BAYANIHAN AT KAWALANGHIYAAN SA PANAHON NG SAKUNA

SIDEBAR

BIGLA ang pagsabog ng bulkang Taal noong hapon ng Linggo o isang araw matapos magbabala ang Philippine Institute of Volcanology ang Seismology (Phivolcs) sa pan-ganib na kinakaharap ng mga naninirahan malapit sa bulkan.

Pero sa kabila ng sakunang dala ng bulkang Taal, mabilis na rumesponde ang mga lokal na pamahalaan at agad inilikas ang mga nainirahan sa “danger zone” mula hapon hanggang gabi ng Linggo.

Kabilang ang AFP-Southern Luzon Command (Solcom) na naka-base sa Camp Nakar sa mabilis na nagpadala ng mag “humanitarian assistance and disaster relief” (HADR) units sa mga lugar na nasa “danger zone” para tumulong sa evacuation ng mga resi-dente.

Sinabi ng SOLCOM public information officer na si Col. Dennis Cana na dalawang platoon din ng mga sundalo mula sa 2nd Infantry Division sa Tanay, Rizal ang naka-deploy sa Batangas para tumulong sa mga apektado ng bulkang Taal.

Buhay na buhay ang ispirito ng bayanihan sa sakuna sa Batangas at pati ang lokal na pamahalaan ng Maynila sa pamamagitan ng Disasater Risk Reduction Management Office (DRRRMO) ay nagpadala ng mga ambulansiyang nakaantabay para sa mga sugatan.

Nagdeploy din ng mga truck na may tubig ang Alpha Fire Brigade mula sa Maynila pa-ra mamahagi ng tubig sa mga nagsilikas na residente sa paligid ng bulkang Taal.

Pati ang Metropolitan Manila Development Authority (MMDA) ay nag-deploy ng 30 per-sonnel sa lalawigan ng Batangas para tumulong sa mga nasalanta ng pagsabog ng bulkan. Nakasakay ang mga tauhan ng MMDA sa tatlong military, tatlong ambulansiya, at dalawang fire trucks.

May dala rin ang MMDA na 10 portable water purifiers, self-contained breathing appa-ratus, compressors and refiller para sa mag biktima ng matinding pagbuhos ng abo mula sa bulkang Taal.

Kung buhay ang ispirito ng bayanihan sa sakuna sa Batangas, nakakita naman ng oportunidad ang mga walang-hiyang tao na pumakyaw ng mga N95 face mask na pananggalang sa masamang epekto ng mga nagliparang abo mula sa bulkang Taal.

Lahat halos ng mga outlet ng Mercury Drug sa Metro Manila at sa mga lalawigan ng Cavite, Laguna, Batangas at Rizal ay naubusan ng stock ng N95 face mask matapos may mga halang ang kaluluwa na pumakyaw ng mga ito para ibenta ng mas mahal.

Sa lungsod ng Maynila nabuko na ang N95 face mask na nagkakahalaga lamang ng mula P25 hanggang P30 ay i¬binebenta na ngayon sa halagang P200 o halos 10 beses na mas mahal sa orihinal na presyo.

Sa opisina ni Manila Vice Mayor Honey Lacuna-Pangan nakarating ang mga reklamo na sobrang mahal ang mga i¬binebentang N95 face mask sa ilang lugar sa Maynila. Acting mayor si Lacuna-Pangan matapos ma-stranded sa Hongkong si Manila Mayor Isko Moreno kasama ang kanyang pamilya.

Inutusan na ni Vice Mayor Lacuna ang Manila Bureau of Permits at Manila Licenses Office na magsagawa ng inspeksyon sa mga tindahan na overpriced ang N95 face mask.

Ito ang pahayag ni vice ma¬yor na isa ring doktora: “Huwag naman po natin gamitin ang pa¬nahon na ito para manamantala. Tandaan po natin, delikado po sa kalusugan nila ito. Ayaw ko pong makakita ng pasyenteng may asthma na itinakbo sa ospital dahil lang hindi siya makahanap o makabili ng mask.”

