PALPAK NA DPWH PROJECT SA OLONGAPO

TINGNAN NATIN

HINDI pa talaga rumaratsada ang tag-ulan nagkasira-sira na ang tinatayang P500-M o kalahating bilyong pisong “slope protection project” sa kahabaan ng Sta. Rita River na tumatagos mula Brgy. Old Cabalan hanggang Brgy. Kalaklan ng Olongapo City.

Tingnan Natin: ang “slope protection project” ay panlaban sa pagguho ng lupa na, bukod sa panganib sa mga kabahayang matitibag, ay panlaban din sa pagbabaw ng ilog at resulta nitong pagbaha.

Binuhusan ito ng pondo at gana-gana ang mga contractor, at malamang, sina Edi – alam niyo na.

Pero sa kabila nito, balahura ang trabaho, walang pakialam sa nasayang na pondo at masamang epekto sa mamamayan ng Olongapo.

Tingnan Natin: proyekto ito ng Dept. of Public Works & Highways (DPWH), hindi ng Olongapo City government kaya ang may dapat ipaliwanag, kung hindi managot mismo, ay ang Zambales 2nd District Engineering Office ng DPWH sa ilalim ni District Engineer Hercules C. Manglicmot.

Tanong natin kay District Engineer Manglicmot: bakit nakalusot ang mga contractor ng proyektong ito?

Ano ang dahilan bakit po nagmistulang bulag, pipi at bi­ngi ang DPWH Zambales 2nd Engineering District sa hinaba-haba ng panahong ginagawa ang proyekto?

Tingnan Natin: daan-daang milyong pisong pera ng ba­yan ang sinayang, at nanganganib pa ngayon ang mamamayan ng Olongapo sa pagguho at mga pagbaha.

Nagkaayusan ba ang DPWH at mga contractor kaya hindi na makapalag ang DPWH sa pagkabalahura ng proyekto?

Sa tinagal-tagal na ni Eng’r Manglicmot sa Zambales 2nd Eng’g District ng DPWH, tropa-tropa na lang ba niya ang mga contractor na sila na lang nang sila ang paulit-ulit na kunwari nakakakuha pero ang totoo ay binibigyan na lang ng kontrata?

Tingnan Natin: alam na kaya ito ni DPWH Sec. Mark A. Villar? At kung hindi pa, teka muna, bakit? Kung alam na, ano ang ginagawa niyang aksyon kay Manglicmot at mga contractor?

Sec. Villar, pakitutukan naman po ang problemang ito. Ninanakawan na ng pondo, nalalagay pa sa panganib ang buhay at mga ari-arian ng mga taga-Olongapo.

Hintayin natin ang aksyon si Sec. Villar? Tingnan Natin. (Tingnan Natin / Vic V. Vizcocho, Jr.)

Please follow and like us:
Read More

SILTATION O PAGBABAW NG SUBIC BAY

TINGNAN NATIN

UMULAN ng may kahabaan nitong nakaraang linggo sa Subic Bay Freeport at nagbaha sa mga lugar na taunan nang binabaha rito.

Tingnan Natin:  1992 nang isara ng US Navy ang base militar nila rito matapos ibasura ng Senado ang tratado sa patuloy sanang magpa­panatili ng mga Amerikano.

Kahit matagumpay na nagawang Freeport at Economic Zone ang Subic, hindi na nabigyang pansin ang mga dati ay regular na minamantinang imprastraktura noong panahon ng US Navy.

Sagana sa pondo ang US Navy noon, hindi gaya ng Subic Bay Metropolitan Authority (SBMA), ang namamahala sa ngayon ay sentro ng negosyo at turismo.

Tingnan Natin: isa sa mga binaha at nagdulot ng malaking pinsala sa mga motorista, kapwa residente, negosyante at mga turista, ang bahagi ng junction na nagdurugtong sa Subic-Clark-Tarlac Expressway (SCTEx) tumbok ng Rizal at Maritan Roads.

Katwiran ng ilang SBMA officials, nasa jurisdiction ito ng SCTEx management o Manila North Tollways Corp. (MNTC).

Sagot ng mga taga-Subic, responsibilidad ng SBMA ang lahat ng nasa loob ng Freeport.

