SOURCE NG P74.9-M DROGANG NASABAT SA CAVITE, METRO; DRUG LORD SA BILIBID TULOY ANG NEGOSYO

0

UMABOT sa P74.9 milyong halaga ng ilegal na droga ang nakumpiska ng mga awtoridad sa tatlong magkakahiwalay na operasyon sa Bacoor City sa Cavite, Valenzuela City, Quezon City at Caloocan City.

Sa Bacoor City, nasabat ang tinatayang P68 milyong halaga ng umano’y shabu na ibabagsak sana sa Metro Manila at sa lalawigang ito, makaraang madakip ng mga awtoridad ang dalawang hinihinalang tulak ng ilegal na droga sa Panapaan, Bacoor City.

Sina Reynaldo Moral Cordero at Irene Ilaya Biazon, kapwa residente ng Maricaban, Pasay City, ay natimbog bandang 6:30 ng gabi noong Enero 27 sa Panapaan 4 , Bacoor City.

Lulan ng isang Mitsubishi Lancer (WTY-942 ) ang dalawa nang kapwa madakip ng mga tauhan ng National Bureau of Investigation (NBI).

Ayon kay NBI Director Dante Gierran, isang impormante ang nagbigay ng tip hinggil sa transaksiyon ng mga suspek sa NBI-MIMAROPA.

Bunsod nito, nagkasa ng operasyon ang magkasanib na puwersa ng NBI-NCR at ng NBI-MIMAROPA at hinarang ang sasakyan ng mga suspek na nagresulta sa pagkakakumpiska sa 10 kilo ng hinihinalang shabu na tinatayang P68 milyon ang halaga.

Samantala, kumpiskado naman ang mahigit P5.9 milyon halaga ng umano’y shabu at marijuana sa dalawang umano’y drug pushers na nadakip sa magkahiwalay na buy-bust operation sa mga lungsod ng Caloocan at Valenzuela noong Miyerkoles ng gabi.

Ayon sa ulat, dakong alas-9:00 ng gabi nang madamba si Omair Sultan, 23, ng Phase 12, Brgy. 188, Tala sa Domato Avenue, Phase 12, matapos bentahan ng shabu ang isang undercover na pulis kapalit ng P20,000 marked money kabilang ang isang tunay na P1,000 at 19 piraso ng boodle money.

Bukod sa nasabing kontrabando, nakuha rin sa suspek ang medium size plastic ice bag na naglalaman ng 680 gramo ng shabu na tinatayang P4,624,000 ang street value.

Alas-8:30 naman ng gabi nang masakote ang habal-habal driver na si Dominic Aposaga, 26, sa buy-bust operation sa kanyang bahay sa 76 Gladiola St., Bahayang Pag-asa Subd. sa Maysan, Valenzuela matapos bentahan ng isang plastic bag ng pinatuyong dahon ng marijuana ang isang poseur buyer.

Nakumpiska kay Aposaga ang 14 piraso ng pinatuyong stems at dahon ng marijuana na nakabalot sa transparent plastic, apat na bloke ng ng marijuana, kalahating bloke ng marijuana at pitong plastic sachets ng marijuana na umaabot lahat sa 11 kilo at nasa P1,320,000 ang halaga, P5,000 buy-bust money, dalawang digital weighing scale at P300 cash.

Sa Quezon City, arestado ang suspek na si Dennis Pacanas y Ibañes, 38, anyos, sa isinagawang buy-bust operation sa #108 Lower Everlasting St., Brgy. Payatas A, Quezon City dakong alas-4:30 ng hapon noong Enero 29.

Ayon kay SDEU P/Major Sandie Caparroso, sa nasabing operasyon ay nakumpiska mula sa suspek ang P1 milyong halaga ng umano’y shabu.

Ang mga suspek ay nahaharap sa kasong paglabag sa RA 9165 o Comprehensive Dangerous Drugs Act of 2002. (RENE CRISOSTOMO/ALAIN AJERO)

2 BUMALIK SA ISLA NG TAAL, MISSING; NATABUNANG ASO, NASAGIP.

BATANGAS – Hindi pa rin natatagpuan ang dalawang lalaking bumalik sa isla ng Taal sa kasagsagan ng pag-aalburoto ng bulkan noong Enero 12.

Kinilala ang mga nawawala na sina Alexander Dando Jr. at Marlon Deteral, kapwa residente ng Barangay Alas-As sa isla ng Taal, sakop ng bayan ng San Nicolas.

Ayon sa mga kaanak ni Dando, bandang alas-4:30 ng hapon noong Linggo, Enero 12, nag-text ang biktima at sinabing bumalik siya sa isla dahil sa paniwalang humuhupa na ang pag-aalburoto ng bulkan.

Alas-11:00 ng umaga noon nang mag-alisan ang mga residente sa isla dahil sa aktibidad ng Taal.

Nakalikas na umano si Dando ngunit dahil nakainom ay naging makulit at nagpasyang bumalik. Mula noon ay hindi na siya makontak ng mga kaanak.