Tama lang na parusahan ang mga nagbebenta ng overpriced N95 face mask dahil wa-lang puwang ang kawalanghiyaan ng ganoong klase ng tao sa panahon ng sakuna kung saan nabubuhay ang ispirito ng bayanihan. (SIDEBAR / Raymond Burgos)

Read More

‘GIYERA’ NI TRUMP, PAMPATAY SA IMPEACHMENT; TULONG SA ELEKSYON

SIDEBAR

Dalawang araw pa lang ang lumilipas matapos ang pagsalubong sa taong 2020 ay nagpasabog agad ang Estados Unidos sa pamamagitan ng isang drone attack kay Iranian Gen. Qassem Suleimani noong Enero 3 sa international airport ng Baghdad sa Iraq.

Si US President Donald Trump ang nag-utos ng asasinasyon kay Gen. Suleimani na commanding general ng elite Quds Force ng Iranian armed forces. Preemptive strike ang drone attack kay Suleimani matapos makatanggap ng intelligence report ang US na may plano ang heneral na maghasik ng lagim sa Estados Unidos.

Walang makapagsabi kung gaano katotoo ang naturang intel report ni Trump pero nakita na rin natin sa panahon ni President George W. Bush kung papaano ginamit ang pekeng intel sa “weapons of mass destruction” o WMD para giyerahin ang bansang Iraq ni Saddam Hussein noong 2003.

Hindi marahil nakita ng US ang magiging reaksyon ng mga mamamayan ng Iran na agad nagtungo sa lansangan ang daang libong mga Iranian para kondenahin ang ginawang asasinasyon ng US at ang paglalagay ng patong sa ulo ni Trump sa halagang US$80 milyon.

Nagbanta rin ang pangulo ng Iran ng ganting reaksyon sa US na agad na sinagot ni Trump na nakahanda ang US military na tirahin ang 52 target sa loob ng Iran sakaling mangyari ang ganti ng Iran laban sa US.

Malaki ang respeto at ­paghanga ng mga Iranian sa napatay na si Gen. Suleimani na pinuno ng mga special ­forces bukod pa sa bayani siyang itinuturing dahil puro panalo ang kanyang mga pinamunuan na giyera sa ilalim ng Iranian armed forces.

Pabor para kay President Trump ang pangyayari lalo pa’t nahaharap siya sa impeachment trial sa Senado at sa kanyang muling pagtakbo sa pagka-pangulo sa darating na Nobyembre.

Mas mabuti ngang magkaroon ng ganting atake ang Iran sa US dahil magagamit ito ni Trump para hindi matuloy ang kanyang impeachment trial dahil sa problema sa napipintong giyera laban sa Iran at sakaling maging tagumpay ang “giyera” magagamit ni Trump ito na mabisang propaganda  sa kanyang kampanya sa re-eleksyon sa Nobyembre.

Samantala, ang mga bansang gaya ng Pilipinas ang napeperwisyo sa mga giyera ng US sa Middle East dahil na rin sa presensya ng overseas Filipino workers (OFWs) sa Iran at sa Iraq na damay na din sa napipintong giyera.

May 1,600 OFWs sa Iran samantalang may 6,000 Filipino sa Iraq na ayon kay Labor Secretary Silvestre Bello III ay pawang mga ilegal dahil sa umiiral na ban sa dalawang bansa dala na rin ng kawalan ng bilateral labor agreement ng Pilipinas sa Iran at Iraq.

Nag-utos na si Pangulong Rodrigo Duterte ng mass eva­cuation bukod ito sa pagpapalabas ng order ng Department of Foreign Affairs (DFA) sa mga embahada ng Pilipinas sa Iran at Iraq na bigyan na ng abiso ang mga Filipino sa posibleng mass evacuation.

Maraming posibleng ­mangyari pero ang pinakama­laga kay Trump ay mamatay ang kanyang impeachment at makakuha ng ikalawang termino bilang pangulo ng Estados Unidos. (SIDEBAR / Raymond Burgos)

Read More

PAGBABALIK SA WIKANG INGLES BILANG MEDIUM OF INSTRUCTION

SIDEBAR

Pinaiimbestigahan na sa Kamara ang nakababahalang pangungulelat ng Pilipinas sa pinakahuling assessment na isinagawa ng Organization for Economic Cooperation and Development patungkol sa reading comprehension o pag-intindi sa binabasa ng mga mag-aaral sa 79 na bansa.

Si Cavite Rep. Elpidio Barzaga ang naghain ng House Resolution 626 para sa pormal na imbestigasyon na isasagawa ng House Committee on Basic Education and Culture at Committee on Higher and Technical Education para alamin kung anong mga hakbang ang dapat gawin para masolusyunan ang problema sa reading comprehension ng mga Filipinong mag-aaral.

