PAGPATAY NG TANDEM, DROGA TULOY PA RIN; PNP BINIRA SA PROMOSYON NG NCRPO CHIEF

MAKARAANG mamatay ng isang 8-anyos na batang lalaki sa ambush sa Maynila nitong Lunes at nabaril ang dalawang bata sa isa ring ambush nitong Martes, itinaaas pa rin ng bagong talagang hepe ng Philippine National Police (PNP) na si General Archie Francisco Gamboa, ang ranggo ni Brigadier General Debold Sinas sa major general.

Si Sinas ay ipinuwesto ni Gamboa bilang “acting director” ng National Capital Region Police Office (NCRPO) noong Oktubre ng nakalipas na taon, makaraang iangat si Lt. Gen. Guillermo Lorenzo Eleazar sa pagiging hepe ng PNP-Directorial Staff (ikaapat sa pinakamataas na opisyal ng PNP).

Ilang araw ang nakalipas, itinalaga si Eleazar bilang hepe ng PNP for Operations makaraang ipuwesto ni Pangulong Rodrigo Duterte si Gamboa bilang chief PNP.

Nitong Martes sa Camp Rafael Crame sa Quezon City, pormal at opisyal na ikinabit ni Gamboa sa balikat ni Sinas ang ikalawang estrelya ng huli upang siya ay maging Major General Debold Sinas.

Itinuloy ni Gamboa pagtataas ng ranggo kay Sinas bilang “major general” isang araw matapos ang pagkamatay ng 8-anyos na si Rhonjay Furio nitong Lunes sa San Andres, Manila.

Batay sa ulat ng Manila Police District (MPD), agad namatay si Furio nang tamaan ng ligaw na bala mula sa dalawang suspek na bumaril kay Barangay Kagawad Roberto Cudal malapit sa kanto ng Onyx at Estrada Streets sa Sta. Ana, Manila.

Pinaulanan ng bala si Cudal ng mga suspek na nakasakay sa motorsiklo. Sugatan sa insidente si Cudal.

Ayon sa ulat, namatay si Cudal nitong Enero 29 habang nilalapatan ng lunas sa ospital.

Ang isa pang nabaril na si Romeo Nicolas habang katabi ni Cudal, ay idineklarang maayos na ang kalagayan.

Batay sa imbestigasyon ng MPD, si Cudal ang target ng mga suspek na pinaniniwalaang “hired killers”.

Iniimbestigahan pa ang nasabing kaso hanggang ngayon.

Noon namang Martes, araw ng opisyal na pagdedeklarang major general na si NCRPO Director Sinas, ay dalawang bata na naman ang nadamay sa ambush sa Gen. Santos Avenue, Brgy. Upper Bicutan sa Lungsod ng Taguig.

Sa imbestigasyon ng pulisya ng Taguig, ang 5-anyos na si Crystal Zhang at ang ate nitong 12-anyos na si Hazel Zhang ay tinamaan din ng ligaw na bala nang pagbabarilin ng apat na mga suspek hanggang mamatay ang mga Chinese na sina Ninjie Zhang, alyas “Kauyu” at ang Filipino na kinilala lamang sa pangalang “Noel.”

Kumaripas ang apat na mga suspek na nakasakay sa dalawang motorsiklo  matapos isagawa ang pagpatay sa kanilang target.

Isinugod naman sa Taguig Pateros District Hospital ang mga batang nabaril.

Iniimbestigahan pa ng mga pulis-Taguig ang nasabing krimen.

Marami ang nagpahayag ng todong pagkadismaya na naging major general si NCRPO Director Sinas sa kabila ng magkasunod na ambush na ikinadamay ng mga bata.

Ayon sa ilang mapagkakatiwalaan source, si Sinas ay batid sa PNP na ‘bataan’ ni Gamboa. (NELSON S. BADILLA)

GIYERA KONTRA DROGA, ANTI-CRIMINALITY: 5 PATAY SA QC, 2 SA MAYNILA

ILLEGAL DRUGS-2LIMA ang patay sa Quezon City habang dalawa sa lungsod ng Maynila sa ikinasang giyera kontra droga at anti-criminality operation ng mga awtoridad.

Sa Quezon City, tatlong lalaking inakusahang mga holdaper ang napatay ng mga awtoridad sa ikinasang operasyon.

Batay sa ulat, bago ang engkuwentro ay hinoldap ng hindi kilalang mga suspek ang dalawang call center agent sa Obrero St., Barangay Bagumbayan pasado alas-dos ng madaling araw nitong Biyernes.

Agad namang nakapagsumbong ang mga biktima sa pulisya na nagkasa ng anti-criminality operation sa lugar.

Nang matiyempuhan ang mga suspek ay nakipaghabulan ang mga pulis hanggang sa makarating sa isang eskinita sa nabanggit na lugar kung saan nangyari ang palitan ng putok.

Napatay ang tatlong holdaper at nakuha ng mga pulis ang .45 at .38 kalibreng baril.

Patay rin ang dalawang lalaki na sinasabing nasa drug watchlist ng Drug Enforcement Group ng Quezon City Police District (QCPD) matapos makipagbarilan sa drug bust operation dakong alas-3:00 ng madaling araw nitong Biyernes.

Ayon sa report ng Police Station 6, unang nagpaputok ng baril ang hindi pinangalanang mga suspek makaraang mapag-alamang pulis ang katransaksyon sa bahagi ng Barangay Bagong Silangan.

Gumanti ng putok ang mga pulis  naging dahilan ng agarang pagkamatay ng mga suspek.

Samantala, dalawang hinihinalang tulak ng ilegal na droga ang napatay sa ikinasang buy-bust operation ng mga awtoridad sa magkahiwalay na lugar sa Sta. Cruz, Manila.

Sa ikinasang buy-bust operation sa Manila North Cemetery ay napatay ng mga pulis ang hinihinalang drug pusher na kinilalang si Benedict Galang, tinatayang 25-anyos at naninirahan sa #1801 Antonio Rivera St., Tondo.

Sa isa pang operasyon sa Sta. Cruz, Manila nitong Biyernes ng madaling araw, isa pang umano’y drug pusher ang napatay nang manlaban sa mga awtoridad.