Sa kabilang dako, tumanggi naman umanong sumakay sa huling papaalis na bangka sa isla ang nawawala ring si Deteral.

Ayon sa kapatid, bumalik ang biktima sa kanilang bahay sa pag-aakalang naiwan ang kanilang ina  na napag-alamang nauna na palang nakalikas. Hindi na rin nakita si Deteral mula noon.

Makalipas ang halos dalawang linggo, umaasa pa rin ang mga kaanak ng dalawa na nakaalis ang mga ito sa isla at napunta lamang sa malayong evacuation center.

Ayon naman sa mga awtoridad, hindi pa sila makapagsagawa ng search and rescue operation dahil sa naka-lock down pa rin ang buong isla.

Samantala, himalang nasagip ang isang aso na 15 araw na nabaon sa makapal na abo na galing sa Bulkang Taal.

Sa video post ng netizen na si Germie Balba, makikitang binalikan ng kanyang kapatid ang kanilang bahay sa Barangay Pulangbato, sa bayan ng San Nicolas noong Lunes, 15 araw makalipas ang pag-alburoto ng Taal.

Ang Pulangbato ay isa sa mga barangay na nasa mismong pulo ng Taal volcano sakop ng bayan ng San Nicolas.

Laking tuwa ng dalawa nang matapos nilang hukayin ang makapal na abo ay tumambad ang hawlang kahoy  na kinalalagyan ng aspin na si Idol.

Winasak nila ang hawla at sinikap na mailabas si Idol na halos ay namayat na sa uhaw at gutom.

Kahit naghihina, lumakad at tumayo ang aso at tinanaw ang kabuuan ng isla na tila naninibago sa kanyang kapaligiran.

Laking tuwa naman ng mga netizen sa pagkakaligtas kay Idol at sa pagmamalasakit ng magkapatid na hukayin ang kinaroroonan ng aso. (NILOU DEL CARMEN)

LALAKI PATAY SA TAGA NG PAMANGKIN DAHIL NANGHIRAM NG BATERYA NANG WALANG PAALAM

CAPIZ – Patay ang isang lalaki nang pagtatagain siya ng pamangkin matapos niyang ipahiram ang baterya ng sasakyan ng suspek, iniulat nitong Huwebes ng umaga sa lalawigang ito.

Kinilala ang biktimang si Esmundo Gapi, 62-anyos, residente ng Barangay San Nicholas, Tapaz, Capiz.

Kusa namang sumuko sa pulisya ang suspek at pamangkin ng biktima na kinilalang si Joey Melicado, 35-anyos, residente ng nasabing lugar.

Batay sa report ng Tapaz Municipal Police Station, nagtalo ang magtiyuhin nang malaman ng suspek na ipinahiram ng biktima ang baterya ng kanyang sasakyan na hindi ipinaalam sa kanya.

Sa tindi ng galit ng suspek, kumuha siya ng itak at pinagtataga sa ulo at tiyan ang kanyang tiyuhin.

Agad namang dinala sa ospital ang biktima ngunit idineklarang patay na. (ANNIE PINEDA)

MAGSASAKA, KALABAW NAKURYENTE SA PALAYAN

LEYTE – Patay ang isang magsasaka at alaga nitong kalabaw makaraang makuryente nang  masagi nila ang nakalaylay na live wire sa palayan, iniulat nitong Huwebes ng umaga sa lalawigang ito.

Kinilala ang namatay na si Romualdo Pace, 69, residente ng Brgy. Santiago, Alangalang, Leyte.

Batay sa repot ng Alangalang Municipal Police Station, nangyari ang insidente sa Brgy. Tombo, bayan ng Alangalang sa nasabing lalawigan.

Lumabas sa imbetigasyon, hila-hila ni Pace ang kanyang alagang kalabaw patungong bukid habang may kargang abono nang masagip nila ang naputol na live wire na umano’y naputol sa pananalasa ng bagyong Ursula ngunit hindi naayos ng Leyte III Electric Cooperative (LEYECO III).

Bunsod nito, nagkikisay si Pace at bumulagta sa gitna ng daan habang nasunog naman ang kalahating parte ng katawan ng kalabaw.

Patuloy ang imbestigasyon sa pulisya sa insidente at inaalam kung may pananagutan ang LEYECO dahil sa kapabayaan.

Hustisya naman ang sigaw ng pamilya ni Pace. (ANNIE PINEDA)

MAG-ASAWA NAGLAKO NG SHABU

CAVITE – Nabisto na hindi lamang gulay ang itinitinda ng isang mag-asawa makaraang madakip sa buy-bust operation sa bayan ng Tanza sa lalawigang ito.

Nahaharap sa kasong paglabag sa RA 9165 o Comprehensive Dangerous Drugs Act of 2002, ang mag-asawang sina Enrique Herrera, alyas “Rick”, 51, magsasaka, at Clarita, 50, vendor ng gulay, kapwa residente ng Brgy. Paradahan 1, Tanza, Cavite.