Pinakamababa sa 79 bansa ang nakuhang marka ng may 600,000 Filipinong mag-aaral na may edad 15 sa pagsusulit ng Programme for International Student Assessment (PISA) noong 2018. Ito ang unang pagkakataon na lumahok ang Pilipinas sa PISA survey. Karamihan sa mga mag-aaral na nasa edad 15 sa Pilipinas ay nasa Grade 9.

Dismayado rin si Cebu Gov. Gwendolyn Garcia sa pangungulelat natin hindi lamang sa reading comprehension kundi maging sa math and science at ang kanyang solusyon ay ang panunumbalik sa wikang Ingles bilang medium of instruction.

Madali para kay Gov. Garcia ang “English only” policy sa public schools sa Cebu dahil mayroon nang Local School Board resolution sa kanyang lalawigan na nagbabalik sa English bilang medium of instruction sa elementary at high schools. Nakatakdang ipatupad ito ng Cebu Provincial Schools Division sa school year 2020.

Kahit wala pa ang imbestigasyon sa mababang kapulungan, tama ang posisyon ni Gov. Garcia sa paggamit ng wikang Ingles dahil bukod sa mga klasikong nobela na nakasulat sa wikang Ingles, pati na ang mga aklat sa math and science ay sa Ingles din nakalimbag.

Ang naging problema nga lang ay nang ilagay sa ating Saligang Batas ang paggamit ng Filipino bilang medium of instruction at sinikap itong ipatupad ng pamahalaan, hindi handa ang mga guro at estudyante dahil nga sa kakulangan ng mga aklat sa math and ­science sa wikang Filipino.

At dahil sa dami ng mga banyagang salita sa dalawang asignatura, hirap ang mga translator nito sa wikang Filipino at nangyari tuloy ay lalong naguluhan ang mga estudyante sa pag-intindi ng math at science sa wikang Filipino.

Sa DepEd dapat manggaling ang solusyon sa problema ng mga Filipinong mag-aaral sa reading comprehension, math at science at ang magiging papel lamang ng Kongreso ay pondohan ang mga programang mag-aangat sa kalidad ng ating mga mag-aaral. (Sidebar / RAYMOND BURGOS)

Read More

PANGUNGULELAT NG MGA PINOY SA READING, MATH AT SCIENCE

SIDEBAR

Nakababahala ang pangungulelat ng Pilipinas sa pinakahuling assessment na isinagawa ng Organization for Economic Cooperation and Development (OECD) patungkol sa reading comprehension o pag-intindi sa binabasa ng mga mag-aaral sa 79 na bansa.

Pinakamababa sa 79 bansa ang nakuhang marka ng may 600,000 Filipinong mag-aaral na may edad 15 mula sa 79 na bansa na sumailalim sa pagsusulit ng Programme for International Student Assessment (PISA) noong 2018.

Ito ang unang pagkakataon na lumahok ang Pilipinas sa PISA survey. Karamihan sa mga mag-aaral na nasa edad 15 sa Pilipinas ay nasa Grade 9.

Nakakuha ng pinaka­mataas na marka ang mga mag-aaral mula Beijing, Shanghai, Jiangsu at Zheijang sa China. Nakakuha sila ng 555 puntos sa reading, 591 puntos sa math at 590 sa science.

Pumangalawa naman ang mga mag-aaral mula Singapore na nakakuha ng 549 puntos sa reading, 569 puntos sa math at 551 puntos sa science.

Ang ibig sabihin lang nito ay kailangang pag-aralan ng Department of Education ang programa ng edukasyon at sistema ng pagtuturo sa nabanggit na apat na syudad at lalawigan sa China at gayundin sa Singapore para makita kung ano ang mga dapat baguhing programa at pagtuturo sa elementary at high school education.

Sa resulta ng PISA 2018, nakakuha ng 340 puntos ang mga mag-aaral mula sa Pilipinas. Sobrang baba nito sa average na 487 puntos.

Ayon din sa resulta ng PISA 2018, 1 sa 4 na mag-aaral ang nahihirapan sa iba’t ibang aspeto ng pagbabasa, katulad ng pagkuha sa pangunahing ideya ng binabasa, maging ang pagdudugtong sa mga impormasyong kanilang nakukuha mula sa kanilang binabasa.

