila lumabas ng bansa. Ang malala pa, ayon sa implementing rules and regulations o IRR ng health care program ng gobyerno, ang lahat ng land-based na OFWs ay kailangang bayaran ang kanilang premium sa PhilHealth bago sila makakuha ng Overseas Employment Certificate (OEC. Sa madaling sabi, hostage ng PhilHealth ang OFWs hangga’t ‘di pa nila nababayaran ang P50,000 na bayad.

Sa halip na tulungan ang ating mga kababayan na natulak nang magtrabaho sa ibang bayan dahil hindi sila kayang buhayin ng sariling bansa ay lalo pang pinapahirapan ang migranteng Filipino. Matagal na panahong nawawalay ang mga OFW sa kanilang pamilya para lang maghanap ng pagkakakitaan, ngunit ang sakripisyong ito ay susuklian ng pamahalaan sa pagbabaon sa kanila sa utang bago pa man sila makaalis.

Para sa Bayan Muna, dapat unahin ng PhilHealth ang pagsagot sa mga isyu ng anomalya sa paggamit ng pondo bago sila magpanukala ng mga bagong taas-singil. Kung maaalala, may isyu ng ghost patients, ghost dialy­sis, malalaking bonuses sa mga opisyal, magagarbong mga party at iba pa.

Noong nakaraang Kongreso pa kinukuwes­tyon ng Bayan Muna ang PhilHealth ukol sa pagtaas ng premium habang ang mga opisyal nito ay binibigyan ng P1.5 bilyon sa bonuses. Ngayon ay dinagdagan pa ang bud­get ng PhilHealth na ga­ling sa kaban ng bayan, kaya walang dahilan ang PhilHealth upang pilitin na magbayad nang mas malaki ang OFWs.

Karugtong nito, napa­kababa ng paggamit ng pera ang PhilHealth, bagama’t napakaraming Filipino ang nangangailangan ng tulong medikal. Nasa 10-12% lamang ang utilization rate ng buong pera ng PhilHealth!

Samakatuwid, walang dahilan para sa taas-si­ngil. Kailangan nang ayusin ng PhilHealth ang serbisyo nito sa taumbayan! (Kakampi Mo ang Bayan /  TEDDY CASIÑO)

Read More

KAILANGANG IBASURA ANG RICE LIBERALIZATION LAW!

KAKAMPI MO ANG BAYAN TEDDY

PARA sa mga Makabayang mambabatas na sina Kaloi Zarate at Ferdie Gaite ng Ba­yan Muna, malaki ang pangangailangan na ibasura na ang Rice Li­beralization Law dahil ito ay napatunayan na sa karanasan na anti-magsasaka.

Datos mismo ng gob­yerno ang nagsasabi na nababangkarote ang mga magsasaka dahil sa pag-i-import ng bigas. Ayon sa Philippine Statistics Authority (PSA), ang isang kilo ng palay ay bumagsak sa halagang P15.96 sa ikatlong linggo ng Setyembre, ito ay bumagsak ng 1.4% mula noong isang linggo, at 30.1% naman mula noong isang taon.

Dagdag pa ng PSA, ang average na farm gate price ng palay ay lu­magapak sa pinakamababa sa loob ng walong taon. Nakatanggap din ng ulat ang Bayan Muna mula sa grupo ng mga magsasaka na ang kilo ng palay ay umaabot na sa presyong P5-7 na lamang sa ilang lugar. Mas mura pa sa presyo ng darak ng palay!

Kaya naman ang Makabayan bloc sa Kongreso, na binubuo ng Bayan Muna, Gabriela, Kabataan, at ACT Teachers at ang iba pang mambabatas sa Kongreso ay naghain ng resolusyon upang dagdagan ang budget ng pagbili ng palay sa mga magsasaka sa halagang P15 bilyon, sa pamamagitan ng supplemental budget. Ito ay pansamantalang tulong lamang, ngunit makakasalba sa mga magsasakang biktima ng Rice Liberalization Law. Maaaring ikamatay na ng ating industriya ng bigas ang batas na ito.

Tinanggal din ng Rice Liberalization Law ang kapangyarihan ng National Food Authority o NFA na bumili ng palay sa mga magsasaka, na sana ay kahit papaano ay maiimpluwensiyahan nito ang presyo ng bigas, upang hindi naman ma­ging napakababa, dahil sa pagbuhos ng imported at smuggled na bigas.

Sa dulo, ang kailangan talagang mangyari ay mabasura na ang Rice Import Liberalization Law bago pa tuluyan nitong mapatay ang mga magsasaka at ang agrikultura ng Pilipinas.   (Kakampi Mo ang Bayan / TEDDY CASIÑO)

Read More

KONDENAHIN ANG PAGPAPASARA SA LUMAD SCHOOLS!

KAKAMPI MO ANG BAYAN TEDDY

Mariing kinukondena ng Bayan Muna ang utos na pagpapasara ng Department of Education sa Salugpungan Schools.

Ayon sa lider-lumad at kinatawan ng Bayan Muna Party-list na si Eufemia Cullamat, ito na ang pinakamatinding paglabag sa karapatan sa edukasyon ng mga kabataang lumad. Ano ngayon ang gagawin ng pamahalaan sa 3,500 na estudyante ng Salugpungan? Paano na ang mga guro at staff ng mga paaralan? Napakarami na ngang mga estudyante na hindi nakakapag-aral, lalo na ang mga lumad, ay ganito pa ang ginagawa sa mga paaralang itinayo pa mismo ng mga lumad para sa kanilang kabataan.

Mariing kinukondena ng Bayan Muna ang mapang-aping sistema ng DepEd, na mula sa pagsulsol ng militar. Lehitimo ang kagustuhan ng mga lumad na makapag-aral ang mga kapwa lumad, ayon sa kanilang kultura at sa sariling pagpapasya. Gayundin, makatwiran ang pakikibaka ng mga lumad para sa kanilang karapatan sa lupang ninuno, at ang kanilang paraan ng pamumuhay na nakabatay sa lupa at tradisyon. Ngunit ang tugon ng pamahalaan at ng berdugo nitong militar ay pasistang atake sa mga paaralan, pati na sa mga administrador, guro, at sa mga estudyante nito.

Hangad ng mga lumad ang hustisya, kapayapaan, at pag-alaga sa kalikasan, at dito nagmumula ang pagkakaisa ng mga lumad. Ngunit ang gobyerno at ang militar mismo ang nais bumuwag ng pagkakaisa ng mga lumadupang pahinain ang pagtanggi ng mga ito sa mga proyektong sisira sa kalikasan at magpapalayas sa mga lumad sa kanilang lupang ninuno. Inaatake ang mga lumad upang papasukin ang mga malalaking mina, plantasyon, logging, at iba pang proyekto upang pagkakitaan ng iilan.

Isara man ang mga paaralan, patuloy ang pakikibaka ng mga lumad para depensahan ang lupang ninuno, at para sa kinabukasan ng susunod na salinlahi. (Kakampi Mo ang Bayan / TEDDY CASIÑO)

Read More