Ayon sa ulat  ni Pat. Ehdcel Manalo ng Tanza Municipal Police Station, dakong alas-7:30 kamakalawa ng gabi nang naaresto ang mag-asawa sa aktong nakikipagtransaksyon sa isang poseur buyer sa Brgy. Paradahan 1, Tanza.

Nauna rito,  nakatanggap ng impormasyon ang Tanza CPS na bukod sa pagbebenta ng gulay, ang mag-asawa ay dumidiskarte rin sa pagtutulak ng ilegal na droga kaya nagkasa ng buy-bust operation ang mga awtoridad na nagresulta sa pagkakadakip sa dalawa.

Nakuha sa mag-asawa ang isang sachet ng shabu o 1 gramo na P2,000 ang street value.

Ang mag-asawa na kabilang sa listahan ng  Street Level Target  (SLT) watchlist, ay kapwa nakakulong na sa Tanza Custodial Center. (SIGFRED ADSUARA) 

GURO KINATAY NG KATAGAY

PANGASINAN – Patay ang isang guro makaaang pagsasaksakin at gilitan sa leeg ng dalawang kainuman, iniulat nitong Huwebes ng umaga sa lalawigang ito.

Kinilala ang biktimang si Arnaldo Tabucol, 29-anyos, English teacher at residente ng Tayug, Pangasinan.

Batay sa report ng Tayug Police Station, noong Martes nang matagpuan ang bangkay ng biktima sa bukid sa Brgy. Libertad, ng nasabing bayan.

Lumabas sa imbestigasyon, bago ang insidente, nakita ang biktima habang nakikipag-inuman sa mgA suspek ngunit hindi na nakauwi sa kanilang bahay.

Sa follow-up operation ng pulisya, nadakip ang 17-anyos na suspek nang makorner sa isang checkpoint gamit ang motorsiklo ng biktima.

Samantala, patuloy ang mga awtoridad sa pagtugis sa isa pang suspek.

Nagpapatuloy ang imbestigasyon ng pulisya para alamin ang posibleng motibo sa pagpaslang sa biktima. (ANNIE PINEDA)

PULIS PATAY SA TANDEM

NEGROS Oriental – Patay ang isang pulis makaraang pagbabarilin ng riding in tandem, iniulat ng mga awtoridad nitong Huwebes ng umaga sa lalawigang ito.

Kinilala ang biktimang si Executive Master Sergeant Roldan Esmajer, nakadestino sa San Jose Municipal Police Station, at residente ng Barangay Tampi ng nasabing bayan.

Batay sa report ng San Jose Municipal Police Station, nangyari ang insidente sa Barangay Tapon Norte B ng naturang bayan.

Lumabas sa paunang imbestigasyon, sakay ang biktima ng motorsiklo nang walang habas siyang pagbabarilin ng riding in tandem.

Agad namang dinala sa Siliman University Medical Center ang biktima ngunit nalagutan ng hininga sanhi ng mga tama na bala sa iba’t ibang parte ng katawan.

Nagpapatuloy ang imbestigasyon ng pulisya para alamin ang posibleng na motibo sa krimen. (ANNIE PINEDA)

LALAKI NAHULOG  SA BANGIN, PATAY

CAMARINES Sur – Walang buhay na natagpuan ang isang lalaki na hinihinalang nahulog sa bangin, iniulat ng pulisya nitong Huwebes ng umaga sa lalawigang ito.

Kinilala ang biktimang si Ruel Llanita, 30-anyos at residente ng Sitio Bulalahin, Brgy. Tible, Sipocot, Camarines Sur.

Batay sa report ng Sipocot-PNP, nakita na lamang ang bangkay ng biktima sa bangin na may lalim na 25-talampakan, ilang metro ang layo mula sa kanilang tahanan.

Ayon sa kaanak, umaga ng umalis sa kanilang bahay si Llanita para pumunta sa kanyang sakahan ngunit gabi na ay hindi pa rin ito nakauuwi.

Agad namang hinanap ng kanyang pamilya ang biktima at natagpuan ito sa bangin ngunit wala nang buhay sanhi ng sugat sa ulo at katawan.

Nagpapatuloy ang imbestigasyon ng pulisya para alamin kung may nangyaring foul play sa nasabing insidente. (ANNIE PINEDA)

3 KONSEHAL NAGSUNTUKAN SA LAOAG CITY HALL

ILOCOS Norte – Nauwi sa suntukan ang mainitang diskusyon sa kanilang sesyon ng tatlong city councilor sa Laoag City sa lalawigang ito, noong Miyerkoles bago maghatinggabi.