Gayundin, 1 sa 10 mag-aaral lamang ang may kakayahang malaman kung alin ang katotohanan (fact) at opinyon kapag nagbabasa tungkol sa mga paksang hindi pamilyar sa kanila.

Lumalabas rin sa resulta ng PISA 2018 na karamihan sa mga mag-aaral ang mas may kakayahang makahanap ng impormasyon (locating information) kaysa maintindihan ito. Kabilang ang mga bansang Pilipinas, Brunei Darussalam, Ireland, Malaysia, Malta at the Nether­lands sa may ganitong resulta sa pagsusulit.

Sa larangan naman ng math, nakakuha ng 353 puntos ang Pilipinas, habang nakakuha naman ito ng 357 puntos sa science.  Nasa 489 puntos ang average na marka sa math at science. Kapwa ikalawa sa pinakamababa ang marka ng Pilipinas sa math at science.

Kailangan na lang na kumilos ang DepEd para maisakatuparan ang mahusay na rekomendasyon ng Reading Association of the Philippines sa lalong madaling panahon. (Sidebar / RAYMOND BURGOS)

Read More

PEACE TALKS ULIT SA CPP-NDF

SIDEBAR

TAMA ang desisyon ni Pa­ngulong Rodrigo Duterte na muling buhayin ang naudlot na usapang pangkapayaan ng pamahalaan sa National Democratic Front of the Philippines at sa Communist Party of the Philippines na siyang namumunong organisasyon sa NDFP.

Disyembre 5 nang utusan ni Pangulong Duterte si Labor Secretary Silvestre Bello III na makipagkita muli kay CPP Founding Chairman Jose Ma. Sison sa The Netherlands para pag-usapan ang pagpapatuloy ng natigil na peace talks.

Pinatigil ni Pangulong Duterte ang peace talks sa CPP-NDF sa gitna ng mga opensiba ng New People’s Army laban sa mga tropa ng Armed Forces at Philippine National Police na nagresulta sa pagkamatay ng ilang mga sundalo at pulis.

Kasunod ng terminasyon ng peace talks, ipinag-utos ng pangulo ang muling pag-aresto sa mga consultant ng NDFP kabilang na si Vicente Ladlad na mahigit isang taon nang nakakulong sa Bicutan na nasa ilalim ng Bureau of Jail Management and Peno­logy.

Si National Security Adviser Hermogenes Esperon ang nagsiwalat ng kagustuhan ng pangulo na muling buksan ang prosesong pangkapayapaan nang sa gayon ay matapos na rin ang mahigit 50 taong rebelyon ng CPP-NPA.

“I am of the understanding that the President sent Sec. Bello because he has gotten word that Jose Ma. Sison would like to tell him something. The President has always said that he will always leave a window, no matter how small, for peace talks,” ani Esperon sa ABS-CBN News Channel (ANC).

Nagpahayag ng pagtutol si Sison sa suhestiyon na isagawa sa Pilipinas ang pormal na peace talks dahil na rin sa pangamba na maaaring gamitin ito ng AFP at PNP para magsagawa ng matinding surveillance sa mga lalantad na NDF peace consultant.

Sabi ni Sison: ”This precondition is totally unacceptable to the National Democratic Front of the Philippines because it aims to put the NDFP and the entire peace negotiations in the pocket of the Duterte regime and under the control and surveillance of the bloodthirsty military and police who engage in mass murders and other heinous crimes with impunity.”

Nakasalalay kay Secretary Bello kung magkakaroon ng panibagong peace talks sa CPP-NDF at ito ay naka-depende kung papaano niya kukumbinsihin sina Sison at ang NDF peace negotiators na muling umupo para pag-usapan ang mas importanteng mga usapin para sa pagkakamit ng matagalang kapayapaan sa bansa.

Batid ni Sison at mga kasama niya sa Netherlands na mukhang imposible nang makamit ang tagumpay ng demokratikong rebolusyong bayan na sinimulang isulong noon pang Disyembre 26, 1968 kung kailang itinatag ang CPP sa pamumuno ni Amado Guerrero na siyang nom-de-guerre ni Joma Sison.

Nagiging biruan na nga sa hanay ng mga kadre ng partido na masyado nang matagal ang itinatakbo ng kanilang rebolusyon na patuloy na tumatalima sa teorya ng matagalang digmAang bayan o protracted people’s war.

