LUCENA CITY – Sugatan ang isang truck helper nang saksakin ng kanyang driver na sinita nito dahil sa barumbadong pagmamaneho ng kanilang truck sa lungsod, nitong Lunes ng gabi.

Kinilala ng Lucena City Police ang biktimang si Jeremy Soriano Guado, 26, residente ng Brgy. Macabaclay, Bongabon, Nueva Ecija.

Ayon sa report, mag-aalas-11:00 ng gabi nang magkasagutan ang biktima at ang nakainom na driver ng truck na si alyas “Felix”, 46, na kababayan ng biktima, habang sila ay bumibiyahe sa Lucena City proper para mag-deliver ng mga sibuyas sa Lucena City public market galing sa Nueva Ecija.

Nang huminto ang truck, bumaba ang pahinante subalit sinundan ito ng driver at ilang ulit na sinaksak gamit ang screwdriver.

Isinugod sa ospital ang biktima habang naaresto ng mga awtoridad ang suspek na nahaharap sa kasong frustrated murder.

(NILOU DEL CARMEN)