Nangyari ang rambulan sa harap ng Laoag City Hall na sakop ng Brgy. 10, bandang alas-11:24 sa pagitan umano nina City Councilors  Justine Clarence Gomez Chua, 26;  Edison Uy Chua, 56, kapwa residente ng Brgy. 16, at ang suspek na si City Councilor Edison Hernando Bonoan, kasama ang kanyang pamangkin na si Mark Christian Bonoan Dumbriguez, parehong nasa hustong gulang at residente ng Brgy. 50, Buttong,  pawang ng nasabing lunsod.

Batay sa imbestigasyon ng Laoag City Police Station, bago ang kaguluhan, paalis na umano si Councilor Justine Chua sa City Hall at ang kanyang mga kasamahan dakong alas-7:30 ng gabi, kung saan naroon din si Councilor Edison Bonoan at pamangkin nito.

Nasa loob na umano si Justine Chua ng sasakyan ng isa pang City Councilor na si Jaybee Baquiran, nang lapitan ito ni Edison Bonoan  at sinigawan ng  masasakit na salita at saka pinagsusuntok nang makailang beses sa mukha kaya napilitang gumanti ang biktima.

Nang mapansin naman ni Councilor Edison Chua na katabi sa upuan ni Justine, ang kaguluhan, agad itong bumaba ng sasakyan at sinuntok naman si Bonoan, sa puntong ito ay nakialam na si Mark Christian Dumbriquez at kanyang sinuntok si Councilor Edison Chua, dahilan para lumala ang kaguluhan.

Natigil lamang ang rambulan nang magresponde ang mga miyembro ng Civil Security Unit ng Loag City.

Nabatid na nagkaroon nang mainitang diskusyon ang mga councilor habang nagsasagawa ng sesyon bago nangyari ang suntukan. (NICK ECHEVARRIA) 

MISSING TAXI DRIVER, NATAGPUANG PATAY SA LOOB NG ISANG DRUM

NABUBULOK na ang bangkay ng isang nawawalang taxi driver nang matagpuan sa loob ng drum sa isang abandonadong comfort room sa Port Area, Manila, iniulat ng pulisya kahapon.

Ang biktimang si Jamal Tagsayan y Arurao, residente ng Barangay 647, Zone 67, San Miguel, Quiapo, Manila ay kinilala ng kanyang ina at tiyahin.

Batay sa imbestigasyon ni Det. Donald Panaligan ng Manila Police District-Homicide Section, bandang 1:10 ng hapon nitong Enero 29 nang madiskubre ang bangkay ng biktima sa loob ng isang CR sa Barangay 650, Zone 68, sa Port Area.

Natunton ang bangkay ng biktima dahil sa masangsang na amoy makaraan ang ilang araw na pagkawala.

Unang nakita ang nakalabas na mga paa ng biktima sa nasabing drum  at nakabalot sa plastic ang ulo.

Hindi pa matiyak kung may tama ng saksak o bala ng baril ng ang biktima.

Napag-alaman sa mga kaanak, tatlong araw nang nawawala ang biktima at ang minamanehong taxi nito ay natagpuan sa Cavite St. sa Sta Cruz, Manila.

Makaraang matagpuan ang taxi ay agad tumawag ang operator nito sa asawa ng biktima sa Surigao.

Napag-alaman, tatlong araw na ang nakalilipas nang tumawag umano ang biktima sa kanyang misis at humihingi ng tulong.

“Ma.. tulungan mo ako, nandito ako sa Pier..” ito umano ang pahayag ng biktima nang huling tumawag sa kanyang misis.

Huling nakita ng ina na buhay ang biktima sa kanilang bahay sa San Agustin St., San Miguel, Manila.

Inaalam ng pulisya kung hinoldap o may kinalaman sa ilegal na droga ang pagpaslang sa biktima. (RENE CRISOSTOMO)

3 CHINESE ARESTADO SA SEX DEN SA MAKATI

ARESTADO ang tatlong Chinese national makaraang salakayin ng mga tauhan ng Makati City Police ang isang establisimiyento na hinihinalang sex den, habang nasagip ang 13 kababaihan at limang empleyado sa lungsod na ito, noong Miyerkoles ng gabi.

Kinilala ni Police Col. Rogelio Simon, hepe ng Makati City Police ang mga arestado na sina Kevin Sy, 25, at Xiao Lao, 23, kapwa maintainer umano ng sex den, at ang kustomer na si Tong Po, 25-anyos.

Habang 13 kababaihan ang nasagip, kabilang ang siyam na Chinese nationals, dalawang Russian at dalawang Vietnamese, habang limang empleyadong Filipino ang inimbitahan ng pulisya para sa imbestigasyon.

Base sa isinumiteng report ni Simon, nakumpirma ang ilegal na operasyon sa Golden Dragon Spa sa #1847 K&K Building sa Evangelista St., Barangay Pio del Pilar ng naturang lungsod.

Ayon sa ulat, isang police asset ang nagpanggap na kustomer at nagbayad ng halagang P22,000 para sa sex service sa mga dayuhang babae.