Kung matutuloy ang mu­ling pagbubukas ng peace talks, ang malaking katanu­ngan na lang ay kung magkakaroon ito ng lohikal na kongklusyon na magreresulta sa permanenteng tigil-putukan at pangmatagalang kapayapaan. (Sidebar / RAYMOND BURGOS)

Read More

PAGPILI NG BAGONG PNP CHIEF

SIDEBAR

Mahigit isang buwan na ang nakalilipas mula nang magretiro sa Philippine National Police (PNP) ang hepe nitong si Gen. Oscar Albayalde pero hanggang ngayon ay wala pa ring napipiling kapalit si Pangulong Rodrigo Duterte.

Walang duda na nahihirapang pumili si Pangulong Duterte dahil gusto niyang masiguro na walang isyu laban sa bagong PNP chief at gusto niya ring matiyak na ang kapalit ni Gen. Albayalde ay makapagpanunumbalik ng magandang imahe ng pambansang pulisya.

Tumatak kay Gen. Albayalde ang katagang “ninja cop” dahil sa kanyang naging problema bilang Pampanga police provincial director noong 2013 kung kailan nasangkot ang 10 niyang pulis sa pag-recycle ng shabu na siyang ginagawa ng “ninja cops.”

Senate investigation ang naglubog kay Albayalde at sa 10 “Pampanga ninja cops” at pagkatapos ng mga serye ng pagdinig ay naging resolusyon ng committee ni Senador Richard Gordon ang pagsasampa ng kasong kriminal at administratibo laban sa PNP chief at kanyang “ninja cops.”

Malaking katanungan kung bakit nakalusot si Albayalde sa PNP Senior Officers Promotion and Placement Board (SOPPB) nang maitalaga itong hepe ng National Capital Region Police Office.

Hindi naman kasi lihim sa PNP na nasibak siya bilang Pampanga police director noong 2013 dahil sa isinagawang imbestigasyon noon ng Criminal Investigation and Detection Group (CIDG) sa ilalim ni Maj. Gen. Benjamin Magalong na kasalukuyang Baguio City mayor.

Inamin ni Pangulong Rodrigo Duterte na masusi niyang pinag-aaralan kung sino sa mga heneral ng PNP ang kanyang pipiliin bilang PNP chief.

Una nang inirekomenda ni Interior Secretary Eduardo Año ang tatlong pinaka-senior na PNP officers para maging PNP chief. Kabilang dito sina Police Lieutenant General Archie Francisco Gamboa, Police Lieutenant General Camilo Pancratius Cascolan at ang bagong promote na si Police Lieutenant General Guillermo Eleazar.

Si Lt. Gen. Gamboa ngayon ang officer-in-charge ng PNP at sa kanyang pamumuno ay isinagawa ang pinakamalaking revamp sa pambansang pulisya na aprubado ng Malacañang.

Si Pangulong Duterte na rin ang pabirong nagsabi na kung wala siyang mapili ay baka siya na muna ang maging pinuno ng PNP na bahagi ng kanyang kapangyarihan bilang chief law enforcer ng bansa.

“Even a single case of corruption, wala ka na. I would rather not appoint anybody for that matter. Ako na ang hahawak. I will be the one directing. Guidance and direction lang naman ako. But that is in the event I couldn’t find somebody I can trust,” paliwanag ng pangulo.

Ano kaya kung si Pangulong Duterte ang direktang mag-command ng PNP? (Sidebar / RAYMOND BURGOS)

Read More

TAGUMPAY NI SENADOR ZUBIRI ANG 14 NA GINTO SA ARNIS

SIDEBAR

Pinakamaraming nahakot na medalyang ginto ang Arnis na umabot sa 14 bukod pa sa apat na silver at dalawang bronze para sa kabuuang 20 medalya na isa ng record sa kasaysayan ng Southeast Asian Games.

At ang tagumpay ng Arnis sa 30th SEA Games ay dahil na rin sa todong suportang ibinigay ni Senador Miguel Zubiri na siyang tumatayong presidente at chairman ng Philippine Eskrima Kali Arnis Federation (PEKAF) na siyang humalili sa Arnis Philippines bilang national sports association o NSA.

Kinailangan ng isang senador gaya ni Zubiri na pag-isahin ang lahat ng national organization ng Filipino Martial Arts sa bansa at makakuha ng kagyat na pagkilala mula sa Philippine Sports Commission at Philippine Olympic Committee.