Kinilala ang napatay sa buy-bust operation na si Leoric Salao, alyas “Jolot”,  naninirahan sa #1100 Rizal Avenue St., Sta. Cruz. (JG TUMBADO/RENE CRISOSTOMO)

SUPPLIER NG DROGA NALAMBAT SA PASIG

ARESTADO ang isang 20-anyos na high value target (HVT) at hinihinalang supplier ng ilegal na baril at droga habang nakatakas ang kanyang kasabwat, sa ikinasang operasyon ng mga tauhan ng Eastern Police District (EPD) sa Pasig City, nitong Huwebes ng gabi.

Kinilala ang nadakip na suspek na si Jam-Jam Julian, 20, residente ng Lanzones St., Sitio Kangkungan, Napico, Brgy. Manggahan sa nasabing lungsod.

Nakumpiska mula sa suspek ang tinatayang P200,000 halaga ng hinihinalang shabu.

Nakatakas naman ang kasabwat nitong si Edison Bolista, nasa hustong gulang, ng No. 67 Acacia St. sa parehong barangay, sa isinagawang operasyon ng mga tauhan ng EPD-District Special Operations Unit.

Ang pagkakadakip kay Julian ay resulta ng ilang linggong surveillance operation ng DSOU base sa natanggap na impormasyon na sangkot ang dalawang suspek sa bentahan ng ilegal na baril at shabu.

Nang magpositibo sa surveillance operation, agad nagkasa ng buy-bust operation ang hepe ng DSOU na si P/Major Darwin Guerrero, pasado alas-10:00 ng gabi sa bahay nang nakatakas na si Bolista, matapos magkasundo sa bibilihing armas mula sa mga suspek.

Aarestuhin na sana ng pulis na nagpanggap na buyer, si Julian matapos nitong iabot ang nabiling .38 caliber ngunit nakatunog ang suspek kaya tumakbo sa kanilang bahay para kunin ang kanyang baril ngunit nadakip makaraan ang habulan.

Mabilis namang tumakas si Bolista nang mapansin ang kaguluhan, sa pamamagitan ng pagdaan sa bubungan ng kanyang bahay.

Sa paghahalughog, nakumpiska ang mga awtoridad ng isa pang .9mm caliber at bala, P200,000  halaga ng shabu at mga pinatuyong dahon ng marijuana na nagkakahalaga ng P12,000.

Nabatid na si Julian ay kalalabas lamang mula sa kulungan makaraang magpiyansa sa kasong robbery sa Pasig City at may nakapending pang kaso na physical injuries. (NICK ECHEVARRIA)

 LALAKING NABITIN SA PANONOOD NG PORNOR NANAPAK MATAPOS SITAHIN NG PARAK

NAHAHARAP sa patong-patong na kaso ang isang electrician dahil sa pananapak sa isang parak na nanita sa kanyang panonood ng porno habang nasa loob ng computer shop sa Caloocan City, kamakailan.

Kinilala ng mga awtoridad ang suspek na si  Aldrin Bangayan, 30, ng #1126 Lirio St., Bo. San Jose, Brgy. 187 Tala, habang ang biktima ay kinilalang si P/Cpl. Tayron Guilot ng Manila Police District (MPD), siyang may-ari at nagbabantay ng computer shop sa #1129 Lirio St., Tala sa nabangit na lungsod.

Ayon sa ulat,  isang customer ang nagsumbong umano kay Guilot hinggil sa panonood ng porno ng suspek sa computer shop.

Agad pinuntahan ng biktima ang suspek ngunit laking gulat niya nang makitang kagat-labi at nakapikit ang mga mata ni Bangayan habang pagpaparaos sa sarili dakong alas-11:50 ng gabi.

Dahil dito, nagpakilalang pulis ang biktima at sinaway ang suspek. Gayunman, nagalit ang suspek dahil sa pagkabitin kaya sinapak ang pulis hanggang sa sila ay magpambuno.

Pagkaraan ay inaresto ng pulis ang suspek at dinala sa himpilan ng pulisya.

Ang suspek ay nahaharap sa patong-patong na kasong direct assault, disobedience and resistance at paglabag sa PD 969 o kilala bilang Immoral doctrines, Obscene Publications and Exhibitions and Indecent Shows sa piskalya ng Caloocan City. (FRANCIS SORIANO)

Read More

SOURCE NG P74.9-M DROGANG NASABAT SA CAVITE, METRO; DRUG LORD SA BILIBID TULOY ANG NEGOSYO

UMABOT sa P74.9 milyong halaga ng ilegal na droga ang nakumpiska ng mga awtoridad sa tatlong magkakahiwalay na operasyon sa Bacoor City sa Cavite, Valenzuela City, Quezon City at Caloocan City.

Sa Bacoor City, nasabat ang tinatayang P68 milyong halaga ng umano’y shabu na ibabagsak sana sa Metro Manila at sa lalawigang ito, makaraang madakip ng mga awtoridad ang dalawang hinihinalang tulak ng ilegal na droga sa Panapaan, Bacoor City.

Sina Reynaldo Moral Cordero at Irene Ilaya Biazon, kapwa residente ng Maricaban, Pasay City, ay natimbog bandang 6:30 ng gabi noong Enero 27 sa Panapaan 4 , Bacoor City.

Lulan ng isang Mitsubishi Lancer (WTY-942 ) ang dalawa nang kapwa madakip ng mga tauhan ng National Bureau of Investigation (NBI).

Ayon kay NBI Director Dante Gierran, isang impormante ang nagbigay ng tip hinggil sa transaksiyon ng mga suspek sa NBI-MIMAROPA.

Bunsod nito, nagkasa ng operasyon ang magkasanib na puwersa ng NBI-NCR at ng NBI-MIMAROPA at hinarang ang sasakyan ng mga suspek na nagresulta sa pagkakakumpiska sa 10 kilo ng hinihinalang shabu na tinatayang P68 milyon ang halaga.

Samantala, kumpiskado naman ang mahigit P5.9 milyon halaga ng umano’y shabu at marijuana sa dalawang umano’y drug pushers na nadakip sa magkahiwalay na buy-bust operation sa mga lungsod ng Caloocan at Valenzuela noong Miyerkoles ng gabi.

Ayon sa ulat, dakong alas-9:00 ng gabi nang madamba si Omair Sultan, 23, ng Phase 12, Brgy. 188, Tala sa Domato Avenue, Phase 12, matapos bentahan ng shabu ang isang undercover na pulis kapalit ng P20,000 marked money kabilang ang isang tunay na P1,000 at 19 piraso ng boodle money.