Dakong alas-10:35 ng gabi nang salakayin ng mga tauhan ng Station Investigation and Detective Management Section, sa pangunguna ni Police Major Gideon Ines, ang naturang establisimiyento.

Pagkaraan ay tumambad sa kanila ang mga babaeng dayuhan sa mga kuwarto at may nakitang condoms at sex toys.

Agad namang dinala ang mga dayuhan sa nasabing himpilan ng pulisya at ang mga babaeng nasagip ay dinala sa tanggapan ng Women and Children’s Protection Desk.

Nahaharap ang tatlong naarestong dayuhan sa kasong human trafficking habang inaalam ng pulisya kung may kaukulang business permit ang establisimiyento para tuluyan itong maipasara.

Sinabi ni Simon, pang-anim na establisimiyento na ginagawang sex den ang kanila nang sinalakay sa nasabing lungsod.

FIL-AM, 2 PA TIKLO SA DROGA

ARESTADO ang tatlong kalalakihan, kabilang ang isang Filipino-American national, nang mahulihan ng P.6 milyong halaga ng high grade marijuana at ecstacy sa ikinasang buy-bust operation ng mga pulis kahapon ng madaling araw sa Taguig City.

Kinilala ni Police Col. Celso Rodriquez, hepe ng Taguig City Police, ang mga nadakip na sina Reggie Raphael Galang, 28, ng Room 8003, Tower 2, Ridgewood Tower, Condo Corp, C5, Barangay Ususan, Taguig City; Joshua Cuanzon, 31, tubong Alaska, USA, nakatira sa  #2025 Cityland Vito Cruz Towers,  at Yuan Marc Mendoza, 19, ng #909 University Pad, kapwa taga  Malate, Maynila.

Batay sa isinumiteng report ni Police Col. Rodriquez, dakong ala-1:45 ng madaling araw nang isagawa ang buy-bust operation ng mga tauhan ng Station Drugs Enforcement Unit (SDRU) laban sa mga suspek malapit sa gasoline station sa C5 Road, Barangay Ususan, Taguig City.

Isang pulis ang nagpanggap na bibili ng droga at nang magpositibo ay inaresto ang mga suspek.

Nakumpiska sa mga suspek ang limang pirasong malalaking ziplock ng high grade marijuana, 3 maliliit na ziplock ng nasabi ring droga, tatlong malalaking ziplock ng ecstacy powder at isang malaking ziplock na may lamang kapsula.

Sinabi ng opisyal, ang high grade marijuana ay nasa 177 gramo na may halagang P212,000 at ang powder ecstasy ay nasa 89.85 gramo, na may halagang P476,205.

Ang mga suspek ay nakakulong na sa nasabing himpilan ng pulisya at sasampahan ng kasong paglabag sa Section 5 and 11 Article II ng Republic Act  9165 0 Comprehensive Dangerous Drugs Act of 2002.

MAG-ASAWANG SENIOR SA QC PINATAY

PATAY na nang matagpuan ang mag-asawang senior citizen sa kanilang bahay sa Barangay Commonwealth, Quezon City.

Tinukoy ng pulisya ang pagkakakilanlan ng mga biktimang sina Leonardo Ollano, 69, at Nida Ollano, 63-anyos.

Batay sa pagsisiyasat ng Quezon City Police District (QCPD), nangyari ang krimen dakong alas-8:45 noong Huwebes ng gabi sa bahay ng mga biktima sa Maya Street ng nabanggit na barangay.

Sa salaysay sa pulisya ng kaanak ng mag-asawa na si Hermogenes Timola, walang ilaw at nakakandado ang pintuan ng kanilang bahay nang siya ay dumating.

Bunsod nito, napilitan umano siyang dumaan sa ikalawang palapag ng bahay at tumambad sa kanya ang magulong mga gamit.

Pagbaba ni Timola sa sala ay nadiskubre niya ang mga biktima na nakahandusay at tadtad ng saksak sa katawan.

Hindi natagpuan ng pulisya sa lugar ang kutsilyo na ginamit sa krimen maliban sa isang pares ng tsinelas na posibleng naiwan ng suspek.

Pagnanakaw ang isa sa tinitingnang motibo ng pulisya sa krimen. (JG TUMBADO)

 

Read More

SUSPENSIYON NI RODERICK PAULATE PINAGTIBAY NG SANDIGAN

roderick12
0

PINAGTIBAY ng Sandiganbayan ang naunang ipinataw na 90-araw suspension order kay Quezon City Councilor at aktor na si Roderick Paulate.

Kasabay ito ng pagtanggi sa inihaing motion for reconsideration ng kampo ni Paulate, tumatakbong vice mayor sa lungsod, na nahaharap sa mga kasong graft and falsification dahil sa pagkuha umano ng nasa 30 ghost employees sa kanyang tanggapan.

Sa resolusyon na may petsang March 29, isinaad ng Seventh Division na kulang sa merito ang inihihirit na mosyon ng 59-year-old celebrity politician.