Ito ang pahayag ni Senador Zubiri: “We couldn’t have asked for any more from the boys and girls. They exceeded our expectations. I told them we’ll be happy with 12 golds but they gave us 14. I’m just happy. This is for the country. They had so much sacrifices for the nation. Please give them all honor. All our boys and girls, they fought well for us. Mabuhay po ang Arnis, mabuhay po ang Pilipinas!”

Samantala, isang mala¬king pugay sa lahat ng mga Pinoy na arnisador na nagpakitang gilas para makasungkit ng mga medalya.

Ang mga nakauna sa pagkuha ng mga medalya sa Arnis: Jezebel Morcillo (gold, women’s distaff) at mga nakasungkit ng ginto sa live stick sparring na sina Dexter Bolambao, Nino Mark Talledo, Villardo Cunamay at Mike Banares. Gayundin ang silver medalist na sina Jude Oliver Rodriguez at bronze medalists na sina May Busacay at Eza Rai Yalong.

Humakot din ng ginto sa padded stick category ang women’s team na kinabibilangan nina Sheena Del Monte (bantamweight division), Jedah Mae Soriano (featherweight), Ross Monville (lightweight) at Abegail Abad (welterweight).

Tatlong ginto naman ang naiuuwi ng men’s team na sina Jesfer Huquire (bantamweight), Elmer Manlapas (featherweight) at Carloyd Tejada (welterweight), samantalang silver ang ambag ni Billy Valenzuela (lightweight).

Sina Crisamuel Delfin at Mary Allin Aldeguer naman ay nakakuha ng ginto sa men’s and women’s non-¬traditional open weapon exhibition na mas kilala sa tawag na “Anyo”. Naka-silver naman sina Mark David Puzon at Ryssa Jezzel Sanchez sa kaparehong event.

Inaasahang lalong yayabong pa ang Arnis bilang martial art at sports sa mga susunod na national at international competitions hindi lamang sa Asya kundi pati sa mga bansa sa Europa at Estados Unidos. Sana nga.  (Sidebar / RAYMOND BURGOS)

 

Read More

‘GOLD LUCK’ SA UNANG ARAW NG 30TH SEA GAMES

SIDEBAR

“Gold luck” na matatawag ang paghakot ng medalyang ginto ng mga atletang Filipino sa unang araw ng 30th Southeast Asian Games na ginaganap ngayon sa Central Luzon, Metro Manila at Southern Tagalog hanggang sa Disyembre 11.

Umabot sa 22 ginto ang nasungkit ng ating mga atleta noong Linggo na siyang dami ng medalyang ginto na nakuha ng Filipinas noong 2017 sa Malaysia kung saan ginanap ang 29th SEA Games.

Dancesports ang pinakamaraming nakuhang ginto na umabot ng 10 sa pamamagitan ng Latin dancers na sina Wilbert Aunzo at Pearl Cañeda na nakasungkit ng tatlong gold medals gayundin ang standard performers na sina Sean Mischa Aranar at Ana Leonila Manalo Nualla na nakakuha rin ng tatlong ginto.

Nakapag-uwi naman ng tig-dalawang medalyang ginto sina Mark Jayson Gayon at Mary Joy Renigen at sina Michael Angelo Marquez at Stephanie Sabalo.

Gaya ng inasahan, dinomina ng mga Filipinong arnisador ang unang araw ng kompetisyon sa pamamagitan ng live stick event kung saan limang ginto ang nakuha ng ating mga manlalaro na sina Dexter Bolambao, Villardo Cunamay, Nino Mark Talledo, Mike Banares at Jezebel Morcillo.

Nakatulong nang malaki ang suportang ibinuhos sa Philippine Arnis Team ni Senador Miguel Zubiri na siyang presidente ng PEKAF o Philippine Eskrima Kali Arnis Federation na siyang tumatayong national sports association ng Arnis.

Nakapag-deliver din ng dalawang ginto ang mga manlalaro ng sepak takraw sa men’s hoops sa pamamagitan nina John Jeffrey Morcillos, John John Bobier at Metodio Suico Jr. at women’s hoops team na binubuo nina Deseree Autor, Josefina Maat at Sarah Jean Kalalo.