Bukod sa nasabing kontrabando, nakuha rin sa suspek ang medium size plastic ice bag na naglalaman ng 680 gramo ng shabu na tinatayang P4,624,000 ang street value.

Alas-8:30 naman ng gabi nang masakote ang habal-habal driver na si Dominic Aposaga, 26, sa buy-bust operation sa kanyang bahay sa 76 Gladiola St., Bahayang Pag-asa Subd. sa Maysan, Valenzuela matapos bentahan ng isang plastic bag ng pinatuyong dahon ng marijuana ang isang poseur buyer.

Nakumpiska kay Aposaga ang 14 piraso ng pinatuyong stems at dahon ng marijuana na nakabalot sa transparent plastic, apat na bloke ng ng marijuana, kalahating bloke ng marijuana at pitong plastic sachets ng marijuana na umaabot lahat sa 11 kilo at nasa P1,320,000 ang halaga, P5,000 buy-bust money, dalawang digital weighing scale at P300 cash.

Sa Quezon City, arestado ang suspek na si Dennis Pacanas y Ibañes, 38, anyos, sa isinagawang buy-bust operation sa #108 Lower Everlasting St., Brgy. Payatas A, Quezon City dakong alas-4:30 ng hapon noong Enero 29.

Ayon kay SDEU P/Major Sandie Caparroso, sa nasabing operasyon ay nakumpiska mula sa suspek ang P1 milyong halaga ng umano’y shabu.

Ang mga suspek ay nahaharap sa kasong paglabag sa RA 9165 o Comprehensive Dangerous Drugs Act of 2002. (RENE CRISOSTOMO/ALAIN AJERO)

2 BUMALIK SA ISLA NG TAAL, MISSING; NATABUNANG ASO, NASAGIP.

BATANGAS – Hindi pa rin natatagpuan ang dalawang lalaking bumalik sa isla ng Taal sa kasagsagan ng pag-aalburoto ng bulkan noong Enero 12.

Kinilala ang mga nawawala na sina Alexander Dando Jr. at Marlon Deteral, kapwa residente ng Barangay Alas-As sa isla ng Taal, sakop ng bayan ng San Nicolas.

Ayon sa mga kaanak ni Dando, bandang alas-4:30 ng hapon noong Linggo, Enero 12, nag-text ang biktima at sinabing bumalik siya sa isla dahil sa paniwalang humuhupa na ang pag-aalburoto ng bulkan.

Alas-11:00 ng umaga noon nang mag-alisan ang mga residente sa isla dahil sa aktibidad ng Taal.

Nakalikas na umano si Dando ngunit dahil nakainom ay naging makulit at nagpasyang bumalik. Mula noon ay hindi na siya makontak ng mga kaanak.

Sa kabilang dako, tumanggi naman umanong sumakay sa huling papaalis na bangka sa isla ang nawawala ring si Deteral.

Ayon sa kapatid, bumalik ang biktima sa kanilang bahay sa pag-aakalang naiwan ang kanilang ina  na napag-alamang nauna na palang nakalikas. Hindi na rin nakita si Deteral mula noon.

Makalipas ang halos dalawang linggo, umaasa pa rin ang mga kaanak ng dalawa na nakaalis ang mga ito sa isla at napunta lamang sa malayong evacuation center.

Ayon naman sa mga awtoridad, hindi pa sila makapagsagawa ng search and rescue operation dahil sa naka-lock down pa rin ang buong isla.

Samantala, himalang nasagip ang isang aso na 15 araw na nabaon sa makapal na abo na galing sa Bulkang Taal.

Sa video post ng netizen na si Germie Balba, makikitang binalikan ng kanyang kapatid ang kanilang bahay sa Barangay Pulangbato, sa bayan ng San Nicolas noong Lunes, 15 araw makalipas ang pag-alburoto ng Taal.

Ang Pulangbato ay isa sa mga barangay na nasa mismong pulo ng Taal volcano sakop ng bayan ng San Nicolas.

Laking tuwa ng dalawa nang matapos nilang hukayin ang makapal na abo ay tumambad ang hawlang kahoy  na kinalalagyan ng aspin na si Idol.

Winasak nila ang hawla at sinikap na mailabas si Idol na halos ay namayat na sa uhaw at gutom.

Kahit naghihina, lumakad at tumayo ang aso at tinanaw ang kabuuan ng isla na tila naninibago sa kanyang kapaligiran.

Laking tuwa naman ng mga netizen sa pagkakaligtas kay Idol at sa pagmamalasakit ng magkapatid na hukayin ang kinaroroonan ng aso. (NILOU DEL CARMEN)

LALAKI PATAY SA TAGA NG PAMANGKIN DAHIL NANGHIRAM NG BATERYA NANG WALANG PAALAM

CAPIZ – Patay ang isang lalaki nang pagtatagain siya ng pamangkin matapos niyang ipahiram ang baterya ng sasakyan ng suspek, iniulat nitong Huwebes ng umaga sa lalawigang ito.

Kinilala ang biktimang si Esmundo Gapi, 62-anyos, residente ng Barangay San Nicholas, Tapaz, Capiz.

Kusa namang sumuko sa pulisya ang suspek at pamangkin ng biktima na kinilalang si Joey Melicado, 35-anyos, residente ng nasabing lugar.

Batay sa report ng Tapaz Municipal Police Station, nagtalo ang magtiyuhin nang malaman ng suspek na ipinahiram ng biktima ang baterya ng kanyang sasakyan na hindi ipinaalam sa kanya.

Sa tindi ng galit ng suspek, kumuha siya ng itak at pinagtataga sa ulo at tiyan ang kanyang tiyuhin.

Agad namang dinala sa ospital ang biktima ngunit idineklarang patay na. (ANNIE PINEDA)

MAGSASAKA, KALABAW NAKURYENTE SA PALAYAN

LEYTE – Patay ang isang magsasaka at alaga nitong kalabaw makaraang makuryente nang  masagi nila ang nakalaylay na live wire sa palayan, iniulat nitong Huwebes ng umaga sa lalawigang ito.

Kinilala ang namatay na si Romualdo Pace, 69, residente ng Brgy. Santiago, Alangalang, Leyte.

Batay sa repot ng Alangalang Municipal Police Station, nangyari ang insidente sa Brgy. Tombo, bayan ng Alangalang sa nasabing lalawigan.