Una nang iginiit ni Paulate na ang pagsuspinde sa kanya ay dapat isinagawa bago pa man ang kanyang arraignment o pagbasa ng sakdal.

Read More

90% NG MANILA WATER CONSUMERS MAY TUBIG NA

water
0

SA kabila ng pagkakabalik ng tubig sa halos 90% consumer sa east zone ng Metro Manila, sinabi ng Metropolitan Waterworks and Sewerage System (MWSS) na hindi pa rin tapos ang krisis sa tubig ng Manila Water.

Gayong naibalik na ang supply ng tubig, nanatiling hamon pa rin ang kawalan ng supply sa ilang bahagi ng Mandaluyong at Quezon City.

Ilang linggong nawalan ng tubig sa east zone dahilan para mairita ang mga consumer ng Manila Water sa perhuwisyong dulot nito. Maging ang mga negosyo ay nalugi habang ang ilan at pansamantalang nagbawas ng trabahador.

Sinabi ni Cabinet Sec. Karlo Nograles, nakatakdang i-endorso kay Pangulong Rodrigo Duterte ang draft ng EO sa unang linggo ng Abril para pinal itong maaprubahan bago magtapos ang panahon ng tag-init.

Sa ilalim nito, target ng Palasyo na bigyan ng kapangyarihan ang National Water Resources Board para gumawa ng mga polisiya at hakbang kaugnay sa supply ng tubig

Read More

2 PULIS NAG-IINUMAN SA CANTEEN IIMBESTIGAHAN

police500
0

(NI JG TUMBADO)

IIMBESTIGAHAN na ng Philippine National Police (PNP) ang dalawang miyembro nitong nahuli sa aktong nag-iinuman sa pampublikong lugar sa Quezon City, Lunes ng gabi.

Ayon kay Sr. Supt. Bernard Banac, tagapagsalita ng PNP, maaaring mapanagot sa kasong administratibo at iimbestigahan ng PNP Internal Affairs Service sina SPO1 Franklin Nariz at PO3 Tristan Callao.

Si Nariz ay nakatalaga sa PNP Maritime Group habang si Callao naman ay naka-assign sa Headquarters Support Service ng Kampo Crame.

Diin ni Banac, mahigpit nang ipinagbabawal sa mga pulis na uminom ng alak sa mga pampublikong lugar, naka-uniporme o hindi sa layong mapanatili ang magandang imahe ng pambansang pulisya.

“Iwasan natin ang anything na makacontribute sa negative image whether nakauniporme kayo o hindi, for as long as public place ‘yan, iwasan na lang po natin,” pahayag ni Banac.

Sinabi ni Banac na maaaring maharap sa parusang suspensyon o demotion ang dalawang pulis.

Hawak na ng Counter Intelligence Task Force ang mga larawan at video na nagpapakitang nag-iinuman sina Nariz at Callao sa Korabs Canteen sa Justice Lourdes Paredes San Diego Avenue, Quezon City.

“We assure the public that we will continue to pursue our campaign on internal cleansing and we will not hesitate to dismiss personnel from the service to rid our ranks of misfits and scalawags,” dagdag pahayag ng opisyal.

Read More

SINLAKI NG MANILA, QC TATABUNAN SA MANILA BAY

manila 14
0

(NI BERNARD TAGUINOD)

KASING-LAKI ng pinagsamang land area ng Lungsod ng Maynila at Quezon City ang tatabunan sa Manila Bay kapag natuloy ang 22 reclamation projects sa nasabing karagatan.

Gayunman, sinabi ni Gabriela party-list Rep. Arlene Brosas na walang pakinabang ang mga mahihirap sa reclamation projects na ito bagkus ay mabibiktima ang mga ito lalo na ang mga nakatira sa mga mahihirap na komunidad malapit sa Manila Bay.

“Imagine, the area to be reclaimed in as huge as the entire Quezon City and Manila combined. And this is not to house poor families but to house mega casinos and commercial establishments catering to the rich,” ani Brosas.

Unang kinumpirma ng mga kinatawan ng Philippine Reclamation Authority (PRA) sa pagdinig ng House committee on metro manila development na 22 projects ang inaply sa kanilang tanggapan para sa 22,2000 ektaryang reclamation sa Manila Bay.

Ganito aniya ang kalaki ng land area ng Lungsod ng Maynila at Quezon City at manganganib ang mga nakatira umano sa mga dalampasigan o malapit sa dagat dahil wawalisin ang mga ito kalaunan.

“Walang puso ang reklamasyong ito, na pinapakete at pinatatamis gamit ang pekeng rehabilitasyon ng Manila Bay,” ayon pa sa mambabatas dahil tinatayang 300,000 pamilya ang wawalisin sa kanilang tirahan at ipalit sa kanilang lugar ang mga mayayaman.

Nangangamba din ang lady solon na mapapadali ang pag-apruba sa mga reclamation projects na ito ngayong inilipat na ni Pangulong Rodrigo Duterte ang PRA sa kanyang tanggapapan.