Tingnan Natin: hindi nga dapat magsawalang bahala ang SBMA sa mga sitwasyong pumiperwisyo sa tao, kapag ito’y nangyayari sa loob ng teritoryo nito.

Ang maganda pa niyan, hindi na poproblemahin ng SBMA ang pondo para gawan ng solusyon ang pagbabaha sa naturang lugar dahil pwede nitong pagastusan sa MNTC.

Ito ang isa sa pwedeng gawin ng SBMA sa iba pang lugar ng Subic Freeport na binabaha: pagastusan sa mga negosyong apektado at makikinabang din naman sa resulta ng gagawing hakbang kontra pagbabaha. (Tingnan Natin / Vic V. Vizcocho, Jr.)

Please follow and like us:
Read More

OVERPASS VS. PUNONG ACACIA SA SUBIC FREEPORT

TINGNAN NATIN

MAGKABANGGA talaga ang development o pag-unlad at kalikasan.

Tingan Natin: kailangang balansehin ang kaunlaran at pangangalaga sa kalikasan, ayon tayo diyan.

Kapag binalanse, mayroong bibigay sa magkabilang panig, dahil kung hindi, hindi mababalanse at walang mapagkakasunduan.

Ito ang dilemma o kalagayang alanganin sa mga negosyo, konstruksiyon at iba pa na may masasaling sa kalikasan.

Tingnan Natin: dekada na buhat ng isinara sa mga behikulo ang Main Gate bridge papasok ng, at palabas mula, Subic Bay Freeport dahil hindi na umano ligtas liban na lang para sa pedestrian, kaya ganoon na rin ang Main Gate ng Freeport.

Ang Main Gate Bridge ay tinutumbok ng Magsaysay Drive, ang pamosong entertainment district ng Olongapo City mula pa noong panahon na ang Subic Bay Freeport ay US Naval Base, pinakamalaking base militar ng Estados Unidos noon sa labas ng America. Ito ang dahilan kung kaya ang Main Gate bridge ay kilala rin bilang Magsaysay Bridge.

Sa wakas, magagawa na ang Magsaysay Bridge, ibig sabihin, mabubuksan na rin ang Main Gate ng Subic Bay Freeport.

Tingnan Natin: pondo ang problema kaya tumagal ang pagpapagawa nito pero salamat kay Subic Bay Metropolitan Authority (SBMA) Chairman & Administrator (ChAd) Wilma T. Eisma na nakakalap ng pondo mula sa national government na umaabot sa P500M.

Kasama sa plano ng paggawa ng Magsaysay Bridge ang overpass sa nakahambalang na Rizal St. na ngayon pa lamang ay isa sa mga pinagsisikipan ng daloy ng trapiko, kapwa ng motorista at pedestrian.

Ibig sabihin, maiibsan ang kasalukuyan at inaasahang malilikha pang pagbigat ng daloy ng trapiko sa naturang “intersection” kapag gawa na ang tulay at binuksan na ang Main gate para sa mga sasakyan.

Tingan Natin: dahil sa isang puno ng Acacia, patuloy na magdurusa ang mga motorista, pedestriyan, negosyante, residente, estudyante, manggagawa o turista.

Tinutulan kasi ng ilang sariling-basbas na “environmentalists” ang pagtatayo ng “overpass” sa Rizal St. dahil ayaw nilang maputol ang naturang puno ng Acacia na ang edad ay totoo namang deka-dekada.

Nasaan ang balanse ng pag-unlad at kalikasan? Tingnan Natin. Abangan ang mga susunod nating kolum kaugnay nito. (Tingnan Natin / Vic V. Vizcocho, Jr.)

Please follow and like us:
Read More

PANGAMBA NG MGA MANGINGISDA

TINGNAN NATIN

HINDI biro ang hanapbuhay na pangingisda.

Tingnan Natin: pumapalaot, nabibilad sa init ng araw at lamig ng gabi, inaalug-alog ng mga alon, at nangangamba sa pagsama ng panahon, at maging sa mga pirata.

Ang masaklap, ayon sa mga mangingisda natin dito sa Zambales, sa West Philippine Sea dagdag na inaalala ang mga barko at iba pang sasakyang pandagat ng mga Intsik.