Lumabas sa imbetigasyon, hila-hila ni Pace ang kanyang alagang kalabaw patungong bukid habang may kargang abono nang masagip nila ang naputol na live wire na umano’y naputol sa pananalasa ng bagyong Ursula ngunit hindi naayos ng Leyte III Electric Cooperative (LEYECO III).

Bunsod nito, nagkikisay si Pace at bumulagta sa gitna ng daan habang nasunog naman ang kalahating parte ng katawan ng kalabaw.

Patuloy ang imbestigasyon sa pulisya sa insidente at inaalam kung may pananagutan ang LEYECO dahil sa kapabayaan.

Hustisya naman ang sigaw ng pamilya ni Pace. (ANNIE PINEDA)

MAG-ASAWA NAGLAKO NG SHABU

CAVITE – Nabisto na hindi lamang gulay ang itinitinda ng isang mag-asawa makaraang madakip sa buy-bust operation sa bayan ng Tanza sa lalawigang ito.

Nahaharap sa kasong paglabag sa RA 9165 o Comprehensive Dangerous Drugs Act of 2002, ang mag-asawang sina Enrique Herrera, alyas “Rick”, 51, magsasaka, at Clarita, 50, vendor ng gulay, kapwa residente ng Brgy. Paradahan 1, Tanza, Cavite.

Ayon sa ulat  ni Pat. Ehdcel Manalo ng Tanza Municipal Police Station, dakong alas-7:30 kamakalawa ng gabi nang naaresto ang mag-asawa sa aktong nakikipagtransaksyon sa isang poseur buyer sa Brgy. Paradahan 1, Tanza.

Nauna rito,  nakatanggap ng impormasyon ang Tanza CPS na bukod sa pagbebenta ng gulay, ang mag-asawa ay dumidiskarte rin sa pagtutulak ng ilegal na droga kaya nagkasa ng buy-bust operation ang mga awtoridad na nagresulta sa pagkakadakip sa dalawa.

Nakuha sa mag-asawa ang isang sachet ng shabu o 1 gramo na P2,000 ang street value.

Ang mag-asawa na kabilang sa listahan ng  Street Level Target  (SLT) watchlist, ay kapwa nakakulong na sa Tanza Custodial Center. (SIGFRED ADSUARA) 

GURO KINATAY NG KATAGAY

PANGASINAN – Patay ang isang guro makaaang pagsasaksakin at gilitan sa leeg ng dalawang kainuman, iniulat nitong Huwebes ng umaga sa lalawigang ito.

Kinilala ang biktimang si Arnaldo Tabucol, 29-anyos, English teacher at residente ng Tayug, Pangasinan.

Batay sa report ng Tayug Police Station, noong Martes nang matagpuan ang bangkay ng biktima sa bukid sa Brgy. Libertad, ng nasabing bayan.

Lumabas sa imbestigasyon, bago ang insidente, nakita ang biktima habang nakikipag-inuman sa mgA suspek ngunit hindi na nakauwi sa kanilang bahay.

Sa follow-up operation ng pulisya, nadakip ang 17-anyos na suspek nang makorner sa isang checkpoint gamit ang motorsiklo ng biktima.

Samantala, patuloy ang mga awtoridad sa pagtugis sa isa pang suspek.

Nagpapatuloy ang imbestigasyon ng pulisya para alamin ang posibleng motibo sa pagpaslang sa biktima. (ANNIE PINEDA)

PULIS PATAY SA TANDEM

NEGROS Oriental – Patay ang isang pulis makaraang pagbabarilin ng riding in tandem, iniulat ng mga awtoridad nitong Huwebes ng umaga sa lalawigang ito.

Kinilala ang biktimang si Executive Master Sergeant Roldan Esmajer, nakadestino sa San Jose Municipal Police Station, at residente ng Barangay Tampi ng nasabing bayan.

Batay sa report ng San Jose Municipal Police Station, nangyari ang insidente sa Barangay Tapon Norte B ng naturang bayan.

Lumabas sa paunang imbestigasyon, sakay ang biktima ng motorsiklo nang walang habas siyang pagbabarilin ng riding in tandem.

Agad namang dinala sa Siliman University Medical Center ang biktima ngunit nalagutan ng hininga sanhi ng mga tama na bala sa iba’t ibang parte ng katawan.

Nagpapatuloy ang imbestigasyon ng pulisya para alamin ang posibleng na motibo sa krimen. (ANNIE PINEDA)

LALAKI NAHULOG  SA BANGIN, PATAY

CAMARINES Sur – Walang buhay na natagpuan ang isang lalaki na hinihinalang nahulog sa bangin, iniulat ng pulisya nitong Huwebes ng umaga sa lalawigang ito.

Kinilala ang biktimang si Ruel Llanita, 30-anyos at residente ng Sitio Bulalahin, Brgy. Tible, Sipocot, Camarines Sur.

Batay sa report ng Sipocot-PNP, nakita na lamang ang bangkay ng biktima sa bangin na may lalim na 25-talampakan, ilang metro ang layo mula sa kanilang tahanan.

Ayon sa kaanak, umaga ng umalis sa kanilang bahay si Llanita para pumunta sa kanyang sakahan ngunit gabi na ay hindi pa rin ito nakauuwi.

Agad namang hinanap ng kanyang pamilya ang biktima at natagpuan ito sa bangin ngunit wala nang buhay sanhi ng sugat sa ulo at katawan.

Nagpapatuloy ang imbestigasyon ng pulisya para alamin kung may nangyaring foul play sa nasabing insidente. (ANNIE PINEDA)

3 KONSEHAL NAGSUNTUKAN SA LAOAG CITY HALL

ILOCOS Norte – Nauwi sa suntukan ang mainitang diskusyon sa kanilang sesyon ng tatlong city councilor sa Laoag City sa lalawigang ito, noong Miyerkoles bago maghatinggabi.

Nangyari ang rambulan sa harap ng Laoag City Hall na sakop ng Brgy. 10, bandang alas-11:24 sa pagitan umano nina City Councilors  Justine Clarence Gomez Chua, 26;  Edison Uy Chua, 56, kapwa residente ng Brgy. 16, at ang suspek na si City Councilor Edison Hernando Bonoan, kasama ang kanyang pamangkin na si Mark Christian Bonoan Dumbriguez, parehong nasa hustong gulang at residente ng Brgy. 50, Buttong,  pawang ng nasabing lunsod.

Batay sa imbestigasyon ng Laoag City Police Station, bago ang kaguluhan, paalis na umano si Councilor Justine Chua sa City Hall at ang kanyang mga kasamahan dakong alas-7:30 ng gabi, kung saan naroon din si Councilor Edison Bonoan at pamangkin nito.

