CAVITE – Huli sa akto ang isang 54-anyos na barker nang tangkain nitong pasukin ang isang kilalang drug store matapos dumaan sa bubong sa pamamagitan ng pagbaklas nito sa Imus City noong Miyerkoles ng umaga.

Nasa kustodiya na ng Imus Component City Police Station ang suspek na si alyas “Renato” ng Brgy. Luma 1, Imus City, Cavite.

Ayon sa ulat, tinangkang pasukin ng suspek ang isang drug store sa Brgy. Tanzang Luma 1, Imus City, Cavite sa pamamagitan ng pag-akyat sa bubong nito.

Narinig naman ng naka-duty na security guard na si “Gadais” ang kalabog sa taas ng bubong kaya humingi ito ng tulong sa nagpapatrulyang police mobile na nagresulta sa pagkakaaresto sa suspek sa bubong ng tindahan bandang alas-6:30 ng umaga.

Nakumpiska sa suspek ang mga ginamit sa pagbaklas tulad ng plier, screw driver, dalawang pirasong cutter, adjustable wrench, gunting, isang G-Shock na relo, flashlight na pagmamay-ari ng guwardiya, P300 cash at 13 piraso na bala ng .38 kalibreng baril. (SIGFRED ADSUARA)