Paano ba naman, binubunggo ang bangka at iniiwan ang mga mangingisdang lulutang-lutang, makaligtas o malunod, bahala na si Batman.

Tingnan Natin: totoo naman ang pangamba dahil kailan lang, isang bangkang pangisdang Pinoy ang pinalubog ng mga Intsik at 22 sa kanila ang iniwanang kakawag-kawag sa karagatan.

Mabuti na lamang at hindi naglaon ay dumating din ang barko ng mga Vietnamese at nailigtas sa kamatayan ang 22.

Wasak ang bangka, wala ring kita ang mga mangingisda.

Tingnan Natin: ang tagal bago nagsalita ang pangulo at nang magsalita ay mistulang inabsuwelto ang mga Intsik.

Ngayon, lalong tumindi ang pangamba ng mga ma¬ngingisda dahil lumalabas, wala silang aasahang protek¬syon mula sa pamahalaan.

Walang proteksyon mula sa Philippine Navy, walang proteksyon mula sa Philippine Coast Guard, at lalong wala mula sa presidente ng bansa.

Tingnan Natin: nangangamba ang mga asawa, anak at iba pang kapamilya ng mga mangingisda rito sa Zambales sa tuwing sila’y papalaot.

Kung dati’y ang pangamba ay makahuhuli ba ng isda na ang mapagbebentahan ay sasapat sa kanilang mga pangangailangan, ngayo’y pangamba pa rin kung madadale ba sila ng mga Intsik, hindi lamang ng sama ng panahon.

Ang ibinigay na tig-P10,000 ng DOE at DA ay pampalubag-loob at hindi gagamot sa perwisyong inabot ng buhay ng buong pamilya ng bawat isa sa 22 mangingisda.

Tingnan Natin: hanggang hindi naninindigan ang Malacañang para sa karapatan ng bansa sa West Philippine Sea, hindi tayo rerespetuhin ng mga Intsik.

Mauulit nang mauulit ang katulad na insidente at ang mga mangingisda at kanilang pamilya ay patuloy na ma¬ngangamba na kahit hindi masama ang panahon, maaaring may masamang mangyari sa kanila. Tingnan Natin! (Tingnan Natin / Vic V. Vizcocho, Jr.)

Please follow and like us:
Read More

KONDENAHIN NG SENADO ANG PAMBU-BULLY NG CHINA

TINGNAN NATIN

NATUTUWA tayo sa mga pahayag ni Senador Panfilo Lacson kaugnay ng pambabangga at paglubog ng bangkang pangisda, at pag-iwan sa 22 mangingisdang Pinoy na lulutang-lutang sa dagat para mamatay.

Tingnan Natin: hanggang kailan pa natin malulunok ang pambu-bully ng China? Tanong ni Senador Lacson. Ang pinakahuling insidente ay muling pagsubok sa respeto at pagti­timpi, aniya, respeto sa bahagi ng China at pagtitimpi ng Pilipinas.

Sukdulan na ang pambabastos sa Pilipinas at mga Filipino ng pamunuan ng China, at ito’y hindi na bago.

Tingnan Natin: mala­king kontribusyon dito ang mga nauna nang pahayag ni Pangulong Duterte na lantarang pagpaling sa China at pagdistansya sa Estados Unidos.

Sa pagkakataong ito, inabot siya ng ilang araw bago nagsalita, bagay na umani ng maraming batikos.

Nang magsalita naman ang pangulo, tinuring lamang nitong simpleng insidenteng dagat o maritime ang nangyari.

Tingnan Natin: ayon kay Senador Lacson, “nakadudurog” ng puso ang paninindigan ni Pangulong Duterte sa Reed Bank.

Agad aniyang sumurender ang pangulo samantalang marami pang “options” o maaaring hakbang at tunguhin na mapagpipilian at maipatutupad.

Sobrang nilimitahan ni Duterte ang maaa­ring gawin, bagay na pagsasawalang-bahala sa nariyan namang tratado ng bansa at Estados Unidos na binigyang diin pa ni US State Secretary Mike Pompeo sa pagsabing may obligasyon kapwa ang dalawang bansa sakaling atakihin ang kanilang mga sasakyang dagat sa West Philippine Sea.

