CAVITE – Timbog ang tatlong hinihinalang tulak nang salakayin ang isang drug den sa isinagawang buy-bust operation na nagresulta sa pagkakasamsam sa tinatayang P82,800 halaga ng umano’y shabu sa Bacoor City noong Lunes ng gabi.

Kinilala ang mga arestado na sina Prudencio Fabian y Guanzon, alyas “Bachi”, 52; Reynaldo Adonis Aurelia, alyas “Rey”, 59, at Benizer Centis y Fabila, alyas “Benjie”, 43-anyos.

Si Fabian umano ang maintainer ng nasabing drug den habang mga customer sina Aurelia at Fabila.

Ayon sa ulat, dakong alas-8:15 ng gabi, nagsagawa ng buy-bust operation ang Provincial Drug Enforcement Agency, Cavite Provincial Office at Bacoor City Police sa Brgy. Mabolo III, Bacoor City na nagresulta sa pagkakalansag sa nasabing drug den at nadakip ang mga suspek.

Nakumpiska ang 12 gramo ng hinihinalang shabu na may street value na P82,800, mula sa mga suspek na sasampahan ng kasong paglabag sa

RA 9165 (Comprehensive Dangerous Drugs Act of 2002).

(SIGFRED ADSUARA)