CAVITE – Walong estudyante ang nasugatan nang pumalya ang turnilyo sa sinasakyan nilang octopus ride sa isang karnabal sa bayan ng Naic sa lalawigan noong Huwebes ng gabi.

Nilalapatan ng lunas sa San Lorenzo Ruiz Hospital ang mga biktimang sina Zyrinne Marlan, 20; Mary Rose Mariano, 23; Erica Gravador, 21; Joana Pagaduan, 25; Jomer Pagaduan, 25; Michelle Cailo, 16; Abagail Cailo, 21, at Chinne Cabugayan, 22-anyos.

Ayon sa ulat, masayang nakasakay ang mga biktima sa isang Octopus ride sa Fiesta Carnival sa Brgy. Ibayo Silangan, Naic, Cavite bandang alas-9:30 ng gabi nang umano’y lumuwag ang malaking turnilyo sa nasabing sasakyan na nagresulta sa pagkakasugat ng mga ito.

Agad namang isinugod sa ospital ang mga nasugatan para malapatan ng lunas. (SIGFRED ADSUARA)