Dahil dito, dapat aniyang tutulan ang nasabing mga proyekto dahil isinasakripisyo ng gobyerno umano ang kapakanan ng mga mahihirap para bigyan daan ang mga dayuhang negosyante na maglalagak ng puhunan na irereclaim na bahagi ng Manila Bay.

Read More

MODELS, EVENT ORGANIZER HULI SA P800K SHABU

BARS
0

DALAWANG part-time models at isang event organizer na sinasabing drug supplier ang nahulihan ng mahigit sa P800,000 halaga ng shabu sa isang condominium sa Tomas Morato, Quezon City.

Nakuha sa mga suspect na sina sina Billy Joe Kakilala at Ronnie Toribio, at ang event organizer na si Abby Forteza Oba ang ecstasy tablets at liquid, shabu at cocaine gayundin ang drug paraphernalia sa buy bust operation ng PDEA.

Sinabi ng PDEA na supplier ang tatlo sa mga kilalang bar sa Quezon City at sa Bonifacio Global City kung saan mga mayayamang partygoer at kasamahang model ang regular nilang customers.

Itinuro na rin ng mga ito ang suspek na pinagkukunan ng droga na ngayon ay hinahanting na ng pulisya.

Read More

BUMAHA NG LUHA; BELTRAN INILIBING NA

beltran9
0

(NI TJ DELOS REYES/PHOTO BY EDD CASTRO)

BUMAHA ng luha ang paghahatid ng pamilya at mga taga supporter sa labi ng pinaslang na si Bagong Silangan Chairwoman Crisell ‘Beng’ Beltran sa huling hantungan nito kahapon sa Forest Lawn Cemetery, Rodriguez Rizal.

Libu-libong mga tagasuporta ang siyang nakipaglibing na pawang nakasuot ng puti tshirt na may nakasulat na ‘Justice for Beng Beltran’.

Karamihan naman sa mga residente ng Bagong Silang ay naglabasan sa kanilang bahay upang sa huling pagkakataon ay kanilang makita ang kanilang inidolo at minahal na kanilang kapitana.

Paniwala ng grupo na kahit na mayroon nang nadakip ang Quezon City Police District na sinasabing mga  pumatay kay Beltran ay hindi sila kuntento dahil hanggang sa kasalukuyan ay wala pa rin nailalabas ang kapulisan kung sino ang nag-utos o mastermind sa pananambang at pagpatay sa kanilang chairwoman.

Tanong pa rin ng nakakarami na bakit nalusutan ang QCPD samantala dapat sila ay nakaalerto dahil sa pinatutupad na Comelec Gun Ban.

Masyado rin daw mapangahas ang mga suspek dahil isinakatuparan ang pagpatay sa katanghalian na tapat dahilan upang posibleng makapangyarihan na tao ang nag-utos upang paslangin si Beltran.

Magugunita na linggo Pebrero 3, nang iprisenta ng pamunuan ng QCPD ang apat na suspek na kanilang dinakip  at tinuturong responsable sa pagpatay sa kapitana na nakilala na sina Teofilo Formanes,   magkakapatid na sina Ruel Juab, Orlando Juab at Joppy Juab.

Ang mga nasabing suspek ay kapwa kinasuhan ng double murder at multiple frustrated murder dahil sa pagpatay kay Beltran at sa drayber nitong si Melchor Salita at ikinasugat na apat na indibidwal.

Suspetsa ng pamilya at supporters ng Kapitana na posibleng ‘fall guy’ lamang ang mga inaresto ng mga otoridad dahil hanggang sa kasalukuyan ay wala pa rin na maituro na mastermind ang mga suspek kung sino ang nagpagawa sa kanila na paslangin si Beltran.

Sa kaso ng pamamaslang kay Ako Bicol Partylist Representative Rodel Batocabe, nagsisuko ang mga salarin bunsod na rin sa laki ng pabuya na umabot sa P50 milyon kung saan mabilis nilang  ikinanta sa kapulisan na si Daraga Mayor Carlwyn Baldo na siyang nag-utos sa kanila.

Dahil dito, kumbisido ang pamilya ni Batocabe na kanila nang nakamtam nila ang hustisya dahil natukoy ang mastermind na  taliwas naman sa nangyari sa kaso ni Beltran na nanatiling blangko ang QCPD kung ano ang tunay motibo sa pagpatay sa Chairwoman.

“Gusto namin malaman kung ano ang motibo, gusto namin malaman kung sino ang mastermind, gusto namin madakip ito at mapanagot sa batas” galit na pahayag ng mga supporters ni Beltran.

Matatandaan na nagalit ang pamilya ng kapitana makaraan na hindi sila papasukin sa Kampo Karingal upang makita ang sinasabing suspek na pumatay sa kanilang mahal sa buhay.