Nasa loob na umano si Justine Chua ng sasakyan ng isa pang City Councilor na si Jaybee Baquiran, nang lapitan ito ni Edison Bonoan  at sinigawan ng  masasakit na salita at saka pinagsusuntok nang makailang beses sa mukha kaya napilitang gumanti ang biktima.

Nang mapansin naman ni Councilor Edison Chua na katabi sa upuan ni Justine, ang kaguluhan, agad itong bumaba ng sasakyan at sinuntok naman si Bonoan, sa puntong ito ay nakialam na si Mark Christian Dumbriquez at kanyang sinuntok si Councilor Edison Chua, dahilan para lumala ang kaguluhan.

Natigil lamang ang rambulan nang magresponde ang mga miyembro ng Civil Security Unit ng Loag City.

Nabatid na nagkaroon nang mainitang diskusyon ang mga councilor habang nagsasagawa ng sesyon bago nangyari ang suntukan. (NICK ECHEVARRIA) 

MISSING TAXI DRIVER, NATAGPUANG PATAY SA LOOB NG ISANG DRUM

NABUBULOK na ang bangkay ng isang nawawalang taxi driver nang matagpuan sa loob ng drum sa isang abandonadong comfort room sa Port Area, Manila, iniulat ng pulisya kahapon.

Ang biktimang si Jamal Tagsayan y Arurao, residente ng Barangay 647, Zone 67, San Miguel, Quiapo, Manila ay kinilala ng kanyang ina at tiyahin.

Batay sa imbestigasyon ni Det. Donald Panaligan ng Manila Police District-Homicide Section, bandang 1:10 ng hapon nitong Enero 29 nang madiskubre ang bangkay ng biktima sa loob ng isang CR sa Barangay 650, Zone 68, sa Port Area.

Natunton ang bangkay ng biktima dahil sa masangsang na amoy makaraan ang ilang araw na pagkawala.

Unang nakita ang nakalabas na mga paa ng biktima sa nasabing drum  at nakabalot sa plastic ang ulo.

Hindi pa matiyak kung may tama ng saksak o bala ng baril ng ang biktima.

Napag-alaman sa mga kaanak, tatlong araw nang nawawala ang biktima at ang minamanehong taxi nito ay natagpuan sa Cavite St. sa Sta Cruz, Manila.

Makaraang matagpuan ang taxi ay agad tumawag ang operator nito sa asawa ng biktima sa Surigao.

Napag-alaman, tatlong araw na ang nakalilipas nang tumawag umano ang biktima sa kanyang misis at humihingi ng tulong.

“Ma.. tulungan mo ako, nandito ako sa Pier..” ito umano ang pahayag ng biktima nang huling tumawag sa kanyang misis.

Huling nakita ng ina na buhay ang biktima sa kanilang bahay sa San Agustin St., San Miguel, Manila.

Inaalam ng pulisya kung hinoldap o may kinalaman sa ilegal na droga ang pagpaslang sa biktima. (RENE CRISOSTOMO)

3 CHINESE ARESTADO SA SEX DEN SA MAKATI

ARESTADO ang tatlong Chinese national makaraang salakayin ng mga tauhan ng Makati City Police ang isang establisimiyento na hinihinalang sex den, habang nasagip ang 13 kababaihan at limang empleyado sa lungsod na ito, noong Miyerkoles ng gabi.

Kinilala ni Police Col. Rogelio Simon, hepe ng Makati City Police ang mga arestado na sina Kevin Sy, 25, at Xiao Lao, 23, kapwa maintainer umano ng sex den, at ang kustomer na si Tong Po, 25-anyos.

Habang 13 kababaihan ang nasagip, kabilang ang siyam na Chinese nationals, dalawang Russian at dalawang Vietnamese, habang limang empleyadong Filipino ang inimbitahan ng pulisya para sa imbestigasyon.

Base sa isinumiteng report ni Simon, nakumpirma ang ilegal na operasyon sa Golden Dragon Spa sa #1847 K&K Building sa Evangelista St., Barangay Pio del Pilar ng naturang lungsod.

Ayon sa ulat, isang police asset ang nagpanggap na kustomer at nagbayad ng halagang P22,000 para sa sex service sa mga dayuhang babae.

Dakong alas-10:35 ng gabi nang salakayin ng mga tauhan ng Station Investigation and Detective Management Section, sa pangunguna ni Police Major Gideon Ines, ang naturang establisimiyento.

Pagkaraan ay tumambad sa kanila ang mga babaeng dayuhan sa mga kuwarto at may nakitang condoms at sex toys.

Agad namang dinala ang mga dayuhan sa nasabing himpilan ng pulisya at ang mga babaeng nasagip ay dinala sa tanggapan ng Women and Children’s Protection Desk.

Nahaharap ang tatlong naarestong dayuhan sa kasong human trafficking habang inaalam ng pulisya kung may kaukulang business permit ang establisimiyento para tuluyan itong maipasara.

Sinabi ni Simon, pang-anim na establisimiyento na ginagawang sex den ang kanila nang sinalakay sa nasabing lungsod.

FIL-AM, 2 PA TIKLO SA DROGA

ARESTADO ang tatlong kalalakihan, kabilang ang isang Filipino-American national, nang mahulihan ng P.6 milyong halaga ng high grade marijuana at ecstacy sa ikinasang buy-bust operation ng mga pulis kahapon ng madaling araw sa Taguig City.

Kinilala ni Police Col. Celso Rodriquez, hepe ng Taguig City Police, ang mga nadakip na sina Reggie Raphael Galang, 28, ng Room 8003, Tower 2, Ridgewood Tower, Condo Corp, C5, Barangay Ususan, Taguig City; Joshua Cuanzon, 31, tubong Alaska, USA, nakatira sa  #2025 Cityland Vito Cruz Towers,  at Yuan Marc Mendoza, 19, ng #909 University Pad, kapwa taga  Malate, Maynila.

Batay sa isinumiteng report ni Police Col. Rodriquez, dakong ala-1:45 ng madaling araw nang isagawa ang buy-bust operation ng mga tauhan ng Station Drugs Enforcement Unit (SDRU) laban sa mga suspek malapit sa gasoline station sa C5 Road, Barangay Ususan, Taguig City.

Isang pulis ang nagpanggap na bibili ng droga at nang magpositibo ay inaresto ang mga suspek.

