LUMANTAD na sa tanggapan ng Criminal Investigation and Detection Group (CIDG) ang dalawa umanong saksi na aktuwal na nakakita sa beauty queen na si Catherine Camilon habang ito ay duguan sa loob ng isang sasakyan bago ito tuluyang nawala.

Ayon sa Criminal Investigation and Detection Group (CIDG) nitong Martes, lumantad sa kanila ang dalawang saksi at nagbigay na rin ang mga ito ng affidavit.

Positibo ring kinilala ng dalawang saksi ang pulis na itinuturing na ‘person of interest’ sa pagkawala ni Camilon.

Ayon sa kanilang salaysay, nakita nila ang pulis sa isang subdivision noong gabing nawala si Catherine.

Nasaksihan din daw nila ang duguang biktima na inililipat mula sa sasakyan ng pulis patungo sa isa pang sasakyan.

May dalawa hanggang tatlong kasamahan anila ang pulis na ‘person of interest’ at isa umano ang personal driver nito.

Ayon pa sa dalawang saksi, tinutukan sila ng baril ng mga kasamahan ng pulis at pinagbantaan.

Samantala, batay sa nagpapatuloy na imbestigasyon ng CIDG, kinumpirma nilang may relasyon si Camilon at ang pulis na ‘person of interest’.

Ang anggulong ito rin ang tinututukan ng mga awtoridad sa posibleng dahilan ng pagkawala ng beauty queen.

(NILOU DEL CARMEN)