Tingnan Natin: kung independiente naman ang Senado sa ehekutibo o Malacañang, maaaring kondenahin ng Senado ang mga ginagawa ng bansang China na taliwas at yumu­yurak sa interes at dignidad ng bansa at mga Filipino.

Sa pamamagitan ng resolusyon, maipapahayag at maipapaabot ng Senado ang paninindigan nito sa bansang China.

Kuwestiyon na lamang ay kung mayroon talagang tahasang bulag, pipi at binging alyado sa Senado ang pangulo, malamang kokontra ang mga ito.

Umaasa naman tayo na sa pamumuno ni Senador Lacson, posibleng maipasa ang naturang resolusyon, kailangan lang simulan niya ito.

Gagawin kaya niya? Tingnan Natin! (Tingnan Natin / Vic V. Vizcocho, Jr.)

Please follow and like us:
Read More

PROBLEMA ANG BAHA SA SUBIC BAY FREEPORT

TINGNAN NATIN

HALOS tiyak na naman ang magaganap na mga pagbaha sa iba’t ibang bahagi ng Subic Bay Freeport itong pahahon ng tag-ulan at sa susunod pang mga taon.

Tingnan Natin: noong nakaraang taon, binaha ng “bigtime” ang Central Business District (CBD), ang Tipo Road, El Kabayo at iba pang bahagi ng Subic Freeport.

Marami ang napinsala, nasirang mga gamit, sasakyan at mga transaksyong hindi natuloy at marami pang ibang masamang epekto sa negosyo na maaaring daan-daang milyong piso, kung hindi bilyon, ang naglahong parang bula dahil sa mga pagbaha.

Tingnan Natin: sa nakalipas na isang taon, wala namang naipatupad na komprehensibong solusyon ang Subic Bay Metropolitan Authority (SBMA).

Ito’y dahil sa iba’t ibang dahilan. Isa, kailangan ng pera o pondo; pangalawa, kailangan ng plano; pa¬ngatlo, kailangan ng panahon para ipatupad kung ano man ang plano na mapopondohan.

Ayon kay SBMA Chairman & Administrator (ChAd) Wilma R. Eisma, malaking pera ang kailangan para masolusyunan ang mga pagbaha sa Subic Bay Freeport.

Kumikilos, aniya, siya upang makakalap ng pondo para sa “flood control”, dahil ang pondo ng SBMA, bagama’t kumikita ito, ay pangunahing nailalagay sa ibang bagay na mahalaga rin naman, kasama na ang bahagi ng mga lokal na pamahalaan sa paligid ng Freeport, intrega sa pamahalaang nasyunal, maintenance ng Freeport at pa-suweldo sa mga empleyado.

Tingnan Natin: may isasagawang pag-aaral at pagpaplano ang SBMA, pero ang pagpili sa magi¬ging “consultant” ay sa susunod na buwan ng Hulyo pa gagawin.

Kapag nakapili ng “consultant,” saka lamang masisimulan ang malalimang pag-aaral at plano.

Matapos ito, kung may pera o pondo, saka magkakaroon ng pagpili naman sa mga kontratistang magtatayo o magpapatupad ng plano, na kakain din ng panahon bago matapos.

Tingnan Natin: masu¬werte na matapos ang buong proseso sa loob ng tatlong taon. Ibig sabihin, kapag may naganap na matinding pag-ulan sa area ng Subic Bay Freeport sa susunod na tatlong taon, siguradong babaha na naman.

Ibig sabihin, mapipinsala na naman ang daloy ng negosyo at kalakalan, mga kagamitan at baka may mabuwis pang buhay.

Hihintayin pa ba ang tatlong taon at magdurusa muna ang mga residente at negosyo sa Subic Freeport?

Hindi na dapat pinatatagal ang pagdurusa. May solusyon sa pangangailangan ng pondo, plano at panahon. Kailangan lang sa pamunuan ng SBMA na maging malikhain. Kaya naman, ‘di po ba? Tingnan Natin!

Please follow and like us:
Read More

AYAW SA BASTOS, EH BAKIT ANG IBANG OPISYAL?

TINGNAN NATIN

SUMOBRA ang banat ni Erwin Tulfo kay Dept. of Social Welfare & Development (DSWD) Sec. Rolando Bautista nang tumanggi itong magpa-interview sa kanyang teleradyo program.

