CAVITE – Timbog ang dalawa katao sa pagtutulak ng ilegal na droga na ang source anila ng ibinibenta nilang marijuana ay mula sa online, sa ikinasang buy-bust operation ng mga awtoridad sa bayan ng Kawit sa lalawigang ito, noong Miyerkoles ng gabi.

Kinilala ang mga arestado na sina Ejay Ong y Bonagua, 19, at Leonidez Martinez y Olaes, 25, kapwa ng Brgy. Tramo, Bantayan, Kawit, Cavite.

Ayon sa ulat ni Police Staff Sergeant Christian A. David ng Kawit Municipal Police Station, dakong alas-9:30 ng gabi, nagsagawa ng buy-bust operation ang mga operatiba ng Station Drug Enforcement Team ng Kawit MPS, sa Brgy. Tramo, Bantayan, Kawit, Cavite na nagresulta sa pagkakaaresto sa mga suspek.

Nakumpiska sa mga suspek ang pitong sachet ng hinihinalang marijuana na tinatayang may timbang na 83 gramo at P9,960 ang street value.

Aminado ang mga suspek na nakukuha nila ang ibinebentang droga sa pamamagitan ng online mula sa source na itinanggi nilang pangalanan, at ibinebenta nila ito sa kanilang mga kaibigan at customer.

(SIGFRED ADSUARA)