Nakumpiska sa mga suspek ang limang pirasong malalaking ziplock ng high grade marijuana, 3 maliliit na ziplock ng nasabi ring droga, tatlong malalaking ziplock ng ecstacy powder at isang malaking ziplock na may lamang kapsula.

Sinabi ng opisyal, ang high grade marijuana ay nasa 177 gramo na may halagang P212,000 at ang powder ecstasy ay nasa 89.85 gramo, na may halagang P476,205.

Ang mga suspek ay nakakulong na sa nasabing himpilan ng pulisya at sasampahan ng kasong paglabag sa Section 5 and 11 Article II ng Republic Act  9165 0 Comprehensive Dangerous Drugs Act of 2002.

MAG-ASAWANG SENIOR SA QC PINATAY

PATAY na nang matagpuan ang mag-asawang senior citizen sa kanilang bahay sa Barangay Commonwealth, Quezon City.

Tinukoy ng pulisya ang pagkakakilanlan ng mga biktimang sina Leonardo Ollano, 69, at Nida Ollano, 63-anyos.

Batay sa pagsisiyasat ng Quezon City Police District (QCPD), nangyari ang krimen dakong alas-8:45 noong Huwebes ng gabi sa bahay ng mga biktima sa Maya Street ng nabanggit na barangay.

Sa salaysay sa pulisya ng kaanak ng mag-asawa na si Hermogenes Timola, walang ilaw at nakakandado ang pintuan ng kanilang bahay nang siya ay dumating.

Bunsod nito, napilitan umano siyang dumaan sa ikalawang palapag ng bahay at tumambad sa kanya ang magulong mga gamit.

Pagbaba ni Timola sa sala ay nadiskubre niya ang mga biktima na nakahandusay at tadtad ng saksak sa katawan.

Hindi natagpuan ng pulisya sa lugar ang kutsilyo na ginamit sa krimen maliban sa isang pares ng tsinelas na posibleng naiwan ng suspek.

Pagnanakaw ang isa sa tinitingnang motibo ng pulisya sa krimen. (JG TUMBADO)

 

Read More

PAG-ABUSO NG PULIS SISILIPIN NG PNP

OIC GAMBOA

IIMBESTIGAHAN ng Philippine National Police ang umano’y pag-abuso ng ilan nilang tauhan na kabilang sa mga nagbigay ng seguridad sa idinaos sa Traslacion nitong Huwebes.

“All of these thing will be assessed. If there is a need to investigate then we will investigate,” pagtiyak ni PNP officer-in-charge Lt. Gen. Archie Gamboa.

Subalit nilinaw ni Gamboa na ipauubaya niya ito sa PNP-NCRPO na may kapangyarihang magpataw ng kaukulang disciplinary measures at magsumite ng kaukulang ulat sa punong himpilan.

Matatandaang inireklamo ng ilang deboto na mistula umano silang mga raliyesta kung ituring ng mga pulis dahil sa higpit ng pagbabantay ng mga ito at pagbabawal sa kanilang makalapit sa andas.

May mga nasaktan umanong deboto, may naipit, ginamitan ng pepper spray, natapakan ng mga pulis at sundalo na naka-combat boots at may TV reporter na inagawan umano ni Southern Metro Manila police chief Brig. Gen. Nolasco Bathan ng cellphone habang dinodokumento nito ang girian ng mga deboto at security forces ng gobyerno.

Dinepensahan naman ni NCRPO chief Bgen. Debold Sinas ang mga pulis at sinang-ayunan si Manila Mayor Isko Moreno na tagumpay at matiwasay ang Traslacion 2020.

At kung siya pa rin umano ang mamamahala sa susunod na Traslacion ay dadagdagan pa niya ang mga pulis at sundalong itatalaga bilang security.

Bilang pasasalamat sa mga pulis, pinag-aaralan din ni Sinas ang paggawad ng tatawaging “Traslacion pin” sa libo-libong pulis na nagbantay sa seguridad ng mga deboto at lahat ng nakilahok sa prusisyon.

Reklamo ng reporter

Isinumbong kay acting PNP chief at Interior Secretary Eduardo Año ang pang-aagaw umano ng cellphone ni P/BGen Nolasco Bathan sa isang reporter.

Tinangka pa umano ni Bathan na burahin ang recorded video footage sa cellphone ni GMA 7 Reporter Jun Veneracion na tahasang itinanggi ng opisyal.

“Bakit nabura ang video ko Sir?” tanong ni Veneracion sa opisyal. Sinagot umano siya ni Bathan na “Wala akong binura dyan, saksi ko pa ang Itim na Nazareno.”

Matapos isoli ng heneral ang cellphone sa TV reporter ay humingi rin ito ng paumanhin.

“I would like to apologize for what happened at Ayala Bridge, Manila during the Procession of the Black Nazarene 2020 wherein I confiscated the cellular phone of the media personality who was later on identified as Mr. Jun Veneracion of GMA 7 thinking that he was someone who poses threat during the procession,” sabi sa official statement na ipinalabas ng SPD sa mga mamamahayag.

Sinabi ni Dir. Bathan na nagkaroon ng komosyon sa pagitan ng mga pulis at deboto ng Black Nazarene nang kunan ng video ni Veneracion at hindi nakontrol ang pangyayari nang ipaubaya ng kapulisan ang andas sa mga deboto.

Nangako naman si DILG Sec. Año na paiimbestigahan ang pangyayari.

Habang inihayag naman ng PNP na kukunan muna nila ng pahayag ang heneral hinggil sa akusasyon para maging patas.

Samantala, dumipensa rin si P/B. Gen. Bernabe Balba, District Director ng Manila Police District sa mahigpit na crowd management sa kapistahan ng Quiapo kamakalawa.

Depensa ni Balba, kinakailangan nilang maging mahigpit sa pagtupad ng kanilang tungkulin para na rin sa kaligtasan ng lahat at upang matiyak na maiiwasan ang kaguluhan at mga di kanais-nais na pangyayari, na maaari aniyang magresulta sa mass casualty.

Paumanhin ng Palasyo

Humingi rin ng pasensiya ang Malakanyang sa mga hindi inaasahang pagkilos at ginawa ng mga pulis sa mga deboto ng Mahal na Poong Itim na Nazareno.

Ayon kay Cabinet Secretary Karlo Nograles, kung nagkaroon man ng paghihigpit sa panig ng mga pulis ay dahil kailangan ito para protektahan ang mga deboto.