Tingnan Natin: hindi dapat dumaranas ng ganoong pang-aalipusta hindi lamang si Bautista kundi kahit na sinong tao, mayaman, mahirap, sibilyan o militar.

Pero itong panghihimasok ng Association of Generals and Flag Officers (AGFO) sa isyu, tingin natin, ay wala sa lugar.

Ang pambabastos ni Tulfo kay Bautista ay hindi laban sa Sandatahang Lakas, patungkol ito kay Bautista bilang miyembro ng gabinete ng pamahalaang sibilyan ni Pangulong Duterte.

Tingnan Natin: maaaring ireklamo si Tulfo ni Bautista sa boss nitong si Sec. Martin Andanar ng Presidential Communications Office of the Philippines, o kay Pangulong Duterte mismo. Nariyan din ang National Press Club (NPC) o kaya’y Kapisanan ng mga Brodkaster sa Pilipinas (KBP).

Ang kuyugin ng military, pati na kapulisan, si Tulfo ay nakababahalang indikasyon ng pagsasantabi sa isinasaad ng Saligang Batas o Konstitusyon na pangingibabaw ng sibilyan sa military sa ating bansa.

Si Bautista ang dapat magreklamo, at kaya naman niyang ipagtanggol ang sarili, pero ang AGFO at iba pa sa serbisyo, akala mo kung sinong nakisawsaw sa isang pagkakamaling may katapat na dulugan, at parusa kung kinakailangan.

Tingnan Natin: bastos daw si Tulfo? Oo, parang ibang opisyal, bastos din, ‘di ba?

Pero itong mga AGFO at iba pa sa serbisyo na nakisawsaw sa isyu, lumalabas na ok lang ang kabastusan ng ibang opisyal.

Tingnan Natin: si dating Senador Francisco Tatad, i­lang p.i. ang inabot sa ibang opisyal, pati asawa ng mama, nilapastangan, ‘di po ba?

Dahil si Tulfo ay hindi tulad ng ibang opisyal, hindi pwedeng bastos ito, pero ang ibang opisyal na kanyang amo, Ok lang kahit pa sukdulan.

Sana, itong AGFO at iba pa na nakisawsaw sa isyu, kung talagang naniniwala pa kayo sa Good Manners and Right Conduct (GMRC), tingnan ninyo rin ang iba pang palamurang opisyal.

Hindi naman kayo bulag at bingi sa kanyang mga pinaggagagawa at pinagsasasabi, hindi po ba? (Tingnan Natin!)

Please follow and like us:
Read More

HINDI BASURAHAN ANG PILIPINAS

TINGNAN NATIN

HABANG tinitipa natin ang kolum na ito, kandarapa pa ang mga kinatawan ng sari-saring media companies sa pag-cover sa pagbabalik sa Canada ng mga container vans ng basura na nakatengga sa Subic Bay International Terminal, Corp. (SBITC) sa Subic Bay Freeport.

Tingnan Natin: noon pang 2013-2014 dumating ang may 103 container vans ng basura mula sa Canada pero ngayon lang maibabalik ang mga ito matapos ang masidhi, maingay at determinadong pagtutol ng maraming sektor laban sa paggawang basurahan ang Pilipinas ng ibang bansa.

Hazardous at toxic umano ang naturang basura na kinabibilangan ng non-recyclable plastic, electronic waste, household waste, at iba pa. Ang totoo, 69 lang sa 103 ang ibabalik sa Canada dahil naitapon na sa mga landfill ang may 26 container vans na basura, at may walo pang iba na naidispatsa na, hindi malinaw kung paano.

Tingnan Natin: 2013-2014 dumating ang mga basura mula Canada, panahon ni PNoy. Sablay nga ang administrasyong Aquino dahil walang nagawa upang maipabalik, at maging laban sa pagpasok, ng mga ito.

Pero hindi nangangahulugang porke pumalpak si Aquino ay bida na si Duterte na kasalukuyang pangulo.

Ang pagkontra sa pagiging basurahan ng Pilipinas ng mga mauunlad na bansa ay mula mismo sa mamamayan, sari-saring sektor, na kaagapay ng Ecowaste Coalition at Greenpeace.