Nagpakitang gilas din sina triathlon athletes na sina John Rambo Chicano at Kim Mangrobang na kapwa nanalo ng gintong medalya samantalang mga Pinoy rin ang nakakuha ng silver.

Naka-ginto rin ang mga atleta ng Wushu na si Agatha Wong (Taolu event); Estie Gay Liwanen ng bagong SEAG sport na Kurash at si Jan Emmanuel Garcia ng Chess.

Bagama’t magastos ang maging host country ng SEA Games, malaking bentahe ito sa ating mga atleta dahil bukod sa may entry tayo sa 56 sports, mas mataas din ang moral at motibasyon ng ating mga manlalaro na manalo dahil sa suporta ng ating mga kababayan na tinatawag na “home court advantage”.

Siyempre, mas kailangan ng ating mga atleta ang todong suporta ng ating pamahalaan sa pamamagitan ng Philippine Sports Commission at Philippine Olympic Committee na siyang mga pangunahing ahensya na namamahala sa ating national athletes. (Sidebar / RAYMOND BURGOS)

Read More

KAPAG MAY USOK, MAY SUNOG

SIDEBAR

May kasabihan sa wikang Ingles na “Performance is the best PR (public relations)” na katulad din ng kasabihang “Action speaks louder than words.”

Ang dalawang kasabihang ito ang realistikong naglalarawan sa mga na­ging kapalpakan ng mga organizer ng 30th Southeast Asian Games (SEA Games) simula pa nang nagdatingan ang mga atleta ng Football sa Ninoy Aquino International Airport noong Linggo o sakto ring isang linggo bago ang opening ceremony sa Nobyembre 30.

Late dumating ang mga bus na susundo sa Football teams mula sa Cambodia, Myanmar at Timor-Leste at pagdating sa kanilang mga hotel, hindi agad naka-check in para matulog at magpahinga dahil sa kakulangan sa paghahanda at koordinasyon ng kung sino man ang in-charge sa Football teams.

Palpak din ang hotel accommodation ng Thailand Football team at dahil sa matinding traffic sa South Luzon Expressway, kinansela ng mga Thai ang kanilang ensayo sa Biñan Football Stadium sa Laguna.

Wala ring electronic scoreboard sa unang laro ng Football sa Rizal Memorial Stadium bukod pa sa hindi pa natapos na Press Center na animo’y isang warehouse at patuloy na pagpipintura sa ilang bahagi ng gusali ng RMS.

Kung hindi sana pumalpak ang preparasyon sa Football tournament ay nakalimutan na sana ang tungkol sa 50-milyong pisong kaldero sa New Clark City. Pero maraming kapalpakang nangyari sa kabila ng mga pahayag sa media ni Speaker Alan Peter Ca­yetano na handang-handa na ang Philippine Southeast Asian Games Organi­zing Committee (PHISGOC) para sa 30th SEA Games.

Pati siguro si Pangulong Rodrigo Duterte napaniwala ni PHISGOC Chairman Ca­yetano na handang-handa na ang Pilipinas sa paghu-host ng okasyon kaya nang nabasa niya sa mga pahayagan ang mga reklamo ng mga naunang dumating na Football teams ay natural lang na madismaya siya dahil pamahalaan pa rin ng Pilipinas ang nagiging kahiya-hiya sa Asia.

Dapat lang ang ipinag-utos ng pangulo na imbestigasyon sa mga kapalpakan ng organizer ng SEA Games pati na ang mga alegasyon ng korapsyon na makikita sa mga pipitsuging signages at ni walang mga tarpaulin sa kahabaan ng EDSA na ­nagwe-welcome sa mga atleta at delegado mula sa iba’t ibang Asia countries.

Kabilang sa mga iimbestigahan ang PHISGOC chairman at ang lahat ng mga organizer ng mga tournament kung saan pumalpak sa pagbibigay ng shuttle bus, hotel accommodation at food requirements ng mga atleta kabilang na ang mga Muslim na atleta.

Talagang totoo ang kasabihang “performance is the best PR.” At totoo rin ang kasabihang “Kung may usok, may sunog.” Ang tanong na lang ay kung sinu-sino ang mga bugok sa PHISGOC ang masusunog kapag nagkaroon na ng imbestigasyon ang Malacañang sa mga kapalpakan ng PHISGOC sa SEA Games. Abangan… (Sidebar / RAYMOND BURGOS)

Read More