CAVITE – Patay ang isang rider nang sumemplang ang minamanehong motorsiklo habang nagulungan naman ang isa pang rider ng isang truck na may backhoe, sa magkahiwalay na lugar sa lalawigan noong Miyerkoles ng gabi.

Ang biktimang si alyas “Arnulfo”, 57, ng Brgy. San Esteban, Dasmariñas City, ay idineklarang dead on arrival sa Pagamutan ng Dasmarinas City, habang namatay sa pinangyarihan ng insidente si alyas “Gary”.

Ayon sa ulat, dakong alas-8:15 ng gabi, habang minamaneho ni Arnulfo ang kanyang motorsiklong Yamaha Fazzio at binabagtas ang Phase 2 ng Town and County sa Brgy. Burol 1, Dasmariñas City, nang hindi nito napansin ang humps naging dahilan upang ito ay mawalan ng kontrol sa manibela hanggang sa nahulog siya mula sa motorsiklo at tumatama ang ulo sa semento.

Minamaneho naman ni Gary ang kanyang kulay black and red na motorsiklong Rusi at binabagtas ang kahabaan ang Tagaytay-Nasugbu Road sa Brgy. Amuyong, Alfonso, Cavite patungo sa east direction at umukupa sa inner lane.

Ngunit dumulas ang motorsiklo ni Gary at nalaglag ito saka gumulong ang katawan patungo sa ilalim ng parating na truck naging dahilan ng agad nitong kamatayan dakong alas-9:30 ng gabi.

(SIGFRED ADSUARA)