Kung talagang sinsero at determinado si Pangulong Duterte laban sa pagtatapon ng basura sa bansa ng ibang bansa, dapat ay umaksiyon din siya laban sa tone-toneladang basura galing China at Australia na nadiskubre sa isang porte sa Mindanao.

Tingnan Natin: hindi niya binabantaan tulad ng Canada ang China at Australia na gigiyerahin. Mabuti naman dahil hindi ito magiging kapani-paniwala.

Sa ngayon, gusto nating makita na mapanagot ang mga nasa likod ng pag-import ng basura, kasama ang mga kasabwat sa gobyerno, kung mayroon, kung sa batas ay mayroon silang pananagutan.

Gusto rin nating malaman kung paano dinispatsa ang 8 container vans ng basura na binanggit natin sa taas dahil lumalabas, 26 nga lang ang naitapon sa landfill sa Tarlac.

May kahilingang paglilinaw na ang Ecowaste Coalition kaugnay nito pero hindi pa umano sinasagot ng Bureau of Customs sa kabila ng pag-invoke ng “Freedom of Information” law. Hanggang kailan? Tingnan Natin! (Tingnan Natin / Vic V. Vizcocho, Jr.)

Please follow and like us:
Read More

PALPAK NA NLEX, MMDA, PNP-HPG AT IBA PA

TINGNAN NATIN

PARA sa mga gaya natin na tagaprobinsya, ang banggit pa lamang ng pagluwas sa Metro Manila ay nakapapagod na dahil nga sa buhul-buhol na daloy ng trapiko na malamang bubunuin.

Tingnan Natin: sa kahabaan ng EDSA, mula Balintawak, QC hanggang Ninoy Aquino International Airport (NAIA), umaabot na ng 2-4 na oras ang biyahe, kasinghaba o doble pa mula Subic hanggang Balintawak. Ganoon din pabalik.

Naniniwala tayo na sa kabila ng volume ng mga sasakyan, maiiwasan ang sobrang bagal o patigil-tigil na daloy ng trapiko kung: isa, alam ng mga kinauukulan ang kanilang ginagawa; pangalawa, ginagawa nila ang dapat gawin; at, pangatlo, may disiplina ang mga motorista, pampubliko o pribado.

Sa mga u-turn slots, inookupahan ng mga mag-u-u-turn halos lahat na ng lanes. Iyong iba, mula kanan ay humahambalang papuntang u-turn slot, bagay na humaharang sa mga makakadaan sanang ibang sasakyan.

Ang enforcers naman, kung mayroon man, ay nakatu¬nganga lang. Kapag may pinigil dahil sa number coding, doon sila nagkukumpulan, para bang ang tanging paglabag lamang na binabantayan ay iyon lang – number coding.

Pili rin ang oras ng mga enforcers at mga tauhan ng PNP Highway Patrol, hindi sila tuluy-tuloy sa pamamahala ng trapiko, at kung ma-traffic na, saka lamang sila poporma na wala nang epekto dahil malala na.

Tingnan Natin: parang ayaw na nilang magtrabaho kapag umuulan, mainit ang sikat ng araw o kaya’y gabi na. Dapat ba iyon?

Ito namang mga motorista, alam naman dapat ang dapat at hindi dapat, wala ring pakundangan sa pagmamaneho, wala sa tamang lane, o kaya’y nagpupumilit sa hindi dapat lugaran.

Peste rin ang mga riders  na parang mga kutong kung saan-saan lumulusot, at kapag nakasagi naman, akala mo ina¬aping nagsasabing walang pambayad sa sinabitan.

Tingnan Natin: ito rin mismong North Luzon Expressway (NLEx) Toll Balintawak Plaza, sala-salabat ang patungong toll gates, lalo na ang palabas ng Metro Manila patungong Norte.

Ang masaklap pa, magkapareho ang kulay ng ilaw ng RFID (Radio-frequency identification) at Easy Trip lanes na hindi naman uubra kung hindi mismong RFID o Easy Trip ang gamit.

Ang Tanong: may isip ba ang mga namamahala ng NLEx? Parang wala at kung mayroon man, hindi ginagamit. Maitutuwid kaya nila ang kapalpakan? Tingnan Natin! (Tingnan Natin / Vic V. Vizcocho, Jr.)

Please follow and like us:
Read More