DAGDAG-PONDO SA DIALYSIS SA LUNG CENTER IBIBIGAY NG PCSO

sandracam12

(NI ABBY MENDOZA)

ISUSULONG ni Philippine Charity Sweepstakes Office (PCSO) Director Sandra Cam na madagdagan ang pondong ibininigay ng ahensya para sa dialysis treatment kasunod na rin ng pagdami ng mga pasyenteng nangangailangan ng tulong.

Si Cam ay bumisita ngayong Huwebes sa  sattelite office ng PCSO sa Lung Center of the Philippines(LCP)  kung saan namigay pa ito ng libreng arrozcaldo at itlog sa may mahigit 400 na pasyente at kaanak nito na nakapila para sa kanilang hinihinging medical assistance.

Hindi ito ang kauna unahang surprise visit ni Cam dahil madalas ito nagtutungo sa LCP kung saan maraming pasyente ang dumadagsa para humingi ng tulong, ayon kay Cam, nais nyang personal na tiyakin na maayos ang kalagayan ng mga pasyente at kaanak nito lalo at panahon na ng tag-ulan.

“Kahit bumabagyo hindi naman natitinag ang ating mga kababayan sa paghingi ng medical assistance kaya tayo sa PCSO ay sisiguraduhin natin na maayos ang kanilang lagay dito, may masisilungan na hindi naman sila malalamigan at mababasa lalo marami sa kanila ay gabi pa lang naghihintay na dito,umulan man o umaraw. Sa ngayon nakita naman natin na maayos ang kanilang kalagayan at masaya tayo na ganito ang ating dinatnan,” pahayag ni Cam.

Matapos ang paalmusal ay ilang pasyente ang dumulog kay Cam para hingin ang tulong nito na madagdagan ang pondo para sa dialysis.

Sinabi ni Alfredo Cruz ng Paranaque, 56 anyos, na 5 taon nang nagdidialysis, na magandang pagkakataon ang pagbisita ni Cam para idulog nila ang hiling na maitaas sana ang kanilang nakukuhang  pondo sa dialysis treatment, aniya, kung wala ang tulong ng gobyerno ay tiyak na matagal na syang sumuko sa kanyang sakit na End Stage Kidney Disease.

Inamin ni Cam na marami na ang lumapit sa kanya na humihiling na mataasan ng PCSO ang pondo sa dialysis at kanya nang kinakalap ang mga datos para maipresinta sa PCSO Board at kanilang mapag-aralan kung maaari at kung magkano ang maaari pang maidagdag na tulong ng gobyerno para sa mga pasyente.

Please follow and like us:
Read More

PANELO: SANDRA CAM MAAARING MAG-RESIGN KUNG GUSTO NIYA

SANDRACAM13

BINUWELTAHAN ng Malacanang ang pasabog ni Philippine Charity Sweepstakes Office (PCSO) board director Sandra Cam sa pagsabing malaya siyang makaaalis sa pwesto kung hindi na niya masikmura ang korupsiyon sa ahensiya.

Hindi na rin umano niya kailangan pa ang aksiyon ni Pangulong Rodrigo Duterte na alisin siya sa pwesto, ayon kay presidential spokesperson Salvador Panelo.

Isang press conference ang ipinatawag ni Cam noong Huwebes at hiniling nito sa Pangulo na sibakin na siya sa pwesto dahil umano sa mga katiwaliang nagaganap.

Ayon sa report, sinabi ni Cam na may P10 bilyon ang nawawala dahil sa Peryahan ng Bayan project.

Hinihimok din umano siya ng kapwa niya mga director na baligtarin ang PCSO Board Resolution 83 na kikila sa bagong opisyal ng Speedgame Inc. na nagsasagawa ng operasyon ng Small Town Lottery sa Pangasinan.

Sinabi ni Cam na may utang pa ang Speedgame sa ahensiya ng aabot sa P132 million. Hindi rin umano gumagawa ng hakbang ang PCSO na kolektahin ang utang ng mga STL operators.

Sinabi naman ni Panelo na isapormal ni Cam ang kanyang reklamo at isumite ito sa

Presidential Anti-Corruption Commission upang maaksiyunan ito.

Maaari rin siyang magsampa ng kaso laban sa mga tiwaling opisyal ng PCSO at isumite ito sa PACC.

Tiniyak naman ng Palasyo na magsasagawa ng imbestigasyon sa mga alegasyon ng korupsiyon sa PCSO.

 

 

 

Please follow and like us:
Read More

KATIWALIAN SA PCSO IBINUNYAG NI CAM

SANDRACAM13

(NI DAHLIA S. ANIN/PHOTO BY KIER CRUZ)

NAGWALKOUT sa kanilang special board meeting sa Philippine Charity Sweepstakes Office (PCSO) si Sandra Cam dahil sa pag-reverse ng desisyon ng board tungkol sa desisyon nila sa speed game.

Wala naman umanong sulat sa kanila ang OGCC, na siyang legal counsel ng PCSO para i-reverse ang kanilang board resolution number 83.

Ayon kay Cam, ito ang dahilan kung bakit umano mababa ang revenue ng ahensya.

Aabot umano sa P2 milyon ang nawawala sa kanila araw-araw dahil sa mga hindi naire-remit ng ilang STL operators lalo na ang nasa probinsya.

Isinawalat ni Cam sa media na karamihan sa mga STL operators na hindi nagbabayad ay mga sinasabing mistah umano ni Gen. Pinili na siyang GM ng PCSO.

Aabot na sa P10,727,819.81 ang dapat nilang singilin sa mga operators na ito na hindi nasingil sa loob ng tatlong taon, ayon pa kay Cam.

Nais umapela ni Cam sa Pangulo na i-revamp, o  i-relieve siya sa puwesto at ang lahat ng board members ng ahensya upang matigil umano ang korapsyon na ito.

Naniniwala si Cam na hindi umano dapat na militar ang nakaupo sa charity organization ng gobyerno kung saan ay dapat na may puso at malasakit sa kapwa ang maupo sa ahensiya upang tunay na makatulong sa kapwa.

Sinabi ni Cam na nag-iisa lamang umano siyang lumalaban sa mga katiwaliang ito at patuloy niya itong lalabanan dahil naawa siya sa mga taong pumipila upang humingi ng tulong at kakaunti lang ang naibibigay ng ahensya.

Hindi umano siya natatakot sa mga banta sa kanyang buhay dahil sanay na umano siya dito at ang nais niya lang ay makatulong sa mga tao na nangangailangan.

Hinihiling niya din niya sa Pangulo na ilagay na lamang siya sa ibang ahensya ng gobyerno kung saan mas makakakilos siya ng maayos.

 

Please follow and like us:
Read More