CAVITE – Pinagsasaksak ang isang 72-anyos na senior citizen nang nanlaban sa kapwa nito senior nang tangkain siyang pagnakawan sa loob ng isang kilalang restaurant sa isang mall sa Imus City noong Huwebes ng hapon.

Nilalapatan ng lunas sa Pilar Hospital ang biktimang si alyas “Arnolfo”, 72, ng Anabu 1-C, Imus City dahil sa mga saksak sa katawan.

Arestado naman ang suspek na kinilalang si Manuel Jovillano y Pasupil, 63, ng Lucena City.

Ayon sa ulat, dakong alas-4:05 ng hapon nang mangyari ang insidente sa loob ng isang restaurant sa isang mall sa Tanza Luma, Imus City, nang pumasok sa restroom ang biktima upang umihi.

Sinundan ito ng suspek at tinangkang pagnakawan ang biktima subalit nagpumiglas at tinangkang lumaban.

Subalit naglabas ng kutsilyo ang suspek at sinaksak ang biktima.

Nabulabog ang mga security guard at crew sa mga kalabog sa loob ng restroom kaya sumugod ang mga ito na nagresulta sa pagkakaaresto sa suspek.

Agad namang isinugod sa ospital ang biktima habang ang suspek ay itinurn-over sa pulisya.

(SIGFRED ADSUARA)