Mas lalo pang ikinagalit ng mga ito nang sabihin ng pulis na ‘Utos daw ni Mam’ na hindi sila papasukin habang si Vice Mayor Joy Belmonte ay nasa loob habang iprinipresnta ng QCPD ang mga suspek.

Samantala ‘No Show’ ang pamilyang Belmonte sa paghahatid sa libingan ni Beltran na agad na  nagpahayag na isa sa malapit daw nilang kaibigan ang kapitana nang mabalitaan na pinatay ito.

Hindi rin nakita ang sana’y makakatunggali sa darating na election ni Beltran sa pagkakongresista ng 2nd District ng Quezon City  na sina Precious Hipolito asawa ni Congressman Winnie Castelo, Dante Liban at si Annie Susano.

Tanging dumalo at sumama sa paghahatid kay Beltran ang mga kaalyado nito na si Congressman Bingbong Crisologo na tumatakbong sa pagka-alkalde at Atty. Jopet Sison na lalaban sa pagka-bise alkalde ng nabanggit na lungsod.

Balak ni Crisologo na ang anak ni Beng na si Winsell Beltran ang siyang hahalili sa pagtakbo sa pagka-kongresista.

 

Read More

MASTERMIND TUTUKUYIN SA BELTRAN SLAY

beltran
0

INILANTAD na Linggo ng umaga ng Quezon City Police District (QCPD) ang apat na suspect at limang kasabwat sa pagpaslang kay barangay chairwoman at 2nd district congressional candidate Crisell ‘Beng’ Beltran.

Sina Teofilo Formanes, 48, ang magkapatid na sina Ruel Juab, 38, Orlando Juab, 32, at Joppy Juab, 28, ay iniharap ni QCPD Director Chief Supt. Joselito Esquivel Jr. sa isang press conference. Dalawa pang suspect ang hinahanap na kinilalang sina Warren Juan at Dutchboy Bello.

Lima pang kasabwat ang inaresto dahil sa illegal possession of firearms.

Patuloy pa rin ang imbestigasyon upang mabatid kung sino ang mastermind at kung paanong plinano ang pagpaslang.

 

HUSTISYA HINDI PA SAPAT

 

Bagama’t natimbog na ang mga pumatay umano kay Barangay Bagong Silangan Quezon City Captain Crisell “Beng” Beltran at driver nito, hindi pa rin kuntento ang isang mambabatas hangga’t hindi pa naaaresto ang nag-utos sa mga suspek na patayin ang biktima ng isa mga congressional candidate ng ikalawang distrito ng lungsod.

Kahapon ay ihinarap nina National Capital Region (NCR) Police Diretor Guillermo Eleazar at Quezon City Vice Mayor Joy Belmonte ang mga naarestong suspek.

“The arrest of these suspects is, but, an initial victory in our quest to attain justice for Kapitana Beng and her slain driver. We shall be closely monitoring the developments until all the perpetrators of this brutal crime are brought to justice,” ani Bagong Henerasyon party-list Rep. Bernadeth Herrera-Dy.

Makakamit lang umano ang buong hustisya sa sandaling matukoy, makasuhan at masentensyahan ang mga nag-utos sa mga nahuling suspek na patayin ang kapitana.

Gayunpaman, pinapurihan ng mambabatas ang PNP lalo na ang Special Task Group na binuo ni Quezon City Police District Director Joselito Esquivel sa maagap na pag-aresto sa mga suspek.

 

“Just less than a week since Kapitana Beng’s assassination, the policemen already have in their hands the  suspects who could pinpoint who the mastermind is,” ani Herrera-Dy.

Pinaalalahanan ng lady solon ang mga pulis na tiyaking malakas ang kasong isasampa sa mga salarin at makipag-ugnayan sa Department of Justice (DoJ) para masigurong hindi maibabasura sa korte ang isasamang kaso.

Read More

4 KILLERS NI QC CONGRESSIONAL BET BELTRAN HULI

kapitan
0

(PHOTO BY ARTURO SON)

ARESTADO ng awtoridad ang apat na suspect na umano’y nasa likod ng pagpaslang kay barangay chair Crisell ‘Beng’ Beltran na pambato rin sa 2nd district ng Quezon City para sa Kongreso sa May 13 midterm elections.

Maliban sa apat, lima pang hinihinalaang kasabwat ng mga ito ang inaresto sa illegal possession of firearms.

Hindi pa ibinubunyag ng Quezon City Police Department ang iba pang detalye dahil ihaharap ang mga ito sa media sa Camp Karingal ng alas-11 ng tanghali.

Si Beltran, kasama ang kanyang grupo ay sakay ng kanyang SUV sa J.P. Rizal St., malapit sa Filinvest 2, Barangay Bagong Silangan nang ambusin noong Martes ng tanghali.

Sakay ng tatlong motorsiklo ang mga suspect na rumatrat sa sasakyan ni Beltran.

Naglaan ang Quezon City government ng P5 milyong reward para sa sinumang makapagbibigay ng impormasyon sa mga pumaslang kay Beltran.

Read More