At sa pagbatikos ng netizens sa ginawa ng PNP at pagturing sa mga deboto na parang mga raliyesta ay sinabi nito na “Siguro this is the first time that they did it this way then maybe next year baka pwede mag-adjust di ba?”

Natawa naman si CabSec Nograles sa pahayag na mag-paa na rin ang mga pulis sa susunod na Traslacion para walang natatapakan ng suot nilang combat shoes. (JESSE KABEL, RENE CRISOSTOMO, DAVE MEDINA at CHRISTIAN DALE)

Read More

DOBLE-UMENTO SA PULIS, SUNDALO, IDINEPENSA NI DUTERTE

(NI DONDON DINOY)

DIGOS CITY—Idinepensa ni Pangulong Rodrigo Duterte ang pagdoble ng sweldo sa mga pulis at sundalo dahil sa ilang mga rason.

Ayon kay Duterte, sa dinaluhang ika-60 taong founding anniversary ng kanyang Alma Mater sa sekondarya na Cor Jesu College noong Disyembre 30, nakatanggap siya ng mga reklamo tungol sa umento ng mga pulis at militar.

“I’ve been hearing a lot of complaints bakit ‘yong sa mga pulis doblado. Bakit sa maestra hindi pa. This country is a troubled land. I need soldiers and policemen, who are not afraid to die,” ani niya.

Dagdag ng Pangulo, nagsasakripisyo ang mga pulis at sundalo sa kanilang buhay sa panahon ng kanilang trabaho.

And when there is trouble I send them there and say fight and die if you must. Ang sundalo kasi ‘pag lumabas ng kampo, chances are, there’s an encounter, kung siya ‘yung casualty for the day, dalawa, tatlo. Tayo, lumabas ng bahay. Chances are we can go anywhere and go back all right. Iyong mga sundalo wala ‘yan,” ayon kay Duterte.

Ngunit hindi kasali sa kanyang pahayag kung ngayong taon epektibo ang pangako nitong umento sa mga guro.

“So kayo na lang ang mag-intindi. Kung may baha, sundalo. Kung may tornado, sundalo. Kung may earthquake, sundalo. Kung may — lahat na, may landslide, sundalo. Ang sundalo lahat trabaho na hindi kaya ng civilian, kanila ‘yan,” ayon sa Pangulo.

Ang entry-level ng mga public-school teachers, na may Salary Grade 11 sa ilalim ng Tranche 4 ng Salary Standardization Law, na tatanggap lamang ng buwanang sweldo na P20,754.

Nilinaw naman ni Duterte na prayoridad ng administrasyon ang kapakanan ng lahat ng mag-aaral.

“This administration’s foremost priority is to allocate the biggest part of our government’s budget to ensure that all Filipino students will receive quality and accessible education that would best meet the needs of our time,” ani niya.

 

Read More

PAANO MAGING PULIS?

PULIS TRAINING

(Ni JG Tumbado)

Karaniwan sa mga paglalaro ng mga batang lalaki na pag-usapan kung ano ang kanilang gusto sa paglaki. Maririnig mo si Isko na nagsabing nais niyang maging pulis tulad ng kanyang tatay habang si Oca naman, pangarap na maging sundalo sa tamang edad.

Sa kabila ng mga kontrobersya na naipupukol sa Philippine National Police (PNP), mataas pa rin ang tiwala at respeto sa mga tinaguriang unipormadong indibidwal sa bansa. Sapagkat ang bigat ng mandato at tungkulin ng PNP na panatilihing ligtas ang lawak ng nasasakop na teritoryo ng bansa ay hindi matatawaran.

GUSTO MO BANG MAGPULIS?

Ang mga miyembro ng PNP ay inaatasan ng Konstitusyon na protektahan ang lahat ng indibidwal sa buong bansa, sa sibilyang pamamaraan. Bagama’t mahigpit ang pagsasanay at pagdidisiplina, hindi dapat maging katulad ng militar ang mga hakbang ng PNP sa pagtugon sa mga indibidwal.

Ang isang opisyal ng PNP ay nakatatanggap ng mga naaangkop na benepisyo, kompensasyon at ang buwanang pensyon kapag retirado na sa serbisyo. Ang sahod ng kasalukuyang pulis ay malaki, sapat at ang seguridad ay mas malakas kumpara sa mga kawani ng isang pribadong kompanya.

Paano ba maging isang pulis at anu-ano ang kailangang requirements para makapasok ang isang nagnanais na maging bahagi ng organisasyon?

Upang maging ganap na isang pulis, kinakailangang makumpleto ang mga ‘criteria’ o batayan, requirements at isasalang sa pag-apruba ng National Police Commission (Napolcom).

Ang mga nakapagtapos ng kolehiyo o unibersidad na may bachelor’s degree ay kinakailangang kumuha ng PNP Entrance Exam. Sakaling makapasa, awtomatiko na ang makukuhang ranggong Patrolman (Police Officer 1), alinsunod sa Saligang Batas (Section 30 ng RA 6975, as amended by RA 8551).

Narito ang mga sumusunod na requirements para sa entrance exam:

  1. Kailangan ay isang Filipino citizen;
  2. May edad na hindi bababa sa 21 taon pero hindi hihigit sa 30 taon;
  3. May taas na 1.62 metro (para sa lalaki) at 1.57 metro (para sa babae);
  4. Kung miyembro ng indigenous community, may taas na 1.52 metro (para sa lalaki) at 1.45 metro (para sa babae); at
  5. May bachelor’s degree.

Para naman sa mga nakapagtapos ng Philippine National Police Academy (PNPA), nararapat na maipasa ang qualifying exam at training upang maging isang police official na may ranggong lieutenant o tinyente.

Sakaling makapasa sa pagsusulit, maaaring mag-apply para sa posisyon sa Napolcom. Ang appointment at recruitment requirements para maging isang police officer ay ang mga sumusunod:

  1. Kailangan ay isang Filipino citizen;
  2. May edad na hindi hihigit sa 30 taon;
  3. May taas na 1.62 metro (para sa lalaki) at 1.57 metro (para sa babae);
  4. Kung miyembro ng indigenous community, may taas na 1.52 metro (para sa lalaki) at 1.45 metro (para sa babae);
  5. May bachelor’s degree;
  6. May good moral character;
  7. Nakapasa sa physical, mental at health examinations sa anomang ospital na accredited ng Napolcom; at
  8. Matatawag na eligible alinsunod sa Eligibility Standards na itinakda ng PNP.

Ang bawat PNPA cadet ay may monthly pay at allowances na mahigit P14,000 hanggang P29,000.

Sa kabila ng magagandang benepisyo at allowances nito ay kinakailangan ding sanayin at isailalim ang lahat ng kadete sa matinding physical training sa loob ng labing-anim na linggo.

Kabilang sa kanilang pagsasanay ay ang basic military and jungle warfare, weapons training, military tactics-techniques-procedures, combat standard operation procedure, intelligence, civil-military operations at lectures sa pagbibigay importansya at respeto sa human rights, international humanitarian law, rule of law at ang kahalagahan ng honor code.

SPECIAL ACTION FORCE

Bagama’t sinasabing civilian in nature ang PNP, mayroon din itong counterpart ng AFP, ito ay ang elite force na Special Action Force (SAF) o ang yunit sa pambansang pulisya kontra terorismo at iba pang mabibigat na banta sa seguridad ng bansa.

Ang mga pulis na nais maging SAF officers ay kailangang matugunan muna ang general requirements at documentary requirements ng isang Patrolman bago sumailalim sa anim na buwang basic public safety course sa National Police Training Institute sa Laguna. Mula rito ay tutulak na sa field training ang mga pulis para sa panibagong anim na buwan na pagsasanay.

Ang field training program ng SAF ay maihahalintulad sa on-the-job training program para sa lahat ng baguhang pulis. Ipakakalat sila sa mga istasyon para maramdaman ang trabaho ng pulis mula sa pag-iimbestiga at intelligence work, pangangasiwa ng trapiko at pagpapatrulya. Susundan na ito ng commando course na tumatagal ng anim na buwan hanggang dalawang taon.

Read More

DAGDAG-SAHOD NG PULIS, SUNDALO MATATANGGAP NA

(NI BETH JULIAN)

GOOD news!

Inaasahang matatanggap na ng mga sundalo at mga uniformed personnel ang kanilang inaasam na dagdag sweldo.

Ayon kay Budget and Management Officer in charge Janet Abuel, inaprubahan na ni Pangulong Rodrigo Duterte ang national budget no. 576 na nagsisilbing panuntunan  para sa second tranche ng naturang dagdag sahod.

Paliwanag ni Abuel, dapat ay noong Enero pa ito naipatupad pero naantala ito dahil sa pagkabinbin ng pagpasa sa 2019 national budget.

Gayunpaman, naka-retroactive naman ang naturang dagdag sahod simula Enero 1, 2019, kaya walang dapat na ipag alala.

Sakop ng dagdag sahod ang lahat ng law enforcement agencies maging ng law enforcement personnel ng Philippine National Police (PNP).

 

Read More

PULIS, SUNDALO NA ‘GOONS’ NG POLITIKO BINALAAN NI DU30

PNP100

(NI BETH JULIAN)

MAHIGPIT na nagbabala si Pangulong Rodrigo Duterte sa mga kasapi ng Armed Forces of the Philippines (AFP) at Philippine National Police (PNP) na mananagot sa kanya ang mahuhuli nitong sumusuporta at nagsisilbing ‘goons’ sa mga tumatakbong kandidato ngayong May 2019 elections.

Kaya nanan pinayuhan ng  Pangulo ang mga sundalo at pulis na manatiling neutral o nasa gitna at huwag papanig kaninuman sa mga tumatakbong kandidato.

Binigyan-diin ng Pangulo na hindi trabaho ng mga sundalo at pulis na magsilbing ‘alalay o goons’ ng mga politiko dahil ang trabaho ng mga ito ay magpanatili ng law and order o magpatupad ng batas, kaayusan nang walang takot at kinakampihan.

Ayon sa Pangulo, sa halip ay iniutos nito sa mga pulis at sundalo na magsilabas at paigtingin ang pagwasak o pagbuwag sa mga organized crime group at mga sindikato ng ilegal na droga pati na ang mga organized kidnapping syndicate.

Read More

3 PULIS-CALOOCAN, PINATAY SI KIAN – KORTE

Habang-buhay na pagkabilanggo ang ipinataw na parusa ng korte sa tatlong pulis ng Lungsod ng Caloocan dahil sa pagpatay sa 16-taong-gulang na si Kian delos Santos noong Agosto 2017.

Nakumbinsi si Caloocan City Branch 125 Judge Rodolfo Azucena Jr. na walang dudang “guilty” sina PO3 Arnel Oares, PO1 Jeremias Pereda at PO1 Jerwin Cruz sa pagpatay kay Delos Santos.

Sabi ni Azucena, labag sa Artikulo 248 ng Revised Penal Code alinsunod sa inamiyendahang Republic Act No. 7659.

Makukulong ng 30 taon hanggang 40 (o reclusion perpetua) sina Oares, Pereda at Cruz batay sa tinakda ng batas.

Absuwelto naman silang tatlo sa kasong pagtatanim ng ebidensiya laban kay Delos Santos, sapagkat kapos ang batayan ng prosecution.

Naging kontrobersiyal ang pagkamatay ni Delos Santos noong Agosto ng nakalipas na taon dahil nai-palabas sa TV ang nakunan ng CCTV ang pagkaladkad at pagpatay sa noo’y Grade 11 student.

Maatapos ang insidente, kaliwa’t kanang kritisismo ang iwinasiwas ng oposisyon sa madugong illegal drug operation ng administrasyong Duterte, partikular na kay Pangulong Rodrigo Duterte mismo.

Si Delos Santos ay pinaniniwalang drug runner sa kanilang barangay sa Caloocan, ngunit tahasang itong itinanggi ng kanyang pamilya.

Ikinatuwa naman ni Magdalo party-list Rep. Gary Alejano ang desisyon, sapagkat “ang pag-usad ng kaso ni Kian delos Santos ay isang senyales na may pag-asa pa sa ating bansa.”

Ngunit, idiniin niyang “simula pa lamang ng ating laban para sa hustisya.”

“Walang nakaliligtas sa katarungan. Unang hakbang pa lamang sa pakikipaglaban tungo sa katarungan para kay Kian at iba pang mga biktima ng madugong kampanya laban sa iligal na droga ni Pangulong Duterte,” banggit ni Akbayan party-list Rep. Tom Villarin.

Iginalang din ng Malakanyang ang pasya